Lukaa 20

Bəne bə kitɨŋ bii dɔhɔ kkɨŋ Jisho jè kie muŋgeni mwii

Ə bwo chu butuu budi Jisho kēeh bəne, i baa i dōntə hlɨŋ nwaa Chu bə bə́ mu chəŋ ntofi mə. Bəche ntofi bəŋkuntaŋ bəŋkuntaŋ bə bəne bə keehnə bəŋkɨnə bə Chu maa bəne bbəŋ bə́ hlàah kitɨŋ bwo, 2 bii bə wu ləə, “Bu yɔɔ be mbɛɛ nnu i nə̀ yo wə muŋgeni mwe lə yee wə fə̄ bieŋ bɨhŋ. Ə nə nyəhə wə muŋgeni mwe lə?”

3 Jisho chuu bə bə́ lə, “Nlə mbii dəŋ bəŋ fieŋ. Bə yɔɔ mi fidiɛɛ. 4 Muŋgeni mmuŋ Jɔɔŋ màa i yīi mwe bəne ə njɔ ə mà nə Chu lii mbɛɛ ŋkee lə?”

5 Bə́ hlə chuŋ bə́ bə́ lə, “Ə kkə chuu lə ə mà nə Chu, ə i bii bə be ləə ə fə laha lə kkə nakə bemi bə Jɔɔŋ lə? 6 Ə kkə chuu lə ə mà nə mbɛɛ ŋkee, ə bəne tɨŋ be bə tə́, yulahalə bə́ mà bema chɛɛŋ chɛɛŋ lə Jɔɔŋ mà duŋ mbɛɛ hlɨŋ Chu.” 7 Nəni, bə́ hlə chuu lə, “Kkə kə kələ mbɛɛ nnu i mà nə yo kə.”

8 Jisho hlə yɔɔ bə bə́ lə, “Kəə n'yɔɔ lə dəŋ bəŋ mbɛɛ nnu i nə̀ yo mi muŋgeni mwe lə n'yee nfə̄ bieŋ bɨhŋ kə.”

Ŋgaŋga ki bəne bbəŋ bə́ mà yii sho

(Matio 21:33-46; Maak 12:1-12)

9 Jisho hlə gbe bəŋgba ŋgaŋga bə bəne lə, “Mbɛɛ ju mà nɨŋna wɛɛh ki sháŋ yyɨŋ bə́ fə̀ mbihŋ mu. I yii bəne bədi mə sho, hlə ja gəŋ ə kitɨŋ kidi kwuŋ, gəŋ duŋ mə gbaaŋ. 10 Bwɔɔ kwinə mà bwo wunə, i hlə faŋ mbɛɛ nimi wi ju ə bəne bbəŋ i mà yii bie mə sho lə bə́ nə yiih sháŋ, i bwo bə yí. Lə i gəŋ, bəne bbəŋ i mà yii bie mə sho bə́ kaka kwuŋ kohiŋ chuu wu dɨŋ kwáŋ ŋə ŋɨmə. 11 Mbɛɛ yo baa faŋ mbɛɛ nimi ju, bə́ baa kwuŋ mbini yo, nə wu giaali, kohiŋ chuu wu dɨŋ kwáŋ ŋə ŋɨmə. 12 I baa faŋ ju lə ə kaa bətɔh, bə́ kwuŋ biaanə wu, lɛɛ tələ wu bweenə. 13 Mbɛɛ yo hle ləə, ‘Nlə nfə ləhəŋ lə? Fidiɛɛ nlə nfaŋ ba ə duŋ ŋiaa nnu i dùŋ yo tɔŋ lɨŋŋ. Ləkə bə́ lə bwɔkwe bə wu.’ 14 Ŋiaŋ yo gəŋ lɛɛ mə sho, bəne bbəŋ bə́ mà yii bie bə́ ə wɛɛh kie mə ŋəŋ ə wu go, bə́ ŋwuunə bə́ bə́ lə, ‘Nu lə ndikwili che wɛɛh kɨhŋ. Kkə jii wu fo bishələ bie lə duŋ biaa.’ 15 Bə́ hlə kwo fwoo wu mə sho, jii.”

Ye Jisho yɔɔlə nəni, i hlə bii ləə, “Bə hlè lə mbɛɛ wɛɛh yo lə bwo fə ləhəŋ bə bəne bəhŋ lə? 16 N'yɔ̄ɔ bəŋ lə i yá bwo laa bəne bie, nə wɛɛh kie ə duŋ bə bəne bədi.” Ye bəne bie wo lə nəni, bə́ nɨhŋ bu nɨhŋnə yɔɔ lə, “Chu yee i bāŋka.”

17 Jisho chiini bə́ nəni, bii ləə, “Ə chu fieŋ ffɨŋ bə́ bieŋna ə Kiŋwaati ki Chu mə yɔ̀ɔ lə ləhəŋ lə, fi duŋ lə,

‘Tə llɨŋ bəne bə wɛɛnə mà nɨhŋ le bwoo chu tə llɨŋ duŋ ə bə́ wɛɛ nchi chəŋ lə?’

