Lukaa 24

Jisho fu ə kpe mə

(Matio 28:1-10; Maak 16:1-8; Jɔɔŋ 20:1-10)

Butuu bu bunte bwo kah, bu fu wu ə duŋ butuu bu fwii ə kibumwe mə. Bəkwɛɛ bie fu fili fili, jə mɛŋ mməŋ bə́ mà fə mie yee bə gə̄ŋ ə jəŋ ye bəŋ. 2 Lə bə́ gəŋ bwii həmə, bə́ ŋəŋ lə bə́ hə bɨhaŋ fwoo tə llɨŋ bə́ mà baŋ le ə jəŋ ye bəŋ. 3 Lə bə́ lɛɛ gəŋ mə biee ye mə bə́ nakə ŋəŋ nə ə kiŋwuuni ki Baba Jisho kie go kə. 4 Bə́ hlə lemi həmə kpɛkɛlɛɛ. Fi kah lə bənəə bəfwe mà lema baha həmə, bə́ leela bindu biwu bi tə̄ mwaŋ mwaŋ mwaŋ. 5 Bəkwɛɛ bie lɔ gbaaŋ, hlə chɨŋ bikuu kwe. Bənəə bie bii bə bə́ ləə, “Ə laha ffɨŋ bə kīɛɛ mbɛɛ ŋkee ə bəne bəŋkpi mə lə? 6 Mə lə fəŋ kə, mə hə fwoo ə kpe mə. Bə hle fieŋ ffɨŋ i mà yɔɔ bə bəŋ bwɔɔ nnu bə màa bə dūŋ bə wu ə Galilii. 7 I mà yɔɔla lə, ‘Bə́ kənə bənnə Ŋwa Mbɛɛ ə kwáŋ ŋə bəne bə bieŋ biwaha mə, ə bə́ bweeni wu ə kiŋgwa go, ə chu duŋ ə joo bəŋ tɔh, ə i fu ə kpe mə.’”

8 Bəkwɛɛ bie hlə ŋoo fieŋ ffɨŋ Jisho mà yɔɔ fie bə bə́. 9 Bə́ ja no həmə ə jəŋ ye bəŋ fiimə chu dɨŋ gəŋ yɔɔ bieŋ bɨhŋ binhliŋ bə bəne biih bə kintu bə yuufi ə nchɔ mwi bie maa bəne bənhliŋ bbəŋ bə́ màa bə bə̄lə bie wu. 10 Bəkwɛɛ bbəŋ bə́ mà yɔɔ bie bieŋ bbɨŋ bi mà duŋ bie bə bəne bə faŋnə bə Jisho mà duŋ Meeli Madaliŋ, Juhana maa Meeli mah Jɛŋ bə bəkwɛɛ bədi. 11 Bə́ wo biyɔɔnə bie ye biyɔɔndu lə, nakə bemi ba kə. 12 Kwaalə, Pita bu ja fa, lələ gəŋ həmə ə jəŋ ye bəŋ, bwɔkwe mia mə biee ye mə ŋəŋ kwaa ə duŋ bindu bbɨŋ bə́ ma bini bie Jisho mu. I hlə no yee i chū dɨŋ ə chəŋ, gbo kpee wu ə ŋkpe mə bə fieŋ ffɨŋ fi duŋna fie.

Bəne bədi ŋəŋ Jisho ə je nni Emawo mə

(Maak 16:12-13)

13 Fi ja gbe bumbimbwe lə, bəne bədi bəfwe bbəŋ bə́ màa bə́ bā bəmbələ Jisho mà noo ə Jelushalɛŋ bə́ gəŋ ə kwili lidi llɨŋ bə́ chèe lə Emawo, li duŋ ye bəmaa fumanyaaŋ lə bəŋgəŋ bwii həmə.^ª 14 Bə́ gəŋ yee bə́ yɔ̄ɔ bə́ bə́ ki bieŋ bbɨŋ bi ma kah bie binhliŋ. 15 Ye bə́ màa bə́ jāa lə bə́ yɔ̄ɔ bə́ nāamə nəni, Jisho kibɛɛ bwo baha ə bə́ go yee i jāa bə bə́. 16 Fieŋ fidi fə bə́ nakə kələ mbɛɛ yo kə. 17 Jisho hlə ja bii bə bə́ ləə, “Ə laha ffɨŋ bə́ jāa bə́ yɔ̄ɔ fie ki fi nəni lə?” Ye i biilə nəni, bə́ hlɨkə lemi, chɨŋ mənhlɨŋ kwe. 18 Mbɛɛ ju ə bə́ mə nnu yii liih mà duŋ lə Klofa bii bə wu ləə, “Ə wə kwaa nfuntə fəŋ ə Jelushalɛŋ nnu wə kə kələ bieŋ bbɨŋ bi kaah fəŋ ə joo ŋəhŋ mə lə?”

