Jɔɔŋ 2

Jisho fii ŋgwiŋ ə chu mbihŋ

Lə joo tɔh bwii, bə́ fə chɔnɔ ki biah kie mə ə kibalaki ki Kana ə wɛɛ wi Galilii mə, mah Jisho duŋ həmə. 2 Bə́ mà jaŋna dəŋ Jisho bə bəne biih bə kintu ə chɔnɔ ki biah kie mə. 3 Lə mbihŋ ka, mah Jisho chee wu həmə yɔɔ lə, “Mbihŋ mə bə́ kaa.” 4 Jisho chuu bə wu lə, “Kpɛ, wə yii mi mə yulaha lə? Bwɔɔ ŋgwəŋ kə wunə kə.” 5 Mahni yɔɔ bə bəne bbəŋ bə́ gāh bie lə, “Fieŋ finhliŋ ffɨŋ mə lə yɔɔ lə bə fə, bə fə.” 6 Ə mà duŋ shó lema həmə buhlɔ ŋŋəŋ bə́ fə̀ bə tə́. Shó ŋəhŋ duŋ ŋŋəŋ Bəjuu màa bə́ yīi ŋgwiŋ mə bə́ wìi go ŋə ncheenə Chu bənduŋ wɛɛŋ ə wu dí. Sho mwe màa wi jə̄ bəleta bə ŋgwiŋ maa ye gbi fumanyaaŋ ə nchɔ bətiŋ (75) gəŋ bwii ye bəleta gbi bə yuufi ə nchɔ bətiŋ (115) lə. 7 Jisho ja yɔɔ bə bəne bəganə bie lə, “Bə to bwo yii ŋgwiŋ ə shó ŋəhŋ mə baa baa.” Bə́ to bwo yii ŋgwiŋ ə shó ŋie mə ŋə yii baa baa. 8 I hlə yɔɔ bə bə́ lə, “Bə kɔɔlə məndi fidiɛɛ bə gəŋ nə bə ŋga cha yo.” Bə kɔɔlə gəŋ nə. 9 Ŋgah cha yo jə mɔŋ ŋgwiŋ mie, i wo mə choo mbihŋ. I gəhlə ləə məhŋ mbihŋ bwo fəhəŋ lə. (Kwaalə, bəne bbəŋ bə́ gàh bie bbəŋ bə́ màa bə́ tō bie ŋgwiŋ mie bbəŋ bə́ mà kələ dɔhɔ kkɨŋ mə bwō.) Ŋgah cha yo hlə chee che biah yo, 10 bii bə wu ləə, “Bəne hlaa gah ŋkwo bə́ ə duŋ mbihŋ mə nwaa ə chɔnɔ mə, bwɔɔ nnu bəne ŋwi fiili, bə́ hlə gah mməŋ mə duŋ mie kə nwaa lə ba gbaaŋ kə. Wə kaka kili wə fo ə duŋ mbihŋ mə nwaa mie yee wə bwō bə mə fidiɛɛ lə?” 11 Fɨhŋ màa fieŋ fi fwii ffɨŋ fi nyìi muŋgeni mu Jisho, i mà fə fieŋ fɨhŋ ə kibalaki ki Kana ə wɛɛ wi Galilii mə. Ye i fələ nəni, fi hlə nyii kiŋkuntaŋ kiih, bəne biih bə kintu hlə yii tɔ́ŋ ə wu mə.

12 Ə chu bwɔɔ nnu dɨŋ, Jisho ja bwɔ gəŋ ə Kapanahuŋ bə mahni maa bə bəmaani bəniɛ maa bəne biih bə kintu, bə́ duŋ həmə bə bə́ joo chɛɛ.

Jisho kohiŋ bəne bə shi ə chəŋ ntofi Chu mə

(Matio 21:12-13; Maak 11:15-17; Lukaa 19:45-46)

13 Lə joo ŋə Chɔnɔ ki Bəjuu kkɨŋ bə́ chèe lə Ŋkabəŋ yee ki bwō baha ba chəkə chəkə, Jisho ja biŋ ə Jelushalɛŋ. 14 I gəŋ bwii ə chəŋ ntofi mə, ŋəŋ bəne bbəŋ bə́ tàa bənaŋ bə shɔ́ŋ maa bikuuku maa bbəŋ bə́ gàanə kpo bə́ shiila. 15 I jə gi lo litiini mu, kohiŋ bə́ bənhliŋ mu, kohiŋ fwoo maa shɔ́ŋ bə bənaŋ mu chəŋ ntofi ye mə. I baa hlahi kpo wi bəne bbəŋ bə́ màa bə́ gāanə bie kpo, yəə tələ bidaŋ bibə, 16 yɔɔ bə bəne bbəŋ bə́ tàa bie bikuuku lə, “Bə jə bieŋ bɨhŋ bə no bə bi fəŋ. Bə kə jəə chəŋ Tah chuu ə duŋ chəŋ shi kə.” 17 Ye i yɔɔlə nəni, bəne biih bə kintu hlə hle fieŋ ffɨŋ bə́ bieŋna ə Kiŋwaati ki Chu mə lə, “Kinhle kiŋkuntaŋ kkɨŋ ŋkə̀nə ə chəŋ wa mə duŋ ə ki jii mi.”

18 Bikuu bi Bəjuu hlə bii bə wu lə, “Fieŋ ffɨŋ duŋ ə wə fə bənyii be lə bə́ nəə wə muŋgeni bənfə fi duŋ laha lə?” 19 Jisho chuu bə bə́ lə, “Ə bə bwu chəŋ ntofi ni, ə njə joo tɔh bəmbihiŋ chuu yi fa.”

20 Bəjuu bie bii bə wu ləə, “Fi mà jə bigoŋ mbwɛɛnya ə nchɔ buhlɔ bəŋwɛɛ chəŋ ntofi ni, ə wə jə ə duŋ joo tɔh bəmbihiŋ chuu yi fa lə?” 21 Kwaalə, Jisho màa i yɔ̄ɔ ki chəŋ ntofi ni ə duŋ gbo wiih. 22 Nəni, bwɔɔ nnu i mà fu ə kpe mə, bəne biih bə kintu hlə ŋoo lə fɨhŋ lə fieŋ ffɨŋ i mà yɔɔ. Bə́ hlə bemi fieŋ ffɨŋ fi dùŋ ə Kiŋwaati ki Chu mə, baa bemi dəŋ biyɔɔnə bbɨŋ Jisho mà yɔɔ bə bə́.

23 Ye Jisho mà duŋ lə ə Jelushalɛŋ ə Chɔnɔ ki Ŋkabəŋ kɨhŋ mə, bəne kiŋaaŋkə yii tɔ́ŋ ə wu mə yu bieŋ bbɨŋ bi nyìi kiŋkuntaŋ kiih bbɨŋ i mà fəə. 24 Kwaalə, Jisho mà kə nəə wu fiih gbo bə bə́ kə, yulahalə i mà kəla ye bəne bənhliŋ duŋ. 25 Ə mà duŋ ə mbɛɛ yɔɔ wu ki mbɛɛ ju kə, yulahalə wu kibɛɛ mà kəla fieŋ ffɨŋ mbɛɛ kənə ə wu bulə.