Nimi 2

Fiana Wɛɛŋ bwo

Lə butuu bu Chɔnɔ kidi kkɨŋ bə́ mà chee lə Pɛntikɔ ki bwo wunə, ə duŋ bəne bənhliŋ bbəŋ bə́ mà yii tɔ́ŋ ə Jisho mə buma dɔhɔ mwe. 2 Bə́ hlə gənə wo ye fieŋ fidi dimi hlili bwo buh ye litiɛɛni lə. Fi hlili lə, lɛɛ yii ə chəŋ mənhliŋ ye mə, nni bə́ mà duŋ ye mu. 3 Ə chulə bə́ kee, bə́ ŋəŋ fieŋ fidi fi duŋ ye ŋəniini ŋə bwii lə, fi hlaamə gəŋ ə mbɛɛ mənhliŋ go. 4 Fiana Wɛɛŋ bu yii ə bə́ mə bənhliŋ, fə yee bə́ yɔ̄ɔ ə díe yí bitɨŋ mə chili chili. 5 Ə mà duŋ ə bwɔɔ yo bəŋ, Bəjuu bbəŋ bə́ mà jəə bwɔɔ yii tɔ́ŋ ə Chu mə mà duŋ ə Jelushalɛŋ, bə́ fù ə bitɨŋ binhliŋ mə bi yaŋ kwe. 6 Ye bə́ wo lə nəni, bə́ hlə bumə bwo kiŋaaŋkə ə dɔhɔ kkɨŋ bəne bbəŋ bə́ mà yii bie tɔ́ŋ ŋəbə ə Jisho mə mà duŋ. Bəne bbəŋ bə́ mà yiila bie tɔ́ŋ ə Jisho mə yɔ̄ɔ, mbɛɛ mwi mwi wò ə díe yiih mə. Fi fɨhɨŋ bə́. 7 Gəə ŋɨŋ bə́, yee bə́ nāamə ə naamə mə, bə́ yɔ̄ɔ ləə, “Nhle lə bəne bəhŋ bənhliŋ lə bəne bə Galilii lə? 8 Fi jaa ləhəŋ maa yee kkə wō mbɛɛ mənhliŋ ye bə́ yɔ̄ɔ ə díe yí kitɨŋ kiaa mə lə? 9 Be bədi no ə Paltia, bədi no ə Mede bə Elaŋ, bədi no ə Meshopotemia bə Judia maa Kapadoshia, bədi no ə Pwɔntu bə Ɛshia. 10 Be bədi no ə Fligia bə Panfilia, bədi ə Ijip bə wɛ́ɛ ŋə Libia mə, ŋŋəŋ ŋə duŋ baha ə kibalaki ki Shiliŋ go. Be bədi no ə Luŋ, ə duŋ Bəjuu bə bəne bbəŋ bə́ mà fiima chu bəne bə kimbemi ki Bəjuu. 11 Be bədi no ə Klɛt bə Libia. Kkə wò ə díe yaa mə chili chili ye bəne bəhŋ yɔ̄ɔ bieŋ bikpee gbo bbɨŋ Chu fəə.” 12 Gəə ŋɨŋ bə́, yee bə́ nāamə bə́ bə́ ləə fɨhŋ fieŋ nyīi lə laha lə? 13 Bəne bədi yee bə́ fē ŋkwo bə́ ə nfe mə bə́ yɔ̄ɔ lə, “Mbihŋ kwoo bəne bəhŋ.”

Pita yɔɔ bə bəne

14 Nəni, Pita bə bəne bə hlɨŋ bənshɔli bə Jisho bə yuufi ə nchɔ mwi bie lemi həmə. Pita hlə chɔɔ bən'yɔɔ bə kimɔ ki bəne kie ntakə gbaaŋ lə, “Bəjuu bəŋŋ maa bəne bənhliŋ bbəŋ bə́ dùŋ ə Jelushalɛŋ, ŋkiɛɛ lə bə kələ fɨhŋ. Bə nə bituŋ bieeŋ kinwaa bə fieŋ ffɨŋ nlə n'yɔ̄ɔ bə bəŋ. 15 Mbihŋ kə kwoo bəne bəhŋ ye bə hlē lə kə. Fidiɛɛ yu kaani kwaa bitaŋ fumayuufi həmbumbwaa. 16 Fieŋ ffɨŋ fi kaah fie fidiɛɛ lə ffɨŋ Jwɛl mbɛɛ hlɨŋ Chu mà yɔɔlə,

17 ‘Chu yu yɔ̄ɔ lə, ə yá chu duŋ ə joo ŋə həŋgbɔŋ ŋie mə,

ə i yá ŋwoŋ Fiana wi ə bəne bəŋ bənhliŋ.

