Nimi 7

Shitifiŋ təŋ kwoo kiih ə bəne bəhlaahnə kitɨŋ fwi

Che kwoo ki bəche ntofi bii bə Shitifiŋ ləə, “Bieŋ bɨhŋ bə́ yɔ̄ɔ bɨŋ lə chɛɛŋ lə?” 2 Shitifiŋ chuu lə, “Bətah bə bəŋgwoŋ bəŋŋ, bə wələ wo. Chu kiŋkuntaŋ mà fwoo ə che tah ya Ablahaŋ kwáŋ i kaani i dùŋ ə Meshopotemia, i hlə bwo no gəŋ yee i dūŋ ə Halaŋ, 3 yɔɔ bə wu lə,”

“She kichəŋ ko, wə fu ə kitɨŋ kieeŋ mə,

wə gəŋ ə kitɨŋ kkɨŋ nlə nyii wə mə.”

4 Nəni, i hlə no ə Chadiyaŋ yo mə, gəŋ yee i dūŋ ə Halaŋ. Ə chulə tili kpee, Chu fə i no bwo yaŋ dɔhɔ kkɨŋ bə dūŋ kɨhŋ mə fidiɛɛ. 5 I duhŋ fəŋ Chu nakə nəə dəŋ wu dɔhɔ kə, maa ntaŋ shishɔ, kwaalə, kaachi lə mə yá yi nə kitɨŋ kkɨŋ ki dùŋ kiih bə ŋkaani bəne biih. Chu màa i kāachi nəni Ablahaŋ kaani kə kənə ŋiaŋ kə. 6 Chu baa yɔɔ bə wu lə,

“Ŋkaani wa yá yi duŋ nfuutə ə kitɨŋ kidi kwuŋ,

bə́ yáa bə́ dūŋ mə bə́ nɨ̀ŋ munfwa,

bə́ bèe fwɔ bə bə́ ə bigoŋ mə gi na (400).

7 Nlə nlɛɛ ŋgə ə kitɨŋ kie mə,

ə ŋkaani wa yá fu mə bwo yee bə́ chēe Chu bə mi yaŋ.”

8 Chu baa nə tɨmə bə Ablahaŋ, fieŋ ffɨŋ fi nyìi tɨmə kie duŋ lə Ablahaŋ yáa i nyīeŋ bwɔni biih jó. Ablahaŋ bwo bwee Ayjik, ə bwo chu ə joo bəŋ nyaaŋ, i nyieŋ wu jo. Ayjik bwo bwee Jekɔb nyieŋ wu jo. Jekɔb bwo nyieŋ jó yi bwɔni biih bə yuufi ə nchɔ bəfwe bbəŋ bə́ dùŋ bəche tah biaa dɔhɔ kkɨŋ kichəŋ kiaa mà mɛŋ fu.

9 Bəche bətah biaa bie yee bə lūhuŋ bimi bə Joshɛ maani bə́, hlə taa wu, i gəŋ yee i dūŋ nfwa ə kitɨŋ ki Ijip mə. Kwaalə, Chu fwòŋ wu kwaa, 10 i chɨ̀nə wu ə bəŋgə bii mə bənhliŋ. Chu baa nə wu bufe, fə Fɛlɔ Ŋkɨŋ nnu Ijip yee i lêki wu, hlə chi wu njii wi ə kitɨŋ ki Ijip mə i fwòŋ dəŋ maa kichəŋ kiih kinhliŋ.

11 Lə bwi gbe ə Ijip kiɛkiɛ bə Kana, bəne wo ŋgə gbaaŋ. Bəche bətah biaa nakə baa lə kənə fieŋ fidinə kə. 12 Lə Jekɔb wo lə biləə bie ə Ijip, i hlə faŋ bwɔni biih bbəŋ bə́ dùŋ bəche tah biaa bə́ gəŋ mə ə cha nni fwii bəŋ. 13 Ə chulə bə́ bwɔ gəŋ mə ə chá bəŋ fie, Joshɛ hlə fə bəmaani kələ wu. I nyii dəŋ bə́ bə Fɛlɔ. 14 Joshɛ hlə faŋ hlɨŋ bə tili Jekɔb, lə wu bə kichəŋ kiih kinhliŋ bwo ə Ijip. Kichəŋ ki Jekɔb mà duŋ ə bwɔɔ yo bəŋ mbɛɛ mbɛɛ gbifumanyaaŋ ə nchɔ bətiŋ (75). 15 Lə Jekɔb wo nəni, i jə kichəŋ kiih kinhliŋ bwɔ gəŋ bə ki ə Ijip. Bəə bəche tah, bə bətah biaa kpe həmə bənhliŋ. 16 Bə́ gəŋ tu biŋwuuni bie chu dɨŋ bə bi yaŋ, bwo diih ə Shɛkɛŋ ə joo kkɨŋ Ablahaŋ mà taŋ ə bwɔni bə Hamo kwáŋ.

