Maak 16

Jisho fu ə kpe mə

(Matio 28:1-8; Lukaa 24:1-12; Jɔɔŋ 20:1-10)

Lə bunte bwo kah, Meeli Madaliŋ bə Meeli mah Jɛŋ, maa Shalome gəŋ taŋ mɛŋ məndi mənfuchee nwaa, lə bə́ gəŋ lɔɔ kiŋwuuni ki Jisho kie mu. 2 Lə yee ə dūŋ həmbumbwaa fili fili kwaa ye kitaŋ bɛɛlə ə duŋ butuu bu fwii ə kibumwe mə, bə́ ja yee bə́ gə̄ŋ ə biee ye bəŋ. 3 Ə chulə yee bə́ gə̄ŋ nəni, yee bə́ bīi bə́ go ŋəbə ləə, “Ə nyəhə nnu mə lə bɨhɨŋ fwoo tə llɨŋ bə́ kəə le fwiih wi biee we mu lə?” 4 Kwaalə, lə bə́ lɛɛ díi, bə́ ŋəŋ bə́ hə bɨhaŋ fwoo tə le. Tə lɨhŋ màa liŋkuntaŋ gbaaŋ. 5 Lə bə́ lɛɛ gəŋ mə biee ye mə, bə́ ŋəŋ hlɔŋ ŋiaŋ nyo ju i shiila kwaŋ diee. I leela kindu ki wu buuu. Bikuu lu bə́ gbaaŋ. 6 Hlɔŋ ŋiaŋ nyo yo glə yɔɔ bə bə́ lə, “Bikuu kə loo bəŋ kə. Ŋkələ lə bə kīɛɛ ə duŋ Jisho nnu Nashalit nnu bə ma bweeni yo ə kiŋgwa go. Mə lə fəŋ kə. Mə hə fwoo ə kpe mə. Bə kee ŋəŋ dɔhɔ kkɨŋ bə ma nɔhiŋ kie wu. 7 Bə gəŋ yɔɔ bə bəne biih bə kintu maa bə Pita lə mə kaah bəŋ fwi bəŋgəŋ ə Galilii. Bə lə gəŋ ŋəŋ ə wu go mə ye i mà yɔɔlə bə bəŋ.” 8 Bəkwɛɛ bie fu ə biee ye mə yee bə́ nə̄nə nəni kɨkɨkɨ, bə́ ja bwaalə ə mbwaalə mə, ntɨŋ hə ŋima bə́ jə nəni kakala. Bə́ nakə yɔɔlə fieŋ fidi bə mbɛɛ ju kə, yulahalə bə́ mà duŋ bə nɨŋ.^ª

Jisho nyii gbo wiih bə bəne

[ 9 Jisho mà fu ə kpe mə butuu bu fwii ə kibumwe go ə kaani fili fili, i hlaa fu ə duŋ ə Meeli Madaliŋ go nnu i mà fwoo yo muŋkwini fumanyaaŋ ə wu go. 10 Meeli hlə gəŋ yɔɔ bə bəne bbəŋ bə́ màa bə́ bā bie bə Jisho. Bəne bəhŋ duŋ bbəŋ bə́ mà shee yee bə́ dē bə́ chɨŋna bikuu kwe. 11 Ə chulə lə bə́ wo ye kpɛ yo yɔɔ lə mə hə ŋəŋna ə Jisho go i duŋ ŋkee, bə́ nakə bemi kə.

(Lukaa 24:13-35)

12 Ə fɨhŋ dɨŋ Jisho baa nyii gbo wiih bə bəne biih bədi bə kintu bəfwe bbəŋ bə́ màa bə́ gə̄ŋ ə kwili lidi mə ə duŋ bushi bwii hə gaana. 13 Bə́ chu dɨŋ, gəŋ yɔɔ bə kintu ki bəne bədi bbəŋ bə́ hə she bie, bə́ nakə bemi bə́ kə.

(Matio 28:16-20; Lukaa 24:36-49; Jɔɔŋ 20:19-23)

14 Həmə dɨŋ Jisho nyii gbo wiih fidiɛɛ ə duŋ bə bəne biih bə yuufi ə nchɔ mwi bie kibɛɛ ye bə́ màa bə́ dī lə. I hla bə́, yulahalə bə́ mà kə kənə kimbemi kə, bə́ ta bikuu bəmbəmi bə bəne bbəŋ bə́ mà ŋəŋ bie ə wu go bwɔɔ nnu i mà fu yo ə kpe mə. 15 I hlə yɔɔ bə bə́ lə “Bə gəŋ ə mbiŋ nte bə gəŋ yee bə dōntə hlɨŋ nwaa Chu ni bə bəne bənhliŋ. 16 Mbɛɛ nnu mə bemi hlɨŋ ye, bə́ yii wu ə njɔ, kəə i yá yi fukwoo. Mbɛɛ nnu i nɨ̀hŋ bəmbemi, kəə i yá yi gbe nhlaa. 17 Bəne bbəŋ bə́ lə bemi yáa bə́ fə̄ bieŋ bbɨŋ bi nyìi muŋgeni mu Chu ye bɨhŋ lə: Bə́ yá yi fwoo muŋkwini ə bəne go ə yii lɨŋŋ bəŋ. Bə́ yáa bə́ yɔ̄ɔ díe yifwɔ. 18 Bə́ yáa bə́ kə̄nə yɔ́ bə kwáŋ. Ə bə́ lə ŋwi cha, ə i fə bə́ fieŋ fidi kə. Bə́ yáa bə́ chī kwáŋ ŋəbə ə bəne bə jə́ŋ go, bə́ ŋwùnə.”

Jisho biŋ buh

(Lukaa 24:50-53)

19 Lə Baba Jisho yɔɔ kaa bə bə́ nəni, Chu hlə jə wu i biŋ buh gəŋ shii ə wɛɛ wi kwaŋ diee wi Chu mə. 20 Bəne biih bə kintu hlə fu yee bə́ jāa bə dòntə hlɨŋ nwaa ə bidɔhɔ mə binhliŋ. Baba nɨ̀ŋ bə bə́, i fwɔ̀ŋ hlɨŋ nni bə́ màa bə́ dōntə lə ə chɛɛŋ bə bieŋ bbɨŋ bi nyìi muŋgeni mu Chu bbɨŋ bə́ màa bə́ fə̄.]