Bə́ faŋ bəne bə bicha lə bə́ bwo gəŋ kwo Jisho
18
Ə chulə Jisho cheela kaa Chu, wu bəə bəne biih bə kintu no həmə, gəŋ le ə fwoŋ wwuŋ bə́ chèe lə Kidlɔŋ, le fu ə wukwi wɛɛ wwuŋ wɛɛh ki bite bi sháŋ dùŋ, hlə lɛɛ mə. 2 Ə mà duŋ Judash nnu i mà taa yo Jisho kə̀lə dɔhɔ kie, yulahalə Jisho bəə bəne biih bə kintu màa bə́ bā bəŋgəŋ bumə həmə bwɔɔ mənhliŋ. 3 Nəni, Judash hlə gəŋ mə bə kintu ki bəne bə bicha maa bəne bədi bbəŋ bə́ màa bə́ fwōŋ chəŋ ntofi. Bəne bəhŋ ə mà faŋ bəche ntofi bəŋkuntaŋ bəŋkuntaŋ maa Bəfalashii bə́. Bə́ màa bə́ gə̄ŋ bə́ kə̄nə bimɔɔ bibəənə maa bə bieŋ bi ntɨmə. 4 Ye Jisho mà kələ lə ba fieŋ finhliŋ ffɨŋ fi mà duŋ lə fi chili wu, i fu bwo fwi, bii bə bə́ ləə, “Bə kiɛɛ ə duŋ nyəhə lə?” 5 Bə́ chuu bə wu lə, “Jisho mbɛɛ nnu Nashalit.” Jisho yɔɔ bə bə́ lə, “Ə mi wu.” Ə mà duŋ Judash nnu i mà taa yo wu lema bə bəne bie. 6 Ye Jisho yɔɔ lə bə bə́ lə, “Ə mi wu,” bə́ chu dɨŋ dɨŋ gbe həkwe. 7 I baa bii bə bə́ ləə, “Bə kiɛɛ ə duŋ nyəhə lə?” Bə́ chuu lə, “Jisho mbɛɛ nnu Nashalit.” 8 Jisho yɔɔ bə bə́ lə, “Nhə n'yɔɔla bə bəŋ lə ə mi wu. Ə duŋ lə bə kiɛɛ ə duŋ mi, bə tukwaŋ ə bəne bəhŋ go yee bə́ gə̄ŋ.” 9 I mà yɔɔ nəni bənfə lə fi bwo fu yəəŋ bə die nni i mà yɔɔ ye bə Chu lə, “Mmà ŋkə laa lə tələ mbɛɛ mwi ə bəne bbəŋ wə mà nə bie bə mi kə.”10 Shaamuŋ Pita mà duŋ bə hlo ki ntɨmə. I hlə nuulə fwoo ki ə bwaali mə, hlɛɛ tiɛɛ ki nfwa che kwoo ki bəche ntofi ki diee mu, ki kaŋnə. Yii li nfwa yo mà duŋ lə Maliku. 11 Jisho yɔɔ bə Pita lə, “Yii chuu hlo ko kie ə bwaali mə. Ŋkə ŋ'wiee kwooh ki ŋgə kkɨŋ Tah nə kie mi kə lə?”
Bə́ jə Jisho gəŋ bə wu ə Anash kwuŋ nnu i mà hlaa duŋ yo che kwoo ki bəche ntofi
12 Che kwoo ki bəne bə bicha maa bəne bbəŋ bə́ màa bə́ fwōŋ chəŋ ntofi Bəjuu hlə kwo Jisho kwaa wu bə gi. 13 Bə́ hlaa jə wu gəŋ bə wu ə Anash kwuŋ, yulahalə Anash mà duŋ che kpɛɛ Kayifa. Kayifa duŋ che kwoo ki bəche ntofi ə kigoŋ kie mə. 14 Kayifa nu lə wu nnu i mà nə keehnə bə Bəjuu lə fi nwaa lə mbɛɛ mwi kpe ə bəne bəŋ bənhliŋ.
