Jɔɔŋ 6

Jisho lee bəne bənchuku bətiŋ

(Matio 14:13-21; Maak 6:30-44; Lukaa 9:10-17)

Bwɔɔ nnu dɨŋ, Jisho ja gəŋ le Nɔ nnu Galilii kwo wikwi. Nɔ nu duŋ nnu bə́ chèe dəŋ lə Tibelia. 2 Kimɔ ki bəne wūlu wu dɨŋ yulahalə bə́ mà ŋəŋna nyíŋ yiih yyɨŋ i màa i fə̄ ə bəne bə jə́ŋ go ye i mà ŋwuhuŋ lə bə́. 3 Jisho bə bəne biih bə kintu ja gəŋ shii ə kɔnɔ go. 4 Ə bwɔɔ yo bəŋ mà duŋ Chɔnɔ ki Bəjuu ki Ŋkabəŋ duŋ baha baha. 5 Jisho ja lɛɛ díi, ŋəŋ ye kimɔ ki bəne bwō ə wu go, i hlə bii bə Filip ləə, “Bə́ lə fə ləhəŋ ə bə́ hlə taŋ biləə bbɨŋ bəne bəhŋ lə di lə?” 6 I mà bii nəni, i mɔ̄ŋ kwaa Filip yulahalə wu kibɛɛ mà kəla fieŋ ffɨŋ mə lə fə. 7 Filip chuu bə wu lə, “Kwaalə kpo wwuŋ duŋ ə bə́ hluŋ mbɛɛ nimi ə joo bəŋ gi fwe kə wunə dəŋ dududu bəntaŋ biləə bbɨŋ ŋwuŋ mənhliŋ ə bə́ mə lə bənə chɛɛ chɛɛ kə.”^ª 8 Mbɛɛ kintu wi ju nnu yii liih mà duŋ lə Andulu nnu i mà duŋ dɨŋ Shaamuŋ Pita hlə yɔɔ bə wu lə, 9 “Ŋiaŋ nyo ju yo fəŋ bə chée yí bibele shiŋ bə fiɔŋ fie, kwaalə fɨhŋ duŋ ə fi fə laha bə dɨŋ bəhŋ bəne kiŋaaŋkə nəni lə?” 10 Jisho yɔɔ lə, “Bə yɔɔ bəne bie bə́ shii həkwe.” Ə mà duŋ biyaa duŋ həmə gbɔɔɔ, bə́ hlə yɔɔ lə bə́ shii həkwe, bənəə kwaa mà duŋ ye bənchuku bətiŋ (5,000) lə. 11 Jisho hlə jə chée yí bibele yé nə kimbaafɛɛ bə Chu, hlə gah bə bəne bbəŋ bə́ mà shii bie. I fə dəŋ lə yəəŋ bə fiɔŋ yé. Mbɛɛ mənhliŋ mà bəna ba ye i mà kiɛɛ lə. 12 Bə́ di fiili, i yɔɔ bə bəne biih bə kintu lə, “Bə́ do buhuŋ biŋkə bie lə kidi kə laa nya kə.” 13 Nəni, bə́ hlə do buhuŋ biŋkə bi bibele bbɨŋ bi mà she bie, bi yii bijee yuufi ə nchɔ bifwe.

14 Lə bəne bie ŋəŋ nyiŋ yi nni i fəə ni, hlə yɔɔ lə, “Chɛɛŋ mbɛɛ nu duŋ ba Mbɛɛ Hlɨŋ Chu nnu i mà duŋ yo bəmbwo ə mbiŋ nu mə.” 15 Lə Jisho ŋəŋ lə bəne bie, bie bə́ kīɛɛ lə bə́ bwo kwo wu ə muŋga mə nɔhiŋ wu Ŋkɨŋ bə́, i hlə wa gbo fiimə biŋ ə kɔnɔ go yee i dūŋ mə wuu mbwoŋ.

Jisho jaa ə ŋgwiŋ bəŋ

(Matio 14:22-33; Maak 6:45-52)

16 Lə yee ə dūŋ hə kitaŋ, bəne biih bə kintu bwɔ gəŋ ə nɔ mə, 17 lɛɛ ə kikpɔŋkɔ mə chɔɔ bəmbələ gəŋ ə Kapanahuŋ. Ə bwɔɔ yo bəŋ mà duŋ bənchancha mɔɔma Jisho kaani dəŋ kə bwoo ba həmə ye bə́ mà duŋ lə kə. 18 Nɔ yo gbe bə nənə, yulahalə fwee màa ki kāh. 19 Ye bə́ màa bə́ nūalə kikpɔŋkɔ kie bə́ lē, bə́ gəŋ bwii ye bəmaay bətɔh ləkə bənua lə, bə́ bu gənə ŋəŋ kwaa ye Jisho jāa ə ŋgwiŋ bəŋ i chu bwo baha ba ə kikpɔŋkɔ kibə kie go. Tɔ́ŋ kaŋnə bə́ fiɛ. 20 Kwaalə, i yɔɔ bə bə́ lə, “Bə́ kə lɔɔ kə. Ə mi looo.” 21 Lə bə́ wo nəni, bə́ tɨŋ jə wu ə kikpɔŋkɔ kie mə. Lə bə́ jaka, bə́ gənə ŋəŋ kikpɔŋkɔ kie bwiila həkɨŋ ye bə́ màa bə́ gə̄ŋ lə.

