Nimi 10

Fieŋ ye yobutuu lə bwo ə Kɔnili mə

Mbɛɛ ju mà duŋ ə kibalaki ki Kashalia mə bə́ chèe wu lə Kɔnili, i dùŋ che kwoo ki kintu kidi ki bəne bə bicha bə Luŋ, kkɨŋ bə́ màa bə́ chēe lə ki Itali. 2 I mà duŋ mbɛɛ nnu bəne bənhliŋ bə wu chəŋ mà yiila tɔ́ŋ ə Chu mə. I bwɔ̀kwe i chèe Chu bwɔɔ mənhliŋ, i nə̀ nnə gbaaŋ bə Bəjuu bənjɨnənə. 3 Ə chu butuu budi dəŋ ye bitaŋ bitɔh lə ə bushi, fieŋ fidi ye yobutuu lə kwo wu, i ŋəŋna nchinda Chu ə fieŋ fie mə. Nchinda yo bwo lɛɛ chee wu lə, “Kɔnili.” 4 Kɔnili lɔ, i tɨŋ díi ə wu go bii ləə, “Che kwoo, ə laha lə?” Nchinda yo chuu lə, “Chu woo cheenə ko, baa ŋəŋ nnə́ ŋŋəŋ wə nə̀ bə bəne bənjɨnənə, hle wə. 5 Fidiɛɛ, faŋ bəne ə Jopa bə́ gəŋ dii mbɛɛ ju nnu yii liih duŋ lə Shaamuŋ, lidi duŋ lə Pita. 6 I bwo yee i dūŋ bə Shaamuŋ ju nnu i bwɛ̀ɛ bwá nnu kwili liih baha ə nɔ go.” 7 Ye nchinda Chu yo yɔɔlə nəni i hlə no. Kɔnili she dii bəne biih bə nimi bəfwe, baa dii dəŋ ŋwuŋ kicha ju nnu i màa i bā bənfwoŋ wu, i mà duŋ mbɛɛ nnu wu dəŋ mà yiila tɔŋ ə Chu mə. 8 Lə bə́ bwo, i yɔɔ bieŋ binhliŋ bbɨŋ bi hə duŋ bə wu, hlə faŋ bə́ ə Jopa.

Chu nyii fieŋ fi ŋkpee gbo bə Pita

9 Butuu fu wu, ə bwo chu ye hlɨŋ bushi lə, bə́ chu gəŋ bwii ə kibalaki kie mə. Pita ja biŋ ə chəŋ bəŋ bəŋwubənchee Chu. 10 Jəbulə gbe bəŋ'wu wu, i kənə hlɔɔ bəndi, bə́ kaani bə́ jwa biləə bujwanə. Fieŋ ye yobutuu lə kwo wu. 11 I ŋəŋ ə fieŋ fie mə, buuli wɛɛma, fieŋ fidi hlīli fi bwō buh ye dii li kindu lə, bə́ kəna ki ə bənchi bənua go. 12 Bichəŋ bi nyáŋ yinhliŋ yyɨŋ yí jàa, bə yyɨŋ yí jìŋ buh, maa munyini mmuŋ mu tìɛŋ buh, duŋ ə kindu kie mə. 13 Die yɔɔ bə wu lə, “Pita, ja fa nyieŋ jii wə di.” 14 Pita chuu lə, “Baba, nduŋ ə mɔŋ kə, yulahalə n'ya hlaa di bieŋ woo woo ləkə bbɨŋ bi dùŋ kə duŋ nə wɛɛŋ kə.” 15 Die ye baa yɔɔ bə wu lə, “Wə kə nyɛhiŋ fieŋ ffɨŋ Chu fəə fi duŋ wɛɛŋ kə.” 16 Yee fi dūŋ lə gəŋ bwii ə chá bəŋ shɔ, bə́ hlə bihiŋ chuu fieŋ fie mə buh.