Pita nɨhŋ lə i kələ lə Jisho kə
15 Ye bə́ màa bə́ gə̄ŋ lə bə Jisho nəni, Shaamuŋ Pita bə mbɛɛ kintu Jisho ju bələ wu. Ye che kwoo ki bəche ntofi mà kələ lə mbɛɛ kintu Jisho nu, i hlə bələ Jisho gəŋ lɛɛ ə kwili li che kwoo ki bəche ntofi le mə. 16 Pita lemi ba bweenə baha ə fwiih wi mbaŋ we tɨŋ. Ŋwa kintu Jisho nnu che kwoo ki bəche ntofi mà kələ yo, fiimə fu bwo yɔɔ bə ŋiaŋ kpɛ nnu i màa i fwōŋ yo ə fwiih wi mbaŋ we tɨŋ, jə Pita lɛɛ bə wu. 17 Ŋiaŋ kpɛ yo bii bə Pita ləə, “Nhle lə wə duŋ mbɛɛ ə kintu ki mbɛɛ nu mə lə?” Pita chuu lə, “Nduŋ nə kə.” 18 Ə mà duŋ fukpɔŋ duŋ, bəne bə nimi bə bəne bbəŋ bə́ màa bə́ fwōŋ chəŋ ntofi ye tɔŋna bwii lemi həmə yee bə́ wūu. Pita hlə kah gəŋ yee i lēmi bə bə́ i wūu dəŋ.
Che kwoo ki bəche ntofi bii bieŋ bə Jisho
19 Che kwoo ki bəche ntofi hlə yee i bīi bieŋ bə Jisho ki bəne biih bə kintu maa ki keehnə kiih. 20 Jisho chuu bə wu lə, “Mmaa mbà bən'yɔɔ bə mbiŋ mənhliŋ wɛɛŋ. Mmaa mbà bəŋkeeh bəne ə chə́ŋ yí cheenə Chu mə maa ə chəŋ ntofi dɔhɔ kkɨŋ Bəjuu bənhliŋ bumə. Ŋkə nhlaa lə yɔɔ fieŋ ə nələ mə kə. 21 Wə bii bieŋ bɨhŋ ə duŋ bə mi yulaha lə? Bii ə duŋ bə bəne bbəŋ bə́ wò ye ŋkèeh. Bə́ kə̀lə fieŋ ffɨŋ mbà bən'yɔɔ.” 22 Ye Jisho yɔɔlə nəni, mbɛɛ ju ə kintu ki bəne bbəŋ bə́ màa bə́ fwōŋ bie chəŋ ntofi ye lema baha baha kəh wu ə kweli go, bii bə wu ləə, “Ni lə je nni duŋ ə wə chuu bə che kwoo ki bəche ntofi lə?” 23 Jisho chuu bə wu lə, “Ə duŋ lə n'yɔɔla həkunə, wə nyii ki həkunə kie. Ə duŋ lə n'yɔɔla ə duŋ kichɛɛŋ, wə hlə kəh mi yulaha lə?” 24 Anash hlə faŋ Jisho ə Kayifa nnu i duŋ yo che kwoo ki bəche ntofi. Jisho kaani ki kwaa bə gi.
Pita baa nɨhŋ lə i kələ lə Jisho kə
25 Ye Shaamuŋ Pita mà kaani lə i lēmi i wūu bwii we, bəne bii bə wu ləə, “Wə kə duŋ nə ju ə kintu ki bəne biih mə kə lə?” Kwaalə Pita nɨhŋ yɔɔ lə, “Ŋkə duŋ nə ju kə.” 26 Mbɛɛ nimi che kwoo ki bəche ntofi ju baa bii bə Pita lə, “Nhə ŋkə ŋəŋ nə ə wə go bəə wu ə wɛɛh ki sháŋ kie mə kə lə?” Mbɛɛ nimi yo mà duŋ mbɛɛ ə kichəŋ ki mbɛɛ nnu Pita mà kaalə yo tiɛɛ kiih. 27 Pita baa nɨhŋ. Kwaa ə bwɔɔ yo bəŋ, kikɔkɔlɔ tɔŋ jə.
