Jisho fu ə kpe mə
28
Lə bunte bwe kah, kibweenə chɔɔla bənchaa, ə duŋ butuu bu fwii ə kibumwe go, Meeli Madaliŋ bə Meeli ju yo gəŋ bəŋgəŋ nchiini jəŋ ye. 2 Fi kah lə, shishɔ mà nəna bə muŋga, yulahalə nchinda Baba mà hlila bwo ə buh bɨhɨŋ tə liŋkuntaŋ llɨŋ bə́ mà kəə le fwiih wi joo kie mu hlə shii ə li bəŋ. 3 Bushi bu nchinda yo màa bu tə̄ ə waalə ə lala jaŋ, bindu biih wūunə nəni buuu. 4 Bəne bbəŋ bə́ màa bə́ fwōŋ bie jəŋ ye ŋəŋ ə wu go, nɨhŋ kwo bə́ gbaaŋ, yee bə́ nə̄nə nəni kɨkɨkɨkɨ, bə́ gbe həkwe yee bə́ nɔ̄ŋ həmə ye bəne bəŋkpi lə. 5 Nchinda Chu yo yɔɔ bə bəkwɛɛ bie lə, “Bə kə lɔɔ kə. Ŋkələ lə bə kīɛɛ ə duŋ Jisho nnu bə ma bweeni yo ə kiŋgwa go. 6 I kaani fəŋ kə, mə hə fwoo ə kpe mə ye i mà yɔɔ lə. Bə bwo ŋəŋ dɔhɔ kkɨŋ i maa i nɔ̄ŋ kie. 7 Bə gəŋ chichii bə gəŋ yɔɔ bə bəne biih bə kintu lə mə hə fwoo ə kpe mə, lə mə kaah bəŋ fwi bəŋgəŋ ə Galilii. Bə lə gəŋ ŋəŋ ə wu go mə. Bə wələ wo, bə woo fi kaa ye n'yɔ̄ɔ lə bə bəŋ.” 8 Bəkwɛɛ bie hlə no ə joo kie bəŋ chichii bə nɨhŋ, kwaalə bə́ duŋ dəŋ bə kinjənjə mu gbaaŋ, bə́ lə̄lə, bəŋgəŋ yɔɔ bə bəne bə Jisho bə kintu bie. 9 Ye bə́ màa bə́ gə̄ŋ lə, fi duŋ lə bə́ bəə Jisho bənə, i chee bə́ lə, “Ncheela bəŋ.” Bə́ hlə baha ə wu go, bə́ gbe kwaamə wuh ŋiih, kohi wu. 10 Jisho yɔɔ bə bə́ lə, “Bə kə lɔɔ kə. Bə gəŋ yɔɔ bə bəŋgwoŋ lə yee bə́ gə̄ŋ ə Galilii lə ə mə nnu bə́ lə ŋəŋ ə mi go.”Bəne bbəŋ bə́ màa bə́ fwōŋ bie jəŋ ye yɔɔ fieŋ ffɨŋ fi mà kah
11 Bwɔɔ nnu bəkwɛɛ bie mà too yee bə́ gə̄ŋ, fi bwo duŋ lə bəne bə bicha bədi bbəŋ bə́ màa bə́ fwōŋ joo kie ja yee bə́ gə̄ŋ ə kibalaki kie mə bəŋgəŋ yɔɔ fieŋ finhliŋ ffɨŋ fi hə kaah bə bəche ntofi bəŋkuntaŋ bəŋkuntaŋ bie. 12 Bəche ntofi bəŋkuntaŋ bəŋkuntaŋ bie hlə buhuŋ bəne bbəŋ bə́ hlàah kitɨŋ bəə bə́ shii chuŋ, bə́ hlə baŋ biwu bi bəne bə bicha bie bə kpo kiŋaaŋkə, 13 yɔɔ bə bə́ lə, “Yee bə yɔ̂ɔ bə bəne lə, kkə maa kkə nɔ̄ŋ kinɨŋ ə butuu bəne biih bə kintu bie hlə bwo yi jə kiŋwuuni kiih kie gəŋ bə ki. 14 Ə bə yɔɔ nəni, ə fi lɛɛ ə bituŋ bi mbɛɛ muŋgeni yo kwáŋ, ə mə kiɛɛ lə i nə bəŋ ŋgə, ə kkə bwɛɛ bə wu, ə i nakə baa lə nə bəŋ ŋgə kə.” 15 Nəni bə́ hlə jə kpo we hlə yee bə́ yɔ̄ɔ dəŋ ye bə́ mà yɔɔlə bə bə́. Yo ni hlə hlaamə ə Bəjuu mə bwo bwii daŋ lə, bə́ mà yi jə kiŋwuuni ki Jisho bu yi nə.
Jisho faŋ bəne biih ə mbiŋ nu nte kiɛkiɛ
16 Bəne bə kintu bə Jisho bə yuufi ə nchɔ mwi bie hlə ja gəŋ ə Galilii, biŋ gəŋ ə kɔnɔ kkɨŋ Jisho hə yɔɔ kie bə bə́. 17 Bwɔɔ nnu bə́ mà ŋəŋ ə wu go, bə́ kohi wu. Kwaalə bədi yee bə́ jɨ̄mə wu. 18 Jisho baŋ bwo yɔɔ bə bə́ lə, “Tah ma nəə kaa mi muŋgeni munhliŋ mu buh maa mu kwe. 19 Nəni, bə gəŋ ə bitɨŋ binhliŋ mə, yee bə fə̂ bəne dùŋ bəne bə kintu kɨŋŋ, yee bə yîi bə́ ə njɔ ə yii li Tah bəŋ, bə li Ŋiaani, maa bə li Fiana Wɛɛŋ bəŋ. 20 Yee bə lâanə bə́ lə yee bə́ fə̂ fieŋ finhliŋ ffɨŋ mmaa ŋkēeh bəŋ mu. Bə wələ wo, nlə n'yee ndūŋ bə bəŋ bwɔɔ mənhliŋ gəŋ bwii maa bwɔɔ nnu mbiŋ yá kah.”