Jɔɔŋ 17

Jisho chee Chu bə gbo wiih maa bə bəne biih

Lə Jisho yɔɔ kaa díe yɨhŋ, i hlə tu díi kee buh chee Chu lə, “Tah, bwɔɔ yo bwoo wunə ba. Nə Ŋwa kiŋkuntaŋ fo Ŋwa dəŋ lə nə kiŋkuntaŋ ko. 2 Duŋ ə i nyii yulahalə wə mà nəə muŋga munhliŋ bə wu ə buh yu mbɛɛ ŋkee, fo mə lə nə kinduŋh ki kə kaa bə bəne bənhliŋ bbəŋ wə nəə bə wu. 3 Kinduhŋ ki kə kaa kɨhŋ duŋ kkɨŋ ki dùŋ kie lə yee bə́ kə̄hlə wə, lə wə dùŋ Chu kichɛɛŋ, baa kələ lə ndùŋ Jisho Kleto nnu wə mà faŋ yo. 4 N'yiila kiŋkuntaŋ ko yaŋ kwe ye ŋkaalə nimi llɨŋ wə mà nə le lə nnɨŋ. 5 Fidiɛɛ Tah, baa nə mi kiŋkuntaŋ baha ə wə go kkɨŋ mmà hlaa kənə kie fwii mbiŋ nu hlə chɔɔ.

6 N'yiila wə bə bəne bbəŋ wə mà shaa bie ə mbiŋ nu mə nə bə mi. Bəne bəhŋ màa bwo, wə hlə nə bə́ bə mi. Bə́ mà chiee die wa. 7 Bə́ kəla fidiɛɛ lə fieŋ finhliŋ ffɨŋ ŋkənə fi fù ə duŋ ə wə kwáŋ. 8 N'yɔ̄ɔ nəni yulahalə nnəə bə́ díe yyɨŋ wə mà nə yé bə mi, bə́ jə yí, hlə kələ lə yí fù ə duŋ ə wə kwuŋ, bemi dəŋ lə ə màa wə nnu wə mà faŋ mi. 9 Nchēe Chu nəni ə duŋ yu bə́. Nchēe lə ə duŋ yu bəne bənhliŋ bə mbiŋ nu kə. Nchee ə duŋ yu bəhŋ nini bbəŋ wə nəə bie bə mi, yulahalə bə́ duŋ bəne bwo. 10 Fieŋ finhliŋ ffɨŋ ŋkə̀nə lə fwo, fieŋ finhliŋ ffɨŋ wə kə̀nə lə fɨŋŋ. Ə yu bə́ nnu kiŋkuntaŋ kɨŋŋ n'yìee. 11 Fidiɛɛ ŋkaani lə ə mbiŋ nu mə kə. Kwaalə bə́ bie ə mbiŋ nu mə, n'yu nfiimə mbwo chu bə wə. Tah wɛɛŋ yo, fwoŋ bə́ bə muŋgeni, mmuŋ wə mà nə mwi mi, fo bə́ lə duŋ fieŋ fimwi ye kkə dùŋ lə fieŋ fimwi.

12 Bwɔɔ nnu mmaa duŋ bə bə́, mma fwoŋna bə́ ə muŋgeni mu yii lo bəŋ ye wə mà nə lə bə mi. Mma nfwoŋna bə́, mbɛɛ ju ə bə́ mə nakə laa kə, kahiŋ kwaa wu nnu i duŋ yo bənla. Fɨhŋ mà duŋ fo fieŋ ffɨŋ bə́ mà bieŋ ə Kiŋwaati ki Chu mə lə fu yəəŋ. 13 Fidiɛɛ n'yu nfīimə mbwo chu bə wə, n'yɔ̄ɔ bieŋ bɨhŋ ŋkaani yaŋ mbiŋ nte fo bə́ lə yee bə́ wō kinjənjə kɨŋŋ bə́ fiili ə ki mə. 14 N'yɔɔla die wa bə bə́, bəne bə yaŋ ə mbiŋ nu mə lòh bə bə́ yulahalə bə́ duŋ nə bəne bə yaŋ mbiŋ nu mə kə, yəəŋ dəŋ ye ndùŋ lə kə duŋ nə mbɛɛ nnu yaŋ ə mbiŋ nu mə kə. 15 Ŋkə nchee lə Chu nəni lə wə fwoo bə́ ə mbiŋ nu mə kə. Nchēe ə duŋ lə wə fwoŋ bə́ lə bə́ kə lɛɛ lə ə mbɛɛ yiwaha yo kwáŋ kə. 16 Bə́ dùŋ nə bəne bə mbiŋ nu kə, dəŋ yeeŋ ye nduŋ lə kə duŋ nə mbɛɛ nnu yaŋ ə mbiŋ nu mə kə. 17 Bwɛɛ chi bə́ chili yee bə́ dūŋ wɛɛŋ bə́ bə̀lə ə duŋ kichɛɛŋ kkɨŋ wə mà nyii kie. Die wa lə die kichɛɛŋ. 18 Ye wə mà faŋ lə mi ə mbiŋ nu mə, ə dəŋ yəəŋ ye nfaŋ dəŋ bə́ yaŋ ə mbiŋ nte. 19 Mbwɛɛla gbo wuŋŋ chi chili yu bə́, fo bə́ dəŋ lə bwɛɛ go ŋəbə chi chili yee bə́ bə̄lə kichɛɛŋ.

20 Nchēe lə Chu ə duŋ bə bəne bəhŋ kwaa kə. Nchēe dəŋ bə bəne bənhliŋ bbəŋ bə́ bèmi die bə́, yii tɔ́ŋ ə mi mə. 21 Nchēe lə bə́ bənhliŋ yee bə́ dūŋ fieŋ fimwi ye wə Tah dùŋ lə ə mi mə ndùŋ ə wə mə. Nchēe Chu lə yee bə́ dūŋ dəŋ ə be mə fo bəne bbəŋ bə́ dùŋ yaŋ ə mbiŋ nu mə lə bemi lə ə mà faŋ wə mi. 22 Kiŋkuntaŋ kkɨŋ wə mà kohi kie mi mu, nnəə bə bə́ fo bə́ lə yee bə́ dūŋ fieŋ fimwi, dəŋ yəəŋ ye bee wə dùŋ lə fieŋ fimwi, 23 ndùŋ ə bə́ mə, wə dùŋ ə mi mə. Ə bə́ ba fieŋ fimwi, nəni ə bəne bə mbiŋ nu kələ lə ə faŋ wə mi, lə wə lèki bə́ yəəŋ ye wə lèki lə mi. 24 Tah, ŋkiɛɛ lə bəne bbəŋ wə nə bie mi yee bə́ dūŋ bə mi dɔhɔ kkɨŋ ndùŋ kie, fo bə́ lə ŋəŋ kiŋkuntaŋ kkɨŋ wə mà nəə mi yu kinleki kkɨŋ wə mà leki kie mi mbiŋ nu kaani kə chɔɔ lə kə. 25 Eee Tah ntiiŋ yo, bəne bbəŋ bə́ dùŋ ə mbiŋ nu mə kə̀lə lə wə kə, kwaalə ŋkə̀lə wə, bəne bəŋŋ bəhŋ kə̀lə lə ə faŋ wə mi. 26 Nfəə ba bə́ kələ wə, nlə n'yee mbaa nfə̄ lə yee bə kə̄lə wə gbaaŋ, fo kinleki kkɨŋ wə lèki kie mi lə duŋ ə bə́ mə, ndùŋ dəŋ ə bə́ mə.”