Lukaa 23

Paylɛt bə Hɛlɔ bii bieŋ bə Jisho

(Matio 27:1-2; Maak 15:1-5; Jɔɔŋ 18:28-38)

Ye kintu ki bəne bbəŋ bə́ hlàah bənhlaa yɔɔlə nəni, bə́ hlə ja bə́ bənhliŋ jə Jisho yee bə́ gə̄ŋ bə wu ə Paylɛt kwuŋ. 2 Ye bə́ gəŋ lə bwii həmə, bə́ hlə gbe yee bə bwɛ̄ɛ bieŋ ə wu go, bə́ yɔ̄ɔ lə, “Mbɛɛ nu yu jāa i bīhi kitɨŋ kiaa, i nɨ̄hŋ lə bəne kə chuuŋkə kiŋwaati bə Kayisha Ŋkɨŋ nnu Luŋ kə, baa yɔɔ dəŋ lə i duŋ Nchuu Fwoo nnu Chu mà kaachi, fi nyìi lə i duŋ ŋkɨŋ ju.”

3 Paylɛt bii bə Jisho ləə, “Ə wə Ŋkɨŋ Bəjuu yo lə?” Jisho chuu bə wu lə, “Ə lə ye wə yɔɔ lə.” 4 Paylɛt hlə ja yɔɔ bə bəche ntofi bəŋkuntaŋ bəŋkuntaŋ bə kimɔ ki bəne kkɨŋ ki mà duŋ kie həmə lə, “Ŋkə ŋŋəŋ nə gbenə ki mbɛɛ nu kə.”

5 Bə́ bənhliŋ hlə yee bə́ kpē ba kwaa lə, “Mbɛɛ nu yu jāa i kēeh bəne ə kitɨŋ kinhliŋ ki Judia mə, i fə̀ lə yee bə́ tā bikuu. I mà gbe ə Galilii, i yo fəŋ ə kibalaki kɨhŋ mə fidiɛɛ.”

6 Ye Paylɛt wo lə fɨhŋ nəni, i hlə bii ləə, “Mbɛɛ nu duŋ ŋwuŋ nnu Galilii lə?” 7 Bə́ bemi, i hlə faŋ Jisho ə Ŋkɨŋ Hɛlɔ kwuŋ, yulahalə ə màa wu nnu i màa i hlāah wɛɛ wi kitɨŋ kie, ə wu nnu i mà duŋ dəŋ ə Jelushalɛŋ ə bwɔɔ yo bəŋ.

8 Bə́ gəŋ bə Jisho, Ŋkɨŋ Hɛlɔ ŋəŋ ə wu go, i wo njənjə gbaaŋ yulahalə i màa i bā bəŋ'wo ki Jisho, i hlə yee i kə̄nə ŋgɨŋ bəŋəŋ ə wu go, i hlē dəŋ lə ləkə Jisho lə fə fieŋ ffɨŋ fi lə nyii muŋgeni mu Chu ə i ŋəŋ. 9 I shi bii bieŋ kiŋaaŋkə bə Jisho, kwaalə Jisho nakə chuu lə wu fieŋ kə. 10 Bəche ntofi bəŋkuntaŋ bəŋkuntaŋ bə bəne bə keehnə bəŋkɨnə bə Chu lemi həmə yee bə́ bwɛ̄ɛ bieŋ bintaabə ə Jisho go. 11 Ŋkɨŋ Hɛlɔ bə bəne biih bə bicha bie ja hlə chɔɔ yee bə́ bə̄ŋ bə́ fə̄ dəŋ bə wu, lee wu kindu ki too go, hlə faŋ chuu wu dɨŋ ə Paylɛt kwuŋ. 12 Ə mà duŋ Paylɛt bə Ŋkɨŋ Hɛlɔ duŋ kə diee njənə bə go ŋəbə. Bumbini bwe kibɛɛ bə́ chu kinshiŋ.

