Judash bemi bəntaa Jisho
22
Bwɔɔ Chɔnɔ ki Kibele kkɨŋ bə́ kə yii lə jɔ mə kə, kkɨŋ bə́ chèe lə Chɔnɔ ki Ŋkabəŋ, ki màa ki bwō baha kaa. 2 Bəche ntofi bəŋkuntaŋ bəŋkuntaŋ bə bəne bə keehnə bəŋkɨnə bə Chu, yee bə́ kīɛɛ je nni bə jii Jisho mə ə duŋ ə nələ mə, yulahalə bə́ màa bə́ lɔ̄ bəne.3 Hlaata hlə lɛɛ ə tɔŋ li Judash mə nnu bə́ mà chee yo lə Ishkalɔt, ə duŋ mbɛɛ ə kintu ki bəne bə Jisho bə yuufi ə nchɔ bəfwe mə. 4 I hlə gəŋ bə bəche ntofi bəŋkuntaŋ bəŋkuntaŋ bə bəŋkɨŋ bə bəne bə bicha bbəŋ bə́ fwòŋ chəŋ ntofi. Bə́ hlə dɔ ye mə lə taa Jisho bə bə́. 5 Bə́ wo njənjə hlə dɔ ye bə́ lə hluŋ wu kpo. 6 Lə i bemi lə, i hlə chɔɔ bəŋkiɛɛ jé yyɨŋ mə lə nə Jisho ə kwáŋ ŋəbə mə bwɔɔ nnu kimɔ ki bəne lə duŋ nə kə.
Ndɔ Chɔnɔ ki Ŋkahbəŋ
7 Butuu bu Chɔnɔ ki Kibele kkɨŋ bə́ màa bə́ dūŋ kə yii lə jɔ mə ə duŋ kkɨŋ bə́ bwò bə nyieŋ dəŋ hlɔmbu kintɔnɔ yu Chɔnɔ ki Ŋkabəŋ kɨhŋ mà bwo wunə, 8 Jisho hlə faŋ Pita bə Jɔɔŋ yɔɔ lə, “Bə gəŋ bwɛɛ chi bieŋ bbɨŋ kkə lə di Chɔnɔ kɨhŋ mu.” 9 Bə́ bii bə wu ləə, “Wə kiɛɛ lə kkə gəŋ bwɛɛ chi bi ə duŋ fəhəŋ lə?”
10 I chuu lə, “Bə wələ, bwɔɔ nnu bə lə lɛɛ gəŋ ə kibalaki kie mə, bə lə ŋəŋ mbɛɛ ju i too ŋgwiŋ ə sho mə, bə bələ wu ə chəŋ nni mə lə gəŋ lɛɛ ye mu. 11 Bwɔɔ nnu bə bələ, bə yɔɔ bə che chəŋ yo lə, Mbɛɛ Keehnə biila ləə, fəhəŋ chəŋ ni nte nni bəne bə kpuuni maa bəne biih bə kintu lə di Chɔnɔ ki Ŋkabəŋ mu lə? 12 Mə lə nyii bəŋ chəŋ nni fa gbɔɔŋkɔ nni bə́ hə jəə bwɔɔ bwɛɛ chi yi kwe kwe, ə bə hlə bwɛɛ chi bidinə bie mu.” 13 Nəni, bə́ gəŋ ŋəŋ bieŋ dəŋ yəəŋ ye Jisho hə yɔɔ lə bə bə́. Bə́ hlə bwɛɛ biləə bi Chɔnɔ ki Ŋkabəŋ mu.
