Jɔɔŋ 3

Jisho yɔɔ bə Nikodemu ki bwee lifwɔ

Mbɛɛ kintu Bəfalashii ju mà duŋ bə́ chēe wu lə Nikodemu, i duŋ che kwoo ki bəne ə kintu ki kitɨŋ ki Bəjuu mə. 2 Mbɛɛ nu ja bwo ŋəŋ Jisho ə butuu yɔɔ bə wu lə, “Labi, kkə kələ lə wə duŋ mbɛɛ keehnə nnu i nò ə Chu kwuŋ, yulahalə mbɛɛ hləŋ nnu duŋ ə i fə dɨŋ yɨhŋ nyíŋ Chu kaani kə duŋ nə bə wu kə.” 3 Jisho chuu bə wu lə, “N'yɔ̄ɔ bə wə chɛɛŋ chɛɛŋ lə, ə bə́ nakə baa lə bwee mbɛɛ bwee lifwɔ, ə mbɛɛ mbini yo yá nakə ŋəŋ nə ə muŋkɨŋ mu Chu go kə.” 4 Nikodemu bii bə Jisho ləə, “Ə duŋ ə bə́ fə ləhəŋ bəmbaa bwee mbɛɛ nnu mə hə taa lə? Duŋ ə i baa lɛɛ chu ə mahni bulə ə mahni baa bwee wu lə?” 5 Jisho chuu bə wu lə, “N'yɔ̄ɔ bə wə chɛɛŋ chɛɛŋ lə, ə mbɛɛ lə nakə kənə bwee li ŋgwiŋ maa bə bwee li Fiana Chu, kəə duŋ ə i lɛɛ ə muŋkɨŋ mu Chu mə kə. 6 Mbɛɛ bwee mbɛɛ, Fiana Chu bwee fiana Chu. 7 Kindɔ kə chiinə wə lə n'yɔɔla bə bəŋ lə bə́ kənə bəmbaa bwee bəŋ bənhliŋ bwee lifwɔ kə. 8 Fwee kàh ye ki lèki lə, wə wò ye ki kàh'lə, kwaalə wə kə kə̀lə dɔhɔ kkɨŋ ki bwò kie kə, maa dɔhɔ kkɨŋ ki gə̀ŋ kie. Ə lə dəŋ yəəŋ ye fi duŋ bə mbɛɛ nnu i kənə bwee li Fiana.”

9 Nikodemu hlə bii ləə, “Ə duŋ ə fɨhŋ jaa ləhəŋ lə?” 10 Jisho chuu bə wu lə, “Wə duŋ mbɛɛ keehnə bəne Bəishlael kə kə̀lə fɨhŋ lə? 11 N'yɔ̄ɔ bə wə chɛɛŋ chɛɛŋ lə, kkə yɔ̄ɔ fieŋ ə duŋ ffɨŋ kkə kə̀lə, kkə lèmi kwaa ə duŋ ə nhlaa fieŋ ffɨŋ kkə ŋəŋna, kwaalə bə kə bèmi fieŋ ffɨŋ kkə yɔ̀ɔ kə. 12 Ə n'yɔ̄ɔ bəŋ bieŋ bi yaŋ kwe bə nakə bemi kə, ə bə hlə fə ləhəŋ fidiɛɛ bəmbemi bbɨŋ n'yɔ̄ɔ ə duŋ bieŋ bi buh lə? 13 Mbɛɛ hləŋ nnu i hlaala biŋ ə Chu kwuŋ. Kahiŋ mbɛɛ nnu i no yo mə bwo yaŋ kwe, mbɛɛ nnu lə ŋwuŋ nnu yii liih duŋ yo lə Ŋwa Mbɛɛ. 14 Ye Mushe mà tiɛɛlə yɔ nni bə́ mà fə bə chwaa ə tiɛɛ go ə nji, ə lə yəəŋ ye bə́ yá tiɛɛ li Ŋwa Mbɛɛ, 15 fo maa ə lə duŋ nyəhə nnu i yìi tɔŋ ə wu mə, ə i kənə kinduŋh ki kə kaa.

16 Chu mà leka mbiŋ nu hləŋ hləŋ, i faŋ Ŋiaani mwi nnu ə ka kwaa wu, lə maa nyəhə nnu i yìi tɔŋ ə wu mə, ə i yá la kə, ə i kənə ə duŋ kinduŋh ki kə kaa. 17 Chu mà kə faŋ nə Ŋiaani ə mbiŋ nu mə lə i bwo hlaah bəne lə bə́ gbe nhlaa kə. I mà faŋ wu lə i bwo fwoo bə́ ə nfwoo mə.