19 I bii ləə, “Ə bilaha lə?” Bə́ chuu lə, “Bieŋ bbɨŋ bi kaah bə Jisho nnu Nashalit. Mbɛɛ nnu i màa i dūŋ yo mbɛɛ hlɨŋ Chu, bieŋ bbɨŋ i maa i fə̄, maa bbɨŋ i maa i yɔ̄ɔ ma duŋ bi ŋɨŋ gəə. I mà duŋ ŋwuŋ ŋkuntaŋ gbaaŋ ə Chu fwi maa bə bəne bənhliŋ. 20 Bəche ntofi bəŋkuntaŋ bəŋkuntaŋ bə bəne bbəŋ bə́ hlàah kitɨŋ kiaa ma nəə wu lə bə́ jii. Bə́ hlə bweeni wu ə kiŋgwa go. 21 Kkə mà yiila bufe bwaa ə wu mə lə ə wu nnu mə yah bəne Bəishlael ə ŋgə mə. Kwaalə daŋ duŋ joo tɔh ye bieŋ bɨhŋ ma kah. 22 Fidi ffɨŋ fi baha mu duŋ dəŋ lə, bəkwɛɛ bədi ə kintu kiaa mə bə́ yɔɔla kpee be gbo, lə bə́ hə fwoo gəŋ ə jəŋ ye bəŋ həmbumbwaa fili fili, 23 bə́ nakə ŋəŋ nə ə kiŋwuuni kiih kie go kə. Lə bə́ fiimə chu dɨŋ, bə́ yɔɔ lə bə́ hə gəŋna ŋəŋ bənchinda bə Chu ye yobutuu lə, bə́ yɔɔ bə bə́ lə Jisho yo ŋkee. 24 Bəne bədi ə kintu kiaa mə gəŋna ə jəŋ ye bəŋ gəŋ ŋəŋ dəŋ lə yəəŋ ye bəkwɛɛ bie hə yɔɔ lə, kwaalə bə́ kə ŋəŋ nə ə Jisho go kə.”

25 Jisho yɔɔ bə bə́ lə, “Hooo, binfili bɨhŋ, tɔ́ŋ ŋieeŋ ŋəhŋ duŋ ŋə ŋkpi bəmbemi bieŋ bbɨŋ bəne bə hlɨŋ Chu yɔ̀ɔ. 26 Bə kə kələ lə Nchuu Fwoo nnu Chu mà kaachi yo ma kənə bəŋəŋ bəŋgə bəhŋ ə i hlə lɛɛ ə kiŋkuntaŋ kiih mə lə?” 27 Jisho hlə chɔɔ bəndontə bieŋ binhliŋ bbɨŋ bə́ mà bieŋna ə Kiŋwaati ki Chu mə yu wu, chɔɔ ə bbɨŋ Mushe mà bieŋna, gəŋ bwii dəŋ ə bi bəne bə hlɨŋ bə Chu go. 28 Ye bə́ mà bwo bwii lə baha ə kwili llɨŋ bə́ màa bə́ gə̄ŋ le ə li mə, Jisho fə ye i kah lə ə ŋkah mə. 29 Bə́ kɔnɔ wu ntakə yɔɔ lə, “Duŋ bə be. Bwɔɔ gəŋna gbaaŋ, yu jɨbə chɔɔla bəŋgbe.” Nəni i bemi bəŋgəŋ nɔŋ bə bə́. 30 Bə́ gəŋ, ə chu lə yee bə́ dī biləə, i jə chee kibele, nə kimbaafɛɛ bə Chu, gaa nə bə bə́. 31 Cha mi nəni díi ŋəbə chaa, bə́ hlə kələ wu. I bu la kpaanii ə bə́ dí. 32 Bə́ she yee bə́ nāamə bə́ bə́ ləə, “Nhle lə tɔ́ŋ ŋiaa həə ŋə shī bwɔɔ nnu mə həə i yɔ̄ɔ bə be wa ə je lə, i nachɛ bieŋ bə be ə Kiŋwaati ki Chu mə lə?”

