Nimi 8

Ye bə́ jiilə Shitifiŋ, Shɔl fwɔ̄ŋ.

Shɔl nə ŋgə bə kimbumə ki bəne bə kimbemi

Kwaa bumbini bwe, bə́ chɔɔ bənnə ŋgə ntaabə bə kimbumə ki bəne bə kimbemi ki Jelushalɛŋ. Ki hlaamə kinhliŋ fu həmə, gəŋ ə wɛ́ɛ ŋə Judia bə ŋə Shamalia mə, ə she kwaa bəne bə faŋnə bə Jisho. 2 Bənəə bədi bbəŋ bə́ mà yii tɔŋ ə Chu mə, bə́ jə kiŋwuuni ki Shitifiŋ kie diih, bə́ de wu gbaaŋ. 3 Shɔl duŋ ŋkwo wi i jāa i kāanə i bìhi kimbumə ki bəne bə kimbemi, i lɛ̀ɛ ə chə́ŋ chə́ŋ i kwò bəne bə kimbemi bənəə maa bəkwɛɛ i fàŋ ə chəŋ munfwa mə.

Filip dontə die Chu ə Shamalia

4 Bəne bbəŋ bə́ mà hlaamə bie yee bə́ gə̄ŋ ə bidɔhɔ mə binhliŋ bə́ dòntə die Chu. 5 Filip bwɔ gəŋ wu fiih ə kibalaki ki Shamalia mə, i dòntə hlɨŋ ki Nchuu Fwoo nnu Chu mà kaachi yo. 6 Bəne kiŋaaŋkə wo baa ŋəŋ bieŋ bbɨŋ bi nyìi muŋgeni mu Chu bbɨŋ i màa i fə̄, bə hlə nə bituŋ bə wu kinwaa. 7 Bəfiana bəyili mà fwoo ə bəne go, bə́ dè buh gbaaŋ, bəne kiŋaaŋkə bbəŋ bə́ mà kpe wɛɛ mwe maa bəŋkɔya ŋwùnə dəŋ. 8 Nəni, kintɨŋ kiŋkuntaŋ duŋ həmə ə kibalaki kie mə.

9 Mbɛɛ ju mà duŋ həmə ə kibalaki kie mə nnu yii liih duŋ lə Shaamuŋ, i màa i bā bənyii nfíŋ yiih ə kaani foo, Bəne bə Shamalia bənhliŋ ŋə̀ŋ gəə ŋɨ̀ŋ bə́. I yɔ̀ɔ dəŋ lə i duŋ ŋwuŋ ŋkuntaŋ ju. 10 Bəne bənhliŋ bə həmə ə kibalaki kie mə chɔɔ jə ə bətənə go gəŋ bwii maa ə bəŋkuntaŋ go nə bituŋ bə wu bə́ yɔ̀ɔ lə, “Mbɛɛ nu duŋ muŋga mu Chu mmuŋ bə́ chēe mwe lə Muŋga mu Ŋkuntaŋ.” 11 Bə́ mà nə bituŋ bə wu nəni, yulahalə i màa i bā bənyii nfíŋ yiih ə kaani foo bəne ŋə̀ŋ gəə ŋɨ̀ŋ bə́. 12 Kwaalə, ə chulə Filip bwo yee i dōntə hlɨŋ nwaa ki muŋkɨŋ mu Chu maa ki yii li Jisho Kleto, bəkwɛɛ bə bənəə bemi hlɨŋ nni i mà dontə ye, i yii bə́ ə njɔ. 13 Shaamuŋ yo kibɛɛ bemi dəŋ bə́ yii wu ə njɔ. I hlə ba kwaa yee i dūŋ baha ə Filip go i ŋə̀ŋ bieŋ biŋkpee gbo biŋkuntaŋ bə bieŋ bbɨŋ bi nyìi muŋga mu Chu bbɨŋ i màa i fə̄, gəə ŋɨ̀ŋ wu.

14 Bəne bə faŋnə bə Jisho ə Jelushalɛŋ ja wo lə bəne bə Shamalia jəə ba die Chu, bə́ hlə faŋ Pita bəə Jɔɔŋ bə bə́. 15 Bə́ gəŋ bwii həmə, cheemə bə bəne bə kimbemi bie lə bə́ kənə ə Fiana Wɛɛŋ go, 16 yulahalə Fiana Wɛɛŋ mà kə bwoo ə bə́ ju go kə. Bə́ mà chɔɔ yii dəŋ bə́ ə njɔ kwaa ə yii li Baba Jisho bəŋ. 17 Pita bə Jɔɔŋ chee Chu, chi kwáŋ ŋəbə ə bə́ bəŋ, bə́ hlə kənə Fiana Wɛɛŋ. 18 Ə chulə Shaamuŋ ŋəŋ ye bəne bə faŋnə bə Jisho chi kwáŋ ə bəne bəŋ Fiana Wɛɛŋ bwo ə bə́ go, i hlə yee i nə̄ kpo bə bə Pita bəə Jɔɔŋ, 19 i yɔ̄ɔ lə, “Bə nə mi muŋga muhŋ dəŋ, fo maa ə duŋ nyəhə nnu nchi kwáŋ ŋəŋŋ ə wu bəŋ, i kənə Fiana Wɛɛŋ.” 20 Kwaalə Pita chuu bə wu lə, “Wə bə kpo wo laa bu lanə. Wə kah ləhəŋ maa yee wə hlē lə ə duŋ ə bə́ taŋ nnə llɨŋ li dùŋ li Chu bə kpo lə? 21 Wə kənə lə dɔhɔ dududu ə nimi lɨhŋ mə kə, yulahalə tɔŋ lo chaalə ə Chu mə kə. 22 Fii tɔŋ lo bə fieŋ fiwaha ffɨŋ wə kīɛɛ fie lə wə fə, chee bə Chu ləkə Baba Chu lə laamə nə munhlenə muŋ'waha mmuŋ wə kə̀nə mwe ə tɔŋ lo go. 23 Ŋŋəŋna lə wə fiila bə díi ŋəŋge, chu nfwa yiwaha.” 24 Shaamuŋ kɔnɔ Pita bəə Jɔɔŋ lə, “Butee, bə chee bə Baba lə fieŋ fidi ə bieŋ bbɨŋ bə yɔ̄ɔ bɨhŋ mə kə duŋ nə bə mi kə.”

