Nimi 12

Ŋkɨŋ Hɛlɔ nə ŋgə bə bəne bə kimbemi

Lə yee ə dūŋ ə bwɔɔ yo mə, Ŋkɨŋ Hɛlɔ gbe bənnə ŋgə bə bəne bədi bə kintu ki kimbemi. 2 I yɔɔ bə́ gba Jɛŋ dɨŋ Jɔɔŋ bə hlo i kpe. 3 Ə chulə i ŋəŋna lə fi nwaala Bəjuu bie, i hlə gəŋ fwi bən'yɔɔ lə bə́ kwo dəŋ Pita. Bə́ mà kwo wu ə duŋ joo ŋə Chɔnɔ ki Kibele kkɨŋ bə́ kə yii lə jɔ mə kə. 4 Ye bə́ kwolə wu, hlə fwaŋ ə chəŋ munfwa mə, chi bintu bi bəne bə bicha bənua lə yee bə́ fwōŋ wu bənua bənua. Hɛlɔ mà chi Pita nəni lə bwɔɔ nnu Chɔnɔ ki Ŋkabəŋ kie lə fia kah, ə i fwoo wu chi ə bəne fwi bə́ hlaa wu. 5 Pita hlə yee i dūŋ kwaa ə chəŋ munfwa mə. Kwaalə, kimbumə ki bəne bə kimbemi chee Chu bə wu ntakə.

Nchinda Chu fwoo Pita ə chəŋ munfwa mə

6 Ə chulə yee ə dūŋ ə butuu lə butuu lə fu wu lə Hɛlɔ fwoo Pita bə́ hlaa wu, Pita nɔ̄ŋ kinɨŋ ə bəne bə bicha mə kintekinte bəfwe bə́ hə kwaala wu bə fiaŋ fie, bə fwōŋ. Bəne bə bicha bədi fwōŋ ə chəŋ munfwa ye fwi. 7 Fi kah lə nchinda Baba bu gənə fu bwo, kinchaa tə ə chəŋ munfwa ye mə. Nchinda yo tuu Pita ə fəə go, ŋɛhiŋ wu. Yɔɔ bə wu lə, “Ja fa chəkə.” Ye i yɔɔlə nəni, fiaŋ ye hlə hloonə ə kwáŋ ŋə Pita go gbe həkwe. 8 I baa yɔɔ bə wu lə, “Kwaa kindu ko, lee bikpa, bwo.” Pita fə lə. Nchinda yo baa yɔɔ lə, “Lee kindu ko yee wə bə̂lə mi.” 9 Pita fu yee i bə̄lə wu mə bweenə. I mà kə kələ lə fieŋ ffɨŋ nchinda yo fə fie lə ə chɛɛŋ kə. I màa i hlē lə ə fieŋ fidi ye yobutuu lə ffɨŋ fi kwō wu. 10 Bəə wu jaa kahiŋ dɔhɔ ki fwii kkɨŋ bəne bə bicha fwōŋ kie, kahiŋ dəŋ kkɨŋ ki baŋ kie mu, hlə bwii ə fwiih wi mbaŋ wwuŋ wi fù we gəŋ ə kibalaki kie mə, wwuŋ bə́ mà fə bə bichu. Fwiih wi mbaŋ we wɛɛmə kwaa ə wi kwaŋ, bə́ fu. Ye bə́ fu lə nəni, yee bə́ jāa bə́ bwɔ kwaa ə je, nchinda Baba Chu yo hlə la ə wu dí.

11 Pita she, bufe bwii kwələ chu, i yɔɔ lə, “Fidiɛɛ ŋkəla ba chɛɛŋ lə ə hə faŋ Baba nchinda wi lə i bwo fwoo mi ə kwáŋ ŋə Hɛlɔ mə, nlə nfu ə ŋgə nnu Bəjuu maa bə́ kīɛɛ yo lə bə́ nə mi.”

