Jɔɔŋ 5

Jisho ŋwuhuŋ mbɛɛ nnu i mà gɔŋna hləŋ hləŋ bigoŋ mbwɛɛnshɔ ə nchɔ nyaaŋ

Ə chu bwɔɔ nnu dɨŋ chɔnɔ ki Bəjuu kidi duŋ ə Jelushalɛŋ, Jisho biŋ həmə. 2 Bwɔɔ ki ŋgwiŋ kidi mà duŋ həmə bə́ chèe ki ə díe yí Bəhiblu mə lə Beteshda, bwɔɔ kie mà duŋ baha ə fwiih wi mbaŋ wwuŋ wi lɛ̀ɛ ə kibalaki kie mə wwuŋ bə́ chèe lə Fwiih wi Shɔ́ŋ. Bə́ mà wɛɛla bikpənə həmə bitiŋ, 3 bəne bə jə́ŋ màa bə́ bā həmə kiŋaaŋkə, ə duŋ bəmbandii bə biŋkəŋkpe maa bbəŋ bə́ mà kpee wɛɛ mwe. [Bə́ màa bə́ bwō həmə bə́ kè bwɔɔ nnu ŋgwiŋ mie lə nənə. 4 Nchinda Baba ju màa i bā bəmbwo ə bwɔɔ bəŋ bwɔɔ bəŋ, i lɛ̀ɛ i nɛ̀hiŋ ŋgwiŋ mie. Mbɛɛ nu fwii nnu mə lə hlaa lɛɛ ə ki mə bwɔɔ nnu nchinda yo nɛ̀hiŋ yo ŋgwiŋ mie, kəə mə lə ŋwunə ə jəŋ yi ye kwáŋ, maa ə mə duŋ ləhəŋ.]^ª 5 Mbɛɛ ju mà duŋ həmə nnu i mà gɔŋna bigoŋ mbwɛɛnshɔ ə nchɔ nyaaŋ. 6 Jisho ja bwo həmə ŋəŋ wu, kələ lə i duŋna həmə gbaaŋ, i bii bə wu ləə, “Wə kiɛɛ lə wə ŋwunə lə?” 7 Mbɛɛ jəŋ yo chuu lə, “Che kwoo, ŋkə̀nə lə mbɛɛ nnu duŋ ə i yii mi mə ŋgwiŋ mie mə bwɔɔ nnu mə nə̀nə kə. Ə bwo duŋ bwɔɔ nnu mə nə̀nə, ŋkiɛɛ lə ŋgəŋ lɛɛ, mbɛɛ ju bu hlaa kɨkə lɛɛ bə mi.” 8 Jisho yɔɔ bə wu lə, “Ja fa, jə kiga ko, yee wə gə̂ŋ.” 9 Cha mi, mbɛɛ yo bu ŋwunə, jə kiga kiih yee i gə̄ŋ.

Bumbini bwe mà duŋ ə duŋ bunte bu Bəjuu. 10 Bəjuu bie hlə yɔɔ bə mbɛɛ nnu bə́ mà ŋwuhuŋ yo lə, “Daŋ lə bunte ŋkɨnə kə bemi lə wə tu kiga ko kə.” 11 I chuu bə bə́ lə, “Mbɛɛ nnu mə hə ŋwuhuŋ yo mi hə yɔɔ lə njə kiga kɨŋŋ n'yee ŋgə̄ŋ.” 12 Bə́ bii bə wu ləə, “Ə duŋ nyəhə nnu mə hə yɔɔ yo bə wə lə wə jə kiga ko yee wə gə̂ŋ lə?” 13 Mbɛɛ nnu bə́ mà ŋwuhuŋ yo mà kə baa lə kələ dəŋ mbɛɛ nnu mə hə ŋwuhuŋ yo wu kə, yulahalə Jisho hə jaa lɛɛ gəŋ ə kimɔ ki bəne mə kintekinte kkɨŋ ki mà duŋ həmə.

