Bə́ chuŋ bənjii Jisho
26
Lə Jisho yɔɔ kaa bieŋ bɨhŋ kiɛkiɛ, i yɔɔ bə bəne biih bə kintu lə, 2 “Yee bə kə̂lə lə ə she kwaa joo fwe, ə Chɔnɔ ki Ŋkabəŋ hlə duŋ, ə bə́ hlə nə Ŋwa Mbɛɛ ə bəne kwáŋ, ə bə́ bweeni wu ə kiŋgwa go.” 3 Ə bwɔɔ mbini yo bəŋ, bəche ntofi bəŋkuntaŋ bəŋkuntaŋ bə bəne bbəŋ bə́ hlàah kitɨŋ bumə ə kintɔŋ ki Kayifa mə nnu i mà duŋ yo kwoo ki bəche ntofi, 4 hlə chuŋ ye bə́ lə wɛɛnə kwo jii Jisho. 5 Lə bə́ chuŋ nəni, bə́ yɔɔ lə, “Kkə kə mɔŋ nə fieŋ fɨhŋ ə bwɔɔ Chɔnɔ kɨhŋ mə kə, yulahalə ə kkə lə mɔŋ, ə fi bwo be bə kikpuŋ ə bəne mə.”Kpɛ ju lɔɔ Jisho bə mɛŋ mənfuchee nwaa ə Betani
6 Jisho yee i dūŋ ə kwili li Betani mə, ə Shaamuŋ ŋwuŋ jəŋ kinhlanhla chəŋ. 7 Bə́ shiila yee bə́ dī, kpɛ ju ja bwo lɛɛ mu bə a fidi ffɨŋ bə́ fə̀ bə tə,ª ə duŋ a fi mɛŋ məndi mənfuchee nwaa, məntachuŋ gbaaŋ, bwo shoo mə ə Jisho fi. 8 Lə bəne bə Jisho bə kintu bie ŋəŋ nəni fieŋ fie lo bə́ go. Bə́ yɔɔ lə, “I bihi mɛŋ məhŋ nəni yulaha lə? 9 Bə́ hə duŋ bəntaa mɛŋ məhŋ kpo kiŋaaŋkə, nə kpo we bə bəne bənjɨnənə.” 10 Kwaalə, Jisho kələ munhlenə mubə, yɔɔ bə bə́ lə, “Bə nə̄ kpɛ nu ŋgə yulaha lə? I fəə ə duŋ fieŋ finwaa bə mi. 11 Yee bə kə̂lə lə bəne bənjɨnənə dùŋ bə bəŋ bwɔɔ mənhliŋ, kwaalə nlə nduŋ nə bə bəŋ bwɔɔ mənhliŋ kə. 12 I shoola mɛŋ məhŋ ə mi go nəni, bəmbwɛɛ ye bə́ yá diih mi. 13 N'yɔ̄ɔ bəŋ kichɛɛŋ lə maa fəhəŋ nnu bə́ yáa bə́ dōntə hlɨŋ nwaa ni ə mbiŋ mənhliŋ nu mə, bə́ yáa bə́ yɔ̄ɔ fieŋ ffɨŋ kpɛ nu fəə, bənhle wu.”
Judash taa Jisho
14 Mbɛɛ ju ə kintu ki bəne bə Jisho bə yuufi ə nchɔ bəfwe mə nnu bə́ mà chee lə Judash Ishkalɔt hlə no gəŋ ə bəche ntofi bəŋkuntaŋ bəŋkuntaŋ kwuŋ, 15 bii bə bə́ ləə, “Ə nnə Jisho bə bəŋ, ə bə nə mi laha lə?” Bə́ hlə fa bichu bi kpo mbwɛɛnshɔ bbɨŋ bə́ fə̀ bə chwaa kiwu, nə wu. 16 Chɔɔ jə ə bwɔɔ yo bəŋ, i gbe bəŋkiɛɛ je nni mə lə nə Jisho bə bə́.