Jisho bə bəne biih di biləə bi Chu
14 Bwɔɔ mà bwo wunə, Jisho bə bəne biih bə kintu bə yuufi ə nchɔ bəfwe shii yee bə́ dī. 15 I ja yɔɔ bə bə́ lə, “Mmà nleka gbaaŋ bəndi Chɔnɔ ki Ŋkabəŋ kɨhŋ bə bəŋ nhlə ŋ'wo ŋgə nnu i yu bwō yo. 16 Yee bə kə̂lə lə n'yá mbaalə di Chɔnɔ kɨhŋ kə gəŋ bwii ye bwɔɔ yá wunə nnu Chu yá hlaah muŋkɨŋ mwii.”
17 I jə kwooh, nə kimbaafɛɛ bə Chu yɔɔ lə, “Bə jə ŋwi bəŋ bənhliŋ. 18 N'yɔ̄ɔ bəŋ lə chɔɔ jə fidiɛɛ gəŋ fwi, mbaa lə ŋŋwi mbihŋ mə tiɛɛ kkɨŋ ki dìɛɛni kə, gəŋ bwii bwɔɔ nnu muŋkɨŋ mu Chu yá bwo.”
19 I jə kibele, nə kimbaafɛɛ bə Chu, gaa nə bə́ yɔɔ lə, “Wuhŋ lə gbo wuŋŋ wwuŋ nnə bə bəŋ. Yee bə́ fə̂ fɨhŋ bənhle mi.” 20 Dəŋ yəəŋ ye bə́ kaa lə bə biləə bie, i jə kwooh yɔɔ lə, “Kwooh kɨhŋ lə tɨnə kifwɔ kkɨŋ Chu nəə bə ŋgɔŋ məŋŋ, mməŋ mə fù ə mi go yu bəŋ. 21 Kwaalə, bə wələ wo mbɛɛ nnu i taa yo mi yu dī fəŋ bə mi. 22 Bə kələ lə Ŋwa Mbɛɛ yu gə̄ŋ kwaa ye Chu mà kaachi lə. Kwaalə, ŋgə ŋkuntaŋ duŋ bə mbɛɛ nnu i taa yo mi.” 23 Bə́ hlə gbe yee bə́ bīi bə go ŋəbə ləə, ə mbɛɛ nyəhə nnu i duŋ ə i fə dɨŋ fɨhŋ fieŋ ə bə́ mə lə.
Jisho keeh ye bəne biih duŋ bənjə go ŋəbə
24 Bə́ ja chɔɔ noonə bə go ŋəbə ləə, ə nyəhə ə bə́ mə nnu i duŋ ŋwuŋ ŋkuntaŋ lə? 25 Jisho yɔɔ bə bə́ lə, “Bəŋkɨŋ bə yaŋ kwe kə̀nə muŋgeni mubə ə bəne bəbə bəŋ, bəne bbəŋ bə́ hlàah mbiŋ yɔɔ lə yee bə́ chēe bə́ lə muŋgwii mu bəne. 26 Kwaalə, duŋ ə yee fi dūŋ nəni bə bəŋ kə. Ŋwuŋ ŋkuntaŋ ə bəŋ mə yee i jə̄ gbo wiih lə i duŋ ŋiaŋ wɛ, mbɛɛ nnu i dùŋ kwoo dùŋ ye mbɛɛ nnu i nɨ̀ŋ bə bəŋ bənhliŋ. 27 Ŋwuŋ ŋkuntaŋ duŋ nyəhə, ə mbɛɛ nnu i yìimə i dì, lii ə mbɛɛ nnu i jwà lə? Nhle lə ə mbɛɛ nnu i yìimə i dì kwaa lə? Kwaalə n'yo ə bəŋ mə ye mbɛɛ nnu i nɨ̀ŋ bu nɨŋ nə.
28 Ye mmaa ŋ'wō lə bəŋgə bwɔɔ mənhliŋ, ə bəŋ kwaa bbəŋ bə maa bə dūŋ ba bə mi. 29 Fi hlə yee fi dūŋ lə yəəŋ ye Tah nə lə mi muŋkɨŋ lə n'yee nhlāah, nnəə dəŋ bəŋ muŋgeni mwe bənhlaah. 30 Nnəə bəŋ lə fo bə lə yee bə dī, bə ŋwì ə dɔhɔ ki kintɔŋ kɨhŋ mə, ə bə shii ə bəkabala bəŋ, yee bə hlāah bichəŋ bi Ishlael bi yuufi ə nchɔ bifwe bie.”