17 Lə bwɔɔ yee i bwô wunə nnu Chu mà duŋ bənfə fieŋ ffɨŋ i mà kaachi bəə Ablahaŋ, bəne biaa ə Ijip hə ŋaana gbaaŋ. 18 Bəne bie nɔhiŋ ŋkɨŋ ju nnu i mà kə kələ Joshɛ kə. 19 Ŋkɨŋ yo hlə yee i lɛ̄ɛnti i dì bəne biaa bəŋ kwe kwe, i kaŋ lə bəche tah bə bətah biaa yee bə́ lɛ̄ɛ muŋiaa mu bwɔni bəbə bweenə mu kpê. 20 Ə bwɔɔ yo bəŋ nnu bə́ bwee Mushe, nnu i mà duŋ ŋiaŋ nwaa gbaaŋ bə Chu. Bə́ ləh wu chəŋ kii tɔh, 21 hlə gəŋ chi wu bweenə. Ŋwa Ŋkɨŋ Fɛlɔ kpɛ hlə gəŋ bənə wu, ləh ŋiaŋ yo ye ŋiaani lə. 22 Bə́ hlə keeh Mushe bə bufe bunhliŋ bu bəne bə Ijip, yee i dūŋ mbɛɛ nnu i kə̂lə biyɔɔnə maa bənfə bieŋ kinwaakə.

23 Lə i bwii bigoŋ mbwɛɛnya, i hlə hle lə mə lə gəŋ ŋəŋ ye bəmaani bbəŋ bə́ dùŋ bəne Bəishlael duŋ lə. 24 Ə chulə yee i gə̄ŋ, i ŋəŋ ŋwuŋ nnu Ijip i bee fwɔ bə ŋwuŋ nnu Ishlael ju. I lɛɛ ə bə́ mə bənchuu fie, i jii ŋwuŋ nnu Ijip yo bu jiinə. 25 I mà hle lə bəmaani bii lə kələ lə ə faŋ Chu wu lə i bwo fwoo bə́ ə ŋgə mə. Kwaalə, bə́ nakə kələ kə. 26 Butuu fu wu, Mushe baa ja yee i gə̄ŋ, i buhla bəne Bəishlael bəfwe bə́ jū. I lɛɛ ə bə́ mə bəŋga nyɨmə ye, bii bə bə́ ləə, “Bəŋgwoŋ bəŋŋ, bə́ dùŋ bə ŋwuŋ bə maani, ə fə laha lə yee bə́ jū bə go ŋieeŋ lə? 27 Mbɛɛ nnu i màa i bēe yo bieŋ bə maani yəə Mushe bu yəənə, bii bə wu ləə, ‘Ə chi nyəhə lə wə hlaah be maa bəŋkaalə bənhlaa biaa lə? 28 Wə fəŋ chəə yu kīɛɛ lə wə baa jii mi ye wə ma jii lə ŋwuŋ nnu Ijip yo fogbu lə?’ 29 Lə Mushe wo nəni, i lɔ no ə kitɨŋ ki Ijip mə, gəŋ yee i dūŋ ə kitɨŋ ki Midiyaŋ mə, i duŋ mə bwee bwɔni bəniɛ bəfwe.”

30 Lə ə bwo duŋ bwɔɔ nnu dɨŋ bigoŋ mbwɛɛnya hə kaah, nchinda Chu buhla fu ə Mushe go ə bwii mə, wwuŋ wi màa wi dô ə tiɛɛ go ə nji baha ə kɔnɔ ki Shinay go. 31 Lə Mushe ŋəŋ fi kah wu, i baŋ gəŋ baha baha bənchiini kinwaa. Ye i baŋ lə, i wo ye Baba Chu yɔɔ bə wu lə,

32 “Ə mi Chu bəche chwa bieeŋ,

Chu Ablahaŋ bə Ayjik maa Jekɔb.”

Lə Mushe wo nəni, yee i nə̂nə bə nɨŋ, i nakə baa lə mɔŋ bənchiini kə. 33 Baba Chu baa yɔɔ bə wu lə,

“Fwoo bikpa bwo, yulahalə dɔhɔ kkɨŋ wə lêmi kie lə dɔhɔ kiwɛɛŋ.