Paylɛt kaalə nhlaah ye bəne bie mà leki lə

(Matio 27:15-26; Maak 15:6-15; Jɔɔŋ 18:39–19:16)

13 Ye bə́ chuu lə Jisho dɨŋ, Paylɛt buhuŋ bəche ntofi bəŋkuntaŋ bəŋkuntaŋ maa bəne bbəŋ bə́ màa bə́ hlāah kitɨŋ, baa buhuŋ bəne bənhliŋ. 14 Lə bə́ bumə, i yɔɔ bə bə́ lə, “Bə hə bwo bə mbɛɛ nu fəŋ lə i yu fə̄ bəne tà bikuu, ye ŋkiɛɛ lə lə ŋŋəŋ bieŋ bɨhŋ ə bəŋ dí, bə wələ wo, ŋkə ŋŋəŋ nə lə bieŋ bbɨŋ bə chāa bie ba ə wu go lə i fəə fidi kə, 15 ə duŋ Ŋkɨŋ Hɛlɔ hə kə ŋəŋ nə dəŋ kə. Fiee fieŋ ffɨŋ fi hə fə mə hlə faŋ chuu mbɛɛ nu dɨŋ bə be. Bə ŋəŋ dəŋ lə mbɛɛ nu kə fəə fieŋ ffɨŋ duŋ ə bə́ jii wu ə njii mə kə. 16 Nəni nlə ŋkwuŋ kwaa wu bu kwuŋnə, ə ntukwaŋ ə wu go, i gəŋ.” 17 [Ə bwo duŋ ə bwɔɔ Chɔnɔ ki Ŋkabəŋ mə, Paylɛt kənə bənfwoo mbɛɛ mwi ə chəŋ munfwa mə nə bə bəne.]^ª 18 Bəne bənhliŋ hlə chɔɔ yee bə́ dē bə́ gə̄ŋ həmə bə́ gɛ̄ɛmə lə, “Laa mbɛɛ nu, fwoo Balaba ə chəŋ munfwa mə nə bə be.” 19 Balaba nu mà duŋ ə chəŋ munfwa mə yulahalə i mà kiɛɛla bidiɛɛni həmə ə kibalaki kie mə, i jii dəŋ mbɛɛ.

20 Paylɛt wo nəni i baa yɔ̄ɔ dəŋ bə bəne bənhliŋ yulahalə i mà kiɛɛ lə i tukwaŋ ə Jisho go. 21 Kwaalə, yee bə́ fē kwaa lə, “Bə́ bweeni wu ə kiŋgwa go, bə́ bweeni wu ə kiŋgwa go.” 22 Paylɛt baa yɔɔ bə bəne bie ə chá bəŋ shɔ lə, “Bə́ bweeni wu yulaha lə? Fieŋ fiwaha ffɨŋ i fəə duŋ laha lə? Ŋkə ŋŋəŋ nə gbenə kidi kkɨŋ i gbee kkɨŋ ki dùŋ lə bə́ jii wu kə. Nlə nfɨhɨŋ wu, ntukwaŋ ə wu go.”

23 Bə́ hlə yee bə́ gɛ̄ɛmə bə muŋgeni lə “Bə́ bweeni wu ə kiŋgwa go.” Fi kah Paylɛt. 24 Nəni, Paylɛt kaalə nhlaa yo tukwaŋ ə wu go, lə bə́ fə bə wu ye bə́ leki lə. 25 I hlə fwoo mbɛɛ yo ə chəŋ munfwa mə, nnu bə́ mà bii yo, nnu i màa i kīɛɛ yo bidiɛɛni ə kibalaki kie mə jii mbɛɛ. Ye i fwoolə, i hlə nə Jisho ye bə́ mà kiɛɛ lə.

Bə́ bweeni Jisho ə kiŋgwa go

(Matio 27:32-34; Maak 15:21-32; Jɔɔŋ 19:17-27)

