Jisho bə Shakiyo
19
Jisho gəŋ lɛɛ ə kibalaki ki Jeliku mə, yee i kāh. 2 Mbɛɛ ju mà duŋ həmə yii liih duŋ lə Shakiyo, ə duŋ che kwoo ki bəne bbəŋ bə́ kwò kiŋwaati, i duŋ dəŋ che bieŋ. 3 I mà kiɛɛ lə i ŋəŋ ə Jisho go ye i màa i kāh'lə. Kwaalə, fi kah wu yulahalə i mà duŋ ŋkwoo, ə duŋ kimɔ ki bəne baŋna wu. 4 I hlə lələ kah fwi gəŋ biŋ ə tiɛɛ kidi go bəmbənə jə nni mə lə ŋəŋ ə Jisho go ye i kāh'lə yu i mà duŋ bəŋkah mə wɛɛ wumbini we. 5 Jisho gəŋ bwii həmə, i lɛɛ díi ŋəŋ ə wu go mə fa, chee wu lə, “Shakiyo, hlili bwo chəkə, yulahalə n'yo bənɔŋ ə wə chəŋ daŋ.”6 I hlə hliinə bwɔ ə tiɛɛ kie go, tɨŋ jə Jisho bə kintɨŋ. 7 Bəne bənhliŋ bbəŋ bə́ mà ŋəŋ ye Jisho màa i gə̄ŋ lə bə wu hlə gbe yee bə́ ŋwūunə lə, “Mbɛɛ nu yu gə̄ŋ lə i gəŋ nɔŋ bə mbɛɛ bieŋ biwaha.”
8 Bə́ gəŋ lə yee bə́ dūŋ mu, Shakiyo ja lemi fa yɔɔ bə Jisho lə, “Baba, kee ŋəŋ, nlə ŋgah bieŋ bɨŋŋ kintekinte nnə bə bəne bənjɨnənə. Ə duŋ lə mmà nhlaala fihi mbɛɛ ju, ə nchuu wu chá nya.”
9 Lə Jisho wo lə, i yɔɔ bə wu lə, “Daŋ kinchɨnə bwoo yuhŋ chəŋ, ye che kwili nu duŋ lə dəŋ ŋwa Ablahaŋ. 10 Ŋwa Mbɛɛ mà bwo lə i bwo kiɛɛ bəne bbəŋ bə́ laa, lə i fwoo bə́.”
Ki ŋgaŋga kpo
11 Ye bəne màa bə́ wə̄lə ye Jisho yɔɔlə bieŋ bɨhŋ, i hlə ja gəŋ fwi bəŋgba ŋgaŋga ji bə bə́, yulahalə ə mà chu she chɛɛ lə i lɛɛ ə Jelushalɛŋ, yee bəne hlē lə ləkə ə she chɛɛ ə Chu gbe bənhlaah muŋkɨŋ mwii. 12 I yɔɔ lə, “Ə mà duŋ ə bwɔɔ ju bəŋ, ŋwa ŋkɨŋ ju no ə kitɨŋ kibə kwuŋ yee i gə̄ŋ ə kitɨŋ kidi kwuŋ je nyɛɛkə lə bə́ gəŋ nɔhiŋ wu ə muŋkɨŋ bəŋ, ə i hlə fiimə bwo chu dɨŋ bənhlaah muŋkɨŋ mwii. 13 Lə yee i tōo, i dii bəne biih bə nimi yuufi, ga bə́ kpo bibwa gbi gbi, yɔɔ lə, ‘Bə jə bə she fə shi mu fwɛɛ fo n'yá mbwo.’ 14 I hlə too, bəne bə kitɨŋ kiih màa bə́ lōh bə wu gbaaŋ. Bə́ she faŋ bəne wu dɨŋ lə bə́ gəŋ yɔɔ lə ‘Bə́ kə leki lə mbɛɛ yo duŋ ŋkɨŋ bə́ kə.’