34 Ndiɛɛla gbo ŋəŋ ye bə́ bèe bieŋ bə bəne bəŋŋ ə kitɨŋ ki Ijip mə,

mbaa ŋ'wò ye bə́ kwìni,

nhlə bwɔ bwo bənfwoo bə́ ə ŋgə yo mə.

wələ wo, nlə nfaŋ wə ə Ijip fidiɛɛ.”

35 Mushe nu duŋ nnu bə́ mà hlaa nɨhŋ yo wu, bii bə wu ləə, “Ə chi nyəhə lə wə hlaah be, maa bəŋkaalə bənhlaa biaa lə? Ə wu nnu Chu mà faŋ lə i gəŋ duŋ ŋwuŋ hlaahnə bə́, maa bənfwoo bəne biih ə ŋgə mə. Ə duŋ Chu nnu i mà faŋ nchinda wi i bwo ə tiɛɛ kkɨŋ ki màa ki dō kie bwii go hlə yɔɔ hlɨŋ ye bə wu. 36 Mushe hlə gəŋ ə Ijip, fə bieŋ bi ŋɨŋ gəə bə bieŋ bi ŋkpee gbo, fwoo bə́ mə. I fə bidi ə Nɔ Ge mə, baa fə bidi nji dɔhɔ kkɨŋ bə́ mà jaala ə bigoŋ bəŋ mbwɛɛnya.” 37 Ə Mushe nu nnu i mà yɔɔ bə bəne Bəishlael lə,

“Chu yá yi fwoo mbɛɛ hlɨŋ wi ju ə bəmwaa bieeŋ mə,

faŋ wu bə bəŋ ye i mà fwoo lə mi.

38 Ə baa duŋ dəŋ wu Mushe nnu nchinda Chu mà yɔɔ yo bə wu ə kɔnɔ ki Shinay go, bwɔɔ nnu kimbumə ki bəne Bəishlael mà duŋ ə nji bə bəche tah biaa, Chu nə biyɔɔnə bbɨŋ bi nə̀ kinduŋh lə i nə chuu bə be. 39 Kwaalə, bəche tah biaa kaka nɨhŋ bəŋ'wo Mushe, bwuŋ kinhlaŋ bə wu, hlə yee bə́ lēki lə bə́ hə fiimə chu dɨŋ ə Ijip. 40 Bə́ hlə yɔɔ bə Ɛlɔŋ lə, ‘Fə be bəcheh bbəŋ bə́ lə yee bə́ gə̄ŋ be fwi, yulahalə kkə baala kələ fieŋ ffɨŋ fi dùŋ bə Mushe nu nnu i mà fwoo yo be ə kitɨŋ ki Ijip mə kə.’ 41 Bə́ hlə fə finchunə fidi fibu ŋwa naŋ, nyieŋ nyáŋ tofi fi mu, hlə yee bə́ tɨ̄ŋ bə kieŋ kkɨŋ bə́ fəə bə kwáŋ ŋəbə. 42 Ye bə́ fələ nəni, Chu hlə fii kinhlaŋ bə bə́, bə́ hlə yee bə́ chēe ə duŋ bə kitaŋ bə kpii maa bə muntoola. Ə duŋ ye bə́ mà bieŋ ə Kiŋwaati ki bəne bə hlɨŋ Chu mə Chu yɔ̄ɔ lə,

‘Bəne bə Ishlael, bə màa bə nyīeŋ nyáŋ ə nji ə bigoŋ mə mbwɛɛnya,

bə ntofi ə duŋ mi mu lə?

43 Bə màa bə jāa bə tu kikɔ ə duŋ ki chu nnu bə́ chee lə Mulɔk,

baa tu fintoola ə duŋ fi chu nnu bə fə bə chēe lə Lefaŋ,

ə duŋ mumbuchɛni mmuŋ bə fəə bənchee bə mwi.

Yu fɨhŋ, nlə nfwoo bəŋ ə bə fu gəŋ kahiŋ Babilɔŋ ə ŋkahiŋ mə.’