26 Bə́ hlə jə Jisho yee bə́ gə̄ŋ bə wu. Ye bə́ màa bə́ gə̄ŋ lə, bə́ bənə bə mbɛɛ ju i kwə̄lə ə nji bə́ kwo jə wu yii liih duŋ lə Shaamuŋ, ə duŋ mbɛɛ nnu Shiliŋ. Bə́ too wu kiŋgwa ki Jisho kie ə wu bweŋ, i hlə tu ki yee i bə̄lə Jisho. 27 Bəə bə́ hlə yee bə́ gə̄ŋ, kimɔ kiŋkuntaŋ ki bəne bələ wu mə. Bədi duŋ bəkwɛɛ bbəŋ bə́ màa bə́ dē, bə́ mā bəŋgə bii. 28 Jisho ja fiimə yɔɔ bə bə́ lə, “Bəkwɛɛ bə Jelushalɛŋ, bə kə dee yu mi kə. Bə de ə duŋ yu go ŋieeŋ, maa bə bwɔni bieeŋ. 29 Bə kələ lə bwɔɔ yu bwō nnu bə́ yá yɔɔ lə, ‘Kintɨŋ kiŋkuntaŋ dùŋ bə bəkwɛɛ bbəŋ bə́ kə hlaa lə bwee kə, bə kpɛ nnu i kə hlaa lə mwahiŋ ŋiaŋ kə.’ 30 Ə yáa ə dūŋ ə bwɔɔ yo bəŋ, ə bəne yáa bə́ dīimə bə bikɔnɔ biŋkuntaŋ lə, ‘Bi gbe ə be bəŋ,’ diimə bə bikɔnɔ bitənə bitənə lə, ‘Bi kəə be.’ 31 Bə́ yáa bə́ dīimə nəni yulahalə ə bəne lə fə dɨŋ fɨhŋ fieŋ bə tiɛɛ kkɨŋ ki kaani kide, ə bə́ yá hlə fə ləhəŋ bə kkɨŋ ki mà ŋɨŋna lə?”

32 Ye bə́ màa bə́ gə̄ŋ lə bə Jisho nəni, bə́ mà kənə bəne bə chəŋ munfwa bəfwe bəŋgəŋ njii dəŋ bə́. 33 Bə́ gəŋ bwii ə dɔhɔ kkɨŋ bə́ chèe lə dɔhɔ ki Gəələ, hlə bweeni Jisho həmə, hlə bweeni dəŋ bəne bə chəŋ munfwa bə bəfwe bie ə biŋgwa go, ju yo wɛɛ wi Jisho wi diee, ju yo wɛɛ wiih wi məə. 34 Jisho ja yɔɔ lə, “Tah, laamə nə yíwaha yí bəne bəhŋ, yulahalə bə́ kə kələ fieŋ ffɨŋ bə́ fə̄ fie kə.”^ª Bəne bie jə bindu bi Jisho tɨŋ kimbəmbu mu hlə ga bə go ŋəbə.

35 Bieŋ bɨhŋ kiɛkiɛ màa bi kāh bə Jisho nəni, ə duŋ bəne lema həmə bə́ chīini. Bəne bbəŋ bə́ hlàah kitɨŋ bu kaka no fibə yee bə́ nyɛ̄hiŋ wu bə́ yɔ̄ɔ lə, “I maa i chɨ̄nə bəne bədi, i chɨnə chuu gbo wiih fidiɛɛ lə, ə mə fəŋ duŋ Nchuu Fwoo nnu Chu mà kaachi.” 36 Bəne bə bicha hlə yee bə́ nyɛ̄hiŋ wu dəŋ, nə wu mbihŋ məŋgbanyi, 37 bə́ yɔ̄ɔ lə, “Ə wə fəŋ lə duŋ Ŋkɨŋ Bəjuu, wə chɨnə gbo wo lə.” 38 Bə́ mà bieŋna kiŋwaati bweeni chi ə Jisho kwoo fi lə, “Nu lə Ŋkɨŋ Bəjuu.”

39 Mbɛɛ nnu chəŋ munfwa ju nnu bə́ mà bweeni ə kiŋgwa go, fiimə yee i tō Jisho, i yɔ̄ɔ lə, “Nhle lə ə wə Nchuu Fwoo nnu Chu mà kaachi yo lə? Fwoo gbo wo, wə chɨnə dəŋ maa be.” 40 Ju yo wo fieŋ ffɨŋ i yɔ̄ɔ fie, nyieemi wu, bii ləə, “Wə lɔ lə Chu kə lə? Wə yo dəŋ ə dɨŋ ŋgə wi yo mə. 41 Bee wə kpe chɛɛŋ chɛɛŋ ə duŋ yu bikoonə bi bieŋ biaa biwaha bbɨŋ kkə fə̀, kwaalə mbɛɛ nu kpe wu fiih i kə fəə fieŋ fiwaha kə.” 42 Mbɛɛ chəŋ munfwa yo hlə baa yɔɔ lə, “Jisho, yee wə hlē mi bwɔɔ nnu wə yáa wə hlāah muŋkɨŋ mwo.” 43 Jisho yɔɔ bə wu lə, “N'yɔ̄ɔ wə chɛɛŋ chɛɛŋ lə daŋ duŋ ə bee wə duŋ ə dɔhɔ ki kinjənjə ki Chu mə.”

