Matio 25

Ŋgaŋga ki hlɔ́ŋ yí bwɔni bəkwɛ yuufi

“Ə duŋ ə bə́ fɛhiŋ muŋkɨŋ mu buh bə hlɔ́ŋ yí bwɔni bəkwɛ bədi yuufi bbəŋ bə́ mà jəə bibəənə bibə, fu bəŋgəŋ tɨŋ jə ŋwuŋ biah ju. 2 Bə́ mà dùŋ nəni bətiŋ dùŋ bənfili, bətiŋ dùŋ bəŋkələ bieŋ. 3 Fi duŋ lə bənfili bie jə bibəənə bibə nakə jəə mɛŋ məndi kə, 4 kwaalə bəŋkələ bieŋ bie jə bibəənə bibə bə mɛŋ məndi ə bibi mə buhuŋ mu. 5 Bə́ gəŋ yee bə́ kē ŋwuŋ biah yo, i kəmə bəmbwo, kinɨŋ gbe bənjɨɨŋkə bə́ dí bənhliŋ, bə́ gbe kinɨŋ. 6 Lə yee ə dūŋ ə butuu kintekinte, bə́ wo ye mbɛɛ diimə lə, ‘Ayililili, bə kee ŋəŋ, nu ŋwuŋ biah yo looo! Bə fu gəŋ tɨŋ jə wu looo.’ 7 Hlɔ́ŋ yí bwɔni bəkwɛ bie bənhliŋ hlə ja fa bihiŋ bibəənə bibə. 8 Hlɔ́ŋ yí bwɔni bəkwɛ bənfili bie yɔɔ bə bəŋkələ bieŋ bie lə, ‘Bə nə dəŋ be ə mɛŋ mieeŋ məndi go lə, yu bibəənə biaa bie bi nyɨ̄ŋ bi kāa looo.’ 9 Kwaalə bəŋkələ bieŋ bie chuu lə, ‘Duŋ ə mə wunə bə be bənhliŋ kə. Bə gəŋ ə duŋ ə bəne bbəŋ bə́ tàa bie kwáŋ, bə gəŋ taŋ mieeŋ.’ 10 Ye bə́ mà gəŋ lə bəŋgəŋ taŋ, ŋwuŋ biah yo hlə she bwii bwo. Bbəŋ bə́ mà diɛɛ bie ba gbo yee bə́ kē, gəŋ lɛɛ bə wu ə chəŋ chɔnɔ ki biah kie mə, bə́ hlə fwaŋ wulə. 11 Ə chu bwɔɔ nnu dɨŋ hlɔ́ŋ yí bwɔni bəkwɛ bədi bbəŋ bə́ mà gəŋ bie bəŋgəŋ taŋ mɛŋ bwii bwo dəŋ, bə́ lemi həmə fwih yee bə́ chēe lə, ‘Che kwoo, che kwoo, wɛ wulə kie kkə lɛɛ.’ 12 Kwaalə, i chuu bə bə́ lə, ‘N'yɔ̄ɔ bəŋ kichɛɛŋ lə, ŋkələ lə bəŋ kə.’ 13 Yee fi dūŋ lə, bə bwɛɛ gbo yee bə kē, yu bə kə kələ butuu ləkə bwɔɔ yo kə.

Ŋgaŋga ki bəne bə nimi bətɔh

(Lukaa 19:11-27)

14 Bwɔɔ yo yá bwo duŋ ye mbɛɛ ju nnu i mà duŋ bəŋgəŋ gbɛŋ, i chee bəne biih bə nimi nə chi bieŋ biih ə bə́ kwáŋ. 15 I mà nəə mbɛɛ nimi ju bibwa bi kpo bitiŋ, nə ju bibwa bi kpo bifwe, nə ju kibwa ki kpo mwe. I mà nə i bə̄lə ye muŋga mu mbɛɛ dùŋ. Ye i nə lə nəni, i hlə la gbɛŋ wiih. 16 Mbɛɛ nimi nnu i mà jə yo bibwa bi kpo bitiŋ hlə gəŋ cha mi fə shi mu, di mbɨŋ bibwa bitiŋ. 17 Nnu i mà jə yo bibwa bi kpo bifwe fə dəŋ shi, di mbɨŋ bibwa bifwe. 18 Kwaalə, mbɛɛ nimi nnu i mà jə yo kibwa ki kpo mwe, gəŋ wu fiih gəŋ tɨŋ bwɔɔ nələ kpo wi che kwoo wi yo mə.

