Nimi 4

Pita bə Jɔɔŋ təŋ kwoo kibə

Kwaalə ye Pita bə Jɔɔŋ màa bə́ kaani lə bə́ yɔ̄ɔ bə bəne bie nəni, bəche ntofi bədi bə che kwoo ki bəne bə bicha bbəŋ bə́ fwòŋ chəŋ ntofi maa Bəshadushii bədi tee mu. 2 Bə́ màa bə́ fwōo tɔ́ŋ yulahalə Pita bə Jɔɔŋ màa bə́ lāanə bəne, bə́ dòntə lə ye Jisho mà fu lə ə kpe mə lə bəŋkpi yá yi fu dəŋ ə kpe mə. 3 Bə́ hlə kwo bə́ gəŋ fwaŋ, ye ə mà duŋ lə hə kitaŋ, lə bwɔɔ nnu butuu fu wu, ə bə́ hlə kee ə hlaa yo mə. 4 Kwaalə, bəne kiŋaaŋkə bbəŋ bə́ mà wo keehnə ki Pita bə Jɔɔŋ, mà bema, kintu kibə yiinə, bənəə yee bə́ dūŋ ye bənchuku bətiŋ lə (5,000).

5 Butuu fu wu, bəcha bə kitɨŋ bə bəne bəhlaanə kitɨŋ maa bəne bbəŋ bə́ kèeh bəŋkɨnə bə Chu, bumə ə dɔhɔ mə mwe ə Jelushalɛŋ. 6 Anash che kwoo ki bəche ntofi bə Kayifa maa Jɔɔŋ bə Alekshanda maa bəne bədi bbəŋ bə́ mà duŋ dəŋ ə kichəŋ ki che kwoo ki bəche ntofi mə duŋ həmə. 7 Bə́ hlə chi Pita bə Jɔɔŋ ə bə́ fwi, bii bə bə́ ləə, “Bə ma jə muŋga fəhəŋ bəŋwuhuŋ mbɛɛ nu lə? Bə ma ŋwuhuŋ wu ə yiih li nyəhə bəŋ lə?” 8 Fiana Wɛɛŋ fiili ə Pita mə, i chuu bə bə́ lə, “Bəcha bə kitɨŋ bə bəne bəhlaanə kitɨŋ, 9 kkə lemi fəŋ daŋ bəntəŋ kwoo kiaa yu nimi linwaa llɨŋ kkə ma fə bə kiŋkəŋkpe mə hlə yee i jāa. Ye bə kiɛɛ lə bəŋkələ ye fi ma jaa lə, 10 bəŋ bə bəne bənhliŋ bə Ishlael yee bə kə̂lə lə mbɛɛ nnu i lēmi nu ə bəŋ dí fidiɛɛ i tā gbo nəni, ə yu yiih li Jisho Kleto nnu Nashalit. Jisho nu duŋ nnu bə mà jə yo bweeni ə kiŋgwa go i kpe, kwaalə Chu fwoo wu ə kpe mə. 11 I duŋ tə llɨŋ Kiŋwaati ki Chu yɔ̀ɔ kie ki li lə,

‘Tə llɨŋ bəŋ bəne bə wɛɛnə mà nɨhŋ le

li noo chu tə li hənchi chəŋ.’

12 Ə kwaa Jisho wuu mboŋ nnu i fwòo bəne. Yii li mbɛɛ ju hləŋ yaŋ kwe llɨŋ Chu chi lə duŋ ə li chuu fwoo be.”

