Jɔɔŋ 19

Bə́ hlaah kaalə lə bə́ jii Jisho

Paylɛt hlə jə Jisho nə bə́ hloo wu. 2 Bəne bə bicha jə biŋkwahiŋ lo kinfwili ki muŋkɨŋ kəə wu fi, jə kindu ki muŋkɨŋ ki ge, dɔhiŋ wu go. 3 Bə́ hlə yee bə́ gə̄ŋ wu fwi bə́ fē bə wu, bə́ yɔ̄ɔ lə, “Jaaki! Ŋkɨŋ Bəjuu!” Ye bə́ màa bə́ fēlə nəni bə́ kə̄h wu bə biah. 4 Paylɛt baa fu bweenə yɔɔ bə bəne bie lə, “Bə ŋəŋ, n'yu nfwōo mbɛɛ nu nnə bə bəŋ, yu ŋkə ŋəŋ nə fieŋ fiwaha ffɨŋ i daa kə.” 5 Jisho fu yee i gə̄ŋ bə kinfwili ki biŋkwahiŋ kie fi maa kindu ki muŋkɨŋ go. Paylɛt yɔɔ bə bə́ lə, “Bə kee ŋəŋ nu mbɛɛ yo!” 6 Lə bəche ntofi bəŋkuntaŋ bəŋkuntaŋ bə bəne bbəŋ bə́ fwòŋ chəŋ ntofi ə bwɔɔ nu bəŋ ŋəŋ ə wu go, yee bə́ gɛ̄ɛmə lə, “Bə bweeni wu ə kiŋgwa go, bə bweeni wu ə kiŋgwa go!” Paylɛt yɔɔ bə bə́ lə, “Bə jə wu bə kwáŋ ŋieeŋ bə bweeni wu ə kiŋgwa go, yulahalə ŋkə ŋəŋ nə fieŋ ffɨŋ i daa kə.” 7 Bəjuu bie chuu bə wu lə, “Kkə kənə ŋkɨnə ya, ŋkɨnə yo nyìi lə i yo bəŋkpe, yulahalə i jəə gbo wiih lə i duŋ Ŋwa Nchu.” 8 Ə chulə Paylɛt wo yo ni, nɨŋ kwo wu gbaaŋ. 9 Bəə Jisho baa chu mu ə kintɔŋ kiih mə, i bii bə Jisho ləə, “Wə bwo fəhəŋ lə?” Kwaalə Jisho nakə chuulə wu fieŋ kə. 10 Paylɛt bii bə Jisho lə, “Wə yɔɔ lə jə bə mi kə lə? Wə kə kələ lə ŋkənə muŋga mu ncheenə kwáŋ ə wə go, kənə dəŋ muŋga mmuŋ nduŋ ə n'yɔɔ lə bə́ bweeni wə ə kiŋgwa go kə lə?” 11 Jisho chuu bə wu lə, “Duŋ ə wə kənə muŋga ə mi bəŋ kə kahiŋ lə bə́ nnəə wə muŋga mwe ə buh. Nəni yu fɨhŋ, mbɛɛ nnu i nə yo mi ə wə kwáŋ yo bə yiwaha yyɨŋ yi ko kah yo.”

12 Ə chulə Paylɛt wo yo ni, i gbe bənhle jé yyɨŋ mə lə tukwaŋ ə wu go. Kwaalə Bəjuu wɛŋ jə gbaaŋ lə, “Ə wə chɔɔ mɔŋ bəntukwaŋ ə mbɛɛ nu go, kəə wə duŋ nə dɔɔ Kayisha Ŋkɨŋ ŋkuntaŋ nnu Luŋ kə. Mbɛɛ mənhliŋ nnu i jə̀ gbo wiih lə i duŋ ŋkɨŋ, lə mbɛɛ nnu i dùŋ kə diee njənə bə Kayisha.” 13 Ə chulə Paylɛt baa wo yo ni, i fu bə Jisho, shii ə kiŋkaa ki nhlaa bəŋ ə dɔhɔ kkɨŋ bə́ chèe lə, Dɔhɔ kkɨŋ bə́ wɛɛla bə Tə́, bə́ chèe ə díe yí Bəhiblu mə lə Gabata. 14 Ə màa butuu bbuŋ bə́ màa bə́ Bwɛ̄ɛ bənɔhiŋ Chɔnɔ ki Ŋkabəŋ, bwɔɔ mà duŋ ye bitaŋ yuufi ə nchɔ bifwe lə. Paylɛt yɔɔ bə Bəjuu lə, “Bə kee ŋəŋ Ŋkɨŋ weŋ nu!” 15 Bəjuu bie yee bə́ gɛ̄ɛmə lə, “Gəŋ bə wu, gəŋ bə wu, bweeni wu ə kiŋgwa go!” Paylɛt bii bə bə́ ləə, “Mbweeni Ŋkɨŋ weŋ ə kiŋgwa go lə?” Bəche ntofi bəŋkuntaŋ bəŋkuntaŋ chuu bə wu lə, “Kkə hləŋkə bə Ŋkɨŋ ju kahiŋ Kayisha.” 16 Paylɛt hlə nə Jisho bə bə́ lə bə́ gəŋ bweeni wu ə kiŋgwa go.