19 Lə che kwoo ki bəne bə nimi bie la gbɛŋ we, i gəŋ duŋ mə gbaaŋ. Ə chulə i kwələ bwo, i dii bəne biih bə nimi bie lə bəə bə́ nachɛ bieŋ. 20 Mbɛɛ nimi nnu i mà jə yo bibwa bi kpo bitiŋ mà bwoo chuu bə bibwa yuufi, yɔɔ lə, ‘Che kwoo, wə mà nə mi bibwa bi kpo bitiŋ, kee ŋəŋ mma nshee fə shi mu, bənə bibwa bidi bitiŋ bəŋ.’ 21 Che kwoo wi yo yɔɔ bə wu lə, ‘Kimbaafɛɛ gbaaŋ. Wə duŋ mbɛɛ nimi nwaa baa duŋ bə kichɛɛŋ! Wə ma shee kələ bənfwoŋ fieŋ fitənə kinwaakə. Nəni, nlə nchi wə fidiɛɛ yee wə fwōŋ ə duŋ fiŋkuntaŋ. Lɛɛ ə kinjənjə ki che kwoo wa mə.’ 22 Mbɛɛ nimi nnu wii we kpo mà duŋ yo bibwa bifwe bwo dəŋ, yɔɔ lə, ‘Che kwoo, wə mà nə mi bibwa bi kpo bifwe. kee ŋəŋ, mma nshee fə shi mu, bənə bibwa bidi bi kpo bifwe bəŋ.’ 23 Che kwoo wi yo yɔɔ bə wu lə, ‘Kimbaafɛɛ gbaaŋ. Wə duŋ mbɛɛ nimi nwaa baa duŋ bə kichɛɛŋ! Wə ma shee kələ bənfwoŋ fieŋ fitənə. Nəni, nlə nchi wə fidiɛɛ yee wə fwōŋ ə duŋ fiŋkuntaŋ. Lɛɛ ə kinjənjə ki che kwoo wa mə.’ 24 Mbɛɛ nimi ju nnu i mà jə yo kibwa ki kpo mwe bwo dəŋ, yɔɔ lə, ‘Che kwoo, ŋkə̀lə lə wə dùŋ mbɛɛ nchi. Wə bà bəŋgba bieŋ bbɨŋ wə dùŋ kə dɔɔ, wə bà bəmbuhuŋ gɨŋ ŋə bəjaa ŋŋəŋ wə kə lɛɛ lə kə. 25 Nəni nhlə n'yee nlɔ̄, ŋgəŋ nnələ kpo wo we ə ke. kee ŋəŋ, wuhŋ kpo wo we, kənə.’ 26 Che kwoo yo chuu bə wu lə, ‘Wə duŋ mbɛɛ nimi waha, wə duŋ dəŋ bə kifɛɛ! Wə mà kələ lə mbà bəŋgba bieŋ bbɨŋ nduŋ kə dɔɔ, mbùhuŋ gɨŋ ŋə bəjaa ŋŋəŋ nduŋ kə tuu lə kə. 27 Ye wə mà kələlə nəni, wə mà duŋ lə wə yii kpo wuŋŋ we ə mbwu mə, fo bwɔɔ nnu nfiimə bwo ə njə kpo wuŋŋ we bə mbɨŋ bəŋ.’ 28 Ye i yɔɔlə nəni, i hlə yɔɔ lə bə́ jə kibwa ki kpo kie ə wu kwáŋ, nə bə nnu i kə̀nə yo bibwa bi kpo yuufi. 29 Yee bə kə̂lə lə mbɛɛ mənhliŋ nnu i kə̀nə, duŋ ə bə́ yá yiinə ə i kənə kiŋaaŋkə. Kwaalə mbɛɛ nnu i dùŋ fi hləŋ, maa fi chɛɛ ffɨŋ i yu kə̄nə fie ə bə́ jə fi ə wu kwáŋ. 30 Ye i yɔɔlə nəni, i hlə yɔɔ lə, ‘Bə lɛɛ kine kɨhŋ ə jɨbə nte wa bweenə, dɔhɔ kkɨŋ bəne dè bə́ dì bigəə.’

