Jɔɔŋ 15

Jisho lə tiɛɛ bəne biih duŋ nyáŋ ye

“Ndùŋ wii wi tiɛɛ ki sháŋ yí kichɛɛŋ yé, Tah dùŋ mbɛɛ nnu i bwɛ̀ɛ yo ki. 2 Nyáŋ yinhliŋ yyɨŋ yí duŋ ə mi mə kə chɔŋ nə sháŋ, duŋ ə i gba tələ yí, nyáŋ yyɨŋ yí chɔŋ yé sháŋ duŋ ə i kəŋ yí fo yí lə duŋ wɛɛŋ ə yí chɔŋ sháŋ kiŋaaŋkə. 3 Die njəŋ nni n'yɔ̄ɔ bə bəŋ fəə bə bie wɛɛŋ. 4 Bə ba yee bə dûŋ ə mi mə, ə mba dəŋ n'yee ndûŋ ə bəŋ mə. Nyaŋ tiɛɛ duŋ ə i nakə chɔŋ nə sháŋ yii mboŋ i kaani kə duŋ nə ə tiɛɛ kie go kə. Ə dəŋ yəəŋ ye duŋ ə bə nakə fəə fieŋ ə bəŋ kwáŋ bə kaani kə baa ə mi mə. 5 Ə mi nnu ndùŋ wii wi tiɛɛ ki sháŋ, bə duŋ nyáŋ yé. Mbɛɛ nnu i bà ə mi mə mbà dəŋ ə wu mə, mba wi ə mi mə lə chɔŋ sháŋ yí kiŋaŋ, yulahalə ə nnakə duŋ nə, ə bə fə fieŋ kə. 6 Mbɛɛ nnu i kə baa ə mi mə duŋ ye nyaŋ tiɛɛ nni bə́ hə gbaa lɛɛ tələ yi, mə ŋɨŋ. Dɨŋ yɨhŋ nyáŋ yí bite duŋ ə bə́ yá buhuŋ lɛɛ yí ə bwii mə ə yí fi. 7 Ə bə ba ə mi mə die njəŋ duŋ ə bəŋ mə, maa bə bii ə duŋ filaha ffɨŋ bə kìɛɛ, ə bə́ nə fi bə bəŋ. 8 Ə bə duŋ ye nyáŋ yí bite yyɨŋ yí chɔŋ sháŋ kiŋaaŋkə, ə fɨhŋ yee fi nə̄ yii liŋkuntaŋ bə Tah, hlə nyii lə bə duŋ bəne bəŋŋ bə kintu.

9 Ye Tah lèki lə mi ə dəŋ yəəŋ ye nlèki lə bəŋ. Yee bə dūŋ ba ə kinleki kɨhŋ mə. 10 Ə bə chi bəŋkɨnə bɨŋŋ bəhŋ, ə bə bà ə kinleki kɨŋŋ mə, dəŋ ye nchì lə bəŋkɨnə bə Tah mbà ə kinleki kiih mə. 11 N'yɔ̄ɔ bieŋ bɨhŋ bə bəŋ fo kintɨŋ kɨŋŋ lə yee ki dūŋ ə bəŋ mə, ə bə hlə yee bə kə̄nə kintɨŋ kkɨŋ ki dùŋ yəəŋ gəŋ kpee həŋgbɔŋ. 12 Ŋkɨnə ŋgwəŋ duŋ nnu i dùŋ yo lə yee bə lêki go ŋieeŋ dəŋ ye nlèki lə bəŋ. 13 Kinleki kidi hləŋ həmə kkɨŋ ki ko kah kɨhŋ lə mbɛɛ taala kpe yi yu bədɔɔ biih. 14 Ə yee bə fə̂ fieŋ ffɨŋ n'yɔ̀ɔ lə yee bə fə̂ kəə bə dùŋ bishiŋ bɨŋŋ. 15 Mbaa lə chee bəŋ lə bəne bə nimi bəŋŋ kə, yulahalə bəne bə nimi kə kələ fieŋ finhliŋ ffɨŋ che kwoo bə́ fə̀ kə. Nchiee bəŋ lə bishiŋ bɨŋŋ ba yulahalə fieŋ finhliŋ ffɨŋ ŋ'wò bə Tah nfəə bə kələ ba. 16 Ə mà shaa bəŋ mi kə. Ə mi nnu mmà nshaa bəŋ, fwoo chi baa fə lə bə gəŋ yee bə dūŋ ye nyáŋ yí bite yyɨŋ yí chɔŋ sháŋ, ə duŋ sháŋ yyɨŋ yí yá ba. Ə bə fə nəni, maa ə duŋ laha ffɨŋ bə bii bə Tah ə yii lɨŋŋ bəŋ, ə i nə bə bəŋ. 17 Ŋkɨnə nnu nnə nu bə bəŋ duŋ lə, yee bə lêki go ŋieeŋ.