18 Tə lɨhŋ nini duŋ llɨŋ ə mbɛɛ lə gbe ə li bəŋ, ə i chɛɛmə, ə li gbe ə mbɛɛ bəŋ, ə li gɔhɔ dəŋ wu.”

Mbii ki kiŋwaati ki chuuŋkənə

(Matio 22:15-22; Maak 12:13-17)

19 Ye Jisho gba lə ŋgaŋga ni nəni, bəne bə keehnə bəŋkɨnə bə Chu bə bəche ntofi bəŋkuntaŋ bəŋkuntaŋ hlə yee bə́ kīɛɛ lə bə́ kwo wu ə bwɔɔ yo bəŋ. Bə́ mà kiɛɛ lə bə́ kwo wu yulahalə bə́ mà kəla lə i gba ŋgaŋga ni ə duŋ bə bə́, kwaalə bə́ lɔ bəne bie. 20 Bə́ hlə yee bə́ bə̄lə wuh ŋiih, bə́ jaŋ bəne, faŋ lə bə́ gəŋ yee bə́ chīini wu bə́ fə̄ bufe lə bə́ duŋ bəne bənwaa. Bə́ mà fə nəni bəŋ'wo biwu bii fo bə́ lə kwo nə wu ə kwáŋ ŋə mbɛɛ nu Luŋ nnu i hlâah wɛɛ wimbini we. 21 Bəne bie hlə ja bii bə wu ləə, “Mbɛɛ Keehnə, kkə kələ lə bieŋ bbɨŋ wə yɔ̄ɔ maa bbɨŋ wə kèeh duŋ yəəŋ, wə lɔ̀ lə bəne díi kə. Wə kèeh ə duŋ fieŋ fi kichɛɛŋ ffɨŋ Chu kìɛɛ lə bəne yee bə́ fə̄. 22 Kkə hlə yee kkə bīi ləə ə laha ffɨŋ ŋkɨnə bèmi lə yee kkə chûuŋkə kiŋwaati bə Kayisha Ŋkɨŋ nnu Luŋ lə?”

23 Jisho kələ fieŋ ffɨŋ bə́ wɛ̄ɛnə fie bə fi yɔɔ lə, 24 “Bə bwo mi bə danali mwi ŋŋəŋ.” Bə́ bwo bə wu i bii ləə, “Kwoo kɨhŋ mu lə ki nyəhə lə, yiih lɨhŋ duŋ li nyəhə lə?” Bə́ chuu lə, “Ə Kwoo ki Kayisha, bə yii liih mu.” 25 Jisho hlə yɔɔ bə bə́ lə, “Yee bə nə̂ bə Kayisha fieŋ ffɨŋ fi dùŋ fi Kayisha, bə nə̀ bə Chu fieŋ ffɨŋ fi dùŋ fi Chu.”

26 Lə bəne bie wo fi fɨhɨŋ bə́, bə́ ba biwu bimaalə nakə baa lə kənə fieŋ ffɨŋ bə́ kwo wu ə fi bəŋ ə bəne dí ə bieŋ bbɨŋ mə hə yɔɔ bie mə kə.

Mbii ki nfu ə kpe mə

(Matio 22:23-33; Maak 12:18-27)

27 Bəne bədi ə kintu ki Bəshadushii mə mà jaa bwo bəmbiih fieŋ bə Jisho. Bəshadushii bəŋ duŋ bəne bbəŋ bə́ màa bə́ yɔ̄ɔ lə bəne yá fwoo ə kpe mə kə. 28 Bə́ bwo biih bə wu ləə, “Mbɛɛ Keehnə, Mushe mà bieŋna ə ŋkɨnə ya mə lə,

‘Ə mbɛɛ lə kənə kpɛ, ə mə bwo kpe nnu bə́ kə bwee lə ŋiaŋ bə wu,

kəə maani kənə bənchee kpɛ yo

ə bəə wu bwee bwɔni ə yii li ŋkwu maani yo bəŋ.’

29 Fidiɛɛ, mbɛɛ ju mà kənə bwɔni bəniɛ fumanyaaŋ, nnu fwii yo jə kpɛ, kpe dəŋ bəə wu ŋiaŋ hləŋ. 30 Nu dɨŋ yo baa chee kpɛ yo, kpe dəŋ ŋiaŋ hləŋ. 31 Nu dɨŋ ju yo baa chee kpɛ yo, i bwo kpe lə dəŋ ŋiaŋ hləŋ. Fi duŋ dəŋ lə nəni hləŋ hləŋ bə bwɔni bie fumanyaaŋ bənhliŋ, ju ə bə́ mə nakə bwee lə ŋiaŋ bə kpɛ yo kə. 32 Ə chu bwɔɔ nnu dɨŋ kpɛ yo kpe dəŋ. 33 Ye bəne bə fumanyaaŋ bie mà chee lə kpɛ yo bənhliŋ, ə yá chu bwɔɔ nnu bəne yáa bə́ fū ə kpe mə, ə i yá duŋ kpɛɛ nyəhə lə?”

