Jisho lɛɛ ə Jelushalɛŋ ye Ŋkɨŋ lə
11
Ə chulə Jisho bə bəne biih bə kintu yee bə́ jāa gəŋ baha ə Jelushalɛŋ, bə́ gəŋ bwii ə kwili li Betfa bə li Betani, ŋŋəŋ ŋə duŋ baha ə Kɔnɔ ki Bite bi Olif go, i bwa bəne biih bə kintu bəfwe faŋ, 2 yɔɔ bə bə́ lə, “Bə gəŋ ə kwili li fwi le mə. Bwɔɔ nnu bə lə yee bə lɛ̄ɛ mə, cha mi bə lə ŋəŋ ŋwa hlɔmbwaa, bə́ hə luula, nnu mbɛɛ kə hlaa lə biŋ ə wu bəŋ kə, bə hlooli bwo bə wu.” 3 Ə mbɛɛ lə bii bə bəŋ ləə, “Bə hlōoli wu yulaha lə?” bə chuu lə, “Che Kwoo yu kīɛɛ wu, mə lə chuu wu dɨŋ fidiɛɛ fidiɛɛ.” 4 Bə́ gəŋ ŋəŋ ŋwa hlɔmbwaa yo bə́ hə luula wu baha ə fwiih wi chəŋ ji go ə je. Bə́ hlə hlooli. 5 Lə yee bə hlōoli bəne bədi bbəŋ bə́ màa bə́ lēmi həmