Jɔɔŋ 4

Jisho bə kpɛ ju nnu Shamalia bənə ə fwoŋ wi ŋgwiŋ bəŋ

Jisho kələ lə Bəfalashii hə woo lə i yu jāa bə bəne bə kintu bə́ bwō i yīi bə́ ə njɔ kah Jɔɔŋ. 2 Kwaalə ə màa dəŋ wu nnu i màa i yīi bə́ ə njɔ kə, ə màa yīi ə duŋ bəne biih bə kintu. 3 Ə chulə i kəla nəni, i hlə no ə wɛɛ wi kitɨŋ ki Judia mə, i fiimə chu dɨŋ ə Galilii. 4 I mà duŋ bəŋkah ə wɛɛ wi Shamalia mə. 5 I gəŋ bwii ə kibalaki ki Shamalia kidi mə kkɨŋ bə́ chèe lə Shika, ki duŋ baha ə wɛɛ wwuŋ Jekɔb mà nə bə ŋiaani Joshɛ. 6 Fwoŋ wi ŋgwiŋ wwuŋ Jekɔb mà hliili mà duŋ həmə. Ye Jisho mà jaalə gbaaŋ i fɨŋna, i hlə shii baha ə fwoŋ wi ŋgwiŋ we tɨŋ. Bwɔɔ yo mà duŋ ye hlɨŋ bushi lə.

7 Kpɛ ju nnu həmə Shamalia ja bwo lə i yu bwō to ŋgwiŋ həmə, Jisho yɔɔ bə wu lə, “Nə mi ŋgwiŋ ŋŋwi.” 8 Ə mà chu duŋ bəne bə kintu ki Jisho gəŋna ə kibalaki bəŋgəŋ taŋ biləə. 9 Kpɛ yo bii bə Jisho ləə, “Wə duŋ ŋwuŋ Bəjuu, nduŋ ŋwuŋ nnu Shamalia, wə kah ləhəŋ hlə yee wə nōŋ ŋgwiŋ bə mi lə?” Kpɛ yo mà yɔɔ nəni, yulahalə Bəjuu màa bə́ nyɛ̄hiŋ bəne bə Shamalia. 10 Jisho chuu bə wu lə, “Ə wə hə kələ nnə llɨŋ li dùŋ li Chu, maa mbɛɛ nnu i yɔ̄ɔ yo bə wə lə wə nə wu ŋgwiŋ, ə wə hə noŋ ə duŋ bə wu, ə mə hə nə wə ŋgwiŋ mməŋ mə bwɔ̀ bwɔɔ mənhliŋ.” 11 Kpɛ yo baa bii chuu bə Jisho ləə, “Tah, wə lə bə fieŋ fi tonə ŋgwiŋ mu kə, fwoŋ wi ŋgwiŋ we, we nduuŋkə, wə lə jə ŋgwiŋ mməŋ mə bwɔ̀ bwɔɔ mənhliŋ fəhəŋ lə? 12 Ə chu duŋ lə wə ko kah tah ya Jekɔb nnu i mà hliili yo fwoŋ wuhŋ chi bə be lə, wu kibɛɛ mà ŋwee ŋgwiŋ məhŋ, bwɔni biih ŋwi, nyáŋ yiih dəŋ ŋwi lə?” 13 Jisho chuu bə wu lə, “Mbɛɛ mənhliŋ nnu i ŋwì ŋgwiŋ məhŋ duŋ ə yee i baa i wò hlɔɔ dəŋ. 14 Kwaalə, maa nyəhə nnu mə lə ŋwi ŋgwiŋ məhŋ nlə nə mie wu, ə hlɔɔ baa kwuŋ wu kə. Ŋgwiŋ məhŋ nlə nə wu yá chu chwaa bwɔɔ nni mə ləə i fū ə wu go bwɔɔ mənhliŋ, i nə̀ wu kinduŋh ki kə kaa.” 15 Kpɛ yo hlə yɔɔ bə Jisho lə, “Tah, nə mi dɨŋ məhŋ ŋgwiŋ fo hlɔɔ lə nakə baa lə kwuŋ mi lə n'yee mbaa mbwō fəŋ bəmbwo to ŋgwiŋ kə.”

