Nimi 1

Kiŋwaati ki Nimi

ki bəne bə faŋnə bə Jisho

Che kwili Tiofilo, ə kiŋwaati ki fwii mə kkɨŋ mmà nhlaa bieŋ bə wə, mmà mbieŋna mənte ki bieŋ binhliŋ bbɨŋ Jisho màa i fə̄, maa bbɨŋ i màa i lāanə bəne mu, gbe jə ye i mà chɔɔ nimi liih, 2 gəŋ bwii butuu bbuŋ Chu mà jə wu i biŋ buh. Chu mà chu jə wu biŋ buh, duŋ i mà kaah ə Fiana Wɛɛŋ mə bəŋkeeh bəne biih bə kintu bbəŋ i mà shaala. 3 Bwɔɔ nnu i mà fu ə kpe mə, i nyii gbo wiih bə bə́ ə joo mə mbwɛɛnya ə jé mə kiŋaaŋkə yyɨŋ yí nyìi lə i yo ŋkee. I yɔ̀ɔ dəŋ bə bə́ ki muŋkɨŋ mu Chu. 4 Ye bəə bə́ màa bə́ dūŋ lə nəni, i yɔɔ bə bə́ lə, “Bə kə noo ə Jelushalɛŋ kə. Yee bə kê nnə llɨŋ Tah mà kaachi le bəŋ bə li llɨŋ bə mà wo le n'yɔ̀ɔ ki li. 5 Yee bə kə̂lə lə Jɔɔŋ màa i yīi bəne ə njɔ, kwaalə ə joo mə chɛɛ duŋ ə Chu yá yii bəŋ ə duŋ ə Fiana Wɛɛŋ mə.”

Jisho biŋ buh

6 Jisho bə bəne biih bə faŋnə yee bə́ dūŋ ə bwɔɔ ju bəŋ, bə́ bii bə wu ləə, “Baba, bwɔɔ wuna nnu wə lə fə ə bəne biaa bə Ishlael chu hlaah muŋkɨŋ mubə lə?”

7 I chuu bə bə́ lə, “Bwɔɔ yo ləkə butuu bbuŋ fi lə duŋ ə ndɔ chi Tah ŋgwəŋ bə muŋgeni mwii, ə kə duŋ nə dɔhɔ kieeŋ bəŋkələ kə. 8 Ffɨŋ bə duŋ bəŋkələ duŋ lə Fiana Wɛɛŋ yá yi bwo fiili bəŋ, ə bə hlə kənə muŋga, chɔɔ bən'yɔɔ kɨŋŋ ə Jelushalɛŋ maa ə wɛ́ɛ ŋə Judia mə bə ŋə Shamalia mə ŋənhliŋ, gəŋ bwii ə bənchi bənua bə mbiŋ nu mə.” 9 Kwaalə ye i yɔɔ lə bə́ nəni, Chu hlə jə wu yee i bīŋ buh bə́ chīini ye i bīŋ lə, i biŋ joonə kəə wu, i la ə bə́ dí.

10 Ye bə́ tɨŋ lə díi buh yee bə́ chīini jwaaŋ ye i bīŋ lə, fi duŋ lə bənəə bəfwe mà jaa gənə fu bwo bə́ leela bindu biwu buuu, bə́ lema baha ə bə́ tɨŋ, 11 bii bə bə́ ləə, “Bənəə bə Galilii, bə lēmi bə kēe laha wa buh lə? Jisho nnu Chu jə nu ə bəŋ mə biŋ buh yá yi baa fiimə bwo dəŋ yəəŋ ye bə ŋə̄ŋ lə ə wu go i bīŋ buh.”