Keehnə ki nhlaa nnu həŋgbɔŋ

31 Ə yá bwo duŋ bwɔɔ nnu Ŋwa Mbɛɛ yáa i fīimə i bwō ə kiŋkuntaŋ kiih mə, i yáa i bwō bə bənchinda bə Chu bənhliŋ, i shiila ə kabala wi ŋkuntaŋ bəŋ. 32 Bitɨŋ binhliŋ ə mbiŋ nu mə yá bumə ə wu fwi, ə i ga bə́ ye mbɛɛ fwoŋnə shɔ́ŋ gà lə fwoo shɔ́ŋ ə bí mə. 33 I yá yi chi shɔ́ŋ yé kwaŋ diee, chi bí yé kwaŋ məə. 34 Wu Ŋkɨŋ yá yɔɔ bə bbəŋ bə́ dūŋ bie ə kwaŋ wi diee mə lə, ‘Bəne bbəŋ Tah lɛɛla kinhləmə ə bə́ bəŋ, bə bwo kənə dɔhɔ ə muŋkɨŋ mmuŋ i mà bwɛɛla chi mwe yu bəŋ chɔɔ jə ye bə́ mà fə mbiŋ, 35 yulahalə jəbulə màa i wū mi, bə nə mi biləə. Ntɔntɔ màa i ŋɨ̄ŋ mi, bə nə mi fieŋ fi ŋwinə. Mmà nduŋ nfuuntə, bə tɨŋ jə mi. 36 Mmà nduŋ kichi kindende, bə dɔhiŋ mi bindu. Ŋgɔŋ, bə bwo la mi jiinə. Ndùŋ ə chəŋ munfwa mə, bə bwo chee mi.’ 37 Bwɔɔ nnu i yá yɔɔ nəni, bəne bə kiyəyəŋ bie hlə bii bə wu ləə, ‘Baba, ə bwɔɔ nwɛhɛŋ nnu kkə mà ŋəŋ jəbulə wu wə, kkə nə wə biləə, ləkə bwɔɔ nwɛhɛŋ nnu ntɔntɔ màa i ŋɨ̄ŋ wə, kkə nə fieŋ wə ŋwi lə? 38 Ə bwɔɔ nwɛhɛŋ nnu kkə mà ŋəŋ ə wə go wə dùŋ nfuuntə, kkə tɨŋ jə wə, ləkə kichi kindende, kkə lee wə bindu ə go lə? 39 Ə bwɔɔ nwɛhɛŋ nnu kkə mà ŋəŋ wə gɔ̄ŋ ləkə wə dūŋ ə chəŋ munfwa mə, kkə bwo chee wə mə lə?’ 40 Ə Ŋkɨŋ yo chuu bə bə́ lə, ‘N'yɔ̄ɔ bəŋ kichɛɛŋ lə, ye bə mà fə lə bieŋ bɨhŋ, maa dəŋ bə mbɛɛ tənə ə bəŋgwoŋ mə, bə mà fə ə duŋ bə mi.’ 41 Nəni, i yá hlə yɔɔ bə bbəŋ bə́ dūŋ bie ə kwaŋ wi məə mə lə, ‘Bəŋ bə kida, bə no mi dí, bə gəŋ lɛɛ ə bwii wu kə kaa mə wwuŋ bə́ mà bwɛɛla chi yu hlaata bə bənchinda biih, 42 yulahalə jəbulə màa i wū mi, bə nakə nəə mi fidinə kə. Ntɔntɔ màa i ŋɨ̄ŋ mi, bə nakə nəə mi fiŋwinə kə. 43 Mmà nduŋ nfuuntə, bə nɨhŋ kə tɨŋ nə jə mi. Mmà nduŋ kichi kindende, bə nakə dɔhiŋ mi bindu kə. Mmàa ŋgɔ̄ŋ, mbaa ndūŋ ə chəŋ munfwa mə, bə nakə bwoo chee mi mə kə.’ 44 Bə́ yá hlə bii bə wu ləə, ‘Baba, ə bwɔɔ nwɛhɛŋ nnu kkə mà ŋəŋ jəbulə wù wə, ntɔntɔ ŋɨ̀ŋ wə, wə dùŋ nfuuntə, wə dùŋ kichi kindende, wə gɔ̀ŋ, ləkə ə chəŋ munfwa mə, kkə nakə chɨnə wə lə?’ 45 Ə i yá hlə chuu bə bə́ lə, ‘N'yɔ̄ɔ bəŋ kichɛɛŋ lə, ye bə mà nalə kə fəə bieŋ bɨhŋ, maa dəŋ bə mbɛɛ tənə ə bəŋgwoŋ bəhŋ mə, bə mà kə fəə bi bə mi kə.’ 46 Bie bəne yá gəŋ lɛɛ ə ŋgə kə kaa mə kə. Kwaalə, ə bə kiyəyəŋ bie yá gəŋ lɛɛ fibə ə duŋ ə kinduŋh ki kə kaa mə.”