Nimi 5

Anania bə Shafilia

Mbɛɛ ju nnu bə́ mà chee lə Anania bəə kpɛɛ Shafilia taa dəŋ kiŋkə ki dɔhɔ. 2 I gahi ə kpo we go kili kpɛɛ kələ həmə, i hlə jə kiŋkə kidi kie gəŋ nə ə kwáŋ ŋə bəne bə faŋnə bə Jisho mə. 3 Ye i nə lə nəni, Pita bii bə wu ləə, “Anania, ə fə laha lə wə chi lə hlaata lɛɛ ə tɔŋ lo mə fə lə wə kaalə yo ə Fiana Wɛɛŋ go, hlə gahi ə kpo wwuŋ wə hə taa we dɔhɔ ko kie go lə? 4 Nchu taa wa dɔhɔ kie ə həə ko kə lə? Ə chulə wə taala ki kpo we hə kə duŋ nə wo kə lə? Ə laha ffɨŋ fi fə lə wə dɔ dɨŋ ffɨŋ fieŋ ə tɔŋ lo mə lə? Wə kə kaalə yo ə duŋ bə bəne kə, wə kaala ə duŋ bə Chu.” 5 Cha mi ye Anania wo lə die ni nəni, i hlə gbe kpe. Bəne bənhliŋ bbəŋ bə́ mà wo hlɨŋ ye lɔ gbaaŋ. 6 Hlɔ́ŋ yiniɛ bwo bwɛɛ wu ə kindu mə, jə fu bə wu gəŋ diih.

7 Ə chulə bəntaŋ bə bwɔɔ kaah ye bətɔh lə, kpɛɛ lɛɛ bwo, ŋkələ hləŋ fieŋ ffɨŋ fi fəə nyimi. 8 Pita bii bə wu ləə, “Bu yɔɔ kwaa mi, wuŋ lə kpo we winhliŋ wwuŋ bəŋ bəə nua hə taa we dɔhɔ kie lə?” I chuu lə, “Eee, ə wi nəni winhliŋ.” 9 Pita baa bii bə wu ləə, “Bəŋ bəə nua kah ləhəŋ hlə chuŋ bə mɔŋ Fiana Baba lə? Wələ wo, dó ŋə bəne bbəŋ bə́ gəŋna kə diih nua ŋie fo fwi, bə́ lə lɛɛ bwo tu dəŋ wə, fu gəŋ diih.” 10 Ye Pita yɔɔlə nəni, cha mi Shafilia bu gbe kpe həmə ə wu dí. Ə chulə hlɔ́ŋ yiniɛ ye lɛɛ yi bu ŋəŋ wu i kpee, yi hlə tu fu bə wu gəŋ diih baha ə nyimi tɨŋ. 11 Kimbumə ki bəne bə kimbemi bənhliŋ maa bəne bənhliŋ bbəŋ bə́ mà wo hlɨŋ nini nɨŋ kwo bə́ gbaaŋ.

Bieŋ bbɨŋ bi nyii muŋgeni mu Chu bə bieŋ bi ŋɨŋ gəə

12 Bəne bə faŋnə bə Jisho yee bə́ fə̄ bieŋ bbɨŋ bi nyìi muŋgeni mu Chu bə bieŋ bi ŋɨŋ gəə kiŋaaŋkə ə bəne mə. Bəne bə kimbemi bənhliŋ yee bə́ bā bəmbumə ə kikɔ ki Sholomuŋ ə chəŋ ntofi mə. 13 Ŋwuŋ woo mà kə mɔŋ nə bəmbumə ə bə́ mə kə. Kwaalə bəne bu dohi bə́ gbaaŋ. 14 Bənəə bə bəkwɛɛ kiŋaaŋkə bbəŋ bə́ màa bə́ yīi tɔ́ŋ ə Baba mə yee bə yīinə ə kintu kibə mə. 15 Bieŋ bbɨŋ bəne bə faŋnə bə Jisho màa bə́ fə̄, fə bəne yee bə́ tū bəne bə jə́ŋ bə́ nɔ̀hiŋ bə́ chì baha ə jé mə ə bintaŋ bəŋ maa ə biga bəŋ lə bwɔɔ nnu Pita lə kah, maa ə duŋ kwaa lə nchiinchi wi kah ə bədi bəŋ. 16 Bintu bi bəne yee bə́ nō ə bibalaki mə bbɨŋ bi baha ə Jelushalɛŋ bə́ tù bə́ bwò bə bəne bə jə́ŋ maa bbəŋ bə́ kə̀nə bəfiana bə yili ə bə́ go, bə́ ŋwùhuŋ bə́ bənhliŋ.

