Jɔɔŋ 16

“N'yɔ̄ɔ bieŋ bɨhŋ binhliŋ bə bəŋ fo bə lə nakə gbee ə kimbemi kieeŋ mə kə. 2 Bə́ yá kohiŋ bəŋ ə chə́ŋ yí cheenə Chu mə. Bə kichɛɛŋ, bwɔɔ yu bwō nnu mbɛɛ lə jii mbɛɛ ju ə bəŋ mə, ə yee i hlē lə i fə̀ ə duŋ nimi linwaa bə Chu. 3 Bə́ yáa bə́ fə̄ nəni, yulahalə bə́ kə kələ ba Tah bə mi kə. 4 N'yɔ̄ɔ bieŋ bɨhŋ binhliŋ bə bəŋ nəni fo bwɔɔ nnu bwɔɔ yo lə wunə, ə bə hle ŋoo lə mmà n'yɔɔla ki bi bə bəŋ.

Nimi llɨŋ Fiana Wɛɛŋ yá bwo yee i nɨ̄ŋ

Mmà ŋkə n'yɔ̄ɔ lə bieŋ bɨhŋ bə bəŋ həmɛɛ kə, yulahalə mmaa mba dəŋ fəŋ bə bəŋ. 5 Fidiɛɛ n'yu nchū ba dɨŋ hə wu nnu i mà faŋ yo mi. Kwaalə, mbɛɛ ju ə bəŋ mə kə bii lə dəŋ bə mi lə ŋgə̄ŋ fəhəŋ lə?. 6 Bə bie bə hlē mweŋ ə tɔ́ŋ ŋieeŋ go yulahalə n'yɔɔla bieŋ bɨhŋ bə bəŋ. 7 Maa ye fi duŋ lə nəni, n'yu n'yɔ̄ɔ kichɛɛŋ bə bəŋ lə, ə fieŋ finwaa bə bəŋ lə ŋgəŋ. Ə nlə nakə gəŋ nə, ə Mbɛɛ Kinchɨnə yo nakə bwoo ə bəŋ mə kə. Kwaalə, nlə ŋgəŋ, ə nhlə faŋ wu ə bəŋ mə. 8 Bwɔɔ nnu mə lə bwo, mə lə nyii tɔ bəne bbəŋ bə́ dùŋ bie bə mbiŋ nu, fə ə bə́ ŋəŋ yiwaha yibə, fə ə bə́ ŋəŋ bieŋ bbɨŋ bi dùŋ lə ə fwɔ wintiiŋ, fə dəŋ ə bə́ ŋəŋ ffɨŋ fi dùŋ nhlaah Chu. 9 Mə lə fə ə bə́ ŋəŋ ə yiwaha yibə go ye bə́ nalə kə yii lə tɔŋ ə mi mə, 10 fə ə bə́ ŋəŋ fieŋ ffɨŋ fi dùŋ fintiiŋ ye n'yu ŋgə̄ŋ lə ba ə Tah kwuŋ, ə bə baa ŋəŋ ə mi go kə. 11 Mə lə fə ə bə́ ŋəŋ fieŋ ffɨŋ fi dùŋ nhlaah Chu yulahalə nhlaa kwoo mbɛɛ nnu i kə̀nə muŋgeni ə mbiŋ nu bəŋ.

12 N'yu ŋkaani bə bieŋ kiŋaaŋkə bən'yɔɔ bə bəŋ, kwaalə duŋ ə bi nakə lɛɛ lə ə bituŋ bieeŋ mə fidiɛɛ kə. 13 Bwɔɔ nnu Fiana kichɛɛŋ lə bwo, ə i fə ə bə kələ kichɛɛŋ kinhliŋ. Mə yɔɔ ə duŋ ə muŋgeni mwii mə kə. Fieŋ finhliŋ ffɨŋ i wò ə fi ffɨŋ i n'yɔ̀ɔ, mə yɔɔ bəŋ bieŋ bbɨŋ bi yáa bi bwō. 14 Mə lə nyii kinkuntaŋ kɨŋŋ, mə lə jə ə duŋ fieŋ fɨŋŋ yɔɔ bə bəŋ. 15 Fieŋ fi Tah finhliŋ lə fɨŋŋ. Fiee fieŋ ffɨŋ n'yɔ̄ɔ fie lə fiana kichɛɛŋ lə jə ə duŋ fieŋ ffɨŋ fi dùŋ fɨŋŋ yɔɔ bə bəŋ.

Munhlenə mu bəne bə kintu bə Jisho yá chu kintɨŋ

16 Ə she bwɔɔ chɛɛ ə bə baa ŋəŋ ə mi go kə, bwɔɔ chɛɛ ə bə baa ŋəŋ chuu ə mi go.” 17 Ye Jisho yɔɔlə nəni, bəne biih bə kintu bədi yee bə nāamə bə́ bə́ ləə, “Ə laha ffɨŋ i yɔ̄ɔ fie bə be lə, ə she bwɔɔ chɛɛ ə kkə baa ŋəŋ ə wu go kə, bwɔɔ chɛɛ ə kkə baa ŋəŋ chuu ə wu go, bə lə i yu gə̄ŋ ə Tili kwuŋ lə? 18 Fieŋ ffɨŋ i yɔɔ fie lə ə she bwɔɔ chɛɛ duŋ lə laha lə? Kkə kə kələ fieŋ ffɨŋ i yɔ̄ɔ fie nəni kə.”

