Jisho lemi ə Paylɛt fwi
15
Lə yee butuu wū, bəche ntofi bəŋkuntaŋ bəŋkuntaŋ bə bəne bbəŋ bə́ hlàah kitɨŋ maa bəne bbəŋ bə́ kèeh bəŋkɨnə bə Chu maa bəne bə fwi bənhliŋ shii chuŋ, kwaa Jisho, jə wu gəŋ nə bə Paylɛt. 2 Paylɛt bii bə Jisho ləə, “Ə wə Ŋkɨŋ Bəjuu yo lə?” Jisho chuu bə wu lə, “Ə ye wə yɔɔ lə.” 3 Bəche ntofi bəŋkuntaŋ bəŋkuntaŋ hlə chɔɔ bəmbwɛɛ bieŋ ə Jisho go kiŋaaŋkə. 4 Nəni Paylɛt baa bii bə Jisho ləə, “Wə hləŋkə bə fieŋ fi chuunə kə lə? Wə wo lə dəŋ bieŋ bbɨŋ bə́ bwɛ̄ɛ bɨhŋ ə wə go kə lə?” 5 Kwaalə Jisho nakə chuulə fieŋ bə wu kə. Fi kah Paylɛt.6 Ə bwo duŋ ə Chɔnɔ ki Ŋkabəŋ mə, Paylɛt fwoo mbɛɛ mwi ə chəŋ munfwa mə nnu Bəjuu lə kɔnɔ wu lə i fwoo. 7 Ə bwɔɔ yo bəŋ mà duŋ, mbɛɛ ju duŋ ə chəŋ munfwa mə nnu yii liih mà duŋ lə Balaba, i mà duŋ ə kintu ki bəne bbəŋ bə́ mà duŋ ə chəŋ munfwa mə, ə duŋ bə́ mà chɔɔla bəŋgə ə kibalaki kie mə jii bəne. 8 Kimɔ ki bəne kie chɔɔ bəmbii lə Paylɛt fə ye i màa i bā lə bənfə bə bə́. 9 Paylɛt bii bə bə́ ləə, “Bə kiɛɛ lə nfwoo ə duŋ Ŋkɨŋ Bəjuu lə?” 10 I màa i bīi nəni ə duŋ yulahalə i mà kəla lə bəche ntofi bəŋkuntaŋ bəŋkuntaŋ mà nəə Jisho ə kwáŋ ŋiih mə yulahalə bə́ màa bə́ lūhuŋ bimi bə Jisho. 11 Kwaalə, bəche ntofi bəŋkuntaŋ bəŋkuntaŋ bweemə kimɔ ki bəne kie lə ki yɔɔ lə i fwoo ə duŋ Balaba. 12 Paylɛt baa bii bə bə́ ləə, “Ə nfwoo wu nəni, ə nfə ləhəŋ bə mbɛɛ nnu bə chèe yo lə Ŋkɨŋ Bəjuu lə?” 13 Bə́ gɛɛmə buh gbaaŋ lə, “Bə́ bweeni wu ə mbweeni mə ə kiŋgwa go.” 14 Paylɛt bii bə bə́ ləə, “Bə́ bweeni wu yulaha lə? Fieŋ fiwaha ffɨŋ i fəə duŋ laha lə?” Yee bə́ gɛ̄ɛmə bə́ gə̄ŋ kwaa fwi fwi lə, “Bə́ bweeni wu ə kiŋgwa go.” 15 Nəni Paylɛt hlə fwoo Balaba yulahalə i mà kiɛɛ lə i fə ye kimɔ kie leki lə. I yɔɔ bə́ hlooki Jisho, hlə nə lə bə́ gəŋ bweeni wu ə kiŋgwa go.
