Matio 27

Judash hləə

Lə yee ə dūŋ həmbumbwaa fili fili, bəche ntofi bəŋkuntaŋ bəŋkuntaŋ bə bəne bbəŋ bə́ hlàah kitɨŋ, shii chuŋ bənjii Jisho. 2 Bə́ hlə kwaa wu, jə gəŋ nə wu ə kwáŋ ŋə Paylɛt mə mbɛɛ nnu i hlàah bidi bie.

3 Ə chulə Judash mbɛɛ nnu i mà taa yo Jisho ŋəŋ lə bə́ hlaala kaalə lə bə́ lə jii wu, i gaanə tɔŋ liih, jə kpo wi bichu wu mbwɛɛnshɔ we fiimə gəŋ nə chuu wi bə bəche ntofi bəŋkuntaŋ bəŋkuntaŋ maa bə bəne bbəŋ bə́ hlàah bie kitɨŋ. 4 Ye i mà gəŋ lə, i yɔɔ bə bə́ lə, “Nfəə yiwaha bəntaa mbɛɛ, ə duŋ i kə fəə yiwaha kə.” Bə́ chuu bə wu lə, “Fie fieŋ kənə laha bənfə bə be lə? Ə kələ wə fimbini fie fieŋ.” 5 Judash hlahi kpo we həmə həkwe ə chəŋ ntofi ye mə, hlə fu gəŋ hləə. 6 Bəche ntofi bəŋkuntaŋ bəŋkuntaŋ dɔɔ jə kpo we yɔɔ lə, “Wuhŋ lə kpo wi ŋgɔŋ, ŋkɨnə kə bemi lə bə́ kili dɨŋ wuhŋ kpo ə chəŋ ntofi mə kə.” 7 Bə́ shii chuŋ lə bə́ gəŋ taŋ dɔhɔ ə mbɛɛ ju kwáŋ nnu i mwèe bikaŋ, fo bə́ lə yee bə́ dīih nfúuntə həmə. 8 Fiee fieŋ ffɨŋ bə́ chēe fie dɔhɔ kie bwii daŋ lə, “Dɔ ki Ŋgɔŋ.” 9 Fi mà kah nəni, fo fieŋ ffɨŋ mbɛɛ hlɨŋ Chu Jelimia mà yɔɔ fie hlə gbeemə yəəŋ ye i mà yɔɔlə lə, “Bə́ mà jəə kpo wi bichu mbwɛɛnshɔ ə duŋ chuŋ yiih ye bwɔni bə Ishlael mà bwɛɛ ə kwoo kiih bəŋ, 10 taŋ dɔhɔ mu ə mbɛɛ nnu i mwèe bikaŋ kwáŋ, ə duŋ dəŋ yəəŋ ye Baba Chu mà yɔɔlə bə mi.”

Jisho lemi ə Paylɛt fwi, mbɛɛ nnu i hlàah nahlala nnu Luŋ

(Maak 15:2-5; Lukaa 23:3-5; Jɔɔŋ 18:33-38)

11 Ye Jisho mà lemi lə ə Paylɛt ŋwuŋ bənhlaah fwi, Paylɛt bii bə wu ləə “Ə wə Ŋkɨŋ Bəjuu yo lə?” Jisho chuu bə wu lə “Ə lə ye wə yɔɔ lə.” 12 Kwaalə, ə chulə bəche ntofi bəŋkuntaŋ bəŋkuntaŋ bə bəne bbəŋ bə́ hlàah kitɨŋ chɔɔ yee bə́ bwɛ̄ɛ bieŋ ə wu go, i nakə chuu lə fieŋ kə. 13 Paylɛt bii bə wu ləə, “Wə kə woo dɨŋ bieŋ bbɨŋ bə́ yɔ̄ɔ bie ə wə go kə lə?” 14 Kwaalə, Jisho nakə chuu lə fieŋ bə wu maa fimwi ə bieŋ bbɨŋ bə́ màa bə́ chāa bie ə wu go kə. Mbɛɛ hlaahnə yo ŋəŋ nəni gəə ŋɨŋ wu gbaaŋ.

