Bə́ kiɛɛ kiŋwuuni ki Jisho hləŋ hləŋ
20
Lə yee ə dūŋ butuu bu fwii ə kibumwe go, Meeli Madaliŋ fu ja fili fili kwe kaani kə chaalə, gəŋ ə jəŋ ye bəŋ, ŋəŋ bə́ hə bɨhaŋ tə llɨŋ bə́ mà baŋ le fwiih we mu. 2 Nəni i hlə lələ gəŋ ŋəŋ Shaamuŋ Pita bə mbɛɛ kintu Jisho ju nnu Jisho màa i lēki yo gbaaŋ, yɔɔ bə bə́ lə, “Bə́ hə fwoola Baba ə biee ye mə, kkə kə kələ dɔhɔ kkɨŋ bə́ chi wu kə.” 3 Pita bə mbɛɛ kintu Jisho yo hlə fu yee bə́ lə̄lə bə́ gə̄ŋ həmə ə jəŋ ye bəŋ. 4 Bə́ màa bə́ gə̄ŋ bə́ lə̄lə, kwaalə mbɛɛ kintu Jisho ju yo lələ kah Pita hlaa gəŋ bwii ə jəŋ ye bəŋ. 5 Ye i bwii lə həmə, i gbɛ gbo kee, ŋəŋ bindu bbɨŋ bə́ mà bini bie Jisho mu nɔŋna həmə. I kee nakə lɛɛ lə mə kə. 6 Shaamuŋ Pita bələ wu gəŋ bwii həmə, hlə lɛɛ gəŋ ə joo kie mə. Ye i lɛɛlə, i ŋəŋ kwaa ə duŋ ə bindu bie go bi nɔŋna həmə, 7 maa finshɛŋkɛ fi kindu ffɨŋ bə́ mà bini fie kwoo ki Jisho mu, fi mà ŋkə nɔŋ nə ə bindu bidi bie bəŋ kə. Kwaalə bə́ hə kaa chi fi ə dɔhɔ ki fi mə chili. 8 Mbɛɛ kintu Jisho ju nnu mə hə hlaa bwii yo ə jəŋ ye bəŋ hlə lɛɛ gəŋ dəŋ ə joo kie mə ŋəŋ bə díi ŋiih hlə bemi. 9 Ə mà duŋ bə́ kə kələ dəŋ kinuu ki fieŋ ffɨŋ fi dùŋ ə Kiŋwaati ki Chu mə lə Jisho mà duŋ bəŋkpe fu ə kpe mə kə.Jisho nyii gbo wiih bə Meeli Madaliŋ
10 Bəne bə kintu bə Jisho bie kwələ gəŋ chu ə bə́ kwuŋ. 11 Kwaalə Meeli she həmə yee i dē ə jəŋ ye bəŋ. Ye i màa i dēlə i duŋ duŋ gbɛ gbo mia mə biee ye mə, 12 ŋəŋ bənchinda bə Chu bəfwe bə leela bindu biwu buuu bə́ shiila ye bə́ mà nɔhiŋ lə kiŋwuuni ki Jisho, ju yo wɛɛ wi kwoo, ju yo wɛɛ wi wuh ye i mà nɔŋ lə. 13 Bənchinda bə Chu bie bii bə wu ləə, “Kpɛ, wə dē laha lə?” I chuu lə, “N'yu ndē yulahalə bə́ jəə no bə Baba ŋgwəŋ fəŋ. Ŋkə ŋkələ dɔhɔ kkɨŋ bə́ chi wu kə.” 14 Ye i mà yɔɔlə nəni, ə chu lə i fii gbo i ŋəŋ Jisho lema. Kwaalə i nakə kələ lə ə Jisho kə. 15 Jisho bii bə wu ləə, “Kpɛ, wə dē laha lə? Wə kīɛɛ ə duŋ nyəhə lə?” Meeli hlə yee i hlē lə ləkə ə mbɛɛ nnu i fwòŋ yo wɛɛh kie. I hlə yɔɔ bə wu lə, “Tah, ə duŋ lə ə wə nnu wə tu no bə wu, wə yɔɔ dɔhɔ kkɨŋ wə chi kie wu ŋgəŋ njə no bə wu.” 16 Jisho chee wu lə, “Meeli.” I fii gbo chee wu ə díe yibə yí Bəhiblu mə lə, “Laboni,” lə duŋ lə, “Mbɛɛ Keehnə.” 17 Jisho yɔɔ bə wu lə, “Wə kə kənə ə mi go kə, yulahalə n'yu ŋkāani kə biŋ nə ə Tah kwuŋ kə. Gəŋ ə duŋ ə bəŋgwoŋ mə wə yɔɔ bə bə́ lə n'yu ŋgə̄ŋ ə Tah kwuŋ nnu i dùŋ yo dəŋ Chwa weŋ i dùŋ dəŋ Chu ŋgwoŋ i dùŋ dəŋ Chu weŋ.” 18 Meeli Madaliŋ hlə gəŋ yɔɔ bə bəne bə Jisho bə kintu lə i ŋəŋna ə Baba go, baa yɔɔ bə bə́ lə mə hə yɔɔla bieŋ bɨhŋ bə wu.