Bə́ gəŋ bə Jisho ə Paylɛt fwi
28 Bəne hlə jə Jisho həmə ə Kayifa kwuŋ yee bə́ gə̄ŋ bə wu ə kintɔŋ ki mbɛɛ nnu Luŋ kwuŋ nnu i màa i hlāah həmə. Ə mà duŋ ə kaani həmbumbwaa. Bə́ gəŋ nakə lɛɛ lə fibə ə kintɔŋ ki mbɛɛ yo mə kə, yulahalə ə màa duŋ lə bə́ lɛɛ, ə bə́ màa tɔ yili nakə baa lə di Chɔnɔ ki Ŋkabəŋ kə. 29 Nəni Paylɛt fu bwo ŋəŋ bə́ bii bə bə́ ləə, “Fieŋ ffɨŋ bə ŋəŋ lə mbɛɛ nu gbee fi duŋ laha lə?” 30 Bə́ chuu bə wu lə, “Mbɛɛ nu hə nakə daa fieŋ, ə kkə hə nakə bwoo lə kkə nə wə wu kə.” Bəjuu mà kənə too wudi bənjə go ŋəbə lə bə́ duŋ wɛɛŋ ə Chu fwi, bə́ kə lɛɛ lə ə chə́ŋ yí bəne bbəŋ bə́ dùŋ kə duŋ nə Bəjuu. Ə bə́ lə lɛɛ ə bə́ bihi go ŋəbə nakə kənə je nni bə́ lə chee Chu kə. Fiee fieŋ ffɨŋ bə́ mà duŋ fie kə lɛɛ lə ə kintɔŋ ki Paylɛt mə kə. 31 Paylɛt chuu bə bə́ lə, “Bə jə wu bə hlaah wu bələ ye ŋkɨnə weŋ yɔ̀ɔ lə.” Bəjuu yɔɔ bə wu lə, “Kkə kənə lə muŋgeni mu njiinə mbɛɛ kə.” 32 Biyɔɔnə bɨhŋ mà bwoo fu yəəŋ ə die nni Jisho mà yɔɔ ye i nyìi dɨŋ kpe nni i mà duŋ ye bəŋkpe. 33 Paylɛt fiimə lɛɛ gəŋ ə kintɔŋ kiih mə, i yɔɔ bə́ bwo bə Jisho, i bii bə wu ləə, “Ə wə ŋkɨŋ Bəjuu yo lə?” 34 Jisho bii bə wu lə, “Wə yɔɔ fɨhŋ ə duŋ ye wə hlē, lii ə yɔɔ bəne bədi wə kɨŋŋ lə?” 35 Paylɛt bii bə wu lə, “Nduŋ ŋwuŋ Bəjuu lə? Ə bəne bwo bə kintɔŋ bə bəche ntofi bəŋkuntaŋ bəŋkuntaŋ bbəŋ bə́ bwo nə wə bə mi. Wə da ə duŋ laha lə?” 36 Jisho chuu bə wu lə, “Muŋkɨŋ muŋŋ duŋ nə mu mbiŋ nu kə. Muŋkɨŋ muŋŋ hə duŋ mu mbiŋ nu, ə bəne bəŋŋ hə yee bə́ jū lə bə́ kə nəə mi ə kwáŋ ŋə Bəjuu mə kə. Kwaalə muŋkɨŋ muŋŋ duŋ nə mu mbiŋ nu kə.” 37 Paylɛt bii bə wu ləə, “Ə chu duŋ lə wə duŋ ŋkɨŋ lə?” Jisho chuu bə wu lə, “Ə lə ye wə yɔɔlə lə ndùŋ ŋkɨŋ. Bə́ mà bwee mi, mbwo yaŋ ə mbiŋ nu mə yu fɨhŋ lə mbwo n'yɔɔ bieŋ bi kichɛɛŋ bə bəne. Mbɛɛ mənhliŋ nnu i dùŋ wɛɛ wi kichɛɛŋ yii wò die njəŋ.” 38 Paylɛt yɔɔ lə, “Kichɛɛŋ duŋ laha lə?” Ye i nāamə lə nəni hlə fiimə fu gəŋ ŋəŋ Bəjuu bie yɔɔ bə bə́ lə, “Ŋkə ŋəŋ nə fieŋ ffɨŋ i daa kə. 39 Kwaalə bə kənə too weeŋ wudi lə ə bwo duŋ ə bwɔɔ Chɔnɔ ki Ŋkabəŋ mə, nfwoo mbɛɛ chəŋ munfwa mwi nnə bəŋ. Bə kiɛɛ lə nfwoo ə duŋ ŋkɨŋ weŋ Bəjuu lə?” 40 Bəjuu bie gɛɛmə buh gbaaŋ lə, “Ye, kkə kiɛɛ lə mbɛɛ nu kə, fwoo ə duŋ Balaba!” Balaba nu mà duŋ ə kintu ki bəne bbəŋ bə́ màa bə́ jū Nahlala nnu Luŋ.