(Maak 15:6-15; Lukaa 23:13-25; Jɔɔŋ 18:39–19:16)

15 Ə bwo duŋ ə bwɔɔ Chɔnɔ ki Ŋkabəŋ mə, mbɛɛ nnu i hlàah nu fwoo mbɛɛ mwi ə chəŋ munfwa mə nnu bəne bie kiɛɛ lə mə hə fwoo. 16 Ə mà duŋ ə bwɔɔ yo bəŋ, mbɛɛ ju duŋ ə chəŋ munfwa mə, nnu bə́ mà kələ ba wu yu bieŋ biwaha, yii liih duŋ lə Balaba. 17 Bwɔɔ nnu bəne mà bumə, Paylɛt bii bə bə́ ləə, “Bə kiɛɛ lə nfwoo ə duŋ nyəhə ə chəŋ munfwa mə lə? Bə kiɛɛ lə nfwoo Balaba, lii Jisho nnu bə́ chèe yo lə Nchuu Fwoo nnu Chu mà kaachi lə?” 18 I màa i bīi nəni ə duŋ yulahalə i mà kəla lə bə́ mà nəə Jisho ə kwáŋ ŋiih mə yulahalə bə́ màa bə́ lūhuŋ bimi bə wu. 19 Bənyiinə mu, bwɔɔ nnu Paylɛt mà shii ə dɔhɔ kkɨŋ bə ba kie bənhlaah bənhlaa, kpɛɛ faŋ hlɨŋ bə wu, yɔɔ lə, “Wə kə fəə fieŋ bə mbɛɛ yo kə. Ə mbɛɛ ntiiŋ. N'yɔ̄ɔ nəni yulahalə yobutuu hə fɨhaŋ mi daŋ ə butuu gbaaŋ yu wu.” 20 Ye Paylɛt biilə nəni, bəche ntofi bəŋkuntaŋ bəŋkuntaŋ bə bəne bbəŋ bə́ hlàah kitɨŋ bweemə bəne bie lə, bə́ yɔɔ lə i fwoo ə duŋ Balaba, i laa Jisho ə nlaa mə. 21 Mbɛɛ hlaahnə yo baa ja bii bə bə́ ləə, “Mbɛɛ nnu bə́ kiɛɛ yo lə ncheekwaŋ ə bəne bə bəfwe bəhŋ mə duŋ nwɛhɛŋ yo lə?” Bə́ chuu bə wu lə, “Balaba.” 22 Paylɛt baa bii bə bə́ lə, “Ə nlə ntukwaŋ ə wu go nəni, ə nhlə fə ləhəŋ bə Jisho nnu bə́ chèe yo lə Kleto lə?” Bə bənhliŋ yɔɔ lə, “Bə́ bweeni wu ə kiŋgwa go ə bweeni mə.” 23 I baa fiimə bii ləə, “Bə bweeni wu yulaha lə? Fieŋ fiwaha ffɨŋ i fəə duŋ laha lə?” Yee bə́ gɛ̄ɛmə bə́ gə̄ŋ kwaa fwi fwi lə, “Bə bweeni wu ə kiŋgwa go.”

24 Ə chulə Paylɛt ŋəŋ lə, mbɨŋ ju hləŋ bəŋ, lə fi lə bwo ə duŋ bə bəŋgə. I jə ŋgwiŋ, wii kwáŋ ŋiih mu ə kimɔ ki bəne kie fwi yɔɔ lə, “Kwáŋ ŋəŋŋ hləŋ hə kpe mbɛɛ nu mə kə. Ə bəŋ fí.” 25 Bəne bənhliŋ chuu bə wu lə, “Eee, cheekwaŋ yee ŋgɔŋ mii dùŋ ə bikuu biaa bəŋ maa ə bwɔni biaa bəŋ.”

26 Paylɛt fwoo Balaba ye bə́ mà kiɛɛ lə, yɔɔ bə́ hlooki Jisho, hlə nə lə bə́ gəŋ bweeni wu ə kiŋgwa go.

Bəne bə bicha yee bə́ bə̄ŋ Jisho

(Maak 15:16-20; Jɔɔŋ 19:2-3)

27 Bəne bə bicha bə ŋwuŋ hlaahnə yo hlə jə Jisho lɛɛ bə wu ə kintɔŋ kiih mə, kkɨŋ bə́ chèe lə Platuliyuŋ, hlə buhuŋ kimɔ ki bəne bə bicha bbəŋ bə́ mà she bie bənhliŋ bə́ bumə kaa Jisho kunə gbaaaŋ. 28 Bə́ hloli bindu biih bi go, hlə jə bindu bi muŋkɨŋ joŋ wu go, 29 hlə lo kinfwili ki muŋkɨŋ ki duŋ bə bimbɛɛnə, bɛŋ wu fi, hlə nə wu liwu ə kwaŋ wiih wi diee mə lə ə tələ ki muŋkɨŋ. Hlə yee bə́ bwō bə́ bwɔ̄kwe, bə́ yɔ̄ɔ bə́ bīhi wu lə, “Mbɛɛɛ, jaaki! Ŋkɨŋ Bəjuu!” 30 Ye bə́ màa bə́ fə̄lə nəni, bə́ tū wu bə ntɨŋ, bə jə̄ liwu le bə́ kɔ̄ɔ wu bə li fi fi. 31 Ə chulə bə́ bəŋna kaa wu nəni, bə́ hlə hlooli bindu bi muŋkɨŋ bie, dɔhiŋ wu ə duŋ bindu biih go, hlə jə wu bəŋgəŋ bweeni wu ə kiŋgwa go.