Yee bə́ lōh bə bəne bə faŋnə bə Jisho

17 Che kwoo ki bəche ntofi bə kimɔ kiih bbəŋ bə́ dùŋ Bəshadushii ja chɔɔ yee bə́ lōh bə bəne bə faŋnə bə Jisho, 18 hlə faŋ bəne lə bə́ gəŋ kwo fwaŋ bə́ ə chəŋ munfwa mə. 19 Kwaalə, yee ə dūŋ bwɔɔ butuu, nchinda Baba bwo wɛ biwulə bi chəŋ munfwa ye fwoo bə́. Ye i fwoo lə bə́, hlə yɔɔ lə, 20 “Bə gəŋ ə chəŋ ntofi mə, bə gəŋ yee bə dōntə bieŋ bɨhŋ binhliŋ bə bəne ki fwɔ wifwɔ wuŋ nini.” 21 Ye bə́ wo lə nəni, bə́ hlə gəŋ. Ə chulə butuu yee bu wô, bə́ lɛɛ ə chəŋ ntofi mə, hlə gbe bəŋkeeh bəne.

Dəŋ ə bwɔɔ yo bəŋ, che kwoo ki bəche ntofi bə bəne biih bə kintu, buhuŋ bəne Bəishlael bəhlaanə kitɨŋ bənhliŋ bəə bə́ shii, hlə faŋ bəne bə bicha lə bə́ gəŋ ə chəŋ munfwa mə, gəŋ jə bwo bə bəne bə faŋnə bə Jisho. 22 Bə́ gəŋ bwii mə kiɛɛ bə́ hləŋ hlə chu dɨŋ bwo yɔɔ lə, 23 “Kkə gəŋna bwii ə chəŋ munfwa ye mə, ŋəŋ biwulə bie bə́ hə fwaŋna bi kɨŋkɨŋkɨŋ, bəne bə bicha lema həmə bə́ fwōŋ. Ə chulə kkə wɛ lɛɛ mu chəŋ kkə nakə ŋəŋ nə mbɛɛ mu kə.” 24 Che kwoo ki bəne bə bicha bbəŋ bə́ màa bə́ fwōŋ bie chəŋ ntofi ye bə bəche ntofi bəŋkuntaŋ bəŋkuntaŋ wo nəni, fi fɨhɨŋ bə́, kindɔchiŋ bə́ lə bə́ lə chu fəhəŋ bə fɨhŋ fieŋ lə. 25 Mbɛɛ ju ja lɛɛ bwo yɔɔ bə bə́ lə, “Bə wələ wo, bəne bbəŋ bə ma fwaŋ bie ə chəŋ munfwa mə, bilii bə́ bie bə́ lāanə bəne ə chəŋ ntofi mə.” 26 Ye bə́ wo lə nəni, che kwoo ki bəne bə bicha bə kintu kiih hlə fu gəŋ jə bə́, yee i bwō bə bə́. Kwaalə, bə́ nakə jəə bə́ ə muŋga mə kə, yulahalə bəne bə bicha bie màa bə́ lɔ̄ lə bəne bie lə tɨŋ bə́ bə tə́.

27 Bə́ bwo bə bəne bə faŋnə bə Jisho bie, lɛɛ bə bə́ chi ə bəne bəhlaanə kitɨŋ fwi. Che kwoo ki bəche ntofi yee i bīi bieŋ bə bə́ i yɔ̄ɔ lə, 28 “Kkə ma jəə bwɔɔ kɨnə bəŋ lə bə kə baa lə mɔŋ bənlaanə mbɛɛ ju ə yii li mbɛɛ nu bəŋ kə. Kwaalə, bə ŋəŋ fieŋ ffɨŋ bə mɔŋna fie! Bə fəə kinlaanə kieeŋ kɨhŋ hlaama ə Jelushalɛŋ kiɛkiɛ. Ye bə kiɛɛ lə bənfə lə fi nyii lə kwáŋ ŋiaa ŋie hə kpe yi.” 29 Pita bə kintu ki bəne bə faŋnə bə Jisho chuu lə, “Kkə kənə bəŋ'wo ə duŋ bə Chu, kah bəŋ'wo bə mbɛɛ. 30 Bə mà bweena Jisho ə kiŋgwa go i kpe. Chu che bətah biaa fwoo wu ə kpe mə, 31 bihiŋ chi wu ə kwaŋ wiih wi diee mə lə yee i dūŋ Che Kwoo bə Nchuu Fwoo, fo bəne Bəishlael lə fii tɔ́ŋ ŋəbə, ə wu Chu laamə nə yíwaha yibə. 32 Kkə ŋəŋna bieŋ bɨhŋ kkə hlə yee kkə yɔ̄ɔ bə bəne bə Fiana Wɛɛŋ nnu Chu nə bə bəne bbəŋ bə́ wò wu hlə yee i fwɔ̄ŋ dəŋ lə bi dùŋ chɛɛŋ.”