Jisho bə bəne biih bə kintu di Chɔnɔ ki Ŋkabəŋ
17 Lə yee ə dūŋ butuu bu fwii bu Chɔnɔ ki Kibele kkɨŋ bə́ kə yii lə jɔ mə kə, bəne bə kintu bə Jisho bwo ŋəŋ wu, bii bə wu ləə, “Wə kiɛɛ lə kkə gəŋ bwɛɛ chi dɔhɔ kkɨŋ wə lə di Chɔnɔ ki Ŋkabəŋ ə duŋ fəhəŋ lə?” 18 I chuu bə bə́ lə, “Bə lɛɛ gəŋ ə kibalaki kie mə, bə lə ŋəŋ ə mbɛɛ ju go, bə yɔɔ bə wu lə, ‘Mbɛɛ Keehnə yɔɔ lə bwɔɔ wi wuna. Lə mə lə di Chɔnɔ ki Ŋkabəŋ bə bəne biih bə kintu ə duŋ ə wu chəŋ.’” 19 Bəne bə kintu bie gəŋ fə dəŋ ye Jisho hə yɔɔlə bə bə́, hlə bwɛɛ chi biləə bi Chɔnɔ ki Ŋkabəŋ mu. 20 Ə chu hə kitaŋ, i shiila bə bəne biih bə kintu bə yuufi ə nchɔ bəfwe bie yee bə́ dī. 21 Lə yee bə́ dī, i ja yɔɔ bə bə́ lə, “N'yɔ̄ɔ bəŋ kichɛɛŋ lə, mbɛɛ ju ə bəŋ mə lə taa mi.” 22 Ye i yɔɔlə nəni, hlɨŋ yi kwonə duŋ bə bəne biih bə kintu gbaaŋ, bə́ hlə chɔɔ yee bə́ bīi bə wu mwi mwi ləə, “Baba ə mi lə?” 23 I chuu bə bə́ lə, “Mbɛɛ nnu mə lə taa yo mi, ə wu nnu i yiila kwaŋ ə tahla mə yəəŋ bə mi. 24 Ŋwa Mbɛɛ yu gə̄ŋ dəŋ ye fi duŋ bə́ bieŋna kiih. Kwaalə, ŋgə ŋkuntaŋ duŋ bə mbɛɛ nnu i taa yo Ŋwa Mbɛɛ. Fi màa nwaa gbaaŋ bə mbini yo mbɛɛ lə bə́ kə bwee lə wu kə.” 25 Judash nnu i mà duŋ yo bəntaa Jisho bii dəŋ bə wu ləə, “Mbɛɛ Keehnə, ə mi lə?” Jisho yɔɔ bə wu lə, “Wə yɔɔla bə kijə ko.”
Jisho bə bəne biih di mbuhuŋ
26 Ye bə́ màa bə́ dī lə, Jisho ja jə kibele, nə kimbaafɛɛ bə Chu, hlə gaa nə bə bəne biih bə kintu yɔɔ lə, “Bə jə di, wuhŋ lə gbo wuŋŋ.” 27 I hlə jə dəŋ kwooh, nə kimbaafɛɛ bə Chu hlə nə kwooh kie bə bə́ yɔɔ lə, “Bə jə ŋwi bəŋ bənhliŋ. 28 Məhŋ lə ŋgɔŋ məŋŋ mməŋ Chu shwaŋna tɨmə mu, lə mə shoo yu bəne kiŋaaŋkə, fo mə lə laamə nə yíwaha yibə. 29 N'yɔ̄ɔ bəŋ lə, mbaalə ŋŋwi mbihŋ mə gbɛŋ wi tiɛɛ kkɨŋ ki dìɛɛni kɨhŋ kə, chɔɔ jə ə bwɔɔ nnu bəŋ, gəŋ bwii butuu bbuŋ n'yá ŋŋwi mənfwɔ ə muŋkɨŋ mu Tah mə.” 30 Ə chulə Jisho bə bəne biih bə kintu kaanə, bə́ sheeni yii li kiŋkohi, hlə fu biŋ gəŋ ə Kɔnɔ ki Bite bi Olif go.
