Lukaa 21

Nnə li kpɛɛ ŋkwu njɨnənə

Jisho ja lɛɛ díi, ŋəŋ ye bəne bə bieŋ lɛɛ nnə ŋəbə ə fiŋkɔlɔ fi nnə mə ə chəŋ ntofi mə. 2 I ŋəŋ dəŋ kpɛɛ ŋkwu ju mu ə duŋ kpɛ njɨnənə, i bwo yii munini munfweŋ ə fiŋkɔlɔ fie mə. 3 I hlə yɔɔ lə, “N'yɔ̄ɔ bəŋ kichɛɛŋ lə kpɛɛ ŋkwu nnu i duŋ nu ba kpɛ njɨnənə nəni, i nəə kah bəne bənhliŋ. 4 Bəne bənhliŋ bbəŋ bə́ həə bə́ nə̄, bə́ hə bwo ə duŋ bə biŋgbeshe bi kpo wibə wwuŋ wi yiila yee wi shōo kwe. Kwaalə kpɛ nnu i duŋ nu bə njɨnənə nəni i nəə fieŋ finhliŋ ffɨŋ i kə̀nə.”

Jisho yɔɔ lə bə́ yá yi bwu chəŋ ntofi

(Matio 24:1-2; Maak 13:1-2)

5 Bəne bə Jisho bə kintu bədi ja yee bə́ wīli ə chəŋ ntofi mə, bə́ dōhi tə́ ŋənwaa ŋŋəŋ bə́ mà fə bə bieŋ bbɨŋ bəne mà nə. I yɔɔ bə bə́ lə, 6 “Bə bie bə ŋə̄ŋ bieŋ bɨhŋ lə? Butuu bwe bu bwō bbuŋ tə lidi yá shee ə lidi bəŋ bə́ kaani kə yəə lə tələ li həkwe kə.”

Bəŋgə bə lo

(Matio 24:3-14; Maak 13:3-13)

7 Bə́ bii bə wu ləə, “Mbɛɛ Keehnə, fɨhŋ fieŋ yá duŋ bwɔɔ nwɛhɛŋ lə? Kinyii kkɨŋ ki lə nyii ba duŋ laha lə?”

8 Jisho chuu lə, “Yee bə jə̂ bwɔɔ bəŋəŋ lə mbɛɛ kə fihi bəŋ lə bə nyɔkɔ je kə. Yee bə kə̂lə lə bəne yá yi bwo kiŋaaŋkə, ə bə́ yá tɨŋ yii lɨŋŋ fwi, mbɛɛ yɔ̄ɔ lə, ə wu nnu i dùŋ Nchuu Fwoo, bwɔɔ yo yu bwō wunə. Bwɔɔ nnu bə́ yɔ̄ɔ nəni, bə kə yee bə wə̂lə kə. 9 Bwɔɔ nnu bə wòlə bie bə́ tɨmə bəntɨmə ə bidɔhɔ mə bidɔhɔ mə, bəŋgə duŋ yaŋ mbiŋ nte, bə kə yee bə lɔ̂ kə. Bieŋ bɨhŋ kənə bənhlaa duŋ kwaalə bi nyìi lə lə mbiŋ lə ka ə bwɔɔ yo bəŋ kə.”

10 Jisho baa yɔɔ bə bə́ lə, “Kitɨŋ yáa ki tɨ̄mə bə kidi, ŋkɨŋ ju tɨ̄mə bə ju. 11 Bieŋ biŋkpee gbo yáa bi dūŋ ə bidɔhɔ mə chili chili. Shishɔ nə̄nə bə muŋga. Jəbulə yáa i dūŋ, jə́ŋ yáa yi dūŋ ə bidɔhɔ mə binhliŋ. Bieŋ biŋkpee gbo yáa bi nyīee ə buh bi nə̀ nɨŋ bə bəne. 12 Yee bə kə̂lə lə bwɔɔ nnu bieŋ bɨhŋ yá chu duŋ ə bə́ yá kwo bəŋ, fɨhɨŋ bəŋ. Bə́ yá gəŋ bə bəŋ ə chə́ŋ yí cheenə Chu mə, fwaŋ bəŋ ə chə́ŋ yí munfwa mə. Bə́ yá yi baa jə gəŋ bə bəŋ ə bəŋkɨŋ bə bəne bbəŋ bə́ hlàah kitɨŋ fwi yu yii lɨŋŋ, 13 ə bwɔɔ yo bəŋ yá chu duŋ bə hə kəla bən'yɔɔ kɨŋŋ bə bə́. 14 Bwɔɔ nnu bə́ jə bəŋ nəni, bə kə fɨhɨŋ gbo ləə ə laha ffɨŋ bə lə gəŋ yɔɔ lə, 15 yulahalə ə mi nnu n'yá nə biyɔɔnə ə bəŋ jə, maa bufe. Ə bəne bieeŋ bbəŋ bə́ lôh bie bə bəŋ nakə kaalə mu bənlemi ə kichɛɛŋ bəŋ bə bəŋ kə. 16 Bəne bbəŋ bə́ yá taa bəŋ yáa bə chwa bə mwah, maa bəmwaa, maa bichəŋ bieeŋ bə bədɔɔ bieeŋ. Ə bə́ dəŋ bbəŋ bə́ yá nə bəŋ ə bə́ nyieŋ jii bəŋ bədi bie. 17 Bəne bənhliŋ yáa bə́ lōh bə bəŋ, yu yii lɨŋŋ. 18 Kwaalə, maa shana fwee mi yá laa ə bəŋ fí kə. 19 Ə bə kwaa ə duŋ tɔŋ, ə bə yá hlə kənə kinduŋh.