Jisho yɔɔ lə Pita yá yi nɨhŋ wu
31 Jisho hlə ja chee Pita lə, “Shaamuŋ, Shaamuŋ, kee Hlaata jəə muŋgeni bənhlə bəŋ bənhliŋ fwoo bədi ye mbɛɛ hlə lə gɨŋ ŋə bəjaa fwoo bibɛɛni bie. 32 Kwaalə ncheela Chu bə wə lə tɔŋ lo kə fwoo ə mi mə kə. Bwɔɔ nnu wə lə dii chuu bufe bwo dɨŋ, ə wə nə dəŋ muŋgeni bə bwɔni bə mwa.”
33 Pita yɔɔ lə, “Baba, ə fi duŋ dəŋ lə wə gəŋ ə chəŋ munfwa mə maa bəŋkpe, kəə nlə n'yee mbə̄lə ba wə.”
34 Jisho chuu bə wu lə, “Pita, wo ye n'yɔ̄ɔlə bə wə, kikɔkɔlɔ lə chu duŋ bəntɔŋ jə daŋ, duŋ wə nɨhŋna chá shɔ lə wə kələ lə mi kə.”
Jisho keeh bəne biih bə kintu bəmbwɛɛ tɔ́ŋ ŋəbə
35 I ja bii bə bə́ ləə, “Bə hle bwɔɔ nnu mmaa nfāŋ yo bəŋ fibwa fi kpo hləŋ, bikpa hləŋ, ye bə màa bə jāa lə, bə mà jɨnə fieŋ lə?” Bə́ chuu lə, “Ye, kkə mà kə jɨnə fieŋ kə.” 36 I hlə yɔɔ bə bə́ lə, “Fidiɛɛ, ə mbɛɛ kənə fibwa fi kpo, i jə fi. Ə mbɛɛ nakə kənə hlo ki ntɨmə, i taa kindu kiih taŋ hlo mu. 37 N'yɔ̄ɔ fɨhŋ yulahalə fieŋ ffɨŋ bə́ bieŋna ə Kiŋwaati ki Chu mə duŋ lə,
‘Bə́ mà faa buhuŋ wu bə bəne bəwaha’,
Fieŋ fie fwoo yəəŋ bə mi fidiɛɛ. Bə kələ lə bieŋ bbɨŋ bə́ mà bieŋna binhliŋ yu mi bie bi bwō fu yəəŋ ba.” 38 Bə́ hlə jaka lə, “Baba, keeh ŋəŋ, kkə bie bə bihlo bi ntɨmə bifwe.” I chuu bə bə́ lə, “Bə chilə.”
Jisho chee Chu ə Kɔnɔ ki Bite bi Olif go
39 Jisho ja fu mə kibalaki kie mə bə bəne biih bə kintu, hlə chɔɔ bə biŋ ə Kɔnɔ ki Bite bi Olif go, ye i màa i bā lə bənfə. 40 Bə́ biŋ gəŋ bwii ə dɔhɔ kkɨŋ bə́ màa bə́ gə̄ŋ kie, i yɔɔ bə bə́ lə, “Yee bə chêe Chu lə bimɔŋ nə kə bwoo ə bəŋ mə kə.”