Bəne bə bicha bə Paylɛt yee bə́ lɛ̄ɛ Jisho bə díe
16 Bəne bə bicha bə Paylɛt hlə jə Jisho lɛɛ bə wu ə ntɔŋ dɔhɔ kkɨŋ bə́ chèe lə Platuliyuŋ. Ye bə́ lɛɛlə, bə chee kintu ki bəne bə bicha kidi kie kinhliŋ ki bumə. 17 Bə́ hlə jə kindu ki muŋkɨŋ dɔhiŋ wu go, lo kinfwili ki muŋkɨŋ bə bəŋgeeni bɛŋ wu fi. 18 Bə́ chɔɔ bəmbwɔkwe bə wu bə́ yɔ̄ɔ lə, “Jaaki, Ŋkɨŋ Bəjuu.” 19 Ye bə́ màa bə́ fə̄lə nəni, yee bə́ kə̄h wu bə tələ ə fi. Bə́ tū wu bə ntɨŋ. Bə́ bɛ̄ŋ núh ə wu fwi, lə bie bə bwɔ̄kwe bə wu. 20 Ə chulə bə́ bəŋna kaa wu nəni, bə́ hlə hlooli kihlə ki muŋkɨŋ kie ə wu go, lee chuu wu kindu kiih, hlə jə wu yee bə́ gə̄ŋ bəŋgəŋ bweeni wu ə kiŋgwa go.
Bə́ bweeni Jisho ə kiŋgwa go
21 Lə yee bə́ gə̄ŋ, bə bənə bə mbɛɛ ju i kwə̄lə ə nji yii liih duŋ lə Shaamuŋ, ə duŋ mbɛɛ nnu Shiliŋ. I mà duŋ che Alekshanda bə Lufu. Bə́ too wu kiŋgwa ki Jisho kie i tu. 22 Bə́ gəŋ bə Jisho gəŋ bwii ə dɔhɔ kkɨŋ bə́ chèe lə Golgota, (yii lɨhŋ duŋ lə Dɔhɔ ki Gəələ ki Kwoo,) 23 nə wu mbihŋ lə i ŋwi ə duŋ bə́ hə fuhaŋ mə bə nche yidi bə́ chee lə mɛɛl. Kwaalə Jisho nɨhŋ nakə ŋwee kə.ª 24 Bə́ hlə bweeni wu ə kiŋgwa go. Bə́ jə bindu biih lə bə́ ga bə go ŋəbə hlə tɨŋ kimbəmbu bə bindu biih bəŋkələ ye mbɛɛ lə jə. 25 Bwɔɔ nnu bə́ mà bweeni Jisho ə kiŋgwa go mà duŋ bitaŋ fumayuufi həmbumbwaa. 26 Bə́ bieŋ fieŋ ffɨŋ bə́ mà bweeni fie wu ə kiŋgwa go yu fi. Fi duŋ lə, “Ŋkɨŋ Bəjuu.” 27 Ə mà duŋ bə́ hə bweena dəŋ bəbuyi bəfwe ə biŋgwa go, ju yo wɛɛ wi Jisho wi diee, ju yo wɛɛ wi məə. [ 28 Fi hlə gbeemə yəəŋ ye fi mà duŋ ki bieŋ ə Kiŋwaati ki Chu mə lə,
“Bə́ mà faa wu ə kintu ki bəne bbəŋ bə́ mbee bieŋ mə.”]ª
29 Bəne yee bə́ kāh bə́ ŋə̄ŋ ə Jisho go bə́ chē bə bikuu, bə́ lɛ̄ɛ wu bə bəntɔnɔ bə́ yɔ̄ɔ lə, “Ɨhɨŋŋ! Wə nnu wə ma duŋ bəmbwu chəŋ ntofi bwo wɛɛ chuu yi ə joo bəŋ tɔh, 30 chɨnə dəŋ kwoo ko wə hlili ə kiŋgwa kɨhŋ go lə.” 31 Bəche ntofi bəŋkuntaŋ bəŋkuntaŋ bə bəne bbəŋ bə́ màa bə́ kēeh bəŋkɨnə bə Chu yee bə́ shāa wu bə́ yɔ̄ɔ lə, “I maa i chɨ̄nə bəne bədi, nchɨnə chuu kwoo kiih hləŋ lə. 32 Wu nnu i duŋ yo Nchuu Fwoo nnu Chu mà kaachi, wu nnu i dùŋ yo Ŋkɨŋ bəne Bəishlael, i hlili ə kiŋgwa kɨhŋ go fidiɛɛ lə, kkə ŋəŋ hlə bemi wu.” Bəne bbəŋ bə́ mà bweeni bie bə́ ə biŋgwa go bə Jisho yee bə́ tō dəŋ wu bəntɔnɔ.
