Jɔɔŋ 14

Jisho dùŋ Je nni i gə̀ŋ ə Chu go

Jisho baa yɔɔ bə bəne biih bə kintu lə, “Bə kə chiee lə tɔ́ŋ ŋieeŋ yee ŋə bêe kə. Bə yii tɔ́ŋ ə Chu mə, yii dəŋ tɔ́ŋ ə mi mə. 2 Chəŋ Tah kə̀nə chə́ŋ yinte kiŋaaŋkə. Ə fi hə nakə duŋ nə nəni, ə nhə mbaa n'yɔɔ lə n'yu ŋgə̄ŋ lə ŋkə bwɛɛ chi bəŋ dɔhɔ kə. 3 Bwɔɔ nnu nlə gəŋ mbwɛɛ chi bəŋ dɔhɔ kie, ə nfiimə mbwo njə bəŋ ə yee kkə dūŋ, fo dɔhɔ kkɨŋ ndùŋ, ə bə duŋ dəŋ həmə. 4 Bə kə̀lə je nni ŋgə̀ŋ bə dɔhɔ kkɨŋ n'yu ŋgə̄ŋ.” 5 Tɔma hlə yɔɔ bə wu lə, “Baba, kkə kə kələ dɔhɔ kkɨŋ wə gə̄ŋ kie kə. Kkə lə kah ləhəŋ hlə kələ je ye lə?” 6 Jisho chuu lə, “Ə mi je, ə mi kichɛɛŋ, ə mi kinduŋh. Duŋ ə mbɛɛ gəŋ ə Tah go i kaani kə kaah ə mi go kə. 7 Ə bə həə kələ mi, kəə bə kəla dəŋ Tah. Chɔɔ jə fidiɛɛ bə kəla wu baa ŋəŋ dəŋ ə wu go.”

8 Filip yɔɔ bə wu lə, “Baba nyii be Chwa, fo kkə lə ŋəŋ hlə fiili.” 9 Jisho chuu bə wu lə, “Filip, kkə duŋna bee wə gbaaŋ nəni, wə dəŋ kə kələ mi kə lə? Mbɛɛ nnu i ŋə̀ŋ ə mi go, kəə i ŋəŋna ə Tah go. Wə kah ləhəŋ hlə baa yɔɔ lə nnyii bəŋ Tah lə? 10 Wə kə bemi lə ndùŋ fieŋ fimwi bə Tah, Tah dùŋ fieŋ fimwi bə mi kə lə? Biyɔɔnə bbɨŋ n'yɔ̄ɔ bɨhŋ bə bəŋ n'yɔ̄ɔ lə ə muŋgeni muŋŋ mə kə. Ə Tah nnu kkə duŋ yo fieŋ fimwi nnu i nɨ̀ŋ nimi liih. 11 Bə bemi lə ndùŋ fieŋ fimwi bə Tah, Tah dùŋ fieŋ fimwi bə mi. Ə bə nakə bemi bə mi yu fieŋ ffɨŋ n'yɔ̀ɔ, bə bemi yu ními ŋŋəŋ nnɨ̀ŋ. 12 N'yɔ̄ɔ bə bəŋ chɛɛŋ chɛɛŋ lə mbɛɛ nnu i yìi tɔŋ ə mi mə i yáa i nɨ̄ŋ dəŋ ními ŋŋəŋ nnɨ̀ŋ ŋie. I yáa i fə̄ ními kah ŋŋəŋ nfə̀ ŋəhŋ, yulahalə ŋgəŋna ə Tah kwuŋ. 13 Maa laha fie bə bii ə yii lɨŋŋ bəŋ, ə nfə fi, fo Che Ŋiaŋ lə kənə yii liŋkuntaŋ yu Ŋiaani. 14 Ə bə bii maa ə duŋ laha ə yii lɨŋŋ bəŋ, ə nfə fi.

Jisho yɔɔ lə mə lə faŋ Fiana Wɛɛŋ

15 Ə bə lèki mi, yee bə chî bəŋkɨnə bɨŋŋ, 16 ə nnoŋ bə Tah ə i nə bəŋ Mbɛɛ Kinchɨnə ju nnu mə lə yee i dūŋ bə bəŋ bwɔɔ mənhliŋ. 17 Mbɛɛ nu lə Fiana kichɛɛŋ. I kə duŋ nə mbɛɛ nnu duŋ ə bəne bə yaŋ mbiŋ nte tɨŋ jə wu kə, yulahalə bə́ ŋəŋ nə ə wu go ləkə kələ wu kə. Ŋkwo weŋ bə kə̀lə wu, yulahalə i dùŋ bə bəŋ, i dùŋ ə bəŋ mə.