14 Ə bwo chu bwɔɔ nnu dɨŋ, Jisho ŋəŋ ə wu go ə chəŋ ntofi mə, yɔɔ bə wu lə, “Kee ŋəŋ ye wə ŋwunə lə. Wə kə baa lə fə yíwaha kə. Ə wə fə, ə fieŋ gbe ə wə go ffɨŋ fi kah fɨhŋ.” 15 Mbɛɛ yo ja gəŋ yɔɔ bə Bəjuu bie lə ə həə Jisho nnu mə hə ŋwuhuŋ wu. 16 Bəjuu bie hlə chɔɔ bəmbɛŋ kinjɔŋ ə Jisho dɨŋ, yulahalə i mà ŋwuhaŋ mbɛɛ nu ə duŋ ə bunte mə. 17 Jisho yɔɔ bə bə́ lə, “Tah bwò i nɨ̀ŋ bwɔɔ mənhliŋ, nnɨ̀ŋ dəŋ lə.” 18 Biyɔɔnə bɨhŋ fə Bəjuu gaa lo gbaaŋ bə́ kīɛɛlə bə́ jii wu, ə mà kə duŋ nə kwaa yu ŋkɨnə ki bunte nnu i gbee kə. I mà cheela dəŋ lə Chu lə Tili, i fɛ̀hiŋ gbo wiih lə i duŋ yəəŋ bə Chu.

Muŋgeni mmuŋ Chu nəə bə Ŋiaani

19 Jisho ja yɔɔ bə bə́ lə, “N'yɔɔ bəŋ kichɛɛŋ lə duŋ ə Ŋiaŋ yee i fə̄ fieŋ ə muŋgeni mwii mə kə. I bwò i fə̀ kwaa ə duŋ fieŋ ffɨŋ i ŋə̀ŋ ye Tili fə̀. Fieŋ ffɨŋ che Ŋiaŋ fə̀, ə fi dəŋ ffɨŋ Ŋiaani fə̀, 20 yulahalə Che Ŋiaŋ yo leki Ŋiaani i hlə nyii wu bieŋ binhliŋ bbɨŋ Che Ŋiaŋ fə̀. I yu kaani i nyīi bieŋ bbɨŋ bi kàh bɨhŋ bə wu, lə yee i fə̂, bə ŋə̄ŋ, gəə ŋɨŋ bəŋ. 21 Ye Che Ŋiaŋ fwoolə bəne ə kpe mə nə kinduŋh bə bə́, ə dəŋ yəəŋ ye Ŋiaani nə li kinduŋh bə bəne bbəŋ i shaala bənnə. 22 Bənyiinə mu, duŋ ə Che Ŋiaŋ nakə hlaah lə mbɛɛ ju kə. I nəə nhlaa nu kiɛkiɛ ə duŋ ə Ŋiaani kwáŋ, 23 fo mbɛɛ mənhliŋ lə yee i bwɔ̄kwe bə Ŋiaani yəəŋ dəŋ ye bə́ bwɔ̀ lə kwe bə Tili. Ə mbɛɛ lə nakə bwɔɔkwe bə Ŋiaani, kəə duŋ ə i nakə bwɔɔkwe bə Tili nnu i faŋ yo wu kə.

24 N'yɔɔ bəŋ kichɛɛŋ lə mbɛɛ nnu i wò die njəŋ, yii tɔŋ ə mbɛɛ nnu i faŋ yo mi mə, ə i kənə kinduŋh ki kə kaa. Mbini yo mbɛɛ duŋ ə bə́ baa hlaah wu kə. Mbini yo mbɛɛ fwoo ə kpe mə, lɛɛ ə kinduŋh mə. 25 N'yɔɔ bəŋ kichɛɛŋ lə bwɔɔ yu bwō, i bwoo nnu bəne bəŋkpi lə wo die Ŋwa Nchu, bədi bbəŋ bə́ yá bemi, yá kənə kinduŋh. 26 Yee fi dûŋ lə yulahalə ye kinduŋh fùlə ə Tili go, ə lə dəŋ yəəŋ ye i nə̀ muŋgeni bə Ŋiaani lə kinduŋh yee ki fū dəŋ ə wu go. 27 I nəə dəŋ muŋgeni bə Ŋiaani lə yee i kāalə bənhlaa, yulahalə ə Ŋiaani nnu i dùŋ Ŋwa Mbɛɛ.

28 Gəə kə yee ki ŋɨ̂ŋ bəŋ bə fɨhŋ kə. Bwɔɔ yu bwō nnu bəne bənhliŋ bbəŋ bə́ dùŋ ə ke yá wo die yi, 29 ə bə́ fu mə ke, ə bbəŋ bə́ mà fə bie bieŋ binwaa fu lɛɛ ə kinduŋh ki kə kaa mə, ə bbəŋ bə́ mà fə bie bieŋ biwaha hlə fu ə bə́ hlaah bə́, ə bə́ gbe nhlaa. 30 Fieŋ fidi hləŋ həmə ffɨŋ nduŋ ə nfə bə muŋgeni muŋŋ. Nhlaah nhlaa ye ŋ'wòlə, jé yyɨŋ ŋkàalə mə duŋ yintiiŋ, yulahalə ŋkiɛɛlə lə nfə fieŋ ə duŋ ə yɨŋŋ mə kə. Nfə̀ ə duŋ fieŋ ffɨŋ mbɛɛ nnu i faŋ yo mi kìɛɛ.

