Jɔɔŋ 21

Jisho nyii gbo wiih bə bəne biih bə kintu baha ə nɔ go

Ə chu bwɔɔ nnu dɨŋ Jisho baa nyii gbo wiih bə bəne biih bə kintu baha ə Nɔ nnu Tibelia tɨŋ. Fi mà duŋ ə je ni mə nəni: 2 Shaamuŋ Pita bə Tɔma nnu bə́ mà chee lə Maŋ, maa Nataniya nnu Kana ə bidi bi Galilii mə, maa bwɔni bə Jebedee, bə bəne bə kintu bədi bəfwe mà duŋ dɔhɔ mwe. 3 Shaamuŋ Pita duŋ duŋ yɔɔ lə, “Nlə nla fiɔŋ.” Bə́ yɔɔ bə wu lə, “Kkə lə la be bənhliŋ.” Bə́ bənhliŋ hlə fu gəŋ lɛɛ ə kikpɔŋkɔ mə. Kwaalə bə́ nɔŋ bənjaa ə kikpɔŋkɔ kie mə bumbini bwe nakə kwoo fieŋ kə.

4 Butuu yee bu chāa bu bwō, Jisho bwo lemi ŋgwiŋ həkpa, bəne biih bə kintu nakə baa lə kələ lə ə wu kə. 5 Jisho bii bə bə́ ləə, “Bwɔni bəŋŋ, bə kə kwoo fiɔŋ kə lə?” Bə́ chuu lə, “Kkə kə kwoo fieŋ kə.” 6 I yɔɔ bə bə́ lə, “Bə lɛɛ gbi we ə wɛɛ wi diee wi kikpɔŋkɔ kie mə bə lə kwo fieŋ.” Bə́ lɛɛ, yee wi kāh bə́ bəŋkpa, yulahalə fiɔŋ mà duŋ mə kiŋaaŋkə. 7 Mbɛɛ kintu nnu Jisho màa i lēki yo, bwɔɔ nnu i mà ŋəŋ nəni i hlə yɔɔ bə Pita lə, “Ə Baba.” Ye Shaamuŋ Pita wo lə lə ə Baba, i bu lee bindu biih yulahalə i mà duŋ gbo wi ŋɨmə. Lə i lee nəni i tee mə nɔ yo mə yee i gə̄ŋ ə Jisho go. 8 Kwaalə bəne bədi bə kintu bie yee bə bə̄lə ə kikpɔŋkɔ kie mə bə́ kpā gbi we wi hə yiila bə fiɔŋ. Bə́ mà kə nyɛɛ lə je bənfu həkpa kə. Bəntaŋ mà she kwaa ye mbwɛɛnshiŋ lə. 9 Lə bə́ kpətə həkpa bə́ ŋəŋ bwii gɛɛki ə ká go, fiɔŋ duŋ bəŋ, kibele duŋ dəŋ həmə. 10 Jisho yɔɔ bə bə́ lə, “Bə bwo bə fiɔŋ yidi yyɨŋ bə kwoo.” 11 Nəni Shaamuŋ Pita biŋ gəŋ lɛɛ ə kikpɔŋkɔ kie mə kpa fu bə gbi we həkpa wi yiila bə fiɔŋ yiŋkuntaŋ yiŋkuntaŋ gbi bə mbwɛɛnshiŋ ə nchɔ shɔ (153). Maa ye yí mà duŋ lə kiŋaaŋkə nəni, gbi we nakə shwaanə kə. 12 Jisho yɔɔ bə bə́ lə, “Bə bwo di.” Mbɛɛ mwi ə bəne biih bə kintu bie mə mà kə mɔŋ nə bəmbii ləə, “Ə wu nyəhə chəə lə?” Ə mà duŋ bə́ hə kəla lə ə Baba. 13 Jisho hlə gəŋ jə kibele kie bə fiɔŋ yé nə bə́. 14 Fɨhŋ mà duŋna ə chá bəŋ shɔ ye Jisho mà nyii gbo wiih bə bəne biih bə kintu chɔɔ jə ye i mà fu lə ə kpe mə.

