Nimi 3

Pita bə Jɔɔŋ ŋwuhuŋ kiŋkəŋkpe

Lə ə bwo chu butuu budi, Pita bə Jɔɔŋ no yee bə́ bīŋ ə chəŋ ntofi ə duŋ bitaŋ bitɔh ə bushi, ə màa bwɔɔ cheenə Chu. 2 Ə bwɔɔ yo bəŋ dəŋ, bəne mà too mbɛɛ ju, yee bə́ bwō bə wu, bə́ bwo bwo chi wu ə fwiih wi mbaŋ tɨŋ wwuŋ bə́ màa bə́ chēe lə Kinwaa wwuŋ wi lɛ̀ɛ ə chəŋ ntofi ye mə. Mbɛɛ yo mà duŋ kiŋkəŋkpe jə həmɛɛ ye bə́ mà bwee wu. Bəne màa bə́ bā bəntu chi wu həmə joo ŋənhliŋ i nòŋ kpo ə bəne kwáŋ bbəŋ bə́ kàh bə́ lɛ̀ɛ mu chəŋ ntofi ye mə. 3 Lə i ŋəŋ ə bə Pita bə Jɔɔŋ go ye bə́ kāh bəŋgəŋ lɛɛ mu, i hlə yee i nōŋ kpo bə bə́. 4 Bə́ tɨŋ díi yee bə́ kēe wu jwaaŋ. Pita yɔɔ bə wu lə, “Chiini be!” 5 I kee bə́, i hlē lə ləkə bə́ lə nə wu fieŋ. 6 Pita yɔɔ bə wu lə, “Nlə bə kpo kə dududu, kwaalə fieŋ ffɨŋ ŋkə̄nə nlə nnə fi bə wə. N'yɔ̄ɔ bə wə ə yii li Jisho Kleto nnu Nashalit bəŋ, ja fa yee wə jāa!” 7 Ye i yɔɔlə nəni, i hlə kənə wu ə kwaŋ wi diee go, jaa wu fa. Cha mi, wuh bə mwinshaani mu mbɛɛ yo bu tata. 8 I jiŋ hə buh tee lemi, hlə chɔɔ bənjaa. Bə́ bəə wu gəŋ lɛɛ ə chəŋ ntofi ye mə, i jāa həmə i jīŋ, i dōhi Chu. 9 Bəne bənhliŋ bbəŋ bə́ mà ŋəŋ ye i jāa i dōhi Chu, 10 bə́ kələ tɔ lə ə mbɛɛ nnu i màa i shīi yo i nòŋ bieŋ ə fwiih wi mbaŋ nnu bə́ chèe yo lə Kinwaa wwuŋ wi lɛ̀ɛ we ə chəŋ ntofi mə. Bufe la bə́ fí, gəə ŋɨŋ bə́ bə fieŋ ffɨŋ fi duŋna fie bə wu.