Jisho yɔɔ lə bə́ yá yi ləhə laa Jelushalɛŋ

(Matio 24:15-21; Maak 13:14-19)

20 Bwɔɔ nnu bə ŋəŋ bəne bə ntɨmə fiila taa Jelushalɛŋ gbaaaŋ, ə bə hlə kələ lə bwɔɔ baha ba nnu bə́ lə ləhə laa ki. 21 Ə yee fi kāh nəni, bəne bbəŋ bə́ dùŋ ə Judia lɔ biŋ ə bikɔni go, ə bəne bbəŋ bə́ dùŋ bie ə kibalaki kie mə fu. Mbɛɛ nnu i yo nji kə baa lə bwo lɛɛ həmə kə. 22 Joo ŋie lə ŋŋəŋ Chu yá lɛɛ ŋgə ə Jelushalɛŋ bəŋ yu fwɔ wibə, bənfə lə bieŋ binhliŋ bwo gbeemə yəəŋ ye bə́ mà bieŋ ə kiŋwaati kiih mə. 23 Ŋgə ŋkuntaŋ yá yi duŋ ə joo ŋie mə bə bəkwɛɛ bbəŋ bə́ dūŋ bə té, maa bbəŋ bə́ mwàhiŋ bwɔni. Chu yá yi fwoo tɔŋ bə bəne bəhŋ, lɛɛ ŋgə ŋkuntaŋ ə kitɨŋ kɨhŋ kwuŋ. 24 Bə́ yá yi gba bəne bədi ə ŋgba mə bə bihlo, kwo bədi ə bə́ gəŋ yee bə́ dūŋ bənfwa ə bitɨŋ kwuŋ binhliŋ. Bəne bbəŋ bə́ dùŋ kə kələ Chu yá yi biŋ ə Jelushalɛŋ bəŋ, gəŋ bwii ye bwɔɔ yá wunə.

Jisho yɔɔ bieŋ bbɨŋ bi yáa bi kāh, bwɔɔ nnu i yá baa bwo

(Matio 24:29-35; Maak 13:24-31)

25 Bieŋ bbɨŋ bi yá nyii gbo bi kwò nɨŋ ə kitaŋ mə, ə kpii mə maa ə muntoola mə. Yaŋ kwe yá duŋ ə bitɨŋ yáa bi dūŋ ə bishi mə, bɛhlə yá yi duŋ ye nɔ buŋkə lə gbo. 26 Nɨŋ yá fə ə bəne yee bə́ nə̄nə nəni kɨkɨkɨkɨ. Bə́ yáa bə́ hlē bieŋ biŋkpee gbo bbɨŋ bi yá kah yaŋ kwe, yulahalə bieŋ bi buh binhliŋ bbɨŋ bi kə̀nə múŋga yáa bi nə̄nə. 27 Nəni ə bəne hlə ŋəŋ ye Ŋwa Mbɛɛ hlīli i bwō ə joonə mə i kə̄nə muŋga bə kiŋkuntaŋ gbaaŋ. 28 Bwɔɔ nnu bieŋ bɨhŋ chɔɔ bəŋkah, bə lemi fa, tuuli bikuu buh, yulahalə bwɔɔ nnu Chu lə yah bəhŋ baha ba.”

29 Ye Jisho yɔɔlə nəni, i hlə manta bə bə́ lə, “Bə jə bufe ə findəŋ go bə bite bidi bbɨŋ bi dɨ̀lə bie. 30 Bwɔɔ nnu bi gbè bənhlee, bə hlə kələ lə jaŋ yi bwo chu kwe. 31 Ə lə dəŋ yəəŋ ye bə yá ŋəŋ bwɔɔ nnu bieŋ bɨhŋ binhliŋ dūŋ, ə bə hlə kələ lə muŋkɨŋ mu Chu mwe baha baha.

32 N'yɔ̄ɔ bəŋ kichɛɛŋ lə ŋkaani bəne bə fidiɛɛ bəhŋ yá kaah bieŋ bɨhŋ binhliŋ kaani kə duŋ nə kə. 33 Buuli bə shishɔ yá yi kah, kwaalə die njəŋ yá kaah kə dududu.

34 Bə jə bwɔɔ bəŋəŋ lə bə kə jaa lə di ə duŋ go ŋieeŋ, ŋwi chɨŋ, yii bufe bweeŋ yaŋ ə kinduŋh ki yaŋ kwe kɨhŋ mə, butuu bumbini bwe i yá chɨkə kwo bəŋ ye choo ki tuulənə lə. 35 Fieŋ fi butuu buhŋ nini yá bwo ə bəne bənhliŋ bəŋ, bbəŋ bə́ dùŋ yaŋ kwe ə mbiŋ nu mə. 36 Nəni bə lemi ntakə, yee bə chēe Chu bwɔɔ mənhliŋ, fo bieŋ bɨhŋ yáa bi kāh, ə bi yá nə bəŋ je nni bə lə lɔ kah ə yi mə, hlə lemi Ŋwa Mbɛɛ fwi.”

37 Jisho hlə yee i shī i kēeh bəne ə chəŋ ntofi mə ə joo ŋie mə ŋənhliŋ. Ə bwo chu bwɔɔ kitaŋ, i biŋ gəŋ nɔŋ ə kɔnɔ kidi go kkɨŋ bə́ chèe lə Kɔnɔ ki Bite bi Olif. 38 Bəne bənhliŋ fu həmbumbwaa fili fili bə́ gəŋ ə chəŋ ntofi mə lə yee bə́ wə̄lə keehnə kiih.