15 Bə́ gəŋ nɔhiŋ wu. I chu bwɔɔ nnu dɨŋ, i chee bəne biih bə nimi bbəŋ i mà ga bie bə́ kpo lə i ŋəŋ ləə bə́ ma shee fə shi bənə mbɨŋ lə. 16 Nnu fwii yo bwo yɔɔ lə, ‘Che kwoo, bibwa gbi bbɨŋ wə mà nə bie bə mi mma nshee bənə mbɨŋ bəŋ bibwa yuufi.’ 17 I wo njənjə, baafɛ wu yɔɔ lə, ‘Wə duŋ mbɛɛ nimi nwaa. Ye wə ma shelə kələ bənfwoŋ fieŋ fitənə kinwaakə, nlə nchi wə yee wə hlāah wɛ́ɛ yuufi.’ 18 Ju yo bwo yɔɔ ŋkwo wi lə, ‘Che kwoo, bibwa gbi bbɨŋ wə mà nə bie bə mi mma nshee bənə mbɨŋ bəŋ bibwa bitiŋ.’ 19 I yɔɔ bə wu lə, ‘Nlə nchi wə yee wə hlāah bitɨŋ bitiŋ.’ 20 Mbɛɛ nimi ju yo bwo yɔɔ ŋkwo wi lə, ‘Che kwoo, bɨhŋ bibwa bwo gbi bbɨŋ mma nshee kwaa ə nshɛŋkɛ kindu mə kili. 21 Mmà ŋkili nəni yulahalə wə dùŋ mbɛɛ ntaabə, nlɔ̀ wə. Wə kə chiee fieŋ, wə bu bwo jə bu njənə. Bwɔɔ nnu wə kə dɔɔ fieŋ, wə bu bwo gba bu gbanə.’ 22 Che kwoo wi yo yɔɔ bə wu lə, ‘Wə duŋ ŋiaŋ waha. Biyɔɔnə bbɨŋ bi fū ə wə jə ə bi bbɨŋ nlə njə nhlaah wə mu. Wə ma kəla lə nduŋ mbɛɛ ntaabə, bwɔɔ nnu nduŋ kə chiee fieŋ, mbwo jə bu jənə, bwɔɔ nnu nduŋ kə dɔɔ fieŋ mbwo buhuŋ bu buhuŋnə. 23 Wə mà kələ nəni, ə fə laha lə wə nakə kili kpo wuŋŋ ə nchu mə, lə bwɔɔ nnu n'yá nfiimə ə mbwo jə bə mbɨŋ bəŋ lə?’ 24 I hlə yɔɔ bə bəne bbəŋ bə́ mà lemi bie baha ə wu go lə, ‘Bə jə bibwa bie gbi ə wu kwáŋ, nə bə nnu i kə̄nə yo bibwa bi kpo yuufi.’ 25 Bə́ nɨhŋ yɔɔ lə, ‘Che kwoo, i yu kə̄nə bibwa gi chá yuufi.’ 26 I yɔɔ lə, ‘N'yɔ̄ɔ bə bəŋ lə mbɛɛ nnu i kə̀nə fieŋ duŋ ə bə́ yá yiinə fidi bəŋ. Kwaalə mbɛɛ nnu i dùŋ fi hləŋ, maa fi chɛɛ ffɨŋ i kə̀nə fie ə bə́ yá jə chuu fi ə wu kwáŋ. 27 Fidiɛɛ bəne bbəŋ bə́ màa bə́ duŋ bie kə diee njənə bə mi, bə́ nɨ̀hŋ lə nduŋ nə ŋkɨŋ bə́ kə, bə́ gəŋ jə bwo jii bə́ ə mi dí.’”
Bə́ tɨŋ jə Jisho ə Jelushalɛŋ ye Ŋkɨŋ lə
28 Bwɔɔ nnu dɨŋ ye Jisho mà yɔɔlə bieŋ bɨhŋ, i hlə no kah fwi yee i bīŋ gəŋ ə Jelushalɛŋ. 29 Bwɔɔ nnu i mà chu gəŋ baha ə kwili li Betfa bə li Betani ŋŋəŋ ŋə dùŋ baha ə Kɔnɔ ki Bite bi Olif go, i hlə bwa bəne biih bə kintu bədi bəfwe faŋ bə́, 30 yɔɔ lə, “Bə gəŋ ə kwili li fwi le mə. Bwɔɔ nnu bə lə chu gəŋ lɛɛ həmə, bə lə ŋəŋ ŋwa hlɔmbwaa bə́ hə luula nnu mbɛɛ kə hlaa lə biŋ ə wu bəŋ kə, bə hlooli bwo bə wu fəŋ.” 31 Ə bə lə gəŋ bənhlooli wu, ə mbɛɛ lə bii ləə bə hlōoli wu yulaha lə, bə chuu lə, “Che kwoo yu kīɛɛ wu.”