34 Jisho chuu bə bə́ lə, “Ə mbiŋ nnu fidiɛɛ nu mə duŋ bənəə bə bəkwɛɛ baanə biah, maa bəne nə̀ bwɔni bə bə́ ə biah mə. 35 Kwaalə, bəne bbəŋ bə́ wuna bəmbwo kənə dɔhɔ ə mbiŋ nnu i yu bwō nu mə, bwɔɔ nnu bəne yáa bə́ fū ə kpe mə, bənəə bə bəkwɛɛ yá baa lə baanə biah kə, maa bəne yá baa lə yee bə́ nə̄ bwɔni bə bə́ ə biah mə kə. 36 Bə́ baa lə kpe kə, yulahalə bə́ yáa bə́ dūŋ ye bənchinda bə Chu lə. Bə́ yáa bə́ dūŋ dəŋ bwɔni bə Chu, yulahalə bə́ fwoo ə kpe mə. 37 Kichɛɛŋ ki mu duŋ lə Mushe kibɛɛ mà yɔɔla tɔhi lə bəne yáa bə́ fū ə kpe mə ye i mà bieŋ ki tiɛɛ kkɨŋ i mà ŋəŋ ki dō. I chee Baba ə dɔhɔ ki kiŋwaati mə lə i duŋ Chu Ablahaŋ, Chu Ayjik maa bə Chu Jekɔb. 38 Ə mə yee i chēe nəni, kəə bəŋkpi bəŋ duŋ bəne bəŋkee, yu Chu duŋ nə Chu bəŋkpi kə, i duŋ Chu bəne bəŋkee, yulahalə bə Chu bəne bənhliŋ duŋ bəŋkee.”

39 Ye Jisho yɔɔlə nəni bəne bə keehnə bəŋkɨnə bə Chu dohi wu yɔɔ lə, “Mbɛɛ Keehnə, wə chuula yəəŋ.” 40 Kwaa nəni, mbɛɛ nakə baa lə mɔŋ dəŋ bəmbii fieŋ fidi bə wu kə.

Nchuu Fwoo nnu Chu mà kaachi yo, duŋ ŋwa nyəhə lə

(Matio 22:41-46; Maak 12:35-37)

41 Jisho hlə ja bii ŋkwo wi bə bə́ ləə, “Fi kah ləhəŋ maa yee bəne yɔ̄ɔ lə Nchuu Fwoo nnu Chu mà kaachi yo duŋ ŋwa Ŋkɨŋ Daafi lə? 42 Bə kələ lə Daafi kibɛɛ mà bieŋ ə kiŋwaati ki Ŋkohi mə lə,

‘Baba Chu mà yɔɔla bə Baba ŋgwəŋ lə,

i shii ə kwaŋ wiih wi diee mə,

43 gəŋ bwii bwɔɔ nnu mə lə nɔhiŋ bəne biih bbəŋ bə́ dùŋ kə diee njənə bə wu ə i

diɛŋ wuh ŋiih ə bə́ bəŋ ye kinu ki wuh ŋiih lə.’”

44 Ə Daafi lə chee wu lə Baba wi, ə fi kah ləhəŋ ə i hlə yee i dūŋ ŋiaani lə?

Jisho yɔɔ lə yee bəne jə̂ bwɔɔ, bə bəne bə keehnə bəŋkɨnə

(Matio 23:1-36; Maak 12:38-40)

45 Jisho hlə ja yee i yɔ̄ɔ ba ə duŋ bə bəne biih bə kintu bəne bənhliŋ wō. I yɔɔ bə bə́ lə, 46 “Yee bə jə̂ bwɔɔ bə bəne bbəŋ bə́ kèeh bəŋkɨnə bə Chu. Bə́ lèki bənlee bindu bindiɛɛ bə́ jàa bə bi ə shibəŋ, fo bəne lə yee bə́ chēe bə́ kōhi bə́ ə shibəŋ. Bə́ baa bə́ lèki bənshii ə bishiinə bi fwi bəŋ ə chə́ŋ yí cheenə Chu mə. Bə́ gə̀ŋ ə bichɔni mə, bə́ lèki kwaa bənshii ə duŋ fwi. 47 Ə duŋ dəŋ bə́ bbəŋ bə́ gbèe bə́ tə̀lə bəkwɛɛ bə bəŋkwu, bə́ fìhi bə́ jə̀ bieŋ bibə, hlə chee Chu ndiɛɛ bənyii gbo. Bəne bəhŋ nini bə́ yo ŋgə yá yi kah bəŋ.”