Nimi 11

Pita yɔɔ fieŋ ffɨŋ fi mà kah ə Kɔnili chəŋ

Bəne bə faŋnə bə Jisho maa bəne bə kimbemi bə Judia bənhliŋ wo lə bəne bbəŋ bə́ dùŋ kə duŋ nə Bəjuu tɨŋna jə dəŋ die Chu. 2 Lə Pita biŋ bwo chu ə Jelushalɛŋ, bəne bə kimbemi bədi hlə hla wu. Bəne bəhŋ duŋ bbəŋ bə́ màa bə́ bā bənlemi lə bə́ kənə bənyieŋ mbɛɛ nnu i dùŋ kə duŋ nə ŋwuŋ Bəjuu, ə i hlə yee i dūŋ ŋwuŋ Chu. 3 Yee bə́ hlā wu bə́ bīi ləə, “Wə ma kah ləhəŋ maa bəŋgəŋ la gbɛŋ ə bəne bbəŋ bə́ kaani bikpaa bintuulə, kaanə gəŋ di bə bə́ lə?”

4 Pita hlə nachɛ bieŋ binhliŋ bbɨŋ bi mà kah, yɔɔ bə bə́ lə, 5 “Mmà nduŋ ə kibalaki ki Jopa mə nchēe Chu, fieŋ ye yobutuu lə ja kwo mi. Ŋŋəŋ ə fieŋ fie mə, fieŋ fidi hlīli fi bwō buh ye dii li kindu lə, bə́ kəna ki ə bənchi bənua go. Fi hlili, lemi ə mi fwi. 6 Ə chulə ŋkee mə, ŋŋəŋ nyáŋ chili chili, yidi duŋ yí bweenə, yidi duŋ yí nji bə yyɨŋ yí jìŋ buh, maa munyini mmuŋ mu tìɛŋ buh. 7 Nja wo ye die yɔɔ bə mi lə, ‘Pita, ja fa nyieŋ jii wə di.’ 8 Nchuu lə, ‘Baba, nduŋ mmɔŋ kə. Fieŋ fi woo ləkə ffɨŋ fi dùŋ kə duŋ nə wɛɛŋ fi mà kə hlaa lə lɛɛ ə mi jə kə.’ 9 Die ye baa yɔɔ mə buh lə, ‘Wə kə nyɛhiŋ fieŋ ffɨŋ Chu fəə fi dùŋ wɛɛŋ kə.’ 10 Fi kah nəni gəŋ ə chá bəŋ shɔ bə́ hlə jə chu bə fieŋ fie finhliŋ fi biŋ buh.

11 Dəŋ ə bwɔɔ yo bəŋ, bəne bətɔh bwii həmə ə chəŋ nni mmàa ndūŋ ye, bə́ no ə Kashalia, bə́ faŋna lə bə́ bwo dii mi. 12 Fiana Wɛɛŋ yɔɔ bə mi lə ŋkə nyɛhiŋ bəŋgəŋ bələ bəne bie kə. Bəŋgwoŋ biaa bə Jopa bə buhlɔ bəhŋ bələ mi, be bənhliŋ gəŋ lɛɛ ə chəŋ mbɛɛ yo mə. 13 Ye kkə lɛɛ lə, i yɔɔ bə be ye i mà ŋəŋ ə nchinda Chu go ə wu chəŋ, i yɔɔ bə wu lə i faŋ mbɛɛ ə Jopa lə i gəŋ dii mbɛɛ ju nnu bə́ chèe lə Shaamuŋ Pita. 14 Mbɛɛ yo lə bwo bə hlɨŋ nni bə́ bəə bəne bənhliŋ bə wu chəŋ yá fukwoo yu yi. 15 Ə chulə nchɔɔla bən'yɔɔ, Fiana Wɛɛŋ ja hlili bwo ə bəne bie go dəŋ yəəŋ ye i mà bwolə ə be go hənchɔɔ jə. 16 Ŋŋəŋ nəni, nhlə nhle ŋoo fieŋ ffɨŋ Baba mà yɔɔlə, ‘Jɔɔŋ màa i yīi bəne ə njɔ, kwaalə, Chu yá yi yii bəŋ ə duŋ ə Fiana Wɛɛŋ mə.’ 17 Ye Chu mà nə lə bəne bie nnə ə dəŋ li llɨŋ i mà nə be bwɔɔ nnu kkə mà yii tɔŋ ə Baba Jisho Kleto mə, nhlə duŋ nyəhə nnu nlə n'yee nnɨ̄hŋ fieŋ ə duŋ nfə Chu lə?”