16 Jisho yɔɔ bə wu lə, “Gəŋ chee nua bəə wu bwo.” 17 Kpɛ yo chuu bə wu lə, “Nlə bə nyo kə.” Jisho yɔɔ bə wu lə, “Wə chuula yəəŋ ye wə yɔɔlə lə wə lə bə nyo kə. 18 Wə mà kəna bənəə bətiŋ, nu wə duŋ yo bə wu fidiɛɛ kə duŋ nə dəŋ nua kə. Fieŋ ffɨŋ wə yɔɔ duŋ chɛɛŋ.” 19 Kpɛ yo yɔɔ bə Jisho lə, “Tah, ŋŋəŋna fidiɛɛ lə wə duŋ mbɛɛ hlɨŋ Chu. 20 Bətah biaa màa bə́ bā bənchee Chu ə kɔnɔ kɨhŋ go, bəŋ Bəjuu yɔ̀ɔ ŋkwo weŋ lə dɔhɔ kkɨŋ bəne kənə bənchee Chu duŋ kwaa ə Jelushalɛŋ.” 21 Jisho chuu bə wu lə, “Kpɛ, bemi fieŋ ffɨŋ n'yɔ̄ɔ fɨhŋ. Bwɔɔ yu bwō nnu bə yáa bə chēe Chwa weŋ Chu ə kə baa lə duŋ ə kɔnɔ kɨhŋ go ləkə ə Jelushalɛŋ kə. 22 Bəŋ bəne bə Shamalia bə́ chèe Chu bə fieŋ ffɨŋ bə duŋ kə kə̀lə fi kə, be Bəjuu kkə chèe Chu bə fieŋ ffɨŋ kkə kə̀lə, yulahalə kinfukwoo bwò ə duŋ ə Bəjuu mə. 23 Kwaalə, bwɔɔ yu bwō, i bwoo fidiɛɛ nnu bəne bbəŋ bə́ chèe Chu chɛɛŋ chɛɛŋ yáa bə́ chēe bə Chu Tili bə Fiana Chu bə kichɛɛŋ.^ª Ə dɨŋ bəhŋ bəne bbəŋ Tah Chu kee lə bə́ chèe Chu bə wu. 24 Chu duŋ Fiana, bəne bbəŋ bə́ chèe bə wu kənə bənchee bə fiana Chu bə kichɛɛŋ.” 25 Kpɛ yo yɔɔ bə Jisho lə, “Ŋkəla lə Nchuu Fwoo nnu Chu mà kaachi yo yu bwō, nnu bə́ chēe yo lə Kleto. Bwɔɔ nnu i yá bwo, i yá hlə keeh nə be bieŋ binhliŋ.” 26 Jisho yɔɔ bə wu lə, “Mi nnu n'yɔ̄ɔ nu bə wə ə mi wu.”

27 Ə bwɔɔ yo bəŋ, bəne bə Jisho bə kintu fiimə bwo. Bə́ gəhlə ye i yɔɔlə bə kpɛ yo. Kwaalə, mbɛɛ ju ə bə́ mə nakə baa lə bii bə wu ləə i kiɛɛ laha lə, ləkə lə ə laha ffɨŋ Jisho yɔɔ bə kpɛ yo lə. 28 Kpɛ yo hlə she kikaŋ ki ŋgwiŋ kie həmə gəŋ bweenə, gəŋ yɔɔ bə bəne lə, 29 “Bə́ bwo ŋəŋ mbɛɛ ju nnu i bwoo yɔɔ mi bieŋ binhliŋ bbɨŋ mmà nfə. Ə duŋ ə mbɛɛ nu duŋ Nchuu Fwoo nnu Chu mà kaachi yo lə?” 30 Bəne hlə fu ə kibalaki kie mə yee bə́ bwō ə Jisho go.

31 Ə mà duŋ bəne bə kintu ki Jisho shee yee bə́ kɔ̄nɔ ba Jisho bə́ yɔ̄ɔ bə wu lə, “Labi, di lə.” 32 Kwaalə, Jisho chuu bə bə́ lə, “Ŋkənə biləə bidinə bbɨŋ bə́ duŋ bi kə kələ kə.” 33 Gbo kpe bəne biih bə kintu bə́ bii bə go ŋəbə ləə, “Mbɛɛ ju hə shee bwo bə biləə bwo nə bə wu lə?” 34 Jisho yɔɔ bə bə́ lə, “Biləə bɨŋŋ dùŋ lə n'yee nfə̂ fieŋ ffɨŋ mbɛɛ nnu i faŋ yo mi kìɛɛ, ŋkaanə nimi liih linhliŋ. 35 Nhle lə bə yɔ̀ɔ ŋkwo weŋ lə ə she kii na, ə bwɔɔ banchinə hlə bwii lə? N'yɔ̄ɔ bə bəŋ lə, bə tu díi buh bə kee ŋəŋ ye bieŋ taa kaa ə sho lə bə́ banchi. 36 Mbɛɛ nnu i bànchi kənə bikoonə biih, i buhuŋ biləə i chi ə kinduŋh ki kə kaa mə, fo mbɛɛ dɔnə bə mbɛɛ banchinə lə yee bə́ tɨ̄ŋ bənhliŋ. 37 Fɨhŋ nyìi lə ŋgaŋga ni yɔɔ kichɛɛŋ lə, ‘Mbɛɛ ju dɔ, mbɛɛ ju banchi.’ 38 Nfaŋ bəŋ lə bə gəŋ banchi bieŋ bbɨŋ bə mà kə nɨŋ nə kə. Bəne bədi mà nɨŋna, bə diee mbɨŋ ə nimi libə dɨŋ.”