Jisho nyii gbo wiih bə bəne biih bə kintu
19 Lə yee ə dūŋ kitaŋ kimbini kie kkɨŋ ki mà duŋ butuu bu fwii ə kibumwe go, bəne bə kintu ki Jisho duŋ ə chəŋ bə́ fwaŋna biwulə, yulahalə bə́ màa bə́ lɔ̄ Bəjuu. Jisho duŋ duŋ fu bwo ə bə́ mə kintekinte, yɔɔ bə bə́ lə, “Yee kindunshiiŋ dûŋ bə bəŋ.” 20 Ye i chee lə bə́ nəni, hlə nyii kwáŋ ŋiih bə bíili yiih bə bə́. Bəne biih bə kintu bie wo njənjə gbaaŋ ye bə́ ŋəŋ lə ə Baba go. 21 Jisho baa yɔɔ bə bə́ lə, “Yee kindunshiiŋ dûŋ bə bəŋ. Ye Tah mà faŋ lə mi, ə dəŋ yəəŋ ye n'yu nfāŋ li bəŋ fidiɛɛ.” 22 Ye i mà yɔɔlə nəni, hlə ŋɔɔni ə bə́ go yɔɔ lə, “Bə jə Fiana Wɛɛŋ. 23 Ə bə laamə nə yíwaha yí mbɛɛ, kəə Chu laama nə ba yí. Ə bə nakə laamə nə, kəə yí baa ə wu go.”
Jisho nyii gbo wiih bə Tɔma
24 Ə mà duŋ bwɔɔ nnu Jisho mà bwo ə bəne biih bə kintu tɨŋ, Tɔma nnu i mà duŋ ə kintu ki bəne bə yuufi ə nchɔ bəfwe mə nnu bə́ màa bə́ chēe yii liih lidi lə Maŋ mà kə duŋ nə ə bə́ mə kə. 25 Bəne bə kintu ki Jisho bədi bie hlə yɔɔ bə wu lə, “Kkə hə ŋəŋna ə Baba go.” Kwaalə, mə yɔɔ ŋkwo wi bə bə́ lə, “Kahiŋ lə ŋŋəŋna bibwɔɔ bimunchu mwe ə kwáŋ ŋiih go, yii fiŋkwaani ə bibwɔɔ bi munchu mwe mə, yii dəŋ kwáŋ ŋəŋŋ ə bíili yiih mə, ə mbemi kə.”
26 Kibumwe kah, bəne bə Jisho bə kintu dūŋ chəŋ dəŋ, Tɔma duŋ dəŋ bə bə́, bə́ hə fwaŋna biwulə. Kwaalə, Jisho duŋ duŋ fu bwo ə bə́ mə kintekinte, chee bə́ lə, “Yee kindunshiiŋ dûŋ bə bəŋ.” 27 Ye i yɔɔlə nəni, hlə yɔɔ bə Tɔma lə, “Yii fiŋkwaani fwo ə kwáŋ ŋəŋŋ mə, ŋəŋ ye ŋə duŋ lə, baa yii dəŋ kwáŋ ŋo ə bíili yɨŋŋ mə. Wə kə baa lə kənə naamənə kə, bemi.” 28 Tɔma hlə chuu lə, “Baba ŋgwəŋ, bə Chu ŋgwəŋ.” 29 Jisho yɔɔ bə wu lə, “Wə bemi fidiɛɛ yulahalə wə ŋəŋna ə mi go lə? Kintɨŋ kiŋkuntaŋ dùŋ bə bəne bbəŋ bə́ kə ŋəŋ nə ə mi go kə, kwaalə bə́ bema.”
Kinhle ki kiŋwaati kɨhŋ