22 Butuu fu wu, bəne bbəŋ bə́ mà she bie ə nɔ yo wikwi hlə ŋoo lə ə kikpɔŋkɔ mwe kkɨŋ ki mà she həmə fogbu, Jisho mà kə lɛɛ lə ə kikpɔŋkɔ kie mə bə bəne biih bə kintu kə, bəne biih bə kintu mà noo gəŋ kwaa bəə mbwoŋ. 23 Kwaalə, bikpɔŋkɔ bidi mà fwoo ə Tibelia, bi le bwo baha ə dɔhɔ kkɨŋ Baba Jisho mà jə kie kibele nə kimbaafɛɛ bə Chu bəne di. 24 Ye bəne bie mà nalə kə ŋəŋ nə dəŋ Jisho maa bəne biih bə kintu həmə, bə́ hlə lɛɛ ə bikpɔŋkɔ bie mə, le gəŋ ə Kapanahuŋ bəŋkiɛɛ Jisho.

Jisho duŋ biləə bbɨŋ bi nə̀ kinduŋh

25 Bə́ gəŋ ŋəŋ ə wu go mə nɔ wikwi, bii bə wu ləə, “Labi, wə bwo yaŋ ə duŋ chəə bwɔɔ nwɛhɛŋ lə?” 26 Jisho chuu bə bə́ lə, “N'yɔɔ bəŋ chɛɛŋ chɛɛŋ lə bə kiɛɛ lə mi ə duŋ yu nyíŋ yyɨŋ bə ŋəŋna nfəə kə. Kwaalə ə yulahalə bə ma diee chée yí bibele bə fiili. 27 Bə kə yee bə nɨ̂ŋ kwaa bəŋkənə ə duŋ biləə bbɨŋ bi lə bee kə. Bə nɨŋ ə duŋ bəŋkənə biləə bbɨŋ bi yá ba həmə gəŋ bwii ə kinduŋh ki kə kaa mə. Bɨhŋ duŋ bbɨŋ Ŋwa Mbɛɛ lə nə bə bəŋ. Ə duŋ wu nnu Tili Chu gbaa kidahŋ kiih ə wu go bənyii lə i bema wu.” 28 Bə́ hlə bii bə wu ləə, “Bieŋ bbɨŋ kkə lə yee kkə fə̄ ə fi hlə duŋ lə kkə fəə nimi li Chu duŋ laha lə?” 29 Jisho chuu bə bə́ lə, “Nimi li Chu duŋ llɨŋ li duŋ le lə, yee bə yîi tɔ́ŋ ə duŋ ə mbɛɛ nnu i faŋ yo mi mə.” 30 Nəni bə́ hlə bii bə wu ləə, “Fieŋ ffɨŋ fi nyìi kiŋkuntaŋ ko kkɨŋ wə lə fə ə kkə ŋəŋ hlə yii tɔŋ ə wu mə lə duŋ laha lə? Fieŋ ffɨŋ wə lə fə lə duŋ laha lə? 31 Bəche tah biaa mà diee mana ə nji, ə duŋ ye bə́ mà bieŋ lə, ‘I mà nəə bə́ biləə bbɨŋ bi bwò ə buh bə́ di.’” 32 Ye bə́ yɔɔlə nəni, Jisho hlə chuu bə bə́ lə, “N'yɔɔ bə bəŋ chɛɛŋ chɛɛŋ lə ə kə duŋ nə Mushe nnu i mà nə bəŋ biləə bbɨŋ bi bwō buh kə. Ə Tah nnu i nə̀ biləə bi kichɛɛŋ bbɨŋ bi bwò ə buh. 33 Yee bə́ kə̂lə lə biləə bi Chu duŋ bbɨŋ bi nò ə buh hlili bwo hlə yee bi nə̄ kinduŋh bə bəne ə mbiŋ nu mə.” 34 Bə́ yɔɔ bə wu lə, “Baba, yee wə nə̂ be biləə bɨhŋ bwɔɔ mənhliŋ.”