Bəne bə Shamalia kiŋaaŋkə yii tɔ́ŋ ə Jisho mə

39 Bəne bə Shamalia kiŋaaŋkə ə kibalaki kie mə mà yiila tɔ́ŋ ə Jisho mə yu fieŋ ffɨŋ kpɛ yo mà yɔɔ bə bə́ lə “Mə hə yɔɔla bieŋ binhliŋ bə mi bbɨŋ mmà nfə.” 40 Nəni bə́ bwo ŋəŋ Jisho, bə́ kɔnɔ wu lə i duŋ bə bə́. I bemi, gəŋ duŋ bə bə́ joo fwe. 41 Bəne kiŋaaŋkə baa yii tɔ́ŋ ə Jisho mə yu biyɔɔnə biih. 42 Bəne bie yɔɔ bə kpɛ yo lə, “Kkə kə yii lə tɔ́ŋ ə wu mə yu biyɔɔnə bwo kə. Kkə woo dəŋ bə bituŋ biaa, hlə kələ lə mbɛɛ nu duŋ Nchuu Fwoo mbiŋ nu bə kichɛɛŋ.”

Jisho ŋwuhuŋ ŋwa ŋwuŋ ŋkuntaŋ

43 Lə joo ŋie fwe kah, Jisho ja yee i gə̄ŋ ə Galilii. 44 Wu kibɛɛ mà hlaala yɔɔ lə duŋ ə yee bə́ bwɔ̄kwe bə mbɛɛ hlɨŋ Chu ə wu kwuŋ ə kitɨŋ kiih mə kə. 45 Bwɔɔ nnu i mà gəŋ bwii ə Galilii, bəne bə həmə tɨŋ jə wu yulahalə bə́ mà ŋəŋna bieŋ bbɨŋ i mà fə ə chɔnɔ ki ŋkabəŋ mə ə Jelushalɛŋ, yulahalə bə́ mà duŋ dəŋ ə chɔnɔ kie mə.

46 Jisho baa chu ə Kana wɛɛ wi Galilii dɔhɔ kkɨŋ i mà fii kie ŋgwiŋ mə chu mbihŋ. Ə mà duŋ mbɛɛ ŋkuntaŋ ju duŋ ə kibalaki ki Kapanahuŋ mə, ŋiaani nyo gɔŋ. 47 Che kwoo yo hə woo lə Jisho hə jaa ə Judia bwo ə Galilii, i gəŋ ə wu go, kɔnɔ lə i bwɔ bwo ŋwuhuŋ ŋiaani, lə ə shee chɛɛ i kpe. 48 Jisho hlə yɔɔ bə wu lə, “Ə bə nakə ŋəŋ nə nyíŋ, ŋəŋ dəŋ bieŋ bi ŋɨŋ gəə, ə bə nakə yii lə tɔŋ ə mi mə kə.” 49 Che kwoo yo yɔɔ bə wu lə, “Tah, bu bwo kwaa yee kə bwɔ̄, ŋiaa ka kpe.” 50 Jisho chuu bə wu lə, “Yee wə gə̂ŋ, ŋwa lə ŋwunə.” Mbɛɛ yo bemi fieŋ ffɨŋ Jisho mà yɔɔ bə wu, hlə no yee i gə̄ŋ. 51 Ye i màa i bwɔ̄lə, bəə bəne biih bə nimi bədi bənə, bə́ yɔɔ bə wu lə ŋiaŋ yo yo ŋkee. 52 I hlə bii bə bə́ bwɔɔ nnu mə hə chɔɔ yo bə ŋwunə. Bə́ yɔɔ bə wu lə, “Ə maa fogbu ye kitaŋ mwe lə ə bushi, nnu jəŋ ye ma tukwaŋ ə wu go.” 53 Che ŋiaŋ yo hlə hle lə ə bwɔɔ yo bəŋ ba nnu Jisho ma yɔɔ bə wu lə, “Ŋiaŋ yo lə ŋwunə.” Wu bə bəne bə wu chəŋ bənhliŋ hlə yii tɔ́ŋ ə Jisho mə. 54 Ni lə nyiŋ ə chá bəŋ fie nni Jisho mà fə bwɔɔ nnu i mà no ə^ª Judia bwo ə Galilii.