19 Jisho ə bwɔɔ nnu bəŋ kələ lə bie bə́ kīɛɛ lə bə́ bwo bii wu fieŋ ffɨŋ i yɔ̄ɔ fie lə, i hlə bii ləə, “Bə nāamə bəŋ bəŋ ki fieŋ ffɨŋ n'yɔ̄ɔ fɨhŋ lə, ‘Ə she bwɔɔ chɛɛ ə bə baa ŋəŋ ə mi go kə, lə ə she bwɔɔ chɛɛ ə bə baa ŋəŋ chuu ə mi go lə’? 20 N'yɔ̄ɔ bə bəŋ chɛɛŋ chɛɛŋ lə, bə lə yee bə dē bə kə̀ gbo bə gɛ̀ɛmə, ə bəne bbəŋ bə́ dùŋ bə mbiŋ nu yee bə́ lēki ŋkwo bə́ bu lekinə. Bə lə duŋ bəne bə bujuuli, kwaalə bujuuli bweeŋ bwe lə bwo chu kintɨŋ. 21 Bwɔɔ nnu te kwo kpɛ, yee i wō nlogo, yulahalə bwɔɔ wi bweenə wuna. Bwɔɔ nnu i bwee ŋiaŋ yo, i baa hle nlogo kə, yulahalə i yu wō ə duŋ njənjə lə mbɛɛ fwɔ bwoo ə mbiŋ nu mə. 22 Fiee ffɨŋ fi dùŋ fie bə bəŋ fidiɛɛ. Bə bie juu juu, kwaalə ə yá bwo duŋ bwɔɔ nnu n'yá bwo ə n'ya ŋəŋ ə bəŋ go, ə bə yá kənə ə duŋ kintɨŋ ə tɔ́ŋ ŋieeŋ mə, kieeŋ kie kintɨŋ yá duŋ kkɨŋ mbɛɛ yá jəə ki ə bəŋ kwáŋ kə. 23 Ə yáa ə dūŋ ə bwɔɔ yo mə, bə yá baa lə bii fieŋ bə mi kə. N'yɔ̄ɔ bəŋ chɛɛŋ chɛɛŋ lə, maa ə duŋ filaha ffɨŋ bə lə bii bə Tah ə yii lɨŋŋ bəŋ, ə i nə bəŋ fi. 24 Chɔɔ jə həmɛɛ bwo bwii daŋ, bə kə hlaa lə bii fieŋ bə Tah ə yii lɨŋŋ bəŋ kə. Ə bə bii, ə bə kənə, ə tɔ́ŋ ŋieeŋ fiili bə kintɨŋ.

25 N'yɔ̄ɔ bə bəŋ ə duŋ kwaa ə ŋgaŋga mə, kwaalə bwɔɔ yu bwō nnu nlə mbaa lə yɔɔ bə bəŋ ə ŋgaŋga mə kə. Nlə n'yee n'yɔ̄ɔ bə bəŋ wɛɛŋ ki Tah. 26 Ə yáa ə dūŋ ə bwɔɔ yo bəŋ, ə bə bii fieŋ bə Tah ə yii lɨŋŋ bəŋ. Ŋkə yɔɔ lə bə bəŋ lə nlə noŋ fieŋ bə Tah yu bəŋ kə lə. 27 Tah kibɛɛ lèki bəŋ, yulahalə bə leka mi baa bemi lə mbwò ə Tah go. 28 Mmà noo ə Tah kwuŋ bwo ə mbiŋ nu mə, n'yu nshē mbiŋ nu nchu dɨŋ ə Tah kwuŋ.”

29 Ye Jisho yɔɔlə nəni bəne biih bə kintu dohi wu yɔɔ lə, “Ɨhɨŋŋ! Wə yɔɔla ba ntiiŋ fidiɛɛ ə kə baa lə duŋ ə ŋgaŋga mə kə! 30 Fidiɛɛ kkə ŋəŋna ba lə wə kələ bieŋ binhliŋ. Wə kè lə lə mbɛɛ bii fieŋ bə wə ə mbii mə ə wə hlə kələ fieŋ ffɨŋ bə́ bii fie kə. Fɨhŋ fəə kkə hlə bemi lə wə bwo ə Chu kwuŋ.” 31 Jisho chuu bə bə́ lə, “Bə bema fidiɛɛ lə? 32 Bwɔɔ yu bwō, i bwoo kaa, nnu bə lə hlaamə mwi mwi ə mbɛɛ yee i gə̄ŋ ə wu chəŋ, ə nshe mi mii mboŋ. Kwaalə nduŋ nə mii mboŋ kə, yulahalə kkə bie bee Tah. 33 N'yɔ̄ɔ bieŋ bɨhŋ bə bəŋ fo bə lə duŋ ə mi mə, ə bə hlə kənə tɔŋ lində. Ə mbiŋ nu mə bə lə kənə bəŋgə, kwaalə yee bə kwāa tɔŋ. Ŋkaah mbiŋ nu.”