Jisho yɔɔ lə Pita lə nɨhŋ wu
31 Ye Jisho bə bəne biih bə kintu màa bə́ gə̄ŋ lə, i yɔɔ bə bə́ lə, “Daŋ ə butuu duŋ bəŋ bənhliŋ lə lɔ mi yu fieŋ ffɨŋ fi lə duŋ bə mi. Fi dùŋ bə́ bieŋna Chu yɔ̀ɔ lə, ‘Nlə njii nfwoŋ shɔ́ŋ, ə kikɨŋ ki shɔ́ŋ kie hlaamə.’ 32 Kwaalə, bwɔɔ nnu Chu lə fwoo mi ə kpe mə, nlə ŋkah bəŋ fwi gəŋ ə Galilii.” 33 Pita hlə yɔɔ ŋkwo wi lə, “Ə bəne bənhliŋ lə lɔ wə yu fieŋ ffɨŋ fi lə duŋ bə wə, kəə ndùŋ ə n'yá nlɔ wə kə.” 34 Jisho yɔɔ bə wu lə, “N'yɔ̄ɔ wə kichɛɛŋ lə daŋ ə butuu, kikɔkɔlɔ lə chu waalə kie ki tɔ̄ŋ jə, duŋ wə hə nɨhŋna mi chá shɔ.” 35 Pita yɔɔ bə wu lə, “Ə duŋ lə bee wə kpe, kəə ndùŋ ə nnɨhŋ ba wə kə.” Ye i yɔɔlə nəni, bəne bə kintu ki Jisho bədi bie bənhliŋ yɔɔ dəŋ lə.
Jisho chee Chu ə Getshemani
36 Jisho bə bəne biih bə kintu gəŋ ə wɛɛh kidi ki bite bi sháŋ mə, kkɨŋ bə́ chèe lə Getshemani, Jisho yɔɔ bə bəne biih bə kintu lə, “Bə shii fəŋ ŋkəə gəŋ chɛɛ, ŋgəŋ nchee Chu.” 37 I hlə jə Pita bəə bwɔni bəniɛ bəfwe bə Jebedee, bəə bə́ gəŋ. I chɔɔ bənhle mweŋ, tɔŋ liih fɨ̄hɨŋ wu. 38 I hlə yɔɔ bə bə́ lə, “Tɔŋ lɨŋŋ le bə munhlenə ye nduŋ lə ə ŋkpe ə ŋkpe mə. Bə she fəŋ yee bə dūŋ bə kē.” 39 Ye i yɔɔlə nəni, i hlə baŋ gəŋ fwi chɛɛ, gbe chɨŋ bushi kwe hlə chee Chu lə, “Tah, ə je lə duŋ nni duŋ ə wə fə lə kwooh ki ŋgə kɨhŋ kah ŋkə ŋwee ki kə, wə fə. Kwaalə, wə kə fəə ə duŋ ye ŋkīɛɛlə kə, fə ə duŋ ye wə kīɛɛlə.” 40 Lə i fiimə chu dɨŋ ə bəne biih bə kintu go, i ŋəŋ bə́ nɔ̄ŋ kinɨŋ. I bii bə Pita ləə, “Fi duŋ lə duŋ ə bə nakə shii lə fa bə mi bwii maa ntaŋ bwɔɔ mwi kə lə? 41 Yee bə dûŋ fa, bə chèe Chu lə bimɔŋnə kə bwoo ə bəŋ mə. Ə chɛɛŋ lə tɔŋ yii lèki, kwaalə gbo we dùŋ wɛɛɛ.” 42 I baa fiimə gəŋ yee i chēe Chu ə chá bəŋ fie lə, “Tah, ə fi lə duŋ lə kwooh kɨhŋ lə kaah ŋkaŋ kə ŋwee mə, wə fə kwaa ye wə leki lə.” 43 I fiimə chu dɨŋ baa ŋəŋ bəne biih bə kintu nɔ̄ŋ kinɨŋ yulahalə kinɨŋ màa ki jɨ̄ɨŋkə bə́. 44 I baa tukwaŋ ə bə́ go, baa fiimə gəŋ chee Chu ə chá bəŋ shɔ, i chēe i yɔ̄ɔ kwaa ye mə həə i hlaalə i yɔ̀ɔ. 45 I baa fiimə chu dɨŋ ə bəne biih bə kintu go yɔɔ bə bə́ lə, “Bə bie bə kaani dəŋ bə nɔ̄ŋ kinɨŋ bə ŋɔ̄ɔni ŋkwo weŋ lə? Bə kee ŋəŋ, bwɔɔ yo wuna kaa. Bə́ taala Ŋwa Mbɛɛ bə bəne bə bieŋ biwaha. 46 Bə ja fa yee kkə gə̄ŋ. Bə kee ŋəŋ, mbɛɛ nnu i taa yo mi, yo wu nnu i yu bwō.”