Bə́ bweeni Jisho ə kiŋgwa go

(Matio 27:32-44; Maak 15:21-32; Lukaa 23:26-43)

17 Bə́ hlə jə Jisho, fu bə wu. I too kiŋgwa kiih yee i gə̄ŋ ə dɔhɔ kkɨŋ bə́ chèe lə Gəələ ki Kwoo, bə́ chèe ə díe yí Bəhiblu mə lə Golgota. 18 Bə́ hlə gəŋ bweeni wu həmə ə kiŋgwa go, bweeni dəŋ bəne bədi bəfwe ə biŋgwa go, ju yo wɛɛ wi diee, ju yo wɛɛ wi məə, Jisho duŋ kintekinte. 19 Paylɛt bieŋ dəŋ fieŋ fidi bə́ bweeni ə kiŋgwa ki Jisho kie go. Fieŋ ffɨŋ i mà bieŋ fie mà duŋ lə, “Mbɛɛ nu Nashalit, Ŋkɨŋ Bəjuu.” 20 Bəjuu kiŋaaŋkə mà cheela fieŋ ffɨŋ i mà bieŋ fie, yulahalə dɔhɔ kkɨŋ bə́ mà bweeni kie Jisho ə kiŋgwa go mà duŋ baha ə kibalaki go, i mà bieŋ fieŋ fɨhŋ ə díe yí Bəhiblu mə, ə yí Latiŋ mə maa ə yí Glik mə. 21 Bəche ntofi bəŋkuntaŋ bəŋkuntaŋ bie gəŋ yɔɔ bə Paylɛt lə, “Wə kə bieŋ nə lə, ‘Ŋkɨŋ Bəjuu kə.’ Bieŋ ə duŋ lə, ‘Mbɛɛ nu yɔ̀ɔ lə i duŋ Ŋkɨŋ Bəjuu.’” 22 Paylɛt chuu bə bə́ lə, “Fieŋ ffɨŋ mbieŋ, mbieŋna.”

23 Ye bəne bə bicha bie mà bweeni lə Jisho ə kiŋgwa go, bə́ jə bindu biih gah bə go ŋəbə bidɔhɔ binua ye bə́ mà duŋ lə. Bə́ mà jəə maa kindu kiih ki hətə. Kwaalə kindu kiih ki hətə kɨhŋ bə́ mà tɨŋna taa ki chɔɔ jə ə mɛɛ go gəŋ bwɔ bwii ə wuh go. 24 Nəni bə́ hlə yɔɔ bə go ŋəbə lə, “Kkə kə shwaanə kindu ki hətə kɨhŋ kə. Kkə tɨŋ kimbəəmbo bəŋəŋ mbɛɛ nnu mə lə di ki.” Fɨhŋ mà duŋ bənfə lə fi bwo fu yəən ye bə́ mà bieŋ lə ə Kiŋwaati ki Chu mə lə,

“Bə́ mà gaah bindu bɨŋŋ ə bə́ go,

tɨŋ kimbəəmbo^ª yu kindu ki hətə kɨŋŋ.”

Nəni bəne bə bicha bie mà fəə lə.

25 Bəkwɛɛ bədi mà lema həmə baha ə kiŋgwa ki Jisho kie go. Bəkwɛɛ bəhŋ mà duŋ mah Jisho bə dɨŋ mah Jisho kpɛ maa Meeli kpɛɛ Klopa bə Meeli Madaliŋ. 26 Bwɔɔ nnu Jisho mà ŋəŋ ə mahni go maa mbɛɛ kintu wi nnu i màa i lēki yo bə́ lema baha baha, i yɔɔ bə mahni lə, “Kpɛ, kee ŋəŋ, nu lə ŋwa.” 27 Ye i yɔɔlə nəni i fiimə yɔɔ dəŋ bə mbɛɛ kintu wi yo lə, “Kee ŋəŋ, nu lə mwah.” Chɔɔ jə ə bwɔɔ mbini yo bəŋ mbɛɛ kintu yo jə mah Jisho, i gəŋ yee i dūŋ fidiɛɛ ə duŋ ə wu kwuŋ.

Jisho kpe

(Matio 27:45-56; Maak 15:33-41; Lukaa 23:44-49)

28 Ə chu bwɔɔ nnu dɨŋ ye Jisho mà kələ lə ba lə nimi liih kaa, bənfə lə fi bwo fu yəəŋ ye fi mà duŋ ki bieŋ ə Kiŋwaati ki Chu mə, i duŋ duŋ yɔɔ lə,

“Ntɔntɔ yu ŋɨ̄ŋ mi.”