Matia jə dɔhɔ ki Judash

12 Bəne bə hlɨŋ bə Jisho hlə no ə Kɔnɔ kkɨŋ bə́ chèe lə ki Bite bi Olif go bə́ chū dɨŋ ə Jelushalɛŋ, ə màa kwaa ye kiŋkə ki maay lə bəŋgəŋ bwii həmə.^ª 13 Ye bə́ lɛɛlə həmə, bə́ hlə biŋ gəŋ lɛɛ ə chəŋ nni nte ə chəŋ nni fa mə ə dɔhɔ kkɨŋ bə́ màa bə́ bā bəŋgəŋ ŋɔɔni. Bəne bəhŋ mà duŋ Pita bəə Jɔɔŋ, Jɛŋ maa Andulu, Filip bə Tɔma, Batolomu bə Matio, Jɛŋ ŋwa Alfiyu, Shaamuŋ nnu i mà duŋ mbɛɛ ə kintu ki Bəjilɔt mə^ª maa Juda ŋwa Jɛŋ. 14 Bə́ bəə bəkwɛɛ bədi maa Meeli mah Jisho bə bədɨŋ Jisho màa bə́ bā bəmbumə fieŋ fimwi bənchee Chu bwɔɔ mənhliŋ.

15 Lə ə bwo duŋ ə joo ŋie mə, bəne bə kintu bə Jisho bumə. Bə́ mà duŋ həmə ye bəne gbi bə bəne mbwɛɛnfie lə (120). Pita ja fa yɔɔ bə bə́ lə, 16 “Bəŋgwoŋ bəŋŋ, fieŋ ffɨŋ Kiŋwaati ki Chu mà yɔɔ duŋ lə fi duŋ ba yəəŋ. Ə fi ffɨŋ Fiana Wɛɛŋ mà fə Daafi hlə yɔɔ ə kaani ki Judash nnu i mà kah yo fwi bə́ hlə kwo Jisho. 17 Bə kələ lə Judash nu mà duŋ mbɛɛ ju ə kintu kiaa mə be be, i kə̀nə lii nimi ə be mə.”

18 (Pita hə chu yɔɔ nəni duŋ Judash mà jəə kpo wwuŋ bə́ mà nəə bə wu yu fieŋ ffɨŋ i mà fə bihi, taŋ dɔhɔ mu. Dɔhɔ kɨhŋ duŋ, fo fo i mà gbe həmə chɨŋ kwoo kwe te bwuuu, bulə fu kiɛkiɛ. 19 Bəne bə Jelushalɛŋ bənhliŋ wo, hlə yee bə́ chēe dɔhɔ kie ə díe yibə mə lə Akɛldema, lə duŋ lə, “Dɔhɔ ki Ŋgɔŋ.”)

20 Pita baa yɔɔ lə, “Daafi mà bieŋna ə Kiŋwaati ki Ŋkohi mə lə,

‘Bə she kwili liih li chu bichili,

mbɛɛ kə baa lə yee i dûŋ həmə kə.’

Fi duŋ i bieŋna dəŋ lə,

‘Mbɛɛ ju kənə bənjə chuu dɔhɔ kiih ki nimi kie.’

21-22 Ye fi duŋ lə nəni, mbɛɛ ju kənə bənchili be, yee kkə dôntə lə Baba Jisho mà fwoo ə kpe mə. Mbɛɛ yo kənə bənduŋ mbɛɛ nnu i màa i jāa bə be bwɔɔ mənhliŋ ye Jisho màa i jāa lə bə be chɔɔ jə bwɔɔ nnu Jɔɔŋ màa i yīi bəne ə njɔ, gəŋ bwii butuu bbuŋ Chu mà jə Jisho ə be mə i biŋ buh.”

23 Ye i yɔɔlə nəni, bə́ hlə bwa bəne bəfwe. Ju yo mà duŋ Joshɛ nnu bə́ màa bə́ chēe lə Bashaba bə́ chēe dəŋ lə Jushtu, ju yo duŋ Matia. 24 Ye bə́ bwa lə bə́ nəni, bə́ hlə chee Chu lə, “Baba, wə kələ tɔ́ŋ ŋə bəne bənhliŋ. Nəni, nyii be mbɛɛ nnu wə shaala ə bəne bə bəfwe bəhŋ mə, 25 lə i duŋ mbɛɛ faŋnə Jisho nnu mə lə jə chuu dɔhɔ ki Judash ki nimi, kkɨŋ i mà she kie gəŋ ə kiih dɔhɔ mə.” 26 Ye bə́ chee lə Chu nəni, bə́ hlə bieŋ yíi ŋəbə, nɛhiŋ, li Matia fu gbe. Bə́ hlə yiinə wu ə kintu ki bəne bə faŋnə bə Jisho bə yuufi ə nchɔ mwi bie go.