33 Bə́ hlə ja cha mi kitaŋ kimbini kie yee bə́ chū dɨŋ ə Jelushalɛŋ. Ə chulə bə́ gəŋ, bə́ ŋəŋ bəne bə Jisho bə kintu bə yuufi ə nchɔ mwi bie bə́ buma dɔhɔ mwe bə bəne bədi bbəŋ bə́ màa bə bà bie bəmbələ wu. 34 Bə́ yɔɔ lə, “Chɛɛŋ Baba ya fwoo ə kpe mə buhla fu ə Shaamuŋ dí.” 35 Bə́ hlə yɔɔ dəŋ bə bə́ fieŋ ffɨŋ fi hə duŋ bə bə́, baa yɔɔ ye bə́ hə kələ wu bwɔɔ nnu mə həə i gāa kibele.

Jisho gənə fu ə bəne biih bə kintu mə

(Matio 28:16-20; Maak 16:14-18; Jɔɔŋ 20:19-23)

36 Dəŋ ye bə́ kaani lə bə́ yɔ̄ɔ nəni, Jisho kibɛɛ hlə buhla fu ə bə́ mə hlə chee bə́ lə, “Kindunshiiŋ duŋ bə bəŋ.” 37 Kikpɔ kpe bə́, yee bə́ lɔ̄, bə́ hlē lə ə kiyii kkɨŋ bə́ ŋəŋna. 38 I bii bə bə́ ləə, “Ə laha ffɨŋ bə nāamə mi lə? 39 Bə́ chiini ŋəŋ kwáŋ ŋəŋŋ bə wuh ŋəŋŋ ə bə hlə kələ ba lə ə mi kibɛɛ. Bə mɔŋ wo gbo wuŋŋ ə bə́ hlə kələ yulahalə kiyii kənə lə ba nyaŋ bə bikuu ye ŋkənə lə kə.” 40 Ye i yɔɔlə nəni, i hlə nyii bə́ kwáŋ ŋiih bə wuh ŋiih. 41 Lə bə́ kee Jisho kinjənjə jii bə́, bikəllə hluŋ bə́. Fi chi bə́ bəmbemi lə ə wu. I ja bii bə́ ləə, “Bə bie bə fieŋ fidinə fəŋ lə?” 42 Bə́ jə wɛɛ wi fiɔɔnə wuunə nə wu. 43 I jə di ə bə́ dí.

44 I hlə yɔɔ bə bə́ lə, “Bieŋ bbɨŋ bə ŋəŋna bɨhŋ daŋ lə bieŋ bbɨŋ mmàa n'yɔ̄ɔ bə bəŋ ki bi ŋkaani bə bəŋ. N'yɔ̄ɔ lə bieŋ bɨhŋ binhliŋ bbɨŋ bə́ mà bieŋ kɨŋŋ ə Kiŋwaati ki Mushe mə, bə ə Biŋwaati bi bəne bə hlɨŋ bə Chu mə maa Biŋwaati bi Ŋkohi mə, kənə bəmbwo fu yəəŋ.” 45 I hlə wɛ bufe bubə, bəŋkələ bieŋ bbɨŋ bi dūŋ ə Kiŋwaati ki Chu mə. 46 I yɔɔ lə Bə́ bieŋna lə Nchuu Fwoo nnu Chu mà kaachi yo kənə bəŋəŋ ə ŋgə go, ə i kpe, ə bwo duŋ ə joo bəŋ tɔh, ə i fu ə kpe mə. 47 Fi baa duŋ lə bə́ lə chɔɔ ə Jelushalɛŋ, yee bə dōntə bə bitɨŋ ə yii liih bəŋ lə, bəne bənhliŋ fii tɔ́ŋ ŋəbə fo Chu lə laamə nə yíwaha yibə. 48 Ə bəŋ bbəŋ bə ŋəŋna bie ə bieŋ bɨhŋ go bbəŋ bə yáa bə dōntə. 49 Bə wələ wo, “Nlə nfaŋ bəŋ nə llɨŋ Tah mà kaachi le bəŋ bə li. Kwaalə bə ba fəŋ ə kibalaki mə, yee bə kê muŋga mmuŋ mu hlili mwe bwo buh ə bəŋ bəŋ.”

Jisho biŋ buh

(Maak 16:19)

50 I jə fu bə bə́ ə kwili le mə, bəə bə́ gəŋ bwii baha ə kwili li Betani go, i tuuli kwáŋ ŋiih buh, hləmə bə́. 51 Ye i màa i kāani lə i hlə̄mə bə́ nəni, Chu hlə jə wu i biŋ buh, hlə biŋ gəŋ la. 52 Bə́ nə kiŋkohi bə wu gbaaŋ, hlə ja həmə fiimə chu dɨŋ ə Jelushalɛŋ bə kintɨŋ kiŋkuntaŋ ə tɔ́ŋ ŋəbə go. 53 Bə́ gəŋ yee bə́ shī ə chəŋ ntofi mə bə́ dōhi Chu bwɔɔ mənhliŋ.