13 Bəne bə hlaanə bie wo ye Pita bə Jɔɔŋ yɔ̄ɔ kə lɔɔ kə, baa ŋəŋ dəŋ lə bə́ duŋ bəne bə nya, bbəŋ bə́ dùŋ kə kələ dəŋ kiŋwaati gbaaŋ kə, gəə ŋɨŋ bə́. Bə́ hlə kələ lə fi duŋ nəni, yulahalə ə bəne bbəŋ bə́ màa bə jāa bə Jisho. 14 Bə́ nakə baa lə kənə dəŋ fieŋ ffɨŋ bə́ noo bə Pita bəə Jɔɔŋ ə fi bəŋ kə, yulahalə bə́ màa bə́ ŋə̄ŋ mbɛɛ nnu bə́ mà ŋwuhuŋ yo, i lēmi bəə bə́. 15 Bəne bbəŋ bə́ hlàah bie ja hlaa fwoo bə́ ə bweenə, bə́ hlə she yee bə́ chūŋ bə́ bə́, bə́ yɔ̄ɔ lə, 16 “Kkə lə fə ləhəŋ bə bəne bəhŋ lə? Bəne bənhliŋ bə Jelushalɛŋ kəla ba fieŋ ffɨŋ fi nyìi muŋgeni mu Chu wɛɛŋ ffɨŋ bə́ fəə, duŋ ə kkə nɨhŋ kə. 17 Kwaalə, bənfə lə hlɨŋ nih kə baa lə hlaamə gəŋ fwi, kkə kɨnə bəne bəhŋ lə bə́ kə baa lə mɔŋ bən'yɔɔ fieŋ bə mbɛɛ ju ə yii li Jisho nu bəŋ kə.”

18 Bə́ chee Pita bəə Jɔɔŋ bə́ lɛɛ chu mu. Bə́ nuulə bə́ bituŋ lə bə́ kə baa lə mɔŋ bu mɔŋnə bən'yɔɔ, ləkə bənlaanə mbɛɛ ju ə yii li Jisho bəŋ kə. 19 Pita bəə Jɔɔŋ chuu ŋkwo bə́ lə, “Bə hle dəŋ ləə ə fieŋ fiɛhɛŋ ffɨŋ fi dùŋ yəəŋ ə Chu fwi, yee kkə wô ə duŋ bə bəŋ lii bə wu Chu lə? 20 Yu duŋ ə kkə wii bən'yɔɔ bieŋ bbɨŋ kkə ŋəŋna baa wo kibi kə.” 21 Bəne bbəŋ bə́ màa bə́ hlāah bie jə bwɔɔ baa kɨnə bə́ ntakə, hlə tukwaŋ ə bə́ go lə yee bə́ gə̄ŋ. Bə́ mà jɨnə ə duŋ fieŋ ffɨŋ bə́ lə yii bə́ ə ŋgə mə, yulahalə bəne bənhliŋ màa bə́ kōhi Chu yu fieŋ ffɨŋ fi mà kah fie, 22 kibɛɛ bə mbɛɛ nnu bə́ mà fə yo fieŋ ffɨŋ fi nyìi muŋgeni mu Chu bəŋwuhuŋ wu mà kahaŋ bigoŋ mbwɛɛnya.

Bəne bə kimbemi noŋ muŋgeni bə Chu

23 Ye bə́ ma tu lə kwaŋ ə Pita bəə Jɔɔŋ go nəni, bə́ fiimə gəŋ chu dɨŋ ə bəne bəbə bə kintu mə, yɔɔ bə́ fieŋ ffɨŋ bəche ntofi bəŋkuntaŋ bəŋkuntaŋ bə bəne bbəŋ bə́ hlàah kitɨŋ hə yɔɔ. 24 Bə́ wo lə, hlə buhuŋ go noŋ bə Chu ye mbɛɛ mwi lə lə, “Baba Che Kwoo, ə mà fə wə buuli bə shishɔ maa nɔ bə bieŋ binhliŋ bbɨŋ bi dùŋ ə bidɔhɔ bɨhŋ mə. 25 Wə mà fəə che bətah biaa Daafi, nnu i mà duŋ mbɛɛ nimi wa i yɔɔ bə muŋgeni mu Fiana Wɛɛŋ mə lə,

‘Ə yulaha ffɨŋ bəne bbəŋ bə́ dùŋ kə duŋ nə Bəjuu fwèe bə bieŋ ə bíwɛɛ bibə mə,

bəne chùŋ nchúŋ yyɨŋ yí lə nakə jaa lə lə?