44 Bəche tah bətah biaa màa bə́ jāa ə nji bə́ kə̀nə kikɔ kkɨŋ ki nyìi lə Chu yo bə bə́, bə́ mà fə kikɔ kie, bələ dəŋ yəəŋ ye kkɨŋ Chu mà nyii kie Mushe mà duŋ lə. 45 Bwɔni bə bəche tah bətah biaa jə, tu bwo bə ki yaŋ bwɔɔ nnu bə́ bəə Joshwa màa bə fâa bidi ə bitɨŋ bbɨŋ bi mà duŋ yaŋ, ə duŋ Chu nnu i màa i gə̄ŋ bə́ fwi i kòŋ bitɨŋ bie. Kikɔ kie yee ki dūŋ yaŋ gəŋ bwii bwɔɔ nnu Ŋkɨŋ Daafi màa i hlāah kitɨŋ kɨhŋ. 46 I ŋəŋ lə kwáŋ ŋə Chu ŋie ə wu bəŋ, i hlə noŋ lə Chu bemi, i wɛɛ chəŋ nə bə wu Chu Jekɔb yee i dūŋ mu. 47 Fi kaka duŋ lə ə mà wɛɛ Sholomuŋ chəŋ Chu ye. 48 Kwaalə, Baba Chu nnu i dùŋ yo Kwoo ki Bieŋ Binhliŋ i dùŋ nə ə chə́ŋ yyɨŋ bəne wɛɛ mə kə. Ə duŋ dəŋ yəəŋ ye mbɛɛ hlɨŋ Chu ju mà bieŋ lə, Chu yɔɔ lə,

49 ‘Buuli lə kabala ŋgwəŋ,

shishɔ yɨhŋ duŋ kinu ki wuh ŋəŋŋ.

Chəŋ nni duŋ ə mbɛɛ wɛɛ lə ə njəŋ duŋ ə yee i dūŋ ləhəŋ lə?

Lii dɔhɔ kie həmə kkɨŋ duŋ ə nshii lə?

50 Ə kə duŋ nə nfə ŋgwəŋ bieŋ bɨhŋ kiɛkiɛ lə?’”

51 Shitifiŋ hlə ja yɔɔ lə, “Bə ta bikuu gbaaŋ, tɔ́ŋ ŋieeŋ bə bituŋ bieeŋ kaani bintuulə. Bəŋ bə́ bəche chwa bieeŋ duŋ yəəŋ. Bə nɨhŋ bwɔɔ mənhliŋ bəŋ'wo bə Fiana Wɛɛŋ. 52 Mbɛɛ hlɨŋ Chu ju yo nnu bəche chwa bieeŋ mà kə hlɔɔ lə wuh ə wu dɨŋ kə lə? Bə́ màa bə jîi bəne bə hlɨŋ Chu bbəŋ bə́ màa bə́ yɔ̄ɔ ba lə Mbɛɛ Nimi Chu Ntiiŋ yá yi bwo. I bwo, bə taa wu baa jii wu. 53 Ə baa duŋ dəŋ bəŋ bbəŋ Chu mà faŋ bənchinda biih bə́ bwo nə bəŋkɨnə biih bə bəŋ, bə nɨhŋ bəmbələ bi.”

Bə́ tɨŋ Shitifiŋ bə tə́

54 Bəne bbəŋ bə́ màa bə́ hlāah kitɨŋ wo fieŋ ffɨŋ Shitifiŋ yɔ̄ɔ, tɔ́ŋ bee bə́, yee bə́ dī bigəə. 55 Fiana Wɛɛŋ fiili ə Shitifiŋ mə, i kēe wu fiih ə duŋ buh, i duŋ duŋ ŋəŋ kinchaa ki Chu, baa ŋəŋ ə Jisho go i lema ə wɛɛ wi kwaŋ wi diee wi Chu mə. 56 Shitifiŋ ja yɔɔ lə, “Bə kee ŋəŋ, ŋŋəŋna buuli wɛɛma, Ŋwa Mbɛɛ lema ə wɛɛ wi kwaŋ wi diee wi Chu mə.” 57 Bə́ wo fimbini fie, hlə baŋ bituŋ bibə bə kwáŋ, yee bə́ gɛ̄ɛmə buh, bə́ bulə gəŋ bə́ bənhliŋ lɛɛ ə Shitifiŋ go, 58 kpa fu bə wu bweenə, gəŋ yee bə́ tɨ̂ŋ wu bə tə́. Bəne bbəŋ bə́ màa bə bēmi kah bə wu bwa bindu bibə, nə bə hlɔŋ ŋiaŋ nyo ju nnu bə́ chèe lə Shɔl, hlə yee bə́ tɨ̂ŋ. 59 Ye bə́ màa bə́ tɨ̄ŋ lə Shitifiŋ bə tə́ nəni, i chee Chu lə, “Baba Jisho, jə fiana ŋgwəŋ.” 60 I bɛŋ núh kwe, diimə gbaaŋ lə, “Baba, wə kə kee lə fieŋ fiwaha ffɨŋ bəne bəŋ fə fie kə.” Ye i yɔɔlə nəni, i hlə kpe.