Jɔɔŋ 13

Jisho wii wuh ŋə bəne biih bə kintu

Ə mà duŋ bwɔɔ nnu Chɔnɔ ki Ŋkabəŋ mà chu bwo baha, Jisho kəla lə bwɔɔ wi wuna nnu mə lə she mbiŋ nu, fiimə gəŋ chu ə Tili kwuŋ bwoo wunə ba. Ye i mà leki lə bəne bbəŋ bə́ mà duŋ bie bii ə mbiŋ nu mə, i leki bə́ gəŋ kpee həŋgbɔŋ. 2 Lə yee bə́ dī hə kitaŋ, ə duŋ hlaata hə yiila kinhle ə tɔŋ li Judash ŋwa Shaamuŋ Ishkalɔt mə lə i taa Jisho. 3 Ye Jisho mà kələ lə lə Tili mà nəə kaa bieŋ binhliŋ ə kwáŋ ŋiih mə, i kə̀lə dəŋ lə i mà fu ə Chu kwuŋ i yu fiimə gəŋ chu dɨŋ ə Chu kwuŋ, 4 ye fi mà duŋ lə nəni i bu ja ə biləə bəŋ, fwoo kindu kiih ki bəŋ, jə fitabulu kwaa chi, 5 hlə ŋwoŋ ŋgwiŋ ə chəŋ mə, gbe bəŋ'wii wuh ŋə bəne biih bə kintu mu, i gīaali bə fitabulu ffɨŋ i mà kwaa fie chi. 6 I wii bwo bwii ə Shaamuŋ Pita go, Pita bii bə wu ləə, “Baba, ə wə nnu duŋ ə wə wii wuh ŋəŋŋ lə?”

7 Jisho chuu bə wu lə, “Fieŋ ffɨŋ nfə̄ fɨhŋ duŋ ə wə kələ fi fidiɛɛ kə. Wə lə kələ fi ə duŋ bwɔɔ nnu dɨŋ.” 8 Pita yɔɔ bə Jisho lə, “Duŋ ə wə yá nakə wii lə wuh ŋəŋŋ kə.” Jisho chuu bə wu lə, “Ə nlə nakə wii lə wə, ə wə baa kənə fieŋ bə mi kə.” 9 Shaamuŋ Pita hlə yɔɔ bə Jisho lə, “Baba, ə fi lə duŋ nəni, kəə ə duŋ ə wə wii kwaa ə duŋ wuh ŋəŋŋ kə. Wə lə wii dəŋ kwáŋ ŋəŋŋ maa bə kwoo kɨŋŋ.” 10 Jisho yɔɔ bə wu lə, “Mbɛɛ nnu mə hə wiila gbo i duŋ wɛɛŋ gbo winhliŋ, fi baa duŋ lə i wii gbo kə kahiŋ wuh ŋiih. Bə bie wɛɛŋ, kwaalə ə kə duŋ nə bəŋ bənhliŋ bbəŋ bə bie wɛɛŋ kə.” 11 Jisho màa i yɔ̄ɔ nəni yulahalə i mà kəla mbɛɛ nnu mə lə taa yo wu. Fiee fieŋ ffɨŋ i mà yɔɔ fie lə, “Bə kə duŋ nə wɛɛŋ bəŋ bənhliŋ kə.”

12 Jisho kaanə bəŋ'wii wuh ŋəbə, lee bindu biih, fiimə gəŋ chu ə dɔhɔ kiih mə, hlə bii bə bə́ ləə, “Bə kəla fieŋ ffɨŋ nfə fɨhŋ bə bəŋ lə? 13 Bə chèe mi lə Mbɛɛ Keehnə baa chee dəŋ lə Baba, bə chèe ə duŋ yəəŋ yulahalə ə fieŋ ffɨŋ nduŋ. 14 Mi nnu nduŋ yo Baba weŋ baa duŋ Mbɛɛ Keehnə weŋ nnu ŋ'wīi wuh ŋieeŋ, kəə bə kənə dəŋ bəŋ'wii wuh ŋə bəmwaa bieeŋ. 15 Nfə̄ nəni nnyìi bəŋ bu nyiinə lə yee bə fə̂ dəŋ ye nfə lə bə bəŋ. 16 N'yɔ̄ɔ bə bəŋ chɛɛŋ chɛɛŋ lə mbɛɛ nimi ko lə kah che kwoo wi kə, maa mbɛɛ faŋnə Jisho ko lə dəŋ kah mbɛɛ nnu i faŋ yo wu kə. 17 Ə bə lə kələ bieŋ bɨhŋ, bə fə̀ bi, ə kintɨŋ kiŋkuntaŋ duŋ kieeŋ. 18 N'yɔɔ lə ə duŋ ki bəŋ bənhliŋ kə. Ŋkələ bəne bbəŋ nshaala. Kwaalə, fi duŋ lə fieŋ ffɨŋ fi dùŋ ə Kiŋwaati ki Chu mə kənə bəmbwo wunə ye bə́ mà bieŋ lə lə, ‘Mbɛɛ nnu i diee biləə bɨŋŋ i hlɔɔla gbu ə mi dɨŋ.’ 19 N'yɔ̄ɔ fieŋ fɨhŋ bə bəŋ fidiɛɛ fi kaani kə bwoo duŋ, fo fi yá bwo duŋ, ə bə́ yá hlə bemi lə ə mi wu. 20 N'yɔ̄ɔ bə bəŋ chɛɛŋ chɛɛŋ lə ə mbɛɛ lə tɨŋ jə mbɛɛ nnu nfaŋ, kəə i tɨ̀ŋ jə ə duŋ mi. Mbɛɛ nnu i tɨ̀ŋ jə mi, tɨ̀ŋ jə ə duŋ mbɛɛ nnu i faŋ yo mi.”