Bieŋ bbɨŋ bi nyìi mbɛɛ nnu Jisho duŋ yo

31 Ə duŋ lə nlèmi ə kidɨŋ ki nhlaa kwoo kɨŋŋ bəŋ, ə fi duŋ yəəŋ kə. 32 Kwaalə, mbɛɛ ju yo həmə nnu i lèmi ə kidɨŋ ki nhlaa ŋgwəŋ bəŋ, ŋkə̀lə lə fieŋ ffɨŋ i yɔ̀ɔ kɨŋŋ lə kichɛɛŋ. 33 Bə mà faŋna bəne bə Jɔɔŋ, i gəŋ lemi ə kidɨŋ ki nhlaa kichɛɛŋ bəŋ. 34 Ŋkə ŋkiɛɛ lə lə mbɛɛ bemi kah bə mi kə. Kwaalə, n'yɔ̄ɔ nəni fo bə lə fukwoo. 35 Jɔɔŋ mà duŋ ye mɔɔ kkɨŋ bə́ bəəla yee ki dō ki nə̀ kinchaa, bə leki bənduŋ ə kinchaa kiih mə ə bwɔɔ bəŋ chɛɛ, bə́ tɨ̄ŋ. 36 Fieŋ fidi fie həmə ffɨŋ fi nyìi mbɛɛ nnu nduŋ yo kah Jɔɔŋ. Fi duŋ lə, nimi llɨŋ Tah nə lə ŋkaanə nɨŋ duŋ bieŋ bbɨŋ nfəə bbɨŋ bi nyìi lə ə faŋ Tah mi. 37 Tah nnu i faŋ yo mi kibɛɛ lema ə kidɨŋ ki nhlaa ŋgwəŋ bəŋ. Bə kə hlaa lə wo die yi kə, bə kə hlaa lə ŋəŋ ye i duŋ lə kə. 38 Bə kə̀nə lə dəŋ die yi ə tɔ́ŋ ŋieeŋ go kə, yulahalə bə kə yii lə tɔ́ŋ ə mbɛɛ nnu i faŋ yo mi mə kə. 39 Bə fwiilə Kiŋwaati ki Chu yulahalə bə hlè lə ə mə nnu bə yá kənə fieŋ ffɨŋ fi yáa fi fə̄ ə bə kənə kinduŋh ki kə kaa. Ə kiŋwaati kɨhŋ kibɛɛ kkɨŋ ki yɔ̄ɔ kɨŋŋ. 40 Kwaalə, bə baa bə nɨhŋ bəmbwo ə mi go bəŋkənə kinduŋh.

41 Ŋkiɛɛlə kiŋkohi ə duŋ kkɨŋ ki fù ə mbɛɛ kwáŋ kə. 42 Kwaalə ŋkə̀lə bəŋ. Ŋkə̀lə lə bə kə̀nə lə kinleki ki Chu ə tɔ́ŋ ŋieeŋ mə kə. 43 Mmà mbwo ə duŋ ə yii li Tah bəŋ, bə nakə tɨŋ nə jə mi kə. Ə hə bwo mbɛɛ ju ə yii liih bəŋ, ə bə hə hlə tɨŋ jə mbini yo. 44 Duŋ ə bə fə ləhəŋ hlə bemi mi, duŋ ə bə kiɛɛ kiŋkohi kkɨŋ ki bwò ə bəŋ mə, nakə kiɛɛ lə kiŋkohi ki kə kaa kkɨŋ ki fù ə duŋ bə Chu nnu ə ba yo kwaa wu. 45 Bə kə hlee lə ə mi nnu n'yá n'yii fwɔ weeŋ wiwaha bə Tah kə. Ə Mushe nnu bə yìi yo bufe ə wu mə nnu i nyìi fwɔ weeŋ bə Tah. 46 Ə bə màa bələ kichɛɛŋ ki Mushe, ə bə hə bemi mi yulahalə i mà bieŋ yu mi. 47 Kwaalə ye bə kə bemi lə dəŋ bieŋ bbɨŋ i mà bieŋ kə, duŋ ə bə jaa ləhəŋ hlə bələ fieŋ ffɨŋ n'yɔ̀ɔ lə?”