17 Fieŋ ffɨŋ fi kwo fie wu ye yobutuu lə fɨhɨŋ Pita yee i nāamə ləə ffɨŋ fieŋ nyīi lə laha leee. Ə bwɔɔ yo bəŋ chu duŋ bəne bbəŋ Kɔnili mà faŋ bie hə bwoo bə́ bii kwili li Shaamuŋ nnu i bwɛ̀ɛ yo bwá, bə́ lemi ə fwiih wi mbaŋ we tɨŋ, 18 bə́ chēe, bə́ bīi ləə, “Ŋwuŋ gbɛŋ ju yo fəŋ nnu yii liih duŋ lə Shaamuŋ Pita lə?” 19 Ye Pita mà kaani lə i hlē ki fieŋ fie ye fi bwo lə ə wu go, Fiana Wɛɛŋ yɔɔ bə wu lə, “Kee ŋəŋ, bəne bətɔh bie bə́ kīɛɛ wə. 20 Ja fa bwɔ yee bə gə̄ŋ gbu mwe. Wə kə kpaa gbo kə, ə faŋ mi bə́.” 21 Nəni, Pita hlə no hlili, yɔɔ bə bəne bie lə, “Ə mi nnu bə kīɛɛ. Bə bwo lə ləhəŋ lə?” 22 Bə́ chuu lə, “Kɔnili nnu i dùŋ yo che kwoo ki kintu kidi ki bəne bə bicha bə Luŋ faŋna be. I duŋ ŋwuŋ kiyəyəŋ, nnu i lɔ̀ Chu, Bəjuu bənhliŋ yòhi wu. Nchinda Chu wɛɛŋ ju ma yɔɔla lə i faŋ hlɨŋ lə wə bwo ə wu chəŋ, fo mə lə wo fieŋ ffɨŋ wə lə yɔɔ bə wu.” 23 Ye bə́ chuulə nəni, Pita hlə yɔɔ bə́ lɛɛ bəə bə́ duŋ.

Pita gəŋ bə hlɨŋ Chu ə Kɔnili chəŋ

Butuu fu wu, i ja bəə bə́ yee bə́ gə̄ŋ. Bəne bə kimbemi bədi bə Jopa bələ wu. 24 Bə́ jaa gəŋ nɔŋ, bu baa fu wu bə́ bwii ə Kashalia. Kɔnili bə bəne biih bə kichəŋ maa binshiŋ biih bitɔŋ bbɨŋ i mà jaŋ bie hə chu ke bə́. 25 Ye Pita màa i lɛ̄ɛlə i gə̄ŋ ə chəŋ, bəə Kɔnili bənə. Kɔnili gbe wu fwi kohi wu. 26 Kwaalə, Pita jaa wu fa yɔɔ lə, “Ja fa, nduŋ kwaa fɨŋŋ mbɛɛ dəŋ ye wə.” 27 Yee i yɔ̄ɔ bə Kɔnili i lɛ̄ɛ i gə̄ŋ ə chəŋ, ə chu lə i lɛɛla mu, i ŋəŋ bəne yiila mu chəŋ. 28 I yɔɔ bə bə́ lə, “Bə́ kələ kinwaa lə ŋkɨnə ya bemi lə lə ŋwuŋ Bəjuu la kpuuni ləkə bəŋkwo kinshiŋ bə mbɛɛ nnu i dùŋ kə duŋ nə ŋwuŋ Bəjuu kə. Kwaalə, Chu ma nyiila bə mi lə ŋkənə lə bənchee mbɛɛ ju yɔɔ bə wu lə i dùŋ ŋwuŋ woo ləkə lə i dùŋ nə wɛɛŋ kə. 29 Nəni, bə faŋna hlɨŋ nih lə mbwo, mbwoo, ŋkə nɨhŋnə kə. Nhlə n'yee mbīi bə bəŋ ləə bə chee mi lə ləhəŋ lə?”

30 Kɔnili chuu lə, “Daŋ duŋna ba joo na ye mmaa ndūŋ ə mi chəŋ dəŋ ye bwɔɔ nnu bəŋ bitaŋ bitɔh ə bushi nchēe Chu. Mbɛɛ ju bu ja gənə fu ə mi fwi i leela bindu bi tə̄. 31 Mə yɔɔ bə mi lə, ‘Kɔnili, Chu woo kaa cheenə ko baa ŋəŋ nnə llɨŋ wə nə̀ le bə bəne bənjɨnənə, nhle wə. 32 Nəni, faŋ bəne ə Jopa bə́ gəŋ dii mbɛɛ ju nnu yii liih duŋ lə Shaamuŋ, lidi duŋ Pita. I dùŋ bə Shaamuŋ nnu i bwɛ̀ɛ yo bwá nnu kwili liih duŋ baha ə nɔ go.’ 33 Cha mi nəni, nhlə faŋ hlɨŋ lə wə bwo. Wə bwoo nəni, fi nwaala gbaaŋ. Kkə hlə yee kkə dūŋ fəŋ ə Chu fwi bəŋ'wo fieŋ ffɨŋ Baba faŋ fie wə lə wə bwo yɔɔ bə be.”