Jisho nyii mbɛɛ nnu mə lə taa yo wu

21 Ye Jisho yɔɔ lə bieŋ bɨhŋ nəni, biwɛɛ gbe bəmbee wu. I bu ja yɔɔ wɛɛŋ lə, “N'yɔ̄ɔ bəŋ chɛɛŋ chɛɛŋ lə mbɛɛ ju ə bəŋ mə lə taa mi.” 22 Bəne biih bə kintu ja yee bə́ kēe go ŋəbə dí dí bə́ yɔ̄ɔ lə fo i yɔɔ ə duŋ mbɛɛ nwɛhɛŋ leee. 23 Mbɛɛ ju ə kintu ki bəne bə Jisho mə nnu Jisho màa i lēki yo gbaaŋ i mà yiima gbo i dī baha ə wu go.^ª 24 Shaamuŋ Pita kpaa wu yɔɔ lə i bii bə Jisho ləə i yɔ̄ɔ ə duŋ nyəhə lə. 25 Nəni i baŋ gəŋ ə Jisho go bii bə wu ləə, “Baba, ə nyəhə chəə lə?” 26 Jisho chuu bə wu lə, “Ə mbɛɛ nnu nlə ŋgaa kiŋkə kibele duulə ə bichiŋ mə nə wu.” Nəni i hlə duulə kibele ə tahla mə tu nə bə Judash ŋwa Shaamuŋ Ishkalɔt. 27 Ye Judash jə lə kibele kie nəni, hlaata hlə lɛɛ ə wu mə. Jisho yɔɔ bə wu lə, “Fə fieŋ ffɨŋ wə kiɛɛ fie lə wə fə chəkə.” 28 Mbɛɛ ju ə kintu kibə kie mə mà kə kələ fieŋ ffɨŋ i yɔ̄ɔ fie bə wu nəni kə. 29 Bədi hle lə ye Judash mà duŋ lə mbɛɛ kibwa ki kpo lə Jisho yu yɔ̄ɔ bə wu lə i gəŋ taŋ bieŋ bbɨŋ bə́ duŋ lə bə́ di Chɔnɔ mu, ləkə lə i gəŋ nə fieŋ bə bəne bənjɨnənə. 30 Ye Judash mà jə lə kibele kie di nəni, i hlə fu cha mi gəŋ. Ə bwɔɔ yo bəŋ mà duŋ ə butuu.

Jisho keeh ki kpe yi bə bəne biih bə kintu

31 Ye Judash fu lə gəŋ nəni, Jisho she hlə yɔɔ lə, “Fidiɛɛ duŋ ə bə gbe bəŋəŋ kiŋkuntaŋ ki Ŋwa Mbɛɛ, baa ŋəŋ dəŋ kiŋkuntaŋ ki Chu ə wu mə. 32 Ə bə ŋəŋ kiŋkuntaŋ ki Chu ə wu mə, kəə Chu duŋ ə i nyii dəŋ kiŋkuntaŋ ki Ŋiaani ə wu Chu mə. Ə ki nyiee cha mi. 33 Bwɔni bəŋŋ, nlə nduŋ bə bəŋ kwaa ə bwɔɔ bəŋ chɛɛ. Bə lə she yee bə kīɛɛ mi ə bə nakə ŋəŋ nə ə mi go kə. Ye mmaa n'yɔ̄ɔ lə bə Bəjuu, n'yu n'yɔ̄ɔ dəŋ bə bəŋ fidiɛɛ lə, ‘Dɔhɔ kkɨŋ n'yu gə̄ŋ duŋ ə bə bwo həmə kə.’ 34 Nnəə ŋkɨnə bə bəŋ, ə duŋ ŋkɨnə fwɔ lə bwɔɔ nnu bə she yee bə lêki go ŋieeŋ. Yee bə lêki go ŋieeŋ yəəŋ ye nlèki lə bəŋ. 35 Ə bə she yee bə lêki go ŋieeŋ nəni, ə fɨhŋ hlə fə ə bəne bənhliŋ kələ lə bə duŋ bwɔni bəŋŋ bə kintu.”

Jisho yɔɔ lə Pita yá yi nɨhŋ wu

(Matio 26:31-35; Maak 14:27-31; Lukaa 22:31-34)

36 Shaamuŋ Pita hlə bii bə Jisho ləə, “Baba, wə gəŋ ə duŋ fəhəŋ lə?” Jisho chuu lə, “Dɔhɔ kkɨŋ n'yu ŋgə̄ŋ duŋ ə wə bələ mi mə fidiɛɛ kə. Wə lə she bələ mi dɨŋ.” 37 Pita baa bii bə wu ləə, “Baba, nduŋ nnakə bələ wə fidiɛɛ kə yulaha lə? Nlə nə kinduŋh kɨŋŋ bəŋkpe yu wə.” 38 Jisho bii bə wu ləə, “Ə duŋ ə wə nə kinduŋh ko bəŋkpe yu mi lə?” Jisho yɔɔ bə wu lə, “N'yɔ̄ɔ wə kichɛɛŋ lə daŋ ə butuu, kikɔkɔlɔ lə chu waalə kie ki tɔŋ jə, wə hə nɨhŋna mi chá shɔ.”