Maak 6

Bə́ nɨhŋ Jisho ə kwili liih mə

Jisho ja həmə, bəə bəne biih bə kintu gəŋ ə kitɨŋ kiih mə. 2 Ə bwo duŋ butuu bubə bu bunte, i gəŋ ə chəŋ cheenə Chu mə chɔɔ yee i lāanə bəne. Bəne kiŋaaŋkə wò kinlaanə kie gəə ŋɨ̀ŋ bə́. Bə́ hlə gbe bənaamə bə́ yɔ̄ɔ ləə, “Mbɛɛ nu laanə bɨhŋ bieŋ fəhəŋ lə? I jə buhŋ bufe fəhəŋ lə? Mə kah ləhəŋ hlə yee i fə̄ bieŋ bi ŋɨŋ gəə bɨhŋ lə? 3 Nu kə duŋ nə ŋkpaŋ bite, ŋwa Meeli yo lə? Bəmaani kə duŋ nə Jɛŋ, bəə Joshi maa Judash bə Shaamuŋ lə? Jɛ́ɛmi yiih hləŋ fəŋ bə be kə lə?” Ye bə́ nāamə lə nəni bə́ hlə nɨhŋ wu. 4 Nəni Jisho yɔɔ bə bə́ lə, “Bə́ bwò bə́ kohi mbɛɛ hlɨŋ Chu ə bidɔhɔ binhliŋ mə. Ə kwaa ə kitɨŋ kiih mə bə ə kichəŋ kiih mə maa ə wu chəŋ nnu bə́ dùŋ kə kohi wu kə.” 5 Ye bə́ nɨhŋ lə Jisho nəni, fi hlə kah wu bəmbaa fə bieŋ bi ŋɨŋ gəə həmə kiŋaaŋkə, kahiŋ kwaa lə i mà tuula ə bəne bə jə́ŋ bə chɛɛ go bə́ ŋwunə. 6 Gbo kpe wu yulahalə bə́ mà kə yii lə tɔ́ŋ ə wu mə.

Jisho faŋ bəne biih bə kintu bə yuufi ə nchɔ bəfwe

(Matio 10:5-15; Lukaa 9:1-6)

Jisho hlə no həmə yee i jāa ə ŋəŋkwili ŋie mə i kèeh bəne. 7 I bwo chee jə bəne biih bə kintu bə yuufi ə nchɔ bəfwe bie, faŋ bə́ bweenə bəfwe bəfwe, nə bə́ muŋgeni munfwoonə bəfiana bəyili ə bəne go. 8 Ye i màa i fāŋ lə bə́, i yɔɔ lə, “Bə kə jəə fieŋ kə kahiŋ tələ. Bə kə jəə biləə kə. Bə kə jəə kibwa ləkə kpo ə bicha bieeŋ mə kə.” 9 Kwaalə bə́ lee bikpa, bə kə dɔhiŋ bindu bifwe kə. 10 I baa yɔɔ bə bə́ lə, “Bwɔɔ nnu bə gəŋ ə kitɨŋ kwuŋ, chəŋ nni bə lɛɛ ye yi mə, yee bə dûŋ kwaa mu gəŋ bwii bwɔɔ nnu bə lə no həmə. 11 Ə kwili le lə nɨhŋ kə tɨŋ nə jə bəŋ, ləkə wo fieŋ ffɨŋ bə yɔ̀ɔ, bə no həmə, bwɔɔ nnu bə no həmə bə kwili luu le ə wuh ŋieeŋ go, ə yee ə dūŋ kinyii ki fieŋ ffɨŋ bə́ mɔŋna.”^ª 12 Nəni, bə́ hlə ja gəŋ yee bə́ jāa bə́ dòntə lə bəne fii tɔ́ŋ ŋəbə. 13 Bə́ baa bə́ fwòo dəŋ muŋkwini kiŋaaŋkə ə bəne go, bə́ lɔ̀ɔ bəne bə jə́ŋ kiŋaaŋkə bə mɛŋ bə́ ŋwùhuŋ bə́.