25 Pita bə Jɔɔŋ dontə kaa die Chu, yɔɔ bieŋ bbɨŋ bə́ kə̀lə ki Jisho, hlə ja chu dɨŋ ə Jelushalɛŋ. Ye bə́ màa bə́ chū lə dɨŋ, bə́ kah ə ŋəŋkwili ŋə Shamalia mə kiŋaaŋkə, bə́ dòntə hlɨŋ Chu nwaa mə.

Filip yii mbɛɛ nnu Itopia ə njɔ

26 Nchinda Baba bu yɔɔ bə Filip lə, “Ja bwɔ ə wɛɛ wunhlili, gəŋ ə je nni i fù ə Jelushalɛŋ nni i kàh ə nji nji i gəŋ ə Gasha.” 27 Filip hlə ja yee i bwɔ̄. Mbɛɛ ŋkuntaŋ ju nnu Itopia duŋ ə je ye mə. I mà duŋ mbɛɛ nnu bə́ mà fwoola wu bɨŋ, ə duŋ ŋwuŋ nnu i màa i fwōŋ kpo wi Yah Kanda nnu i màa i hlāah kitɨŋ ki Itopia. Mbɛɛ yo mà no ə Jelushalɛŋ dɔhɔ kkɨŋ i mà gəŋ bənchee Chu, 28 yee i chū dɨŋ ə kitɨŋ kiih mə i shiila ə kikɔtɔ kidi bəŋ nyáŋ kpāh wu, i chee fieŋ ə Kiŋwaati ki Ejaya mbɛɛ hlɨŋ Chu mà bieŋ mə. 29 Fiana Wɛɛŋ yɔɔ bə Filip lə, “Baŋ gəŋ baha ə kikɔtɔ kie go.” 30 Filip lələ gəŋ baha ə ki go, wo ye mbɛɛ yo chee ə Kiŋwaati ki Ejaya mə. I bii bə wu ləə, “Wə chēe nəni wə woo fieŋ ffɨŋ ki yɔ̄ɔ fie lə?” 31 I chuu lə, “Duŋ ə ŋ'wo ləhəŋ mbɛɛ kaani kə nachɛ nə mi lə?” I hlə yɔɔ lə Filip biŋ bwo bə́ shii bəə wu ə kikɔtɔ kie bəŋ. 32 Dɔhɔ kkɨŋ i màa i chēe kie ə Kiŋwaati kie mə màa ki yɔ̄ɔ lə,

“I mà duŋ ye shɔŋ nni bə́ gəŋ nyieŋ,

baa duŋ ye ŋwa nshɔŋ nu bwɔɔ nnu bə́ ŋwì lú ŋiih,

i kə dee jə kə.

Bwɔɔ mənhliŋ i bà dəŋ kijə kimaalə.

33 Bə́ mà nəə wu giaali, nɨhŋ kə hlaah lə nhlaa wi yəəŋ.

Ə yáa nyəhə nnu i yá yɔɔ ki bwɔni biih,

yaŋ bə́ mà kaala bə kinduŋh kiih yaŋ kwe lə?”

34 Mbɛɛ ŋkuntaŋ yo hlə kɔnɔ Filip yɔɔ lə, “Butee wə, bu yɔɔ kwaa mi, mbɛɛ hlɨŋ Chu nu yɔ̀ɔ ki nyəhə lə? I yɔ̀ɔ ki gbo wiih lii ki mbɛɛ ju lə?” 35 Filip hlə chɔɔ kwaa bə dɔhɔ ki Kiŋwaati kie, yee i nāchɛ ki hlɨŋ nwaa Jisho ye bə wu.

36 Bəə wu yee bə́ gə̄ŋ kwaa ə je, bə́ gəŋ bwii ə dɔhɔ kidi mə kkɨŋ ŋgwiŋ mà duŋ həmə. Mbɛɛ ŋkuntaŋ yo yɔɔ lə, “Kee ŋəŋ, ŋgwiŋ mie fəŋ, ə laha ffɨŋ fi baŋ lə wə kə yii lə mi ə njɔ lə?”

[ 37 Filip chuu bə wu lə, “Ə wə lə bemi bə Jisho Kleto bə tɔŋ lo linhliŋ, ə n'yii wə ə njɔ.” I chuu lə, “Mbema lə Jisho Kleto duŋ Ŋwa Nchu.”]^ª

38 Mbɛɛ ŋkuntaŋ yo hlə yɔɔ lə bə́ chi kikɔtɔ kie. Bəə Filip hlili, lɛɛ gəŋ mə njɔ, Filip yii wu ə njɔ. 39 Ye bə́ fulə mə njɔ, Fiana Baba ya jə Filip həmə, mbɛɛ ŋkuntaŋ yo nakə baa lə ŋəŋ ə wu go kə. Kwaalə, yee i gə̄ŋ kwaa wu fiih bə kintɨŋ. 40 Filip duŋ duŋ fu ə Ashotu, hlə ja yee i gə̄ŋ, i kàh ə bibalaki mə binhliŋ, i dòntə hlɨŋ nwaa Chu, gəŋ bwii ə kibalaki ki Kashalia mə.