35 Jisho hlə yɔɔ bə bə́ lə, “Nduŋ biləə bbɨŋ bi nə̀ kinduŋh. Mbɛɛ nnu i bwò ə mi go duŋ ə i baa wo jəbulə kə. Mbɛɛ nnu i duŋ lə i yiila tɔŋ ə mi mə duŋ ə ntɔntɔ wi baa ŋɨŋ kə. 36 Kwaalə ye mmà n'yɔ̄ɔ lə bə bəŋ bə ŋəŋna ə mi go, bə nakə yii lə tɔ́ŋ ə mi mə kə. 37 Bəne bənhliŋ bbəŋ Tah nə̀ mi lə bwo ə mi go. Mbɛɛ nnu i bwò ə mi go duŋ ə n'yá ŋkohiŋ wu kə. 38 Ŋkə nnoo buh bwo yaŋ kwe bənfə ə duŋ fieŋ ffɨŋ ŋkìɛɛ kə. Mbwo bənfə ə duŋ fieŋ ffɨŋ mbɛɛ nnu i faŋ yo mi kìɛɛ. 39 Fieŋ ffɨŋ mbɛɛ nnu i faŋ yo mi kìɛɛ duŋ fɨhŋ nəni, lə ŋkə laa lə mbɛɛ mwi ə bəne bbəŋ i nəə bie bə mi kə, kwaalə nlə fwoo bə́ ə kpe mə butuu bu həŋgbɔŋ bwe. 40 Bə kələ lə fieŋ ffɨŋ Tah kìɛɛ duŋ lə mbɛɛ mənhliŋ nnu i ŋə̀ŋ ə Ŋiaani go, yii tɔŋ ə wu mə, mə lə kənə kinduŋh ki kə kaa, ə n'yá nfwoo wu dəŋ ə kpe mə butuu bu həŋgbɔŋ bwe.”

41 Bəjuu hlə chɔɔ bə ŋwuunə kiih yulahalə i yɔɔla lə i duŋ biləə bbɨŋ bi noo ə buh bwo yaŋ kwe. 42 Bə́ ŋwuunə nəni bii ləə, “Nu kə duŋ nə dəŋ Jisho ŋwa Joshɛ yo lə? Tili bə mahni duŋ dəŋ bbəŋ kkə kə̀lə bie lə? Fi kah ləhəŋ fidiɛɛ maa yee i yɔ̄ɔ lə i bwo ə duŋ ə buh lə?” 43 Jisho chuu bə bə́ lə, “Bə kə ŋwuunə bəŋ bəŋ kə. 44 Mbɛɛ hləŋ nnu duŋ ə i bwo ə mi go fo Tah hə kaani kə fəə wu lə i bwo. Ə n'yá nfwoo dəŋ wu ə kpe mə butuu bu həŋgbɔŋ bwe. 45 Bəne bə hlɨŋ Chu mà bieŋna lə, ‘Chu yá yi keeh bə́ bənhliŋ.’ Nəni mbɛɛ mənhliŋ nnu i wò Tah i jə̀ keehnə kiih, ə wu nnu i bwò ə mi go. 46 Ŋkə n'yɔ̄ɔ lə nəni lə mbɛɛ yo həmə nnu i ŋəŋna ə Tah go. Ə kwaa wu nnu i no yo ə Chu go nnu i ŋə̀ŋ ə Tah go. 47 N'yɔɔ bəŋ chɛɛŋ chɛɛŋ lə, mbɛɛ nnu i bema, i kəna kinduŋh ki kə kaa. 48 Nduŋ biləə bbɨŋ bi nə̀ kinduŋh bə bəne. 49 Bəche chwa bieeŋ màa bə́ dī mana ə nji, bələh bə́ mà kpee. 50 Biləə bɨhŋ lə bbɨŋ bi nò ə buh bwo lə ə mbɛɛ di ə i yá baa kpe kə. 51 Nduŋ biləə bbɨŋ bi noo ə buh bbɨŋ bi nə̀ kinduŋh bə bəne. Ə mbɛɛ di ə biləə bie go, ə i yá ba həmə bwɔɔ mənhliŋ. Biləə bbɨŋ nlə nnə bie lə gbo wuŋŋ. Nlə nnə bi yu kinduŋh ki mbiŋ nu.”