Pita yɔɔ bə bəne ə chəŋ ntofi mə

11 Mbɛɛ yo hlɨŋ ba ə bə Pita bə Jɔɔŋ go, bəne ŋəŋ gəə ŋɨŋ bə́. Yee bə́ lə̄lə bə́ gə̄ŋ chili bə́ ə dɔhɔ kkɨŋ bə́ màa bə́ chēe lə kikɔ ki Sholomuŋ. 12 Lə Pita ŋəŋ lə bəne buma bwo, i hlə yɔɔ bə bə́ lə, “Bəne bə Ishlael, ə duŋ yulaha ffɨŋ gəə ŋɨ̄ŋ bəŋ bə́ fieŋ ffɨŋ bə́ kēe fie be nəni lə? Bə hle ŋkwo weŋ lə ə fə be bə muŋga mwaa mbɛɛ nu hlə yee i jāa lə? Lii bə hle dəŋ ləə ə fwɔ waa wi wɛɛŋ lə? Ə lə kə. 13 Fi duŋ lə ə Chu Ablahaŋ bə Ayjik maa Jekɔb, nnu i duŋ Chu bəche tah biaa bənhliŋ mà koha kaa Jisho mbɛɛ wi nimi chi baha ə wu go. Jisho nu duŋ nnu bə mà nɨhŋ yo nə bə bəne bənhlaah, Paylɛt yee i kīɛɛ lə i tukwaŋ ə wu go, bə nɨhŋ. 14 Jisho mà duŋ Wɛɛŋ, i duŋ Mbɛɛ Ntiiŋ, bə nɨhŋ wu, yɔɔ lə bə́ fwoo ə duŋ ŋwuŋ nnu i mà jii bəne, bwo nə bə bəŋ. 15 Bə fə nəni hlə jii mbɛɛ nnu i nə̀ kinduŋh bə bəne, kwaalə, Chu fwoo wu ə kpe mə, kkə ŋəŋ ə wu go yee kkə yɔ̄ɔ. 16 Ə yiih li Jisho bəŋ, nnu kiŋkəŋkpe kkɨŋ bə ŋə̄ŋ kɨhŋ, bə kə̄lə, hlə yee ki jāa. Fi kah nəni yulahalə kkə yiila tɔ́ŋ ə Jisho mə, tɔ́ŋ ŋŋəŋ kkə yiila ŋie ə wu mə hlə fə mbɛɛ nu yee i tā gbo kinwaa nəni ye bə ŋə̄ŋ lə.

17 Fidiɛɛ bəŋgwoŋ bəŋŋ, ŋkə̀lə lə fieŋ ffɨŋ bəŋ bə bikuu bi kitɨŋ mà fə bə Jisho bə mà fə ŋkələ hləŋ. 18 Fi mà duŋna ə je ni mə bənfə lə fi bwo gbeemə yəəŋ ye Chu mà fə lə bəne bii bə hlɨŋ yɔɔ ə kaani lə, Nchuu Fwoo wi nnu i mà kaachi yo yá yi ŋəŋ ə ŋgə go. 19 Nəni, bə fii tɔ́ŋ ŋieeŋ fiimə chu ə wu mə, fo mə lə laamə nə yíwaha yeeŋ, 20 hlə fə ə tɔ́ŋ də bəŋ, faŋ Jisho Nchuu Fwoo nnu i mà shaala yo yu bəŋ. 21 Jisho nu kənə bəmba buh gəŋ bwii bwɔɔ nnu Chu yá bwɛɛ bieŋ binhliŋ ə bi fiimə chu bifwɔ, ye i mà yɔɔlə ə biwu bi bəne biih bə hlɨŋ bə wɛɛŋ mə ə kaani ə bwɔɔ ko mə. 22 Mushe mà hlaa yɔɔ lə,

‘Baba Chu yá yi fwoo mbɛɛ hlɨŋ wi ju

ə bəmwaa bieeŋ mə,

faŋ wu bə bəŋ ye i mà fwoolə mi,

bə kənə bəmbwo wo fieŋ ffɨŋ i yɔ̄ɔ bə bəŋ.

23 Mbɛɛ nnu i yá duŋ kə woo bə mbɛɛ hlɨŋ yo,

bə́ yá fwoo wu ə kintu ki bəne bə Chu mə, laa wu.’

24 Ə lə dəŋ ye bəne bə hlɨŋ bə Chu bənhliŋ gbe jə ə Shaŋwel go maa bbəŋ bə́ mà bwo bie ə wu dɨŋ mà yɔɔla ki bieŋ bbɨŋ bi kāh bɨhŋ ə joo ŋəhŋ mə. 25 Bieŋ binhliŋ bbɨŋ Chu mà kaachi ə biwu bi bəne bə hlɨŋ bəhŋ mə lə bieeŋ, tɨmə kkɨŋ Chu mà nə bə bəche chwa bieeŋ duŋ dəŋ kieeŋ. Ə duŋ ye Chu mà yɔɔ bə Ablahaŋ lə,

‘N'yá yi hləmə bəne bənhliŋ yaŋ kwe

kah ə ŋiaŋ nnu wə chəŋ mə.’

26 Chu hlə shaa mbɛɛ wi nimi hlaa faŋ ə duŋ bə bəŋ lə i bwo hləmə bəŋ, fə lə bə cheekwaŋ ə jé yeeŋ yíwaha go.”