Nəni, bwɔni bieeŋ bəniɛ maa bəkwɛɛ yee bə́ wō bieŋ bbɨŋ i yɔ̀ɔ, bə́ yɔ̀ɔ bə bəne,

ə bieŋ ye yobutuu lə yee bi kwō hlɔ́ŋ yeeŋ,

ə yó yibutuu yee yi kwō bəne bieeŋ bəcha.

18 Ə yá chu duŋ ə joo ŋie mə,

ə i yá ŋwoŋ Fiana wi ə bəne biih bə nimi go bənhliŋ,

bə bənəə maa bə bəkwɛɛ,

ə yee bə́ wō bieŋ bbɨŋ i yɔ̀ɔ, bə́ yɔ̀ɔ bə bəne.

19 Mə yá fə bieŋ bi ŋɨŋ gəə,

baa fə bieŋ bbɨŋ bi nyìi muŋgeni mwii yaŋ kwe.

Ŋgɔŋ bə bwii maa ndɨŋ məŋkwo nɨŋ yá yi duŋ.

20 Kitaŋ yá yi gbee jɨbə,

ə kpii ja geenə ye ŋgɔŋ lə,

ə butuu buŋkuntaŋ bu Baba bu ŋkpeenə gbo hlə bwo.

21 Nəni, maa nyəhə nnu i nòŋ ə yii li Baba bəŋ, yá fukwoo.’”

22 Pita baa yɔɔ lə, “Bəne bə Ishlael, bə wələ wo kinwaa fieŋ ffɨŋ n'yu n'yɔ̄ɔ. Jisho nnu Nashalit mà duŋ mbɛɛ nnu Chu mà nyiila bə bəŋ lə ə wu nnu i faŋ wu ye i mà fə lə Jisho fə̀ bieŋ bbɨŋ bi nyìi muŋgeni mu Chu bə bieŋ bi ŋɨŋ gəə ə bəŋ mə kintekinte. Bə kə̀lə bieŋ bɨhŋ kinwaa. 23 Jisho nu duŋ mbɛɛ nnu bə́ mà nə bə bəŋ, ə duŋ Chu nnu i mà kaachi, fi chu bwo duŋ mə hə kəla. Bə hlə jii wu ye bə mà nə lə wu ə kwáŋ ŋə bəne bə bieŋ biwaha mə, bə́ bweeni wu ə kiŋgwa go. 24 Kwaalə, Chu fwoo wu ə kpe mə, i fukwoo ə kwáŋ ŋə kpe mə yulahalə kpe mà kə duŋ nə bəŋkənə kaa ə wu kwaŋ kə. 25 Daafi mà yɔɔla ki Jisho nu yɔɔ lə,

‘Ŋŋəŋ ə Baba go nnu i dùŋ bə mi bwɔɔ mənhliŋ

ə kwaŋ wuŋŋ wi diee mə, fo fieŋ lə nakə nɛhiŋ mi kə.

26 Nəni, tɔŋ lɨŋŋ hlə yee li wō njənjə,

n'yɔ̀ɔ bə kintɨŋ.

Ndùŋ mbɛɛ, nnu n'yá kpe ba dəŋ,

kwaalə ŋkee kwaa fwi,

27 yulahalə wə Chu wə yá tookwaŋ lə fiana ŋgwəŋ ba ə kitɨŋ ki bəŋkpi kwuŋ kə.

Wə yá tookwaŋ ə Mbɛɛ nimi wa Wɛɛŋ go lə i fwɔ ə ke kə.

28 Wə nyiila mi jé yyɨŋ nlə ŋkah ə yí mə nhlə fukwoo.

Nlə n'yee ndūŋ bə kintɨŋ ye ndùŋ lə dəŋ ə wə fwi.’”

29 Pita baa yɔɔ lə, “Bəŋgwoŋ bəŋŋ, nduŋ ə n'yɔɔ bə bəŋ kə naamə lə che bətah biaa Ŋkɨŋ Daafi mà kpee, bə́ diih wu, jəŋ yi ye fəŋ bwii daŋ. 30 I mà duŋ mbɛɛ hlɨŋ Chu i kələ ŋkaachi nnu Chu mà kaachi bə wu kaŋ lə mə yá yi nɔhiŋ ŋwa kichəŋ kiih ə kabala wi bəŋ. 31 I kee bəŋəŋ fieŋ ffɨŋ Chu mà duŋ bənfə, hlə yɔɔ lə Nchuu Fwoo nnu Chu mà kaachi yo yá yi kpe fu. Fiee fieŋ ffɨŋ i mà yɔɔ fie lə,

‘I mà kə baa ə bəŋkpi kwuŋ kə,

gbo wiih mà kə fwɔɔ mə ke kə.’

