Nimi 9

Shɔl kaanə yii tɔŋ ə Jisho mə

Ə mà duŋ ə bwɔɔ yo bəŋ, Shɔl kaani i fwèe bə lo, i lɔhiŋ bəne bə kintu bə Baba lə mə lə jii bə́. I hlə gəŋ ə che kwoo ki bəche ntofi kwuŋ, 2 noŋ lə i nə wu biŋwaati lə i gəŋ bə bi ə chə́ŋ yí cheenə Chu yi Damashku mə, bbɨŋ bi nyìi lə ə mə lə ŋəŋ lə bəne bie mə bbəŋ bə́ bə̀lə Je Baba, maa ə duŋ bənəə ləkə bəkwɛɛ, i kwo kwaa bwo bə bə́ ə Jelushalɛŋ.

3 I nə, Shɔl hlə yee i gə̄ŋ ə Damashku, lə i chu gəŋ bwii baha ə kibalaki kie mə, kinchaa kidi lala bwo buh, hlili bwo ə wu bəŋ. 4 I gbe həkwe, wo ye die yɔɔ bə wu lə, “Shɔl, Shɔl, wə hlɔ̀ɔ wuh ə mi dɨŋ nəni yulaha lə?”

5 I bii ləə, “Baba, ə wə nyəhə lə?” Die ye chuu lə, “Ə mi Jisho, ə mi wu nnu wə hlɔ̀ɔ yo wuh ə wu dɨŋ. 6 Fidiɛɛ, ja fa, wə lɛɛ gəŋ ə kibalaki mə, bə́ lə yɔɔ wə fieŋ ffɨŋ wə kənə bənfə.” 7 Bəne bbəŋ bə́ màa bə́ jāa bie bə Shɔl lemi həmə fieŋ fi yɔɔnə hləŋ, ye bə́ màa bə́ wōlə die ye kə ŋəŋ nə ə mbɛɛ yo go kə.

8 Shɔl ja həmə həkwe, bwɔɔ nnu i mà wɛ díi ŋiih, i nakə yee i ŋə̄ŋ ə bieŋ go kə. Bə́ hlə kənə wu ə kwaŋ go, yee bə́ chɛ̄chɛ bə́ gə̄ŋ bə wu ə Damashku. 9 I gəŋ yee i dūŋ mə joo tɔh i kə ŋəŋ nə ə bieŋ go kə. I duŋ nəni, i kə diee fieŋ, i kə ŋwee fieŋ.

10 Mbɛɛ kimbemi ju mà duŋ həmə ə Damashku yii liih duŋ lə Anania. Baba Jisho hlə chee wu ə yobutuu mə yɔɔ lə, “Anania.” I bemi lə, “Baba, nu mi fəŋ.”

11 Baba yɔɔ bə wu lə, “No, gəŋ ə je nni bə chēe ye lə Ntiiŋ, bwɔɔ nnu wə lə bwii ə Judash chəŋ, wə bii mbɛɛ ju nnu Taashu nnu bə́ chèe lə Shɔl. Wələ wo, i yo həmə i yu chēe Chu, 12 mə hə ŋəŋna mbɛɛ ju ə yobutuu mə nnu bə chēe lə Anania, i bwoo bwo chi kwáŋ ə wu bəŋ, mə hlə chɔɔ bəŋəŋ ə bieŋ go.”

13 Kwaalə, Anania yɔɔ lə, “Baba, ŋ'woo ə bəne bə kiŋaŋ kwáŋ ki mbɛɛ nu ye i fə̀ bieŋ biwaha bə bəne bbəŋ bə́ dùŋ bə Chu ə Jelushalɛŋ. 14 I bwo nəni, i jəə muŋgeni ə bəche ntofi bəŋkuntaŋ bəŋkuntaŋ kwáŋ, fo mə lə bwo kwo bəne bənhliŋ yaŋ bbəŋ bə́ chèe Chu bə́ tà yii lo.”

15 Baba chuu bə wu lə, “Gəŋ kwaa. Nshaala mbɛɛ nu ye ŋwuŋ nimi ŋgwəŋ, lə yee i dōntə ki yii lɨŋŋ bə bəne bbəŋ bə́ dùŋ kə duŋ nə Bəjuu maa bəŋkɨŋ bəbə, maa bə bəne Bəishlael. 16 Mi kibɛɛ nlə nnyii wu ye mə kənə bəŋəŋ ə ŋgə go yu yii lɨŋŋ.”