41 Ye i yɔɔlə nəni, i hlə wa gbo gəŋ fwi ye duŋ ə mbɛɛ lɛɛ tə ə li gəŋ gbe, i hlə bɛŋ núh kwe chee Chu lə, 42 “Tah, ə fi wunə hə wə, wə fwoo kwooh ki ŋgə kɨhŋ ə mi kwáŋ lə ŋkə ŋ'wiee ki kə. Kwaalə wə fə ye wə hlè lə, ə kə duŋ nə ye nhlè lə kə.” [ 43 Ye i chee lə Chu nəni, nchinda Chu hlili bwo buh ə wu bəŋ, nə wu muŋgeni. 44 Jisho dūŋ tɔŋ liih nə̄nə wu gbaaŋ. I baa chee Chu ntakə i bwoŋ, yohinə kiih tee kwe ye bintəənə bi ŋgɔŋ lə.]ª
45 I chee kaa Chu, chu dɨŋ ə bəne biih bə kintu mə, ŋəŋ juulinə fəə bə́ fɨŋna yee bə́ nɔ̄ŋ kinɨŋ. 46 I bii bə bə́ ləə, “Bə kaka yee bə nɔ̄ŋ ə duŋ kinɨŋ lə? Bə ja fa yee bə chēe Chu lə bimɔŋnə kə bwoo ə bəŋ mə kə.”
Bəne bə mbiŋ kwo Jisho
47 Ye i màa i kaani lə i yɔ̄ɔ, kimɔ ki bəne fu yee bə́ bwō ə kaka duŋ Judash nnu i mà duŋ yo mbɛɛ ə kintu ki bəne bə Jisho bə yuufi ə nchɔ bəfwe mə nnu i mà kah bə́ fwi. I gəŋ baha ə Jisho go bənyohi wu. 48 Kwaalə, Jisho bii bə wu ləə, “Wə fəŋ kiɛɛ lə wə yohi Ŋwa Mbɛɛ nəni bənyii lə bə́ kwo wu lə?”
49 Bəne biih bə kintu bbəŋ bə́ mà duŋ bie baha ə wu tɨŋ ŋəŋ fieŋ ffɨŋ fi mà duŋ fie, bii ləə, “Baba, kkə gba bəne bəŋ lə?” 50 Mbɛɛ ju ə bə́ mə gba kaalə tiɛɛ ki diee ki nfwa che kwoo ki bəche ntofi. 51 Bələ, Jisho looŋkə bə́ lə, “Mbɛɛ kə baa lə mɔŋ kə,” hlə tuu ə tiɛɛ ki mbɛɛ yo kie go ki hlə leemə chu nduŋ ki.
52 Bəne bbəŋ bə́ mà bwo bəŋkwo Jisho mà duŋ bəche ntofi bəŋkuntaŋ bəŋkuntaŋ bə che kwoo ki bəne bə bicha bbəŋ bə́ fwòŋ ə chəŋ ntofi mə maa bəne bbəŋ bə́ hlàah kitɨŋ. I bii bə bə́ ləə, “Bə bwō lə bə bwo kwo mi bə bihlo maa muŋkwuŋ ye bə bwo kwo lə ə duŋ ŋwuŋ buyi lə? 53 Mmaa mbà ba bə bəŋ joo ŋənhliŋ ə chəŋ ntofi mə bə nakə kwoo mi kə yulaha lə? Kwaalə, fidiɛɛ lə bwɔɔ weŋ nnu duŋ ə bə fə fieŋ, ə duŋ bwɔɔ muŋga mu jɨbə.”
Pita nɨhŋ Jisho
54 Bəne bie hlə kwo Jisho yee bə́ gə̄ŋ bə wu ə kwili li kwoo ki bəche ntofi kwuŋ, ə duŋ Pita bə̄lə bə́ dɨŋ je nyɛɛkə. 55 Bə́ gəŋ shii kintekinte yee bə́ wūu bwii ə kwili le mə. Pita hlə bwo shii bə bə́. 56 Ye bwii we màa wi dō lə, ŋiaŋ kpɛ ju nnu i màa i nɨ̄ŋ ə kwili le mə ja ŋəŋ ə Pita go i shiila. I chiini wu dí jwaaŋ yɔɔ lə, “Mbɛɛ nu hə duŋ dəŋ bə mbɛɛ yo.” 57 Pita nɨhŋ yɔɔ lə, “Kpɛ nu, ŋkə kələ mbɛɛ yo kə.” 58 Bwɔɔ baa kah chɛɛ mbɛɛ ju dəŋ ŋəŋ ə wu go, i yɔɔ dəŋ lə, “Wə duŋ dəŋ ə kintu kibə mə.” Kwaalə Pita yɔɔ lə, “Nyo, ŋkə duŋ nə ju kə.”