Jisho kpe
33 Lə kitaŋ lemi ŋgaaaŋ, jɨbə gbe ə mbiŋ mənhliŋ nte gəŋ bwii bitaŋ bitɔh ə bushi. 34 Lə ə bwo chu bitaŋ bitɔh, Jisho gɛɛmə bə die ntaabə lə, “Ɛloy, Ɛloy lama shabaktani,” fi duŋ lə, “Chu ŋgwəŋ, Chu ŋgwəŋ, wə tələ mi nəni yulaha lə?”
35 Bəne bədi bbəŋ bə́ mà lemi bie həmə wo, bə́ yɔɔ lə, “Bə wo, i yu chēe Elaja.” 36 Mbɛɛ ju ə bə́ mə lələ gəŋ jə ŋkuncha, mihiŋ wu ə mbihŋ məŋgbanyi mə, bɛŋ ə fite go nɛhiŋ nə lə i ŋwi, hlə yɔɔ lə, “Kkə ke ŋəŋ ləə Elaja lə bwo hlili bwɔ bə wu ə kiŋgwa kɨhŋ go lə.” 37 Jisho ja gɛɛmə gbaaŋ hlə ŋɔɔni ŋɔɔninə kiih ki həŋgbɔŋ. 38 Kindu kkɨŋ bə́ mà hlɨhɨŋ kie ə chəŋ ntofi mə shwaanə kintekinte fu wɛɛ fwe. 39 Lə che kwoo ki bəne bə bicha nnu i mà lemi yo Jisho fwi ŋəŋ je nni Jisho kpe ye ə yi mə, hlə yɔɔ lə, “Chɛɛŋ chɛɛŋ, mbɛɛ nu mà duŋ Ŋwa Nchu.”
40 Bəkwɛɛ bədi màa bə́ lēmi dəŋ həmə je nyɛɛkə bə́ kēe. Ə bə́ mə mà duŋ Meeli Madaliŋ bə Meeli mah Jɛŋ wɛ yo ə duŋ dəŋ mah Joshi, ju yo duŋ Shalome. 41 Bəkwɛɛ bəhŋ duŋ bbəŋ bə́ màa bə́ bə̄lə Jisho ə Galilii bə́ chɨ̀nə wu. Bə́ mà duŋ həmə bə bəkwɛɛ bədi dəŋ kiŋaaŋkə bbəŋ bə́ mà bələ Jisho bəə bə́ bwo ə Jelushalɛŋ.
Bə́ diih Jisho
42 Lə yee ə dūŋ bumbini bwe hə kitaŋ, ye ə mà duŋ lə butuu bu Bwɛɛnə bənlɛɛ ə bunte mə, 43 mbɛɛ ju nnu Alimatia nnu bə́ mà chee lə Joshɛ, kwaa tɔŋ gəŋ ŋəŋ Paylɛt noŋ kiŋwuuni ki Jisho lə i gəŋ diih. Joshɛ nu mà duŋ ə kintu ki bəne bbəŋ bə́ hlàah kitɨŋ mə, bəne màa bə́ bwɔ̄kwe bə wu gbaaŋ. Wu kibɛɛ màa i kē dəŋ bwɔɔ nnu muŋkɨŋ mu Chu yá bwo. 44 Lə Paylɛt wo lə Jisho hə kpee, gəə ŋɨŋ wu. I dii che kwoo ki bəne bə bicha kie lə i bwo, i bii bə wu lə Jisho hə kpee ba lə. 45 Bwɔɔ nnu i mà wo ye che kwoo ki bəne bə bicha bie yɔɔ lə Jisho hə kpee, i hlə nə kiŋwuuni kie bə Joshɛ. 46 Joshɛ hlə ja gəŋ taŋ kindu ki wɛɛŋ, gəŋ hlili bwɔ bə kiŋwuuni ki Jisho bwɛɛ ki mə, gəŋ nɔhiŋ chi ə biee nni bə́ mà gbe ə tə mə, hlə bɨhɨŋ tə liŋkuntaŋ kəə fwiih wi biee we mu. 47 Meeli Madaliŋ bə Meeli mah Joshi ŋəŋ dɔhɔ kkɨŋ bə́ mà nɔhiŋ kie Jisho.