17 Nəni, Anania hlə gəŋ, lɛɛ ə chəŋ ye mə, i gəŋ chi kwáŋ ŋiih ə Shɔl bəŋ, chee wu lə, “Shɔl ŋgwoŋ, ə faŋ Baba Jisho mi. Ə wu Jisho nnu wə ma ŋəŋ yo ə je bwɔɔ nnu wə maa wə bwō yaŋ. I faŋna mi lə, mbwo nfə lə wə chu ŋəŋ ə bieŋ go, ə Fiana Wɛɛŋ fiili ə wə mə.” 18 Kwaa ye i yɔɔlə nəni, fieŋ fidi ye yoyo lə fu ə díi ŋə Shɔl mə tee həkwe, i hlə gbe bəŋəŋ ə bieŋ go. I ja fa, bə́ hlə yii wu ə njɔ. 19 I hlə di fieŋ, muŋgeni kwələ chu ə wu mə.

Shɔl dontə hlɨŋ Jisho ə Damashku

Shɔl duŋ ə Damashku bə kintu ki bəne bə kimbemi ə joo mə chɛɛ, 20 hlə chɔɔ cha mi yee i jāa ə chə́ŋ yí cheenə Chu mə, i dòntə lə, “Jisho duŋ Ŋwa Nchu.” 21 Bəne bənhliŋ bbəŋ bə́ màa bə́ wō yee bə́ nāamə ləə, “Nu kə duŋ nə mbɛɛ nnu i màa i jāa yo i kaa bə bəne bu kaanə bbəŋ bə́ chèe bə tà yii li Jisho ə Jelushalɛŋ lə? Nhle lə i bwo yaŋ nəni ə duŋ bəŋkwo bəne bbəŋ bə́ dùŋ yaŋ fiimə chu mə, nə ə kwáŋ ŋə bəche ntofi bəŋkuntaŋ bəŋkuntaŋ mə lə?”

22 Shɔl yee i dōntə kwaa wu fiih ki Jisho ntakə ntakə, i nyìi lə Jisho duŋ Nchuu Fwoo nnu Chu mà kaachi yo. Bəjuu bbəŋ bə́ mà duŋ bie ə Damashku jɨnə fieŋ ffɨŋ duŋ ə bə́ chuu bə wu.

23 Ə chulə joo kiŋaaŋkə kaah, Bəjuu bie shii, chuŋ nchuŋ bənjii Shɔl. 24 Bə́ hlə yee bə́ dūŋ bə kè wu ə fwiih wi mbaŋ wu Damashku fwi, lə bwɔɔ nnu mə lə yee i kàh ləkə ə duŋ ə butuu ləkə ə duŋ ə bushi, ə bə jii wu. Kwaalə, Shɔl kələ nchúŋ yibə ye. 25 Bəne biih bə kintu bie hlə jə wu ə butuu, yii ə kijee mə, fwoo wu ə fiwulə fi mbaŋ yo mə, hlili wu kwe ə bweenə kibɛɛ.

Shɔl gəŋ ə Jelushalɛŋ

26 Shɔl chu dɨŋ ə Jelushalɛŋ, i kiɛɛ bəmbumə ə kintu ki bəne bə kimbemi mə, bə́ yee bə́ lɔ̄ wu bu lɔnə, yulahalə bə́ mà kə bemi ba lə i duŋ mbɛɛ ə kintu kibə mə kə. 27 Kwaalə, Banaba jə wu, bəə wu gəŋ ə bəne bə faŋnə bə Jisho mə. I yɔɔ bə bə́ ye Shɔl mà ŋəŋ ə Baba go ə je Baba yɔɔ bə wu, baa yɔɔ bə bə́ ye i màa i dōntə ki Jisho ə Damashku kə lɔɔ kə. 28 Nəni, Shɔl hlə yee i dūŋ bəə bə́ jàa ə bidɔhɔ binhliŋ bi Jelushalɛŋ mə, bə́ dòntə ki Jisho, kə lɔɔ kə. 29 I bwo yee i yɔ̄ɔ dəŋ bə Bəjuu bbəŋ bə́ màa bə́ yɔ̄ɔ díe yí Glik, noo noonə bə bə́, bə́ hlə ja yee bə́ kīɛɛ je bənjii wu. 30 Bəne bə kimbemi kələ lə bie bə́ kīɛɛ lə bə́ jii wu, hlə jə wu ə bwɔɔ yo bəŋ bwɔ bə wu ə kibalaki ki Kashalia mə, faŋ wu i gəŋ ə Taashu.