Jisho kpe

(Matio 27:45-56; Maak 15:33-41; Jɔɔŋ 19:28-30)

44 Ə chulə kitaŋ chu bwo lemi ba ə bitaŋ bəŋ yuufi ə nchɔ bifwe jɨbə gbe ə kitɨŋ kie mə kinhliŋ gəŋ bwii ə bitaŋ bəŋ bitɔh ə bushi, 45 yulahalə ŋwiŋ mà baala tə kə. Kindu kkɨŋ bə́ mà hlɨhɨŋ kie ə chəŋ ntofi mə shwaanə kintekinte fu wɛɛ fwe. 46 Jisho de gbaaŋ bə die ntaabə ə kiŋgwa kie go lə. “Tah, nnəə fiana ŋgwəŋ ə wə kwáŋ.” Ye i yɔɔlə nəni, i hlə ŋɔɔni ŋɔɔninə kiih ki həŋgbɔŋ.

47 Che kwoo ki bəne bə bicha nnu i mà lemi yo həmə, ŋəŋ fieŋ ffɨŋ fi màa fi kāh fie, i nə kiŋkohi bə Chu yɔɔ lə, “Chɛɛŋ, chɛɛŋ, Mbɛɛ nu ma kə kənə gbenə kə.” 48 Bəne bənhliŋ bbəŋ bə́ mà bumə bie həmə ŋəŋ fieŋ ffɨŋ fi màa fi kāh fie, lə bə́ ŋəŋ nəni, bə́ hlə fiimə yee bə́ kwə̄lə ə kwili ŋəbə mə bə́ bwaana kwáŋ bweŋ. 49 Binshiŋ bi Jisho binhliŋ mà bwoo ŋkwo bi bwo lemi fibə je nyɛɛkə yee bi ŋə̄ŋ fieŋ ffɨŋ fi kāh. Bədi duŋ bəkwɛɛ bbəŋ bə́ mà fu ə Galilii bwo bələ wu.

Bə́ diih Jisho

(Matio 27:57-61; Maak 15:42-47; Jɔɔŋ 19:38-42)

50-51 Mbɛɛ ju mà duŋ ə bwɔɔ yo bəŋ bə́ chēe wu lə Joshɛ, ə duŋ mbɛɛ nu kibalaki kidi ki Bəjuu mə kkɨŋ bə́ chèe lə Alimatia. I mà duŋ mbɛɛ nwaa i duŋ mbɛɛ ntiiŋ ə Chu fwi, i kè dəŋ bwɔɔ nnu Chu yá bwo yee i hlāah muŋkɨŋ mwii. I mà duŋ mbɛɛ ə kintu ki bəne bbəŋ bə́ màa bə́ hlāah kitɨŋ mə. Kwaalə, i mà kə bemi wu fiih fieŋ ffɨŋ bə́ mà dɔ fie bənfə bə Jisho kə. 52 I gəŋ ŋəŋ Paylɛt, kɔnɔ wu lə i gəŋ jə kiŋwuuni ki Jisho kie. 53 Paylɛt bemi, i hlə gəŋ hlili bə kiŋwuuni kie, bwɛɛ ki ə kindu ki wɛɛŋ mə, gəŋ nɔhiŋ chi ki ə biee nni bə́ mà gbe ə tə mə, dɔhɔ kkɨŋ bə́ kə hlaa lə diih mbɛɛ mə kə. 54 Ə màa Butuu bbuŋ bə́ màa bə Nɔ̄hiŋ bunte, ə she chɛɛ lə bunte chɔɔ.

55 Bəkwɛɛ bbəŋ bə́ mà fu bie ə Galilii bələ Jisho, bələ Joshɛ gəŋ ə biee ye bəŋ, gəŋ ŋəŋ ye i nɔ̄hiŋ lə kiŋwuuni ki Jisho kie ə biee ye mə. 56 Bə́ ja no həmə, chu dɨŋ ə ŋəŋkwili ŋəbə mə, gəŋ bwɛɛ fə mɛŋ mənwaa mənfuchee nwaa ba. Mməŋ bə́ lə yee bə́ bā bənlɔɔ kiŋwuuni kie mu. Lə yee ə dūŋ butuu bu bunte bə́ shi, ye bəŋkɨnə bəbə mà kiɛɛ lə.