Bə́ bweeni Jisho ə kiŋgwa go

(Maak 15:21-32; Lukaa 23:26-43; Jɔɔŋ 19:17-27)

32 Ye bə́ màa bə́ gə̄ŋ lə, bə́ fu ə mbɛɛ ju go nnu kibalaki ki Shiliŋ mə yii liih duŋ lə Shaamuŋ. Bə kaŋ lə mbɛɛ nu tu kiŋgwa ki Jisho kie.

33 Bə́ gəŋ bwii dɔhɔ kidi kkɨŋ bə chèe lə Golgota, (yii lɨhŋ duŋ lə dɔhɔ ki Gəələ ki Kwoo), 34 bə́ nə wu mbihŋ mməŋ bə́ hə fuhaŋ bə fieŋ finlo jə ye buloojɛ lə lə i ŋwi. Kwaalə ə chulə i mɔŋ, i nɨhŋ bəŋwi. 35 Bə hlə bweeni wu ə kiŋgwa go, jə bindu biih tɨŋ kimbəmbwo mu bəŋga bə go ŋəbə. 36 Ye bə́ fələ nəni, bə́ hlə shii həmə yee bə́ fwōŋ wu. 37 Bə́ bieŋ kiŋwaati kkɨŋ ki nyìi fieŋ ffɨŋ bə́ bweena fie wu ə kiŋgwa kie go yu fi, hlə bweeni ə kiŋgwa kie go ə wu kwoo fi, fi duŋ lə, “Nu lə Jisho Ŋkɨŋ Bəjuu.” 38 Bə́ bweeni dəŋ bəbuyi bəfwe ə biŋgwa go baha bə Jisho, ju wɛɛ wi diee, ju wɛɛ wi məə. 39 Bəne yee bə́ kāh bə́ ŋə̄ŋ ə Jisho go, bə́ chē bə bikuu, bə́ lɛ̄ɛ wu bə bəntɔnɔ, 40 bə́ yɔ̄ɔ lə, “Wə nnu wə ma duŋ yo bəmbwu chəŋ ntofi baa wɛɛ chuu yi ə joo bəŋ tɔh, chɨnə kwoo ko lə! Ə wə duŋ Ŋwa Nchu, wə hlili ə kiŋgwa kie go lə.” 41 Bəche ntofi bəŋkuntaŋ bəŋkuntaŋ bə bəne bbəŋ bə́ kèeh bəŋkɨnə maa bəne bbəŋ bə́ hlàah kitɨŋ yee bə́ shāa dəŋ wu, bə́ yɔ̄ɔ lə, 42 “I maa i chɨ̄nə bəne bədi, ə dùŋ nnu duŋ ə i nakə chɨnə kwoo kiih lə. Nhle lə i dùŋ ŋkɨŋ bəne Bəishlael lə? I hlili ə kiŋgwa kie go fidiɛɛ, ə kkə hlə bemi bə wu. 43 I maa i yīi kwoo ə Chu mə. Ə duŋ lə Chu lèki wu, Chu chɨnə wu fidiɛɛ ye i maa i yɔ̄ɔlə lə ‘Ndùŋ Ŋwa Nchu.’” 44 Bəbuyi bbəŋ bə́ mà bweeni bie bə Jisho, yee bə́ tō wu bəntɔnɔ dəŋ nəni.

Jisho kpe

(Maak 15:33-41; Lukaa 23:44-49; Jɔɔŋ 19:28-30)

45 Lə hlɨŋ bushi bwo bwii, jɨbə bu gbe ə mbiŋ nte gəŋ bwii bitaŋ bitɔh ə bushi. 46 Lə yee ə dūŋ dəŋ ye bitaŋ bitɔh lə, Jisho gɛɛmə bə die ntaabə lə, “Ɛli, Ɛli, lama shabaktani.” Fi duŋ lə, “Chu ŋgwəŋ, Chu ŋgwəŋ, wə tələ mi nəni yulaha lə?” 47 Bəne bədi bbəŋ bə́ mà lemi bie həmə wo, bə́ yɔɔ lə, “Mbɛɛ yo yu chēe Elaja.” 48 Mbɛɛ ju ə bə́ mə lələ gəŋ cha mi jə ŋkuncha, mihiŋ ə mbihŋ məŋgbanyi mə, bɛŋ ə fite go nɛhiŋ nə lə i ŋwi. 49 Kwaalə bədi yɔɔ lə “Kkə ke ŋəŋ ləə Elaja lə bwo fwoo wu lə!”

