Nimi 6

Bə́ bwa bəne bə nimi fumanyaaŋ

Lə ə bwo duŋ ə bwɔɔ ju bəŋ, ye kintu ki bəne bə kimbemi màa ki kō lə ki gə̀ŋ fwi fwi, Bəhiblu bbəŋ bə́ yɔ̀ɔ bie díe yí Bəglik hlə chɔɔ bəŋwuunə ki Bəhiblu bbəŋ bə́ yɔ̀ɔ bie díe yí kitɨŋ kibə lə bə́ gà bieŋ bə bəkwɛɛ bə bəŋkwu joo ŋənhliŋ bə́ kèe lə bəbə bie kə. 2 Nəni, bəne bə kintu bə Jisho bə yuufi ə nchɔ bəfwe bie hlə buhuŋ kintu ki bəne bə kimbemi bənhliŋ yɔɔ bə bə́ lə, “Fi kə nwaalə lə kkə cheekwaŋ ə die Chu go bəndontə gəŋ yee kkə gā ə duŋ bieŋ kə. 3 Bəŋgwoŋ, fi nwaa lə bə bwa bəne fumanyaaŋ ə bəŋ mə, kkə nə nimi lɨhŋ ə bə́ kwáŋ. Bwɔɔ nnu bə bwa bə́, yee bə kêe ə duŋ bəne bbəŋ bə́ kə̀nə fwɔ́ ŋənwaa, bbəŋ bə́ fiila bə Fiana Wɛɛŋ kənə maa bufe. 4 Nəni, ə kkə hlə yii bikuu biaa ə duŋ bənchee Chu maa bənɨŋ nimi li die Chu.” 5 Bəne bənhliŋ wo ŋkaachi yo, i nwaa bə́. Bə́ hlə bwa Shitifiŋ ə duŋ mbɛɛ nnu kimbemi mà fiila ə wu mə, fiili maa bə Fiana Wɛɛŋ. Bədi duŋ Filip bə Plukolu, Nikano bə Timuŋ, Palmina bə Nikola nnu i mà duŋ mbɛɛ nnu Antiyɔk nnu i mà fiimə chu ŋwuŋ kimbemi Bəjuu ə fiimə mə. 6 Bə́ hlə jə bəne bəhŋ chi ə bəne bə faŋnə bə Jisho fwi, bə́ chee Chu bə bə́, hlə chi kwáŋ ə bə́ bəŋ. 7 Die Chu hlə yee i hlāamə i gə̀ŋ. Kintu ki bəne bə kimbemi bə Jelushalɛŋ ko gəŋ fwi. Bəche ntofi kiŋaaŋkə yii dəŋ tɔ́ŋ ə Jisho mə.

Bə́ bwɛɛ bieŋ ə Shitifiŋ go

8 Chu nə tɔŋ linwaa bə Shitifiŋ gbaaŋ, i kə̀nə muŋga, i fə̀ bieŋ bi ŋɨŋ gəə bə bieŋ bbɨŋ bi nyìi muŋga mu Chu ə bəne mə. 9 Bəne bədi ja chɔɔ noonə bəə Shitifiŋ. Bəne bie mà duŋ Bəjuu bbəŋ bə́ mà no ə Shiliŋ bə Aleshandia maa Shilishia bə Ɛshia. Ə màa bəne bə chəŋ cheenə Chu nni bə́ màa bə́ chèe lə Bənfwa bbəŋ bə́ Fwoo ə Munfwa mə. 10 Ye bə́ màa bə́ nōo lə nəni, Fiana Wɛɛŋ nə Shitifiŋ bufe mbɛɛ nakə baa lə duŋ həmə nnu mə kaa ə wu kwáŋ kə.

11 Bə́ hlə yii bəne bidi bwii dɨŋ dɨŋ lə bə́ kaalə yo lə bə́ woo ye Shitifiŋ yɔ̄ɔ naami liwaha ki Mushe bə Chu. 12 Ye bə́ fələ nəni, bə́ nɛhiŋ tɔ́ŋ ŋə bəne bie, bə ŋə bəne bbəŋ bə́ hlàah kitɨŋ, màa ŋə bəne bbəŋ bə́ kèeh bəŋkɨnə bə Chu. Bə́ hlə lɛɛ Shitifiŋ go, jə gəŋ bə wu ə bəne bbəŋ bə́ hlàah bənhlaa fwi. 13 Bəne bie baa bwo bə bəne bədi lə bə́ bemi kah bə nhlaa yo, bə́ bwɛɛ bieŋ ə Shitifiŋ go yɔɔ lə, “Mbɛɛ nu kahiŋ lə bən'yɔɔ naami liwaha ki chəŋ ntofi ni maa bə bəŋkɨnə bə Mushe kə. 14 Kkə woo ye bə́ yɔɔ lə Jisho nnu Nashalit yo yá yi bwu chəŋ ntofi ni, fii dəŋ too waa wi kitɨŋ wwuŋ Mushe mà keeh be mu.” 15 Bəne bənhliŋ bbəŋ bə́ mà duŋ ə chəŋ nhlaa ye mə tɨŋ díi ə Shitifiŋ go, hlə duŋ duŋ ŋəŋ bushi bwii fiima chu bu bū nchinda Chu.