32 Bəne bə kintu bie gəŋ ŋəŋ bieŋ binhliŋ dəŋ yəəŋ ye mə hə yɔɔ lə bə bə́. 33 Ye bə́ màa bə́ hlōoli lə ŋwa hlɔmbwaa yo, bəne bbəŋ bə́ kə̀nə bie wu bii ləə, “Bə hlōoli ŋwa hlɔmbwaa yo yulaha lə?”
34 Bə́ chuu lə, “Che kwoo ya yu kīɛɛ wu.”
35 Bə́ hlə jə hlɔmbwaa yo bwo nə bə Jisho, tu bindu bibə ə wu bəŋ, hlə tu chi Jisho bəŋ. 36 Yee i gə̄ŋ, bəne tū bindu bibə ə je, i jāa i kāh ə bi bəŋ.
37 Lə i chu gəŋ baha ye je bwɔ ə Kɔnɔ ki Bite bi Olif go, kimɔ ki bəne bə kimɔ kiih ŋənə bənhliŋ yee bə́ tɨ̄ŋ, bə́ kōhi Chu ə buh yu bieŋ bi ŋɨŋ gəə binhliŋ bbɨŋ bə́ ŋəŋna. 38 Bə́ tɨ̄ŋ bə́ yɔ̄ɔ lə, “Chu lɛɛla Kinhləmə ə Ŋkɨŋ nnu i yu bwō yo ə yii li Baba bəŋ. Kindunshiiŋ duŋ buh, kiŋkuntaŋ duŋ ki Chu nnu i dùŋ yo ə buh.”
39 Bəfalashii bədi bbəŋ bə́ mà duŋ ə kimɔ kie mə hlə ja yɔɔ bə Jisho lə, “Mbɛɛ Keehnə, nyieemi bəne bwo bə kintu bəŋ lə bə́ də shiiiŋ.”
40 Jisho chuu lə, “N'yɔ̄ɔ bə bəŋ lə, ə bə́ lə ba dəŋ shiiiŋ, ə tə́ ŋəhŋ dəŋ wili jə.”
41 Jisho mà chu gəŋ bwii baha ə Jelushalɛŋ, i chiini həmə shiiiŋ, i buuu ndəŋ, 42 yee i mā lə, “Hooo Jelushalɛŋ, ə bə hə chɔɔ kələ fieŋ ffɨŋ fi bwo bə kindunshiiŋ ə bəŋ mə daŋ. Kwaalə fidiɛɛ bə́ nəla fi bə bəŋ. 43 Nəni, bə kələ lə bwɔɔ yu bwō nnu bəne bieeŋ bbəŋ bə́ duŋ bie kə diee njənə bə bəŋ lə bwo wɛɛ mbaŋ taa gbaaaŋ baŋ bəŋ kiwɛɛ kinhliŋ. 44 Bə́ yá yi lɛɛ gɔhɔ laa bəŋ maa bə bwɔni bieeŋ, hlaki maa chə́ŋ yeeŋ, ə tə lidi yá nakə shee ə lidi bəŋ kə. Fi yá duŋ nəni yulahalə bə mà kə kələ bwɔɔ nnu Chu mà bwo ə bəŋ mə kə.”
Jisho kohiŋ bəne bə shi ə chəŋ ntofi mə
45 Jisho ja gəŋ ə chəŋ ntofi mə, yee i kōŋ bəne bbəŋ bə́ màa bə́ tāa bieŋ həmə, 46 yee i yɔ̄ɔ bə bə́ lə, “Fi duŋ bə́ bieŋna Chu yɔ̀ɔ lə,
‘Chəŋ njəŋ yá duŋ chəŋ cheenə Chu.’
Kwaalə bə fiila chuu yi butiɛ bu bəne bəbuyi.”
47 Jisho shī, i kēeh bəne ə chəŋ ntofi ye mə ju ju. Bəche ntofi bəŋkuntaŋ bəŋkuntaŋ bə bəne bə keehnə bəŋkɨnə bə Chu maa bəne bəŋkuntaŋ bəŋkuntaŋ bə həmə yee bə́ wɛ̄ɛnə bənjii wu. 48 Kwaalə bə́ nakə bənə je kə, yulahalə bəne bənhliŋ mà bwoo bə́ shī baha ə Jisho tɨŋ bə́ nakə leki lə fieŋ fimwi la ə bieŋ bbɨŋ i màa i kēeh bie mə kə.