18 Bəne bie wo ye Pita yɔɔlə nəni, nakə baa lə hla wu kə. Bə́ hlə ja yee bə́ nə̄ ə duŋ kiŋkuntaŋ bə Chu bə́ yɔ̄ɔ lə, “Ə fi lə duŋ nəni, kəə Chu nəə dəŋ je bə bəne bbəŋ bə́ dùŋ kə duŋ nə Bəjuu, lə bə́ fii tɔ́ŋ ŋəbə bwo kənə kinduŋh ki kə kaa.”

Bəne kiŋaaŋkə bbəŋ bə́ mà kə duŋ nə Bəjuu kə yii tɔ́ŋ ə Baba Jisho mə ə Antiyɔk

19 Bəne bbəŋ bə́ mà hlaamə ye ŋgə yo mà chɔɔ lə bwɔɔ nnu bə́ mà jii Shitifiŋ mà gəŋna ə bidɔhɔ bidɔhɔ mə, gəŋ bwii Fonishia, bədi gəŋ Shayplu, bədi Antiyɔk. Ye bə́ mà gəŋ lə nəni, yee bə́ dōntə die Chu ə duŋ kwaa bə Bəjuu. 20 Kwaalə, bəne bədi bə kimbemi bbəŋ bə́ mà no ə Shayplu maa Shiliŋ, gəŋ ə Antiyɔk yee bə́ dōntə dəŋ hlɨŋ nwaa Baba Jisho bə bəne bbəŋ bə́ dùŋ kə duŋ nə Bəjuu kə. 21 Muŋgeni mu Baba Chu fə bəne kiŋaaŋkə yii tɔŋ ə Baba Jisho mə fiimə chu bə wu.

22 Hlɨŋ ni lɛɛ ə bituŋ bi kimbumə ki bəne bə kimbemi bə Jelushalɛŋ. Bə́ hlə faŋ Banaba ə Antiyɔk. 23 I gəŋ bwii mə, ŋəŋ ye Chu nyiila kinleki bə bə́, i wo njənjə, hlə yee i kēeh bə́ lə yee bə́ bə̄lə Baba bə tɔ́ŋ ŋəbə ŋənhliŋ. 24 Banaba nu mà duŋ mbɛɛ nwaa, i fiila bə Fiana Wɛɛŋ baa kənə kimbemi gbaaŋ. Nəni, i fə bəne kiŋaaŋkə həmə yii tɔ́ŋ ə Baba mə.

25 Banaba hlə ja bwo gəŋ ə Taashu bəŋkiɛɛ Shɔl. 26 I kiɛɛ ŋəŋ ə wu go, i jə wu chu dɨŋ bə wu ə Antiyɔk. Bəə wu duŋ həmə kigoŋ kimbɨŋ bə kimbumə ki bəne bə kimbemi, i kèeh bəne kiŋaaŋkə. Ə duŋ ə Antiyɔk yo mə nnu bə́ mà chɔɔ bənchee kintu ki bəne bə kimbemi lə bəne bə Kleto.

27 Dəŋ ə bwɔɔ yo bəŋ, bəne bədi bbəŋ bə́ màa bə bà bən'yɔɔ bieŋ bbɨŋ bə́ wò ye Chu yɔ̀ɔ, no ə Jelushalɛŋ bwɔ gəŋ ə Antiyɔk yo mə. 28 Fiana Wɛɛŋ fə ju ə bə́ mə nnu yii liih mà duŋ lə Agabu ja lemi fa, yɔɔ lə jəbulə ntaabə yá yi kwo bitɨŋ binhliŋ. Jəbulə ye bwo kwo bə́ bwɔɔ nnu Klawdiyu mà duŋ Ŋkɨŋ nnu Luŋ. 29 Kintu ki bəne bə kimbemi bə Antiyɔk wo nəni, bwɛɛ lə mbɛɛ mənhliŋ chuuŋkə kpo ye i kənə, lə bə́ chɨnə bəmaani bbəŋ bə́ dùŋ ə Judia. 30 Bə́ hlə chuuŋkə, faŋ Banaba bə Shɔl mə lə bə́ gəŋ nə bə bəche kimbumə ki bəne bə kimbemi.