32 Jisho nu duŋ Chu mà fwoola wu ə kpe mə, ə be bənhliŋ bbəŋ kkə duŋ bie bəne biih bə kintu bbəŋ kkə mà ŋəŋna ə wu go. 33 Chu bihiŋ chi wu ə kwaŋ wiih wi diee mə, nə wu Fiana Wɛɛŋ ye i mà kaachi lə. Fieŋ ffɨŋ bə ŋə̀ŋ fɨhŋ bə wò fidiɛɛ lə Fiana nnu Jisho nəə bə be. 34 Ə kə duŋ nə Daafi nnu i mà no biŋ buh kə. Daafi kibɛɛ mà yɔɔla ŋkwo wi lə,

‘Baba Chu mà yɔɔla bə Baba ŋgwəŋ lə,

shii ə kwaŋ wuŋŋ wi diee mə,

35 gəŋ bwii bwɔɔ nnu nlə nnɔhiŋ bəne bwo bbəŋ bə́ duŋ kə diee njənə ə wə fwi,

ə wə diɛŋ wuh ŋo ə bə́ bəŋ ye kinu ki wuh ŋo lə.’

36 Nəni, bəne bənhliŋ bə Ishlael kələ kinwaa lə Jisho nnu bə mà bweeni yo ə kiŋgwa go ə wu nnu Chu mà chi lə i duŋ Baba baa duŋ dəŋ Nchuu Fwoo nnu i mà kaachi.” 37 Ye bəne bie wo lə nəni, yo ye kwo bə́. Bə́ hlə bii bə Pita maa bə bəne bə faŋnə bə Jisho bə nshɔli bie ləə, “Bəŋgwoŋ, kkə lə fə ləhəŋ fidiɛɛ lə?” 38 Pita chuu bə bə́ lə, “Mbɛɛ mənhliŋ fii tɔŋ liih, bə́ yii wu ə njɔ ə yii li Jisho Kleto bəŋ fo Chu lə laamə nə yíwaha yiih baa nə wu nnə lii ə duŋ Fiana Wɛɛŋ. 39 Ŋkaachi nunu duŋ yu bəŋ, maa bwɔni bieeŋ, maa bəne bənhliŋ bbəŋ bə́ dùŋ jé yinyɛɛ. I duŋ yu bəne bənhliŋ bbəŋ Baba Chu yu dīi bə́, bə́ bwò ə wu go.” 40 Pita baa yɔɔ bieŋ kiŋaaŋkə, i kèeh bə́, i nòŋ lə bə́ chɨnə bikuu bibə ə ŋgə nnu i yu bwō yo ə ŋkaani waha nu mə. 41 Lə bəne bie wo biyɔɔnə bi Pita bɨhŋ, kiŋaaŋkə bemi, bə́ hlə yii bə́ ə njɔ. Bumbini bwe bəne yiinə ə kintu ki Jisho mə ye bənchuku bətɔh lə (3,000). 42 Bə́ hlə nə go ŋəbə yee bə́ wō ə duŋ bieŋ bbɨŋ bəne bə faŋnə bə Jisho màa bə́ lāanə. Yee bə́ dūŋ ə kimbumə mə bəə bə́, bə́ gàa kibele, bə́ chèe Chu ə kimbumə mə.

Fwɔ wi kimɔ ki bəne bə kimbemi

43 Bəne bə faŋnə bə Jisho yee bə́ fə̄ bieŋ bi ŋɨŋ gəə bə bieŋ kiŋaaŋkə bbɨŋ bi nyìi muŋgeni mu Chu, bəne ŋə̀ŋ, fi chì bə́. 44 Kintu ki bəne bə kimbemi bənhliŋ yee bə́ dūŋ ye mbɛɛ mwi lə, bə́ kə̀nə fieŋ fibə fimwi. 45 Bə́ jàa bə́ tàa bidɔhɔ bibə maa bieŋ bibə, bə́ gà kpo we ə bə́ go ye ŋgə mbɛɛ duŋ lə. 46 Bə́ ba bəmbumə ə chəŋ ntofi mə joo ŋənhliŋ, bə́ dì mbuhuŋ ə kwíli ŋəbə mə, bə́ lèki ə tɔ́ŋ ŋəbə go kə gee díi kə, 47 bə́ dòhi Chu. Bəne bənhliŋ lèki bə́. Baba chùu i fwòo bəne joo ŋənhliŋ, i yìinə ə kintu kibə go.