Jisho yɔɔ lə mbiŋ nu yáa i lōh bə bəne biih

18 Ə duŋ lə mbiŋ nu lə yee i lōh bə bəŋ, yee bə kə̄lə lə i mà hlaala chɔɔ bənloh ə duŋ bə mi maa yee i lōh bə bəŋ. 19 Ə bə hə duŋ bəne bə mbiŋ nu, ə mbiŋ nu hə yee i lēki bəŋ ye bəne bəbə lə. Kwaalə, bə kə duŋ nə bəne bə mbiŋ nu kə. Nshaala bəŋ ə mbiŋ nu mə. Fiee fieŋ ffɨŋ mbiŋ nu lòh fie bə bəŋ. 20 Bə hle die nni nhə n'yɔɔ ye bə bəŋ lə mbɛɛ nimi ko lə kah che kwoo wi kə. Ə bə́ bɛŋ kinjɔŋ ə mi dɨŋ, kəə bə́ lə bɛŋ dəŋ kinjɔŋ ə bəŋ dɨŋ. Ə bə hə wo die njəŋ, ə bə́ yá wo dəŋ yeŋ. 21 Ə fi dəŋ ffɨŋ bə́ lə yee bə́ fə̄ bə bəŋ yu mi, yulahalə bə́ kə kələ wu nnu i mà faŋ yo mi kə. 22 Ə hə duŋ lə nakə mbwoo yɔɔ bə bə́, ə bə́ hə nakə kənə yiwaha kə. Kwaalə, bə́ lə bə́ fieŋ fidiɛɛ ffɨŋ duŋ ə fi kəə baŋ yiwaha yibə kə. 23 Mbɛɛ nnu i lòh bə mi i lòh dəŋ bə Tah. 24 Ə hə nakə duŋ nə lə nfəə ə duŋ nimi llɨŋ mbɛɛ kə hlaa lə fə ə bəŋ mə kintekinte kə, ə bə́ hə baa kənə gbenə kə. Bələ bə́ ŋəŋna, bə́ baa yee bə lòh bə mi maa bə Tah. 25 Fɨŋ duŋ nəni bənfə lə die ye bwo fu yəəŋ ye bə́ mà bieŋ lə ə Kiŋwaati ki Bəŋkɨnə mə lə,

‘Bə́ mà looh bə mi nya.’

26 Kwaalə, bwɔɔ nnu nlə ŋgəŋ ə Tah kwuŋ nlə nfaŋ Mbɛɛ Kinchɨnə. Ə wu nnu mə lə lemi ə kidɨŋ ki nhlaa ŋgwəŋ bəŋ. Ə wu nnu i dùŋ Fiana kichɛɛŋ nnu i fù ə Tah kwuŋ. 27 Bəŋ dəŋ lèmi ə ki dɨŋ ki nhlaa ŋgwəŋ mə, yulahalə bə mà duŋ bə mi ye bi mà chɔɔ.”