29 Nchwa ju mà duŋ həmə bə mbihŋ məŋgbanyi mənte baaa. Bəne bə bicha bie hlə nuu ŋkuncha mə bɛŋ ə fitələ fi ishob go tu hə buh yii ə wu jə.^ª 30 Bwɔɔ nnu Jisho mà jə mbihŋ mie i yɔɔ lə, “Kaka kaa.” Ye i yɔɔlə nəni, i bɛhi kwoo kiih, nə chuu fiana wi bə Chu.

Bə́ bɛŋ Jisho ə bíili mə

31 Ye bumbini bwe mà duŋ lə Butuu bu bwɛɛnə bənlɛɛ ə bunte mə, Bəjuu yee bə́ kīɛɛ bənfə lə biŋwuuni bie kə baa ə biŋgwa bie go ə bunte mə kə, (bunte bwe kibɛɛ mà duŋ buŋkuntaŋ). Bə́ hlə gəŋ ŋəŋ Paylɛt kɔnɔ lə i yɔɔ bə́ bwuŋ wuh ŋə bəne bbəŋ bə́ mà duŋ bie ə biŋgwa go fo bə́ lə kee bəŋkpe ə bə́ hlili bə́, tu no. 32 Nəni bəne bə bicha bie hlə bwo bwuŋ wuh ŋə mbɛɛ nnu fwii yo, bwuŋ dəŋ ŋə ju nnu bə́ mà bweeni yo bə wu. 33 Kwaalə, bwɔɔ nnu bə́ mà bwo bwii ə Jisho go, bə́ ŋəŋ lə mə hə kpee, bə́ nakə bwuŋ nə wuh ŋiih kə. 34 Mbɛɛ ju ə kintu ki bəne bə bicha bie mə bɛŋ Jisho ə bíili mə bə gɔŋ. Ye i bɛŋ lə nəni, cha mi ŋgɔŋ bə ŋgwiŋ yee mə fū həmə. 35 Mbɛɛ nnu i mà ŋəŋ yo bieŋ bɨhŋ ə wu nnu i yɔ̀ɔ nəni, yo yi duŋ chɛɛŋ, i kə̀lə lə i yɔ̀ɔ ə duŋ kichɛɛŋ fo bə lə bemi. 36 Bieŋ bɨhŋ mà duŋ fo fieŋ ffɨŋ bə́ mà bieŋ ə Kiŋwaati ki Chu mə lə bwo wunə ye bə́ mà bieŋ lə lə, “Bə́ yá bwuŋ nə kwoo kiih kidi mwe kə.” 37 Fi duŋ dəŋ ə dɔhɔ kidi ə Kiŋwaati ki Chu mə bə́ bieŋna lə, “Bəne yáa bə́ kēe mbɛɛ nnu bə́ bɛŋ yo.”

Bə́ diih Jisho

(Matio 27:57-61; Maak 15:42-47; Lukaa 23:50-56)

38 Həmə dɨŋ Joshɛ nnu Alimatia gəŋ ŋəŋ Paylɛt noŋ lə Paylɛt nə wu je i gəŋ fwoo kiŋwuuni ki Jisho. Joshɛ nu mà duŋ mbɛɛ ə kintu ki Jisho mə, kwaalə i ba ə nələ mə yu i màa i lɔ̄ Bəjuu. Paylɛt bemi, i hlə gəŋ tu kiŋwuuni kie. 39 Nikodemu nnu i mà hlaa yo gəŋ ŋəŋ ə Jisho go butuu budi ə butuu mà bwoo bə mɛŋ məndi mənfuchee nwaa mməŋ bə́ fuhaŋ bə mɛɛl maa alo, ndili nnu mu duŋ ye bəkilo mbwɛɛnshɔ ə nchɔ bətɔh lə. 40 Bə́ bəə wu hlə hlili bə kiŋwuuni ki Jisho kie, bini ə bindu ki wɛɛŋ mə shoo bieŋ bidi binfu chee ye bə́ màa bə́ dīih'lə bəne ə fwɔ wi Bəjuu mə. 41 Wɛɛh kidi mà duŋ baha ye bə́ mà bweeni lə Jisho ə kiŋgwa go. Wɛɛh kie duŋ joo ki fwɔ kidi duŋ mə, kkɨŋ bə́ ŋkə hlaa lə diih mbɛɛ mə kə. 42 Nəni ye butuu bumbini bwe mà duŋ lə lə ə butuu bu Bəjuu bu bwɛɛnə bənlɛɛ ə Bunte mə, joo kie duŋ dəŋ baha baha, bə́ hlə yii Jisho mə.^ª