31 Ə bwɔɔ nu bəŋ, kimbumə ki bəne bə kimbemi ŋɔɔni ə ŋgə kwáŋ ə wɛ́ɛ ŋə kitɨŋ ki Judia bə ki Galilii maa ə Shamalia mə. Fiana Wɛɛŋ fə kimbumə kie yiimə, baa yee i chwaŋ kintu kie ki kò. Yee bə́ dūŋ, bə́ bwɔ̀kwe kwaa ə duŋ bə Baba.

Pita gəŋ ə kwili li Lida maa ə li Jopa mə

32 Pita yee i jāa, i gə̀ŋ ə bəne bbəŋ bə́ dùŋ bə Chu ə bidɔhɔ mə binhliŋ, i jaa gəŋ bwii ə bə Lida go. 33 Ye i yo lə həmə, i ŋəŋ ə mbɛɛ ju go nnu i mà kpee wɛɛ mwe, yii liih duŋ lə Ania i mà gɔŋna ta bigoŋ nyaaŋ. 34 Ye Pita ŋəŋ lə ə wu go, chee lə, “Ania, Jisho Kleto yu ŋwūhuŋ wə. Ja fa wə bwɛɛ kintaŋ ko.” Cha mi Aniya bu ja fa. 35 Bəne bə Lida maa bbəŋ bə́ dùŋ ə bidɔ bi Shalɔŋ mə binhliŋ ŋəŋ ye mbɛɛ nu ŋwunə lə, bə́ yii tɔ́ŋ ə Baba Jisho mə.

36 Ə mà duŋ kpɛ ju duŋ ə kibalaki ki Jopa kie mə, ə duŋ mbɛɛ kimbemi, yii liih duŋ lə Tabita, li duŋ ə díe yí Glik mə lə Doka.^ª I màa i fə̄ bieŋ binwaa binwaa bwɔɔ mənhliŋ, i chɨ̀nə bəne bbəŋ bə jɨ̀nə. 37 Lə yee ə dūŋ ə joo ŋie mə, kpɛ wo gbe jəŋ, ki kpe. Bə́ wii kiŋwuuni kiih, biŋ chi ki ə chəŋ ninte chɔɔmənə mə. 38 Ye Jopa mà duŋ lə baha bə Lida, kintu ki bəne bə kimbemi wo lə Pita yo ə Lida, hlə faŋ bənəə bəfwe lə bə́ gəŋ ŋəŋ wu. Bə́ gəŋ kɔnɔ wu lə, “Butee, bwo chichii lə.”

39 Pita hlə ja dəŋ lə bəə bə́ yee bə́ gə̄ŋ. I gəŋ bwii həmə, bə́ jə biŋ bə wu ə chəŋ chɔɔmənə ye mə. Bəkwɛɛ bə bəŋkwu bə həmə bənhliŋ kaa wu kunə yee bə́ dē, bə́ nyīi bindu bbɨŋ Doka màa i fə̄ bwɔɔ nnu i màa i kāani həmə. 40 Pita fwoo bə́ bweenə bənhliŋ, bɛŋ núh kwe chee Chu, fii gbo yɔɔ bə kiŋwuuni kie lə, “Tabita ja fa.” I hlə niɛɛli díi, kee Pita, hlə ja shii fa. 41 Pita kənə wu ə kwaŋ go, i lemi fa. I ja dii bəne bbəŋ bə́ dùŋ bə Chu bə bəkwɛɛ bə bəŋkwu bie, nyii wu bə bə́, i choo ŋkee. 42 Hlɨŋ ye hlaamə gəŋ ə Jopa kiɛkiɛ. Bəne kiŋaaŋkə yii tɔ́ŋ ə Baba mə. 43 Pita duŋ mə Jopa joo kiŋaaŋkə, bəə mbɛɛ ju nnu i bwɛɛ bwá nnu yii liih dùŋ lə Shaamuŋ.