Jisho nə chuu nimi bə Pita

15 Lə bə́ di kaa, Jisho chee Pita bii bə wu ləə, “Shaamuŋ ŋwa Jɔɔŋ, wə lèki mi kahiŋ bədi bəhŋ nini lə?” I chuu lə, “Eee Baba, wə kələ lə n'yii nlèki wə.” Jisho yɔɔ bə wu lə, “Yee wə lêe bwɔni bəŋŋ bə shɔ́ŋ.” 16 Jisho baa chee wu ə chá bəŋ fie bii bə wu ləə, “Shaamuŋ ŋwa Jɔɔŋ, wə yii lèki mi lə?” I chuu lə, “Eee Baba, wə kə̀lə lə nlèki wə.” I yɔɔ bə wu lə, “Yee wə fwôŋ shɔ́ŋ yɨŋŋ.” 17 Jisho baa chee wu ə chá bəŋ shɔ bii bə wu ləə, “Shaamuŋ ŋwa Jɔɔŋ, wə yii lèki mi lə?” Lə Pita wo ye Jisho baa bii lə bə wu ə chá bəŋ shɔ lə i leki wu lə, fi fɨhɨŋ wu. I yɔɔ bə Jisho lə, “Baba, wə yii kə̀lə fieŋ finhliŋ, wə kə̀lə lə nlèki wə.” Jisho yɔɔ bə wu lə, “Yee wə lêe shɔ́ŋ yɨŋŋ. 18 N'yɔ̄ɔ wə chɛɛŋ chɛɛŋ lə, bwɔɔ nnu wə mà kaani hlɔŋ ŋiaŋ nyo, wə màa wə lēe bindu bwo wə jàa wə gə̀ŋ dɔhɔ kkɨŋ wə lèki. Kwaalə bwɔɔ nnu wə yá dɨŋ, wə yá tuuli kwáŋ ŋo buh ə mbɛɛ ju lee wə bindu, jə gəŋ bə wə ə dɔhɔ kkɨŋ wə duŋ kə hlee bəŋgəŋ.” 19 Jisho màa i yɔ̄ɔ fɨhŋ bənyii dɨŋ kpe nni Pita mà kənə ye bəmbwo kpe bənnə Chu yii liŋkuntaŋ. Ye Jisho yɔɔlə nəni i hlə yɔɔ bə wu lə, “Yee wə bə̂lə mi.”

20 Pita fii gbo i ŋəŋ mbɛɛ kintu nnu Jisho mà leki yo i bə̄lə bə́. Mbɛɛ kintu nu duŋ nnu i màa i yīimə yo baha ə Jisho go bwɔɔ nnu bə́ màa bə́ dī yo bieŋ ə kitaŋ. I bii bə wu ləə, “Baba, ə nyəhə nnu i yá taa yo wə lə?” 21 Ye Pita mà ŋəŋ lə mbɛɛ kintu yo bə̄lə bə́, i bii bə Jisho ləə, “Baba, ə bwo tə ki mbɛɛ nunu?” 22 Jisho chuu bə wu lə, “Ə hə duŋ lə ŋkiɛɛ tə lə i ba ŋkee gəŋ bwii ye n'ya nfiimə bwo, fimbini fie lə laha bə wə lə? Yee wə bə̂lə mi.” 23 Ye Jisho yɔɔlə nəni, yo ye hlaamə gəŋ ə bəne bə kimbemi bie mə lə mbɛɛ kintu Jisho nu yá kpee kə. Kwaalə Jisho mà kə yɔɔlə lə i yá kpee kə. I mà yɔɔ kwaa lə, “Ə hə duŋ lə ŋkiɛɛ kwaa lə i ba ŋkee gəŋ bwii ye n'yá nfiimə bwo, fimbini fie lə laha bə wə lə?”

Ki mbɛɛ nnu i mà bieŋ yo kiŋwaati kɨhŋ

24 Mbɛɛ kintu nu ə wu nnu i yɔ̄ɔ yo ki bieŋ bɨhŋ, ə duŋ wu nnu i mà bieŋ bieŋ bie, kkə kə̀lə lə fieŋ ffɨŋ i yɔ̄ɔ ki fi duŋ chɛɛŋ.

25 Bieŋ bidi dəŋ bie kiŋaaŋkə bbɨŋ Jisho mà fə, ə bə́ hə bieŋ bi binhliŋ, ə nhə n'yee ŋŋə̄ŋ lə mbiŋ mənhliŋ duŋ ə i nakə kənə dɔhɔ bənchi biŋwaati bie kə.