12 Ye i kələlə nəni, i hlə ja yee i gə̄ŋ ə Meeli mah Jɔɔŋ Maak chəŋ, bəne buma duŋ həmə kiŋaaŋkə bə́ chēe Chu. 13 I gəŋ bwii həmə, kɔɔ fwiih wi mbaŋ we, ŋiaŋ kpɛ ju nnu yii liih mà duŋ lə Loda nnu i màa i nɨ̄ŋ mu chəŋ bwo bəŋ'wɛ. 14 Ə chulə i wo lə ə die Pita, kinjənjə jii wu, i nakə baa lə wɛ mbaŋ yo kə, kaka no fiimə lələ gəŋ lɛɛ ə chəŋ, yɔɔ bə bəne lə, “Pita yo fo mbaŋ fwih.” 15 Bə́ chuu bə wu lə, “Wə gbeja.” I baa i hlūŋ kwaa kwe lə ə Pita. Bə́ dùŋ duŋ yɔɔ lə “Ə lə duŋ ti nchinda Chu wi.” 16 Ye bə́ màa bə́ yɔ̄ɔ lə nəni, Pita baa kwaa i kɔ̄ɔ. Bwɔɔ nnu bə́ mà wɛ ŋəŋ chɛɛŋ lə ə wu, gəə ŋɨŋ bə́. 17 I chɨlə bə́ bə kwaŋ bə́ ba shiiiŋ, hlə yɔɔ bə bə́ ye Baba hə fwoo wu ə chəŋ munfwa mə, baa yɔɔ lə bə́ yɔɔ bə Jɛŋ maa bəne bə kimbemi bənhliŋ. Ye i yɔɔlə nəni, i hlə no gəŋ wɛɛ wudi.

18 Butuu fu wu, bufe yee bu lā bəne bə bicha bie ə nla mə ləə ə laha ffɨŋ fi duŋna bə Pita lə. 19 Hɛlɔ fwoo bəne lə bə́ jaa kiɛɛ wu. Bə́ kiɛɛ, kiɛɛ hləŋ. I hlə dii bəne bə bicha bbəŋ bə́ màa bə́ fwōŋ bie Pita, bii bieŋ bə bə́, hlə yɔɔ lə bə́ jə bə́, bə́ gəŋ laa bə́. Bwɔɔ nnu dɨŋ, Hɛlɔ no ə kibalaki ki kitɨŋ ki Judia mə, bwɔ gəŋ yee i dūŋ ə kibalaki ki Kashalia mə.

Kpe Ŋkɨŋ Hɛlɔ

20 Ə mà duŋ ə bwɔɔ yo bəŋ Ŋkɨŋ Hɛlɔ fwoo tɔŋ bə bəne bə Taya maa bə Shidɔŋ. Bəne bie hlə buhuŋ go bəŋgəŋ kwi wu kwáŋ lə kindunshiiŋ duŋ həmə, yulahalə kitɨŋ kibə màa ki bənə biləə ə duŋ ə kitɨŋ kiih kwuŋ. Bə́ gəŋ, hlaa kwo kinshiŋ bə Blashtu nnu i mà duŋ che kintɔŋ ki ŋkɨŋ.

21 Butuu mà bwo wunə, Ŋkɨŋ Hɛlɔ lee bindu bitoo, shii ə kabala muŋkɨŋ bəŋ, hlə yee i nə̄ biyɔɔnə bə bəne bie. 22 Bə́ ja yee bə́ wīli liwili, bə́ kōhi wu bə́ yɔ̄ɔ lə, “Bɨhŋ biyɔɔnə lə bi chu, ə kə duŋ nə bi mbɛɛ kə.” 23 Cha mi, nchinda Baba hlə faŋ jəŋ ə Ŋkɨŋ Hɛlɔ go, yulahalə i mà kə nəə kiŋkohi ki Chu kə. Wúŋ hlə di wu, i kpe.

24 Kwaalə, die Chu yee i lɛ̄ɛ ə tɔ́ŋ ŋə bəne mə, i hlāamə i gə̄ŋ fwi fwi.

25 Banaba bə Shɔl kaanə fieŋ ffɨŋ bə́ mà faŋ fie bə́ ə Jelushalɛŋ yu fi, hlə fiimə chu dɨŋ ə Antiyɔk. Bwɔɔ nnu bə́ màa bə́ chū dɨŋ, bə́ jə Jɔɔŋ Maak.