Maak 5

Jisho fwoo muŋkwini ə mbɛɛ go

Jisho bə bəne biih bə kintu le nɔ yo kwo wikwi, wɛɛ wi bəne bə Gelashiŋ mə. 2 Ye i màa i fūlə ə kikpɔŋkɔ kie mə, bəə mbɛɛ ju bənə cha mi nnu fiana yili màa i fɨ̄hɨŋ wu, i fù ə məntiɛ mməŋ bə́ màa bə́ dīih bəne mə. 3 Mbɛɛ yo màa i nɔ̄ŋ ə məntiɛ mie mə. Mbɛɛ mà kə duŋ nə nnu duŋ ə i kwaa wu maa bə fiaŋ kə. 4 Chá kiŋaaŋkə, bə́ bwò bə́ yìi wu ə biwili mə, kwaa kwáŋ ŋiih bə fíaŋ, i kaalə fíaŋ yé, hlaki biwili bie. Mbɛɛ mà kə duŋ nə həmə nnu duŋ ə i kwaa wu kə. 5 Mbɛɛ yo màa i bā bənjaa ə məntiɛ mie bəŋ, i bìŋ ə bikɔni go ə butuu bə bushi, i gɛ̀ɛmə, i kwàŋ gbo wiih bə tə́.

6 Ye i mà ŋəŋ lə ə Jisho go i kaani je nyɛɛkə, i lələ bwo bɛŋ núh ə wu fwi, 7 gɛɛmə buh gbaaŋ lə, “Jisho Ŋwa Nchu, Chu nnu i dùŋ yo Kwoo ki Bieŋ Binhliŋ, wə kiɛɛ laha ə mi go lə? N'yu ŋkɔ̄nɔ wə ə yii li Chu bəŋ lə wə kə nəə mi ŋgə kə.” 8 I mà yɔɔ nəni, yulahalə Jisho mà nyieema lə, “Fiana yili nu, fu ə mbɛɛ nu go.” 9 Jisho bii bə wu ləə, “Yii lo lə nyəhə lə?” I chuu lə, “Yii lɨŋŋ lə Kintu, yulahalə kkə duŋ kiŋaaŋkə.” 10 Ye i chuu lə nəni, i hlə kɔnɔ Jisho gbaaŋ lə i kə koŋnə bə́ ə bidi bie mə kə.

11 Ə mà duŋ kikɨŋ kiŋkuntaŋ ki jɔ́ŋ dī həmə kɔnɔ go. 12 Muŋkwini mwe kɔnɔ Jisho lə, “Faŋ be ə duŋ ə jɔ́ŋ yé mə, kkə lɛɛ ə yí mə.” 13 Jisho bemi. Muŋkwini mwe hlə fu ə mbɛɛ yo go, gəŋ lɛɛ ə jɔ́ŋ yé mə. Kikɨŋ kie mà duŋ ye jɔ́ŋ bənchuku bəfwe lə. Yí bulə bwɔ ə yi ye mə, miili bwɔ ə nɔ yo mə, ki kpe. 14 Bəne bbəŋ bə́ màa bə́ fwōŋ bie jɔ́ŋ yé, bwaalə, gəŋ yɔɔ hlɨŋ nih ə kibalaki kie mə maa bə ŋəŋkwili ŋə həmə ŋie. Bəne wo, bə́ fu bəmbwo ŋəŋ fieŋ ffɨŋ fi duŋna fie. 15 Bə́ bwo dɔhɔ kkɨŋ Jisho mà duŋ kie, ŋəŋ mbɛɛ nnu kintu ki muŋkwini mà fɨhɨŋ yo wu, shiila həmə, i leela bindu, bufe bwii kwəla. Bə́ lɔ gbaaŋ. 16 Bəne bbəŋ bə́ mà ŋəŋ bie fieŋ ffɨŋ fi mà kah fie, hlə yee bə́ yɔ̄ɔ bə bə́ ye fi mà kah'lə bə mbɛɛ yo, maa kikɨŋ ki jɔ́ŋ kie. 17 Ye bə́ wo lə nəni, bə́ chɔɔ bəŋkɔnɔ Jisho lə i no ə bidi bibə mə.

18 Ə chulə Jisho yee i lɛ̄ɛ ə kikpɔŋkɔ kie mə, mbɛɛ nnu muŋkwini mà fu yo ə wu go hlə yee i kɔ̄nɔ Jisho lə yee bə́ gə̄ŋ bəə wu. 19 Jisho nɨhŋ, yɔɔ bə wu lə, “Gəŋ ə duŋ ə wə chəŋ, wə gəŋ yɔɔ bə bəne bwo fieŋ ffɨŋ Baba fəə bə wə, bə ye i kwo hlɨŋ bə wə.” 20 Nəni, mbɛɛ yo hlə no, gəŋ yee i jāa ə kitɨŋ kie mə kinhliŋ kkɨŋ bə́ màa bə́ chēe lə Bibalaki bi Yuufi, i yɔ̀ɔ fieŋ ffɨŋ Jisho fəə bə wu. Bəne wò, gəə ŋɨ̀ŋ bə́.