18 Mbɛɛ nnu i yìi tɔŋ ə wu mə lə gbee nhlaa kə. Kwaalə mbɛɛ nnu i kə yii lə tɔŋ ə wu mə kə i gbee nhlaa, yulahalə mə kə yii lə tɔŋ ə yii li Ŋwa Nchu bəŋ nnu ə duŋ yo kwaa wu kə. 19 Bə́ yá yi kaalə nhlaa ə je ni mə, yulahalə kinchaa bwoo yaŋ mbiŋ nu mə, kwaalə bəne lèki chuu fibə ə duŋ jɨbə kah kinchaa, yulahalə fwɔ wibə duŋ wiwaha. 20 Mbɛɛ mənhliŋ nnu i fə̀ fwɔ wiwaha yii lòh bə kinchaa, i yá bwii lə ə kinchaa kie mə kə, yulahalə ə mə lɛɛ ə kinchaa kie mə ə fwɔ wiih nyiee tɔ. 21 Kwaalə mbɛɛ nnu i fə̀ fieŋ finwaa yii bwò ə kinchaa mə, fo fwɔ wwuŋ i fə̀ we lə nyii lə wi dùŋ wi mbɛɛ nnu i dùŋ bə Chu.”

Jɔɔŋ yɔɔ lə Jisho ko kah wu

22 Bwɔɔ nnu dɨŋ, Jisho bə bəne biih bə kintu no gəŋ wɛɛ wudi wi Judia mə. Bəə bə́ gəŋ yee bə́ dūŋ həmə i yīi bəne ə njɔ. 23 Jɔɔŋ dəŋ màa i yīi bəne ə njɔ ə kwili lidi li Anoŋ mə baha ə Shaliŋ yulahalə ŋgwiŋ mà duŋ həmə gbaaŋ. Bəne bwō i yīi bə́ ə njɔ. 24 Ə bwɔɔ nnu bəŋ mà duŋ bə́ kaani kə yii lə wu ə chəŋ munfwa mə kə.

25 Bəne bə Jɔɔŋ bə kintu bədi bə ŋwuŋ Bəjuu ju bu ja chɔɔ noonə ki gbo wi wiinə bənduŋ wɛɛŋ ə Chu fwi. 26 Bəne bə kintu bə Jɔɔŋ ja gəŋ ə Jɔɔŋ go, yɔɔ bə wu lə, “Labi, mbɛɛ nnu bə mà duŋ yo bəə wu ə Kibee ki Joodaŋ wikwi nnu wə mà yɔɔ yo ba kiih gbaaŋ nəni, ŋəŋ ə wu nnu i yu yīi bəne ə njɔ, bəne bənhliŋ bie bə́ gəŋ kwaa ə duŋ ə wu go.” 27 Jɔɔŋ chuu bə bə́ lə, “Mbɛɛ duŋ nə fieŋ fo Chu hə kaani kə yɔɔlə lə i duŋ fi kə. 28 Bəŋ kibɛɛ duŋ ə bə lemi ə nhlaa ŋgwəŋ dɨŋ lə mma n'yɔɔla lə nduŋ nə Nchuu Fwoo nnu Chu mà kaachi yo kə. Kwaalə bə́ mà faŋ mi lə ŋkah wu fwi. 29 Ə nyimi kpɛ fwɔ nnu i kə̀nə kpɛ. Dɔɔ nyimi yo lemi baha ə nyimi yo tɨŋ i wò yo yi, i lèki gbaaŋ ye i wò lə yi. Ə lə dəŋ yəəŋ ye nduŋ fidiɛɛ nfiila bə kintɨŋ. 30 I kənə bəŋko gəŋ fwi, nchù dɨŋ.

31 Mbɛɛ nnu i nò buh ko kah bəne bənhliŋ. Mbɛɛ nnu yaŋ kwe duŋ kwaa mbɛɛ nnu yaŋ kwe, i yɔ̄ɔ kwaa bieŋ ə duŋ bi yaŋ kwe. Mbɛɛ nnu i fù ə kitɨŋ ki buh mə ko kah bəne bənhliŋ, 32 i lèmi ə nhlaa bieŋ bbɨŋ i ŋə̀ŋ bə bbɨŋ i wò. Kwaalə, mbɛɛ hləŋ həmə nnu i bèmi fieŋ ffɨŋ i yɔ̀ɔ. 33 Mbɛɛ nnu i bèmi fieŋ ffɨŋ i yɔ̀ɔ nyìi lə i fwɔ̀ŋ fieŋ ffɨŋ Chu yɔ̀ɔ lə ə chɛɛŋ. 34 Mbɛɛ nnu Chu fàŋ i yɔ̀ɔ kwaa ə duŋ die Chu, yulahalə Chu mà nəə Fiana wi bə wu kə fɛhiŋ kə. 35 Che Ŋiaŋ lèki Ŋiaŋ i hlə chi bieŋ binhliŋ ə wu kwáŋ. 36 Mbɛɛ nnu i yìi tɔŋ ə Ŋiaani mə duŋ ə i kənə kinduŋh ki kə kaa. Mbɛɛ nnu i nɨ̀hŋ wu yá kənə kinduŋh kə. Mbini yo mbɛɛ tɔŋ li Chu fwèe ba bə wu.”