Bə́ kwo Jisho
47 Ye Jisho màa i kaani lə i yɔ̄ɔ nəni, Judash nnu i mà duŋ yo mbɛɛ ə kintu ki bəne bə Jisho bə yuufi ə nchɔ bəfwe mə hlə fu bwo. I mà bwo bə kimɔ ki bəne kiŋkuntaŋ, bə́ kəna bihlo bə muŋkwuŋ, ə faŋ bəche ntofi bəŋkuntaŋ bəŋkuntaŋ maa bəne bbəŋ bə́ hlàah kitɨŋ bə́. 48 Ə mà duŋ mbɛɛ nnu i taa yo Jisho hə bwɛɛla chi kinyii bə bəne bie yɔɔ lə, “Mbɛɛ nnu nlə nchee yo wu, kwaamə yohiŋ lə wu, bə bu kwo.” 49 Ye bə́ mà bwolə, i gəŋ ə Jisho go cha mi cheemə bə wu lə, “Ncheela wə Mbɛɛ Keehnə.” Ye i yɔɔlə nəni, i hlə kwaamə yohiŋ wu. 50 Jisho yɔɔ bə wu lə, “Mbweŋ, bu fə fieŋ ffɨŋ wə bwo fie lə wə fə lə.” Bəne bie hlə gəŋ kwo Jisho, shaŋ kənə. 51 Fi duŋ lə mbɛɛ ju nnu i mà duŋ bə Jisho hlə bwa hlo ki ntɨmə, hlɛɛ tiɛɛ ki nfwa che kwoo ki bəche ntofi mu, ki kaŋnə. 52 Jisho yɔɔ bə mbɛɛ yo lə, “Yii chuu hlo ko kie ə dɔhɔ ki ki mə. Kələ lə mbɛɛ mənhliŋ nnu i bwà hlo, yá yi kpe bə hlo. 53 Wə hle dəŋ lə nduŋ ə nnakə yɔɔ lə bə Tah lə i faŋ bənchinda biih fəŋ cha mi ə bənchuku mə, ə bə́ kah kintu ki yuufi ə nchɔ bəfwe lə? 54 Kwaalə, ə nlə nja fə nəni, ə fi jaa ləhəŋ maa ə fi hlə duŋ ye bə́ mà bieŋ lə ə Kiŋwaati ki Chu mə lə fi kənə bənduŋ lə?”
55 Ə bwɔɔ yo bəŋ, Jisho hlə bii bə bimɔ bie ləə, “Bə bwo bəŋkwo mi, bə bwo bə bihlo maa muŋkwuŋ ye bə bwō lə bəŋkwo ə duŋ ŋwuŋ buyi lə? Mmaa mbà joo ŋənhliŋ, nshìi ə chəŋ ntofi mə ŋkèeh bəne, bə nakə kwoo mi kə yulaha lə? 56 Kwaalə, fieŋ fɨhŋ finhliŋ mà jə dɔhɔ bənfə lə fi bwo wunə dəŋ ye bəne bə hlɨŋ Chu mà bieŋ lə.” Bəne bə Jisho bə kintu bənhliŋ she wu həmə, lɔ.
Jisho lemi ə chəŋ nhlaa mə
57 Bəne bbəŋ bə́ mà kwo bie Jisho hlə jə gəŋ bə wu ə Kayifa kwuŋ, nnu i mà duŋ yo che kwoo ki bəche ntofi. Bəne bbəŋ bə́ kèeh bəŋkɨnə bə Chu bə bəne bbəŋ bə́ hlàah kitɨŋ hə buma kaa həmə. 58 Bə́ màa bə́ gə̄ŋ bə Jisho Pita bə̄lə wu dɨŋ je nyɛɛkə. Ə chulə i gəŋ bwii ba ə kwili li che kwoo ki bəche ntofi kie mə, hlə lɛɛ gəŋ shii bə bəne bbəŋ bə́ fwòŋ kwili le bəŋəŋ ye fi jaalə gəŋ kpee həŋgbɔŋ. 