33 Ye bəne bəhlaanə kitɨŋ kie wo lə biyɔɔnə bɨŋ nəni, tɔ́ŋ fwee bə́. Bə́ hlə yee bə́ kīɛɛ lə bə́ jii bəne bə faŋnə bə Jisho bie. 34 Kwaalə, mbɛɛ ju ə kintu ki bəne bəhlaanə kitɨŋ nnu yii liih mà duŋ lə Gamaliya, ə duŋ ŋwuŋ Bəfalashii i duŋ dəŋ ŋwuŋ nnu i kèeh bəŋkɨnə bə Chu, bəne bənhliŋ bwɔ̀kwe bə wu gbaaŋ, i ja fa. Ye i ja lə fa, i yɔɔ bə́ hlaa fwoo bəne bə faŋnə bə Jisho bweenə. 35 I she yɔɔ bə bəne bəhlaanə bie kitɨŋ lə, “Bəne bə Ishlael, bə jə bwɔɔ bə fieŋ ffɨŋ bə kiɛɛ lə bə fə bə bəne bəŋ. 36 Bə hlè lə ə mà duŋ ə bwɔɔ ju bəŋ, mbɛɛ ju ja fəŋ bə́ chēe wu lə Tioda i nyìi lə i duŋ mbɛɛ ŋkuntaŋ. Bəne mà gbee wu dɨŋ maa ye gi na lə. Bə́ bwo jii wu kintu kiih kie hlaamə, fieŋ ffɨŋ i màa i bwō fie bə fi la nya. 37 Bwɔɔ nnu dɨŋ mbɛɛ ju ja ə bwɔɔ nnu bə́ màa bə́ fā bəne bə́ chēe wu lə Judash, ə duŋ ŋwuŋ nnu Galilii. I kpa jə bəne kiŋaaŋkə ə wu dɨŋ. Bə́ bwo jii wu dəŋ, kimɔ kiih hlaamə. 38 Yu fɨhŋ, n'yu ŋkēeh bəŋ lə bə kə fəə fieŋ bə bəne bəŋ kə. Bə́ tukwaŋ ə je bə́ go. Ə duŋ lə fieŋ ffɨŋ bə́ bwō fɨhŋ bə fi bə́ kèeh bəne lə ə chɔɔ mbɛɛ, kəə fi la nya. 39 Ə duŋ lə fieŋ fie chɔɔ Chu, kəə duŋ ə bə kɨŋ bə́ kə. Ə bə nakə jəə bwɔɔ, ə fi bwo fu lə bə bie bə jū ə duŋ bə Chu.”

40 Ye Gamaliya yɔɔlə nəni, bəne bbəŋ bə́ màa bə́ hlāah bie kitɨŋ wo keehnə kiih kie, bə chee chuu bəne bə faŋnə bə Jisho bie bə́ lɛɛ. Ye bə́ lɛɛlə, bə́ hloo bə́, nuulə bə́ bituŋ lə bə́ kə baa lə mɔŋ bəŋkeeh mbɛɛ ju ə yii li Jisho bəŋ kə, hlə tukwaŋ ə bə́ go yee bə́ gə̂ŋ. 41 Ye bə́ fulə həmə yee bə́ gə̄ŋ fibə bə́ wò ə duŋ njənjə lə bə́ wuna bəne bənənə bə́ giaali yu yii li Jisho. 42 Bə́ gəŋ nəni, baa yee bə́ lāanə bəne joo ŋənhliŋ ə chəŋ ntofi mə maa ə kwili mə, bə́ dōntə hlɨŋ nwaa Jisho lə i duŋ Nchuu Fwoo nnu Chu mà kaachi yo.