Ki ŋwa Jaylu maa kpɛ ju nnu i mà tuu ə kindu ki Jisho go ŋwunə

(Matio 9:18-26; Lukaa 8:40-56)

21 Lə Jisho le chuu ə kikpɔŋkɔ kie mə gəŋ ə wi ju yo baha ə nɔ go, kimɔ ki bəne baa bumə həmə. 22 Ŋwuŋ ŋkuntaŋ ju ə chəŋ cheenə Chu mə ja bwo həmə, yii liih duŋ lə Jaylu. Ye i ŋəŋ lə ə Jisho go, i gəŋ gbe wu fwi, 23 shi kɔnɔ wu yɔɔ lə, “Ŋiaa wɛ kpɛ yu kpē. Butee, bwo tuu kwáŋ ŋo ə wu go fo mə lə ŋwunə, ə i nakə kpee kə.” 24 Jisho hlə ja bəə wu yee bə́ gə̄ŋ, kimɔ ki bəne bə̄lə Jisho gbɛɛɛ bə́ yə̄ə gbo ə wu go.

25 Kpɛ ju mà duŋ ə kimɔ kie mə nnu i mà gɔŋna jəŋ kibweenə bigoŋ yuufi ə nchɔ bifwe. 26 I mà fɨma gbaaŋ ə kidɨŋ ki bəne bə nche kwáŋ kiŋaaŋkə, i bihi bieŋ biih binhliŋ bbɨŋ i mà kənə, bieŋ bēe kwaa bu beenə bi gə̀ŋ fwi fwi. 27 Ye i mà wolə ki Jisho, i hlə bwo ə kimɔ kie mə bwo tuu ə biwu bi kindu ki Jisho go yaŋ dɨŋ, 28 yulahalə i mà yɔɔla ə tɔŋ liih go lə, “Ə nlə nchɔɔ ntuu kwaa ə kindu kiih go bu tuunə, kəə ŋ'wuna.” 29 Ye i mà tuulə nəni, kibweenə kiih kie kaŋnə cha mi. Kpɛ yo wo dəŋ bə gbo wiih lə i ŋwuna.

30 Ə chulə Jisho wo lə muŋga fwoo ə wu go, i fiimə cha mi, bii bə bəne ləə, “Ə tuu nyəhə ə kindu kɨŋŋ go lə?” 31 Bəne biih bə kintu chuu bə wu lə, “Wə kə ŋəŋ nə lə kimɔ ki bəne nyɨhaŋ ə wə go, wə baa wə bīi mbɛɛ nnu i tuu yo ə wə go lə?” 32 Jisho ba yee i kēe həmə bəŋəŋ mbɛɛ nnu i tuula yo ə wu go. 33 Nəni, ye kpɛ yo mà kəla lə fieŋ ffɨŋ fi mà duŋ fie bə wu, yee i bwō, i lɔ̄, i nə̄nə, bwo bɛŋ núh ə Jisho fwi yɔɔ wu kichɛɛŋ kiih kiɛkiɛ. 34 Jisho yɔɔ bə wu lə, “Ŋiaŋ kpɛ, tɔŋ lo llɨŋ wə yii le ə mi mə fəə wə ŋwuna. Yee wə gə̂ŋ kinwaa. Jəŋ wa ye kaa.”

35 Ye Jisho màa i kaani lə i yɔ̄ɔ bə kpɛ yo nəni, bəne bədi bwii bwo həmə, bə́ fu ə Jaylu chəŋ, che kwoo ə chəŋ cheenə Chu mə, yɔɔ bə wu lə, “Ŋwa yo chɨna. Wə baa wə nə̄ Mbɛɛ Keehnə nu ŋgə yulaha lə?” 36 Ye bə́ yɔɔlə nəni, Jisho wo, kwaalə i fə ye i kə woo lə kə, yɔɔ bə Jaylu lə, “Wə kə lɔɔ kə, yii kwaa tɔŋ ə mi mə.” 37 Yee bə́ gə̄ŋ bu gəŋnə, Jisho nakə bemi lə mbɛɛ ju bələ wu kahiŋ Pita bə Jɛŋ maa Jɔɔŋ dɨŋ Jɛŋ. 38 Lə bə́ gəŋ bwii ə Jaylu chəŋ, Jisho ŋəŋ bəne dē bə́ bɨ̄nə həmə, kpe ye shī choo bushinə. 39 I lɛɛ mu chəŋ, bii ləə, “Bə dē, bə bɨ̄nə kwe nəni yulaha lə? Ŋiaŋ yo kə kpee kə, i yu nɔ̄ŋ ə duŋ kinɨŋ.” 40 Yee bə́ shāa wu bu shaanə. I fwoo bəne bie bənhliŋ bweenə, i jə kwaa ə duŋ che ŋiaŋ bə mah ŋiaŋ yo maa bəne biih bə kintu bə bətɔh bie, bəə bə́ lɛɛ gəŋ dɔhɔ kkɨŋ ŋiaŋ yo mà nɔŋ kie. 41 I kənə ŋiaŋ yo ə bweenə go yɔɔ ə díe yibə mə lə, “Talita kumi!” Fi duŋ lə, “Ŋiaŋ kpɛ, n'yɔ̄ɔ bə wə, ja fa.” 42 Cha mi nəni, i bu ja fa yee i jāa. Ŋiaŋ kpɛ yo mà duŋ bigoŋ yuufi ə nchɔ bifwe. Lə bə́ ŋəŋ nəni gəə ŋɨŋ bə́. 43 Jisho looŋkə bə́ ntakə lə bə́ kə fəə lə mbɛɛ kələ fieŋ ffɨŋ fi dùŋ fie kə. I hlə yɔɔ lə bə́ nə ŋiaŋ yo fieŋ i di.