Ye bə́ mà jii Jɔɔŋ N'yiinjɔ

(Matio 14:1-12; Lukaa 9:7-9)

14 Ŋkɨŋ Hɛlɔ wo hlɨŋ nih ki Jisho, ye bəne màa bə́ wō lə yii liih ə bidɔhɔ binhliŋ mə, bəne bədi yee bə́ yɔ̄ɔ lə, “Jisho nu lə Jɔɔŋ N'yiinjɔ nnu i fwoo ə kpe mə. Fiee fieŋ ffɨŋ fi fə fie lə yee i kə̄nə múŋga munfənə bieŋ bintaabə bɨhŋ nini nəni.” 15 Bədi yɔ̄ɔ lə, “Ə Elaja nnu i fiima bwo chuu.” Bədi lə, “I duŋ mbɛɛ hlɨŋ Chu ju dəŋ ye bə́ fwii fwii bie lə.” 16 Bwɔɔ nnu Hɛlɔ mà wo bieŋ bɨhŋ nəni, i yɔɔ ŋkwo wi lə, “Ə Jɔɔŋ N'yiinjɔ nnu mmà ŋkɨŋ yo kwoo kiih nnu i fwoo ə kpe mə.”

17 Ə mà duŋ Hɛlɔ hə faŋna bəne bə́ gəŋ kwo Jɔɔŋ, kwaa gəŋ fwaŋ wu ə chəŋ munfwa mə yu Hɛlɔdia kpɛɛ Filip dɨŋ Hɛlɔ, Hɛlɔ mà jəə Hɛlɔdia chu dùŋ kpɛɛ. 18 Jɔɔŋ yee i nɨ̄hŋ, i yɔ̄ɔ bə wu lə, “Ŋkɨnə kə bemi lə mbɛɛ jə kpɛɛ maani ye kpɛɛ lə kə.” 19 Ye Jɔɔŋ màa i yɔ̄ɔ lə nəni, Hɛlɔdia chi wu hədɨŋ yee i kīɛɛ jé yyɨŋ mə lə jii wu, kwaalə i nakə bənə je kə, 20 yulahalə Hɛlɔ màa i lɔ̄ Jɔɔŋ lə Jɔɔŋ dùŋ mbɛɛ ntiiŋ, i dùŋ dəŋ mbɛɛ Chu. Hɛlɔ hlə yee i fwɔ̄ŋ lə bə́ kə jii lə wu kə. Bwɔɔ nnu Hɛlɔ màa i bā bəŋ'wo fieŋ ffɨŋ Jɔɔŋ màa i yɔ̄ɔ, tɔŋ liih fɨhɨŋ wu gbaaŋ, kwaalə i yee i wō kwaa ə duŋ njənjə bəŋ'wələ fieŋ ffɨŋ Jɔɔŋ yɔ̀ɔ. 21 Je bwo wɛɛmə bə Hɛlɔdia ə duŋ butuu budi bbuŋ Hɛlɔ mà fə chɔnɔ bə bəche kitɨŋ maa bikuu bi bicha maa bəne bəŋkuntaŋ bə Galilii bəŋoo butuu bbuŋ bə́ mà bwee wu. 22 Ŋwa Hɛlɔdia kpɛ lɛɛ bɨŋ ŋkɔŋ, fi nwaa Hɛlɔ bə bəne biih bə chɔnɔ bie. I hlə yɔɔ bə ŋiaŋ kpɛ yo lə, “Bii mi maa ə duŋ fieŋ filaha ffɨŋ wə lèki, njoŋ wə fi.” 23 I baa kaŋ yɔɔ lə, “Ə wə bii filaha bə mi, ə lə duŋ kiŋkə ki kitɨŋ kɨŋŋ, ə nnə wə.” 24 Ŋiaŋ kpɛ yo hlə fu gəŋ bii bə mahni ləə, “N'yɔɔ lə bə́ joŋ mi laha lə?” Mahni chuu lə, “Gəŋ yɔɔ lə bə́ nə wə kwoo ki Jɔɔŋ N'yiinjɔ.” 25 I hlə yaalə chu dɨŋ həmə həmə, yɔɔ bə Ŋkɨŋ Hɛlɔ lə, “Ŋkiɛɛ lə wə nə mi kwoo ki Jɔɔŋ N'yiinjɔ ə kinfini mə fidiɛɛ.” 26 Ŋkɨŋ yo wo nəni, gbo kpe wu gbaaŋ. Kwaalə yu muŋkaŋ mmuŋ i mà kaŋ mwe ə chɔnɔ kie mə ə bəne fwi, i nakə baa lə bənə jə bəmbaa gaanə yo nni mə hə yɔɔ ye bə ŋiaŋ kpɛ yo kə. 27 Cha mi i bu faŋ ŋwuŋ kicha lə i gəŋ bwo bə kwoo ki Jɔɔŋ. I hlə gəŋ ə chəŋ munfwa ye mə, kɨŋ jə kwoo ki Jɔɔŋ, 28 yii ə kinfini mə, bwo nə ki bə ŋiaŋ kpɛ yo. I jə, fu həmə gəŋ nə bə mahni. 29 Lə bəne bə kintu bə Jɔɔŋ wo, bə́ gəŋ jə kiŋwuuni ki Jɔɔŋ kie gəŋ diih.