Pita yɔɔ bə bəne bbəŋ bə́ dùŋ kə duŋ nə Bəjuu ki Jisho Kleto

34 Pita hlə gbe bən'yɔɔ i yɔ̄ɔ lə, “Bə kichɛɛŋ, ŋŋəŋna lə Chu nyìilə kichili kə. 35 Mbɛɛ mənhliŋ nnu i lɔ̀ wu i baa i fə̀ bieŋ bbɨŋ bi dùŋ yəəŋ i tɨŋ jə wu i kə kee lə ləə i bwò fəhəŋ lə. 36 Bə kələ hlɨŋ nni Chu mà faŋ bə bəne Bəishlael, dontə hlɨŋ nwaa lə Jisho Kleto mà bwo fo kindunshiiŋ lə duŋ. Jisho Kleto nu duŋ Che Kwoo ki bəne bənhliŋ. 37 Bə kələ fieŋ ffɨŋ fi mà duŋ ə kitɨŋ ki Judia mə kinhliŋ, fi mà chɔɔ ə Galilii, dəŋ ye Jɔɔŋ màa i dōntə lə i yìi bəne ə njɔ. 38 Bə kələ dəŋ ye Chu mà shoo Fiana Wɛɛŋ ə Jisho nnu Nashalit go, baa nə wu muŋga, yee mu dūŋ bə wu. Ye Chu màa i dūŋ lə bə wu, i hlə yee i jāa ə bidɔhɔ mə binhliŋ i fə̀ nimi linwaa baa ŋwuhuŋ bəne bbəŋ dɛbulu chwa fwɔ bə bə́. 39 Ə be bbəŋ kkə mà ŋəŋ bie bieŋ bbɨŋ i màa i fə̄ ə kitɨŋ ki Bəjuu mə kinhliŋ, maa bbɨŋ i màa i fə̄ ə kibalaki ki Jelushalɛŋ mə. Bə́ mà bweena wu ə kiŋgwa go i kpe. 40 Kwaalə, ə bwo duŋ ə joo bəŋ tɔh, Chu fwoo wu ə kpe mə, i fə bəne ŋəŋ ə wu go. 41 Ə mà kə duŋ nə bəne bənhliŋ bbəŋ bə́ mà ŋəŋ ə wu go kə. Ə mà ŋəŋ kwaa be ə wu go ye Chu mà shaalə be bəndontə ki Jisho. Kkə mà diee baa ŋwi bə Jisho bwɔɔ nnu i mà fu ə kpe mə. 42 I yɔɔ lə yee kkə dōntə die Chu bə bəne, kkə yɔ̀ɔ bə bə́ lə ə wu nnu Chu mà bwa lə i yá hlaah bəne bəŋkee maa bəŋkpi. 43 Jisho nu duŋ nnu bəne bə hlɨŋ Chu bənhliŋ mà yɔɔ kiih lə maa ə lə duŋ ba nyəhə nnu i yìi tɔŋ ə wu mə, ə Chu laamə nə yíwaha yiih kah ə yii liih bəŋ.”

Fiana Wɛɛŋ bwo ə bəne bbəŋ bə́ dùŋ kə duŋ nə Bəjuu mə

44 Kwaa ye Pita mà kaani lə i yɔ̄ɔ bieŋ bɨhŋ nəni, Fiana Wɛɛŋ ja hlili, bwo ə mbɛɛ mənhliŋ bəŋ nnu i màa i wə̄lə biyɔɔnə bie. 45 Gəə ŋɨŋ bəne bə kimbemi bbəŋ bə́ dùŋ Bəjuu bbəŋ bə́ mà bələ Pita, ye bə́ ŋəŋ lə Chu nəə dəŋ nnə liih llɨŋ li dùŋ Fiana Wɛɛŋ bə bəne bbəŋ bə́ dùŋ kə duŋ nə Bəjuu. 46 Bəjuu bie yee bə́ wō ye bə́ yɔ̄ɔ ə díe yyɨŋ bə́ duŋ kə kələ kə, dohi Chu. Pita hlə bii ləə, 47 “Ye Fiana Wɛɛŋ bwolə ba ə bəne bəŋ go yəəŋ ye i mà bwolə ə be go, ə duŋ ə mbɛɛ baa nɨhŋ lə bə́ kə yii lə bə́ ə njɔ kə lə?” 48 Ye Pita bii lə nəni, i hlə yɔɔ lə bə́ yii bə́ ə njɔ ə yii li Jisho Kleto bəŋ. Bwɔɔ nnu dɨŋ, bəne bie kɔnɔ wu lə i duŋ bə bə́ ə joo bəŋ chɛɛ i hlə no.