18 Nlə tookwaŋ ə bəŋ go lə yee bə dūŋ ye bwɔni bə bəŋkwu lə kə. Nlə nfiimə mbwo n'yee ndūŋ bə bəŋ. 19 Ə she kwaa bwɔɔ chɛɛ ə bəne bbəŋ bə́ dùŋ ə mbiŋ nu mə nakə baa lə ŋəŋ ə mi go kə. Kwaalə, bə lə ŋəŋ ə mi go. Ye ndùŋ lə həmə, duŋ ə bəŋ dəŋ yee bə dūŋ həmə. 20 Ə yáa ə dūŋ bumbini bwe ə bə yá kələ lə ndùŋ fieŋ fimwi bə Tah, bə dùŋ fieŋ fimwi bə mi, ndùŋ fieŋ fimwi bə bəŋ. 21 Mbɛɛ nnu i kə̀lə bəŋkɨnə bɨŋŋ i chì bə́, ə mbini yo mbɛɛ nnu i lèki mi. Mbɛɛ nnu i lèki mi duŋ ə Tah yee i lēki wu. Ə n'yee nlēki dəŋ wu, nyìi gbo wuŋŋ bə wu.” 22 Judash ju (nnu i kə duŋ nə Ishkalɔt) i bii bə wu ləə, “Tah, fi yá kah ləhəŋ ə wə yá hlə nyii gbo wo ə duŋ bə be, ə kə duŋ nə bə bəne bbəŋ bə́ dùŋ ə mbiŋ nu mə kə lə?” 23 Jisho chuu bə wu lə, “Ə mbɛɛ lèki mi, yee i chî biyɔɔnə bɨŋŋ, ə Tah leki wu, ə bee Tah bwo ə wu go yee kkə dūŋh bə wu. 24 Mbɛɛ nnu i dùŋ kə leki mi chì lə die njəŋ kə. Die nni bə wò ni lə njəŋ kə. Ə die Tah nnu i mà faŋ yo mi.

25 N'yɔ̄ɔ bieŋ bɨhŋ ŋkaani bə bəŋ. 26 Kwaalə, Mbɛɛ Kinchɨnə nnu i dùŋ yo Fiana Wɛɛŋ nnu Tah lə faŋ yo ə yii lɨŋŋ bəŋ lə yee i lāanə bəŋ bieŋ binhliŋ baa fə ə yee bə hlē bieŋ binhliŋ bbɨŋ mmàa n'yɔ̄ɔ ŋkaani bə bəŋ. 27 Nshee kidunshiiŋ ki Chu lə ki duŋ bə bəŋ. Nnəə kindunshiiŋ kkɨŋ ki dùŋ kɨŋŋ bə bəŋ. Nnə lə kindunshiiŋ ki Chu kɨhŋ bə bəŋ ye bəne bbəŋ bə́ dùŋ bie ə mbiŋ nu mə nə̀ lə kə. Bə kə chee lə kwáŋ ə tɔ́ŋ ŋieeŋ go lə yee ŋə bēe bəŋ ləkə ŋə kə̀nə nɨŋ kə. 28 Bə hə woo ye n'yɔ̄ɔ lə n'yu ŋgə̄ŋ, lə n'yá yi fiimə bwo duŋ bə bəŋ. Ə bə maa leki mi, ə bə hə yee bə tɨ̄ŋ bu tɨŋnə, yulahalə ŋgə̄ŋ ə duŋ ə Tah kwuŋ, yu Tah ko kah mi. 29 Fidiɛɛ n'yu n'yɔ̄ɔ fieŋ fɨhŋ bə bəŋ fi kaani kə duŋ nə, bwɔɔ nnu fi yá duŋ, ə bə yá hlə bemi mi. 30 Mbaa lə yɔɔ bəŋ bieŋ kiŋaaŋkə kə, yulahalə ŋkɨŋ nnu mə lə hlaah yo mbiŋ nu yu bwō. Ə kə duŋ nə lə i kənə muŋga ə mi bəŋ kə. 31 Kwaalə, nfə̀ ə duŋ ye Tah mà yɔɔlə lə nfə fo bəne bbəŋ bə́ dùŋ yaŋ ə mbiŋ nu mə lə kələ lə nleki Tah. Bə ja kə no.”