50 Jisho baa wɛŋ bə die ntaabə, i nə fiana wi bə Chu. 51 Fi kah lə, kindu kkɨŋ bə́ mà hlɨhɨŋ kie ə chəŋ ntofi mə shwaanə kintekinte fu wɛ́ɛ fwe. Shishɔ nənə, ŋəmbwaa gaamə, 52 Jə́ŋ dəŋ wɛɛmə, bəne bbəŋ bə́ mà duŋ bə Chu kiŋaaŋkə bbəŋ bə́ mà kpee hlə baa fu ə kpe mə. 53 Ə chulə Jisho fwoo ə kpe mə, bəne bie ja gəŋ ə kibalaki ki wɛɛŋ ki Jelushalɛŋ, bəne kiŋaaŋkə ŋəŋ ə bə́ go. 54 Che kwoo ki bəne bə bicha bə bəne bbəŋ bəə bə́ mà duŋ bie həmə bə fwōŋ Jisho, ə chulə bə́ ŋəŋna ye shishɔ nəna lə, bə fieŋ finhliŋ ffɨŋ fi hə kaah, nɨŋ kwo bə́ gbaaŋ. Bə́ yɔɔ lə, “Bə kichɛɛŋ, mbɛɛ nu màa Ŋwa Nchu.” 55 Bəkwɛɛ kiŋaaŋkə mà lema dəŋ həmə jə nyɛɛkə bə́ kēe. Bəkwɛɛ bəhŋ mà fu ə Galilii bə́ jàa bə Jisho bə́ chɨ̀nə wu. 56 Ə kintu kie mə mà duŋ Meeli Madaliŋ, Meeli dɨŋ Jɛŋ bə Joshɛ, maa mah bwɔni bə Jebedee.

Bə́ diih Jisho

(Maak 15:42-47; Lukaa 23:50-56; Jɔɔŋ 19:38-42)

57 Ə bwo chu hə kitaŋ, che kpo ju bwo ə Alimatia yii liih duŋ lə Joshɛ. Wu dəŋ mà duŋ mbɛɛ ə kintu ki Jisho mə. 58 I gəŋ ŋəŋ Paylɛt kɔnɔ wu lə i nə wu kiŋwuuni ki Jisho kie i gəŋ diih. Nəni Paylɛt yɔɔ lə bə́ gəŋ nə wu ki. 59 Joshɛ jə kiŋwuuni kie bini ə kindu ki wɛɛŋ mə, 60 hlə gəŋ nɔhiŋ ə biee yi fwɔ mə nni i mà gbe ə tə mə, bɨhɨŋ tə liŋkuntaŋ kəə biee ye mu, hlə no. 61 Meeli Madaliŋ bə Meeli ju yo mà duŋ həmə, bə́ mà shiila baha ə biee ye tɨŋ ə wɛɛ wudi we mə.

Yee bə́ fwōŋ jəŋ Jisho

62 Lə butuu fu wu, ə duŋ butuu bbuŋ bə́ màa bə́ bā bəmbwɛɛ bieŋ bi bunte bubə bwo kah, bəche ntofi bəŋkuntaŋ bəŋkuntaŋ bə Bəfalashii gəŋ ŋəŋ Paylɛt, 63 yɔɔ bə wu lə, “Ŋwuŋ ŋkuntaŋ, kkə bie kkə hlē fieŋ ffɨŋ ŋwuŋ yo mà yɔɔ fie i kaani həmə. I mà yɔɔla lə, ə yá bwo duŋ ə joo bəŋ tɔh, ə i yá fu ə kpe mə. 64 Ye fi duŋ lə nəni, yɔɔ lə bəne gəŋ yee bə́ fwōŋ jəŋ ye gəŋ bwii joo tɔh, yulahalə kkə bie kkə lɔ̄ ləkə bəne biih bə kintu lə gəŋ yi jə kiŋwuuni kiih kie no bə ki hlə yee bə yɔ̄ɔ bə bəne lə, ‘Mə fwoo ə kpe mə.’ Ə bə́ fə nəni, ə yo kaalənə nni fidiɛɛ ni bee kah nni fwii ye.” 65 Paylɛt yɔɔ bə bə́ lə, “Bə jə bəne bə bicha bie, bə gəŋ bə bə́, bə yɔɔ lə yee bə́ fwōŋ jəŋ ye kinwaa ye duŋ ə bə́ fwoŋ.” 66 Nəni bə́ hlə gəŋ jə bwɔɔ baŋ fwiih wi joo kie, hlə fə kinyii ə tə llɨŋ bə́ mà baŋ lə fwiih wi joo kie mu, hlə chi bəne bə bicha lə yee bə́ fwōŋ.^ª