52 Bəjuu hlə ja chɔɔ yee bə́ gbēe kikpuŋ bə́ bə́, bə́ bii ləə, “Mbɛɛ nu lə kah ləhəŋ ə i hlə nə gbo wiih lə kkə di lə?” 53 Jisho hlə yɔɔ bə bə́ lə, “N'yɔɔ bəŋ chɛɛŋ chɛɛŋ lə ə bə nakə diee gbo wi Ŋwa Mbɛɛ, ŋwi dəŋ maa ŋgɔŋ miih, ə bə kənə kinduŋh ə bəŋ mə kə. 54 Mbɛɛ nnu i dì gbo wuŋŋ ŋwi dəŋ ŋgɔŋ məŋŋ kənə kinduŋh ki kə kaa. Ə n'yá nfwoo wu ə kpe mə butuu bu həŋgbɔŋ, 55 yulahalə gbo wuŋŋ lə biləə chɛɛŋ chɛɛŋ, ŋgɔŋ məŋŋ lə fieŋ fi ŋwinə chɛɛŋ chɛɛŋ. 56 Mbɛɛ nnu i dì gbo wuŋŋ baa ŋwi ŋgɔŋ məŋŋ lə yee i dūŋ ə mi mə ndùŋ dəŋ ə wu mə. 57 Tah nnu i faŋ yo mi kənə kinduŋh, ŋkə̀nə kinduŋh yu Tah. Nəni mbɛɛ nnu i dì gbo wuŋŋ lə kənə dəŋ kinduŋh yu mi. 58 Bɨhŋ biləə duŋ bbɨŋ bi fù bwo buh. Bi kə duŋ nə ye bbɨŋ bə chwa bieeŋ mà di bie ki kpe dəŋ kə. Mbɛɛ nnu i dì bɨhŋ biləə yá yi ba həmə bwɔɔ mənhliŋ.”

59 Bieŋ bɨhŋ duŋ bbɨŋ Jisho màa i yɔ̄ɔ ye i màa i kēeh bəne ə chəŋ cheenə Chu nni Kapanahuŋ mə.

Bəne bə Jisho bə kintu kiŋaaŋkə tu gbu ə wu dɨŋ

60 Bəne bə Jisho bə kintu kiŋaaŋkə wo keehnə kɨhŋ nəni yɔɔ lə, “Bɨhŋ biyɔɔnə nəŋ taa gbaaŋ! Duŋ ə mbɛɛ bemi dɨŋ bɨhŋ biyɔɔnə nəni lə?” 61 Kwaalə, Jisho kələ lə bəne biih bə kintu bie bə́ ŋwūunə bə́ bə́ yu biyɔɔnə bie, i hlə bii bə bə́ ləə, “Fieŋ ffɨŋ n'yɔ̄ɔ fɨhŋ nɛhaŋ tɔ́ŋ ŋieeŋ lə? 62 Ə fi lə duŋ nəni, ə bə hlə fə ləhəŋ fəŋ bwɔɔ nnu bə ŋəŋ ye Ŋwa Mbɛɛ fīimə i bìŋ chu ə dɔhɔ kkɨŋ i mà hlaa duŋ fwii lə? 63 Fiana Chu lə fieŋ ffɨŋ fi nə̀ kinduŋh. Nyaŋ ni go kənə lə ba fieŋ bənfə kə. Biyɔɔnə bbɨŋ n'yɔ̄ɔ bə bəŋ duŋ fiana, bi nə̀ kinduŋh. 64 Kwaalə bəŋ bədi bie həmə bbəŋ bə́ kə bemi biyɔɔnə bɨhŋ kə.” Jisho mà yɔɔ nəni yulahalə i mà kəla kaa jə həmɛɛ bəne bbəŋ bə́ kə yii lə tɔ́ŋ ə wu mə kə, kələ dəŋ mbɛɛ nnu i yá taa yo wu. 65 I baa yɔɔ bə bə́ lə, “Fiee fieŋ ffɨŋ nhə n'yɔɔ fie bə bəŋ lə mbɛɛ hləŋ nnu duŋ ə i bwo ə mi go Tah kaani kə jəə wu nə bə mi kə.”

66 Bwɔɔ nnu dɨŋ, bəne biih bə kintu kiŋaaŋkə hlə tu wuh ə wu dɨŋ nɨhŋ nakə baa lə jaa bə wu kə. 67 Jisho ja bii bə bəne biih bə kintu bə yuufi ə nchɔ bəfwe bie ləə, “Bə kə kiɛɛ lə lə bə gəŋ kə lə, lii ləhəŋ lə?” 68 Shaamuŋ Pita chuu bə wu lə, “Baba, kkə gəŋ ə nyəhə go lə. Ə kənə wə biyɔɔnə bbɨŋ bi nə̀ kinduŋh ki kə kaa, 69 kkə bema, baa kələ lə ə wə nnu wə duŋ Mbɛɛ bə kichili nnu wə fu ə Chu go.” 70 Jisho yɔɔ bə bə́ lə, “Ə kə duŋ nə mi nnu nshaa bəŋ bə yuufi ə nchɔ bəfwe bəŋ kə lə? Kwaalə, mbɛɛ ju ə bəŋ mə lə fiŋkwini.” 71 Jisho mà yɔɔ nəni ə duŋ yu Judash ŋwa Shaamuŋ Ishkalɔt. I mà duŋ ə kintu ki bəne bə Jisho bə yuufi ə nchɔ bəfwe bie mə, ə duŋ wu nnu i duŋ yo lə mə lə taa Jisho.