59 Bwɔɔ baa gəŋ kichə chɛɛ ye ntaŋ bwɔɔ mwi lə, mbɛɛ ju baa i kpe ba lə, “Chɛɛŋ, chɛɛŋ mbɛɛ nu hə duŋ bə wu, yulahalə i duŋ dəŋ mbɛɛ nnu Galilii.” 60 Pita baa nɨhŋ yɔɔ lə, “Nyo nu, ŋkə ŋkələ fieŋ ffɨŋ wə yɔ̄ɔ fie kə.” Ye i mà kaani lə i yɔ̄ɔ nəni, cha mi kikɔkɔlɔ hlə tɔŋ jə. 61 Baba fii gbo díi ŋiih toomə bə ŋə Pita. Pita hle ŋoo die nni Baba ma yɔɔ ye lə, “Kikɔkɔlɔ lə chu tɔŋ jə daŋ, duŋ wə nɨhŋna mi chá shɔ.” 62 I ja həmə fu bweenə, gəŋ jii gbo bəndəŋ.
Bə́ bə̄ŋ bə́ kwūŋ Jisho
63 Bəne bbəŋ bə́ màa bə́ fwōŋ Jisho hlə gbe bəmbəŋ bə́ kwūŋ dəŋ wu, 64 bə́ kəə bushi bwii bə kindu, bə́ yɔ̄ɔ bə wu lə, “Nyii be kinyo ki mbɛɛ hlɨŋ Chu. Yɔɔ be mbɛɛ nnu i kə̄ yo wə.” 65 Bə́ baa bə lɛ̄ɛ wu bə bəntɔnɔ kiŋaaŋkə.
Bə́ hlaah nhlaa Jisho
66 Lə butuu fu wu bəne bbəŋ bə́ hlàah kitɨŋ bə bəche ntofi bəŋkuntaŋ bəŋkuntaŋ maa bəne bə keehnə bəŋkɨnə bə Chu bə́ bumə bənhliŋ. Ye bə́ mà bumə lə, bə́ hlə jə Jisho gəŋ bə wu ə dɔhɔ kkɨŋ bə́ ba kie bənhlaah bənhlaa. 67 Ye bə́ gəŋ lə bə wu nəni, bə́ yɔɔ bə wu lə, “Ə wə duŋ Nchuu Fwoo nnu Chu mà kaachi yo, wə yɔɔ be” I chuu bə bə́ lə, “Ə n'yɔ̄ɔ bə bəŋ, ə bə nakə bemi kə. 68 Ə nlə mbii fieŋ fidi bə bəŋ, ə bə nakə chuu lə kə. 69 Kwaalə, chɔɔ jə fidiɛɛ gəŋ fwi, Ŋwa Mbɛɛ lə shii ə kwaŋ wi diee wi Chu mə nnu i kə̀nə muŋga.” 70 Bə́ hlə jaka bənhliŋ lə, “Aaa wə fəŋ duŋ Ŋwa Nchu lə?” I chuu lə, “Fi duŋ ye bə yɔɔ lə.” 71 Bə́ hlə yɔɔ lə, “Ə duŋ ə yee kkə baa kkə kīɛɛ mbɛɛ bən'yɔɔ laha lə? Kkə woo bieŋ bbɨŋ i yɔ̄ɔ bə kijə kiih.”