59 Bəche ntofi bəŋkuntaŋ bəŋkuntaŋ bə bəne bənhliŋ bbəŋ bə́ hlàah bənhlaa yee bə́ kīɛɛ fieŋ fi kaalənə yo bəntiɛɛ ə Jisho go fo bə́ lə jii wu. 60 Kwaalə, bə́ nakə kənə fieŋ kə, maa ye bəne kiŋaaŋkə bə yo kaalənə mà bwolə lə bə́ bwo bemi kah bə nhlaa yo. Bwɔɔ nnu dɨŋ, bəne bədi bəfwe bwo lemi fwi, 61 yɔɔ lə, “Mbwe nu mà yɔɔ lə duŋ ə i bwu chəŋ ntofi Chu, ə i wɛɛ chuu yi ə joo bəŋ tɔh.” 62 Che kwoo ki bəche ntofi hlə ja lemi fa bii bə Jisho ləə, “Wə lə bə fieŋ fi chuunə kə lə? Wə kə woo bieŋ bbɨŋ bəne bəhŋ yɔ̄ɔ bie ə wə go lə?” 63 Jisho ba shiiiŋ. Che kwoo ki bəche ntofi kie fiimə yɔɔ bə wu lə, “Ə yii li Chu nnu i kə̀nə yo kinduŋh, ə wə duŋ Nchuu Fwoo nnu Chu mà kaachi yo, wə duŋ Ŋwa Nchu, wə yɔɔ be lə.” 64 Jisho chuu lə, “Fi duŋ ye wə yɔɔ lə. Kwaalə n'yɔ̄ɔ bə bəŋ lə, ə bwɔɔ nnu dɨŋ mə duŋ ə bə yá ŋəŋ Ŋwa Mbɛɛ shiila ə kwaŋ wi diee wi Mbɛɛ nnu i kə̀nə yo Muŋga, baa ŋəŋ ye i hlīli i bwō ə joonə ki buh mə.” 65 Che kwoo ki bəche ntofi kie wo nəni, hlə shwaŋ bindu biih yɔɔ lə, “I jəə dɔhɔ ki Chu. Fieŋ fie həmə ffɨŋ duŋ ə yee kkə baa kkə kīɛɛ mbɛɛ lə i lemi fəŋ yɔɔ lə? Bə woo ye i jə dɔhɔ ki Chu. 66 Bə kaala nhlaa nu lə ləhəŋ lə?” Bə́ chuu lə, “Ə mbɛɛ nnu i chu duŋ lə bə́ jii.” 67 Bə́ hlə gbe bəntu Jisho bə ntɨŋ ə bushi go, kɔɔ wu bə muŋkɔɔ, kəh wu bə bía, bə́ yɔ̄ɔ bə wu lə, 68 “Wə nnu wə duŋ yo Nchuu Fwoo nnu Chu mà kaachi, fə ki nyo ki mbɛɛ hlɨŋ Chu bə be fidiɛɛ. Yɔɔ be mbɛɛ nnu i kəh yo wə.”
Pita nɨhŋ Jisho
69 Ə mà duŋ Pita bwoo shii bweenə ə kwili le mə. Ŋiaŋ kpɛ ju nnu i màa i nɨ̄ŋ həmə, ja bwo baha ə wu go yɔɔ bə wu lə, “Wə hə duŋ dəŋ bə Jisho nnu Galilii yo.” 70 Kwaalə, Pita nɨhŋ ə bəne fwi bənhliŋ yɔɔ lə, “Ŋkə ŋkələ fieŋ ffɨŋ wə yɔ̄ɔ fie kə.” 71 Pita hlə ja fu gəŋ yee i dūŋ ə fwiih we mə. Ŋiaŋ kpɛ ju nnu i màa i nɨ̄ŋ dəŋ həmə, ŋəŋ ə wu go, hlə yɔɔ bə bəne bbəŋ bə́ màa bə́ lēmi bie həmə lə, “Mbɛɛ nu bə̄lə Jisho nnu Nashalit.” 72 Pita baa nɨhŋ, kaŋ lə, “Ŋkələ lə mbɛɛ nu kə.” 73 Lə bwɔɔ baa gəŋ chɛɛ, bəne bbəŋ bə́ màa bə́ lēmi bie həmə baŋ gəŋ baha ə Pita go yɔɔ bə wu lə, “Bə kichɛɛŋ, wə dùŋ dəŋ mbɛɛ ju ə bə́ mə, yulahalə biyɔɔnə bwo gəŋ ye bibə lə.” 74 Pita hlə kaŋ, dii kida ə wu fi yɔɔ lə, “Ŋkələ lə mbɛɛ nu kə.” Cha mi kikɔkɔlɔ hlə tɔŋ jə. 75 Pita hle ŋoo die nni Jisho hə yɔɔ ye bə wu lə, “Kikɔkɔlɔ lə chu tɔŋ jə, wə nɨhŋna mi chá shɔ.” I ja həmə fu gəŋ bweenə, gəŋ jii gbo bəndəŋ.