26 Bəŋkɨŋ bə yaŋ kwe bwɛɛ ntɨmə,

bəne bəhlaahnə kitɨŋ bumə

bənju Baba bə mbɛɛ wi nnu i dəhŋ yo lə i duŋ Nchuu Fwoo.’

27 Ə lə dəŋ yəəŋ bə fieŋ ffɨŋ fi mà kah yaŋ ə kibalaki kɨhŋ mə. Ŋkɨŋ Hɛlɔ bəə Pwontu Paylɛt mà buma bə bəne bbəŋ bə́ dùŋ kə duŋ nə Bəjuu maa bəne Bəishlael bə́ chuŋ nchuŋ ə Jisho dɨŋ nnu i duŋ yo Mbɛɛ nimi wɛɛŋ nnu i mà lɔɔ yo lə i duŋ Nchuu Fwoo. 28 Bə́ mà bumə bənfə ə duŋ fieŋ ffɨŋ wə mà dɔɔ bwɔɔ kaani je nyɛɛkə bə muŋgeni mwo lə wə leka lə fi yá bwo duŋ. 29 Nəni, fidiɛɛ Baba, kee ŋəŋ je nni bəne bəhŋ lɔ̄hiŋ ye be mu. Nə be bəne bwo bə nimi tɔ́ŋ ŋəntaabə bəndontə die wa kə lɔɔ kə. 30 Nə be muŋgeni mwo bəŋwuhuŋ bəne maa bənfə dəŋ bieŋ bbɨŋ bi nyìi muŋgeni mwo bə bieŋ bi ŋɨŋ gəə ə yii li Jisho Mbɛɛ nimi wa wɛɛŋ yo bəŋ.” 31 Ye bə́ mà chee lə kaa Chu, shishɔ nənə ə dɔhɔ kkɨŋ bə́ mà duŋ kie mə. Fiana Wɛɛŋ fiili ə bə́ mə, bə́ hlə yee bə́ dōntə die Chu kə lɔɔ kə.

Kintu ki bəne bə kimbemi yee bə kə̄nə fieŋ fibə fimwi

32 Kintu ki bəne bə kimbemi yee bə́ dūŋ tɔŋ mwe, bə́ dūŋ ye mbɛɛ mwi lə, mbɛɛ ju ə bə́ mə mà kə chiee fieŋ fidi lə ə fii kwaa wuu mboŋ kə. Fieŋ fi mbɛɛ mwi duŋ fi bəne bənhliŋ. 33 Chu nə muŋga muŋkuntaŋ bə bəne bə faŋnə bə Jisho, yee bə́ dôntə kwaa bə bəne ntakə lə Baba Jisho mà fwoo ə kpe mə. Bə́ dùŋ kinchɨnə ki Chu duŋ bə bə́ bənhliŋ gbaaŋ. 34 Mbɛɛ mà kə duŋ nə ə bə́ mə nnu i màa i jɨ̄nə kə, yulahalə bəne bbəŋ bə́ mà kənə biwɛŋ ləkə chə́ŋ màa bə́ bā bəntaa bi, bə́ bwò bə kpo we, 35 bə́ nə̀ ə kwáŋ ŋə bəne bə faŋnə bə Jisho mə, bə́ hlə yee bə́ gā bə bəne bənhliŋ ye ŋgə mbɛɛ duŋ.

36 Mbɛɛ ju mà duŋ bə́ chee wu lə Joshɛ, bəne bə faŋnə bə Jisho mà doo wu yii liih lidi lə Banaba, (li duŋ lə, Mbɛɛ Nshii Gbo). I mà duŋ mbɛɛ ə kichəŋ ki Lebi mə, bə́ mà bwee wu ə Shayplu. 37 I hlə gəŋ dəŋ kə taa kii wɛɛ, bwo nə kpo we ə kwáŋ ŋə bəne bə faŋnə bə Jisho mə.