Jisho lee bəne bənchuku bətiŋ

(Matio 14:13-21; Lukaa 9:10-17; Jɔɔŋ 6:1-14)

30 Bəne bə faŋnə bə Jisho ja fiimə chu dɨŋ gəŋ chili wu, bə́ yɔɔ wu bieŋ kiɛkiɛ bbɨŋ bə́ fəə maa bə bbɨŋ bə́ keeh'la bəne. 31 I hlə duŋ duŋ bwo yɔɔ bə bə́ lə, “Bə bwo kwaa bəŋ bəŋ kkə gəŋ ə dɔhɔ kkɨŋ bəne kə duŋ nə həmə kə, kkə ŋɔɔni chɛɛ.” I mà yɔɔ nəni yulahalə bəne kiŋaaŋkə màa bə́ bwō ə dɔhɔ kkɨŋ bə́ màa bə dūŋ kie, bwɔɔ nnu bədi nò, bədi bwò. Bə́ nakə bənə dəŋ bwɔɔ nnu duŋ ə bə́ di fieŋ kə. 32 Nəni bə́ hlə lɛɛ ə kikpɔŋkɔ mə wa gbo, gəŋ yee bə́ dūŋ ə dɔhɔ kkɨŋ bəne duŋ hləŋ. 33 Kwaalə, bəne kiŋaaŋkə bu ŋəŋ ye bə́ gə̄ŋ, bə́ kələ, hlə ja ə bibalaki mə binhliŋ yee bə́ lə̄lə bəŋgəŋ kaanə bə́ fwi. Bə́ bwo gəŋ hlaa bwii həmə, Jisho bə bəne biih bə kintu kaani. 34 Ye i mà fu lə ə kikpɔŋkɔ kie mə biŋ fu həkpa, i ŋəŋ kimɔ ki bəne nəni gbɛɛɛ, hlɨŋ kwo wu bə bə́, yulahalə bə́ mà duŋ ye shɔ́ŋ yyɨŋ yí dùŋ kə kənə mbɛɛ fwoŋnə yí. I hlə chɔɔ yee i lāanə bə́, i laanə bə́ bieŋ kiŋaaŋkə. 35 Ə chulə kitaŋ yee ki gə̄ŋ chɨŋ, bəne biih bə kintu baŋ gəŋ yɔɔ bə wu lə, “Fəŋ duŋ nji ə duŋ bwɔɔ gəŋna dəŋ, 36 yɔɔ bəne bie, bə́ gəŋ ə kitɨŋ kie mə bə kwíli ŋŋəŋ ŋə dùŋ baha baha mə, bə́ taŋ biləə bibə.” 37 Jisho chuu ŋkwo wi lə, “Ə nə bəŋ bə́ fieŋ fidinə.” Bə́ bii bə wu ləə, “Wə kiɛɛ lə kkə kiɛɛ gi fwe taŋ biləə mu bwo nə bə́ lə?” 38 Jisho bii bə bə́ ləə, “Bə bie bə chée yí bibele miɛhɛŋ lə? Bə gəŋ chiini.” Bə́ gəŋ chiini, bwo yɔɔ lə, “Chée yí bibele yé shiŋ bə fiɔŋ fie.” 39 Jisho hlə yɔɔ lə bəne biih bə kintu yɔɔ lə bəne bie shii ə bintu mə, ə nchɛ bəŋ. 40 Nəni, bəne bie shii həkwe ə bintu go gbi gbi bidi mbwɛɛnshiŋ mbwɛɛnshiŋ. 41 Jisho jə chée yí bibele yé shiŋ bə fiɔŋ yé fie, kee buh, nə kimbaafɛɛ bə Chu, hlə gaa nə bə bəne biih bə kintu, lə bə́ nə bə bəne bie. I ga dəŋ fiɔŋ yé fie bə bə́ bənhliŋ. 42 Bəne bənhliŋ di fiili. 43 Bəne bə Jisho bə kintu buhuŋ biŋkə bi bibele bie bə fiɔŋ yé fie, bi yii bijee yuufi ə nchɔ bifwe. 44 Bəne bbəŋ bə́ mà di biləə bie mà duŋ bənəə bənəə bənchuku bətiŋ.

Jisho jaa ə ŋgwiŋ bəŋ

(Matio 14:22-33; Jɔɔŋ 6:15-21)

45 Jisho hlə yɔɔ lə bəne biih bə kintu lɛɛ ə kikpɔŋkɔ mə cha mi hlaa kah fwi bəŋgəŋ ə Beshayida, lə i she chii kimɔ kie yee ki kwə̄lə. 46 Ə chulə i shee chii bə́ lə, i hlə ja biŋ gəŋ ə kɔnɔ go bəŋgəŋ chee Chu. 47 Kitaŋ bwo chɨŋ, ə duŋ kikpɔŋkɔ kie duŋ ə nɔ mə kintekinte, Jisho kaani mə kpa wuu mboŋ. 48 I ŋəŋ ye bəne biih bə kintu jū bənua kikpɔŋkɔ kie, yulahalə fwee màa ki bwō ki fwi ki fɛɛ ki. Lə yee butuu kpē kwe, i ja yee i bwō ə bə́ go, i jāa ə ŋgwiŋ bəŋ. I mà bwo i kiɛɛ lə i kəə kah baha ə bə́ go. 49 Lə bə́ ŋəŋ ye i jāa ə ŋgwiŋ bəŋ, bə hle lə ə kiyii. Bə́ gɛɛmə buh gbaaŋ, 50 yulahalə bə́ bənhliŋ mà ŋəŋna ə wu go nɨŋ kwo bə́. Cha mi, Jisho hlə yɔɔ bə bə́ lə, “Bə́ kwaa tɔ́ŋ ŋieeŋ, ə mi. Bə kə lɔɔ kə.” 51 Ye i yɔɔlə nəni, i hlə lɛɛ shii ə kikpɔŋkɔ kie mə bə bə́, fwee kie hlə də. Bə́ kee nəni, gəə ŋɨŋ bə́ kakala, 52 yulahalə bə́ mà kə kələ fieŋ ffɨŋ chée yí bibele yé nyīi fie ki Jisho kə. Ə duŋ yu bə́ mà kə wɛɛ tɔ́ŋ ŋəbə kə.

Jisho ŋwuhuŋ bəne bə jə́ŋ ə Genishalet

(Matio 14:34-36)

53 Lə bə́ le libi le fu ə bidi bi Genishalet mə, bə́ hlu chi kikpɔŋkɔ kie ŋgwiŋ mie həkpɛɛli. 54 Ye bə́ fulə ə kikpɔŋkɔ kie mə, bəne bu kələ Jisho cha mi, 55 yee bə́ lə̄lə bə́ gə̄ŋ ə wɛ́ɛ ŋə kitɨŋ kie mə kinhliŋ, bə́ tù bəne bə jə́ŋ, bə́ bwò bə bə́ ə bintaŋ bi jə́ŋ bəŋ ə bidɔhɔ binhliŋ bbɨŋ bə́ mà wo lə Jisho yo həmə. 56 Maa dɔhɔ kiɛhɛŋ kkɨŋ Jisho màa i gə̄ŋ, maa ə hle ə duŋ ə kwíli ŋiɛhɛŋ mə, ləkə ə bibalaki mə, ləkə ə bitɨŋ mə, ləkə ə nji, bəne chì kwaa bəne bə jə́ŋ ə dɔhɔ kkɨŋ bəne maa bə́ ba kie bəmbumə. Bwɔɔ nnu Jisho lə bwo yee i kāh, ə yee bə́ kɔ̄nɔ lə i cheekwaŋ lə bə́ tuu kwaa ə biwu bi kindu kiih go. Ye mbɛɛ mənhliŋ màa i tūu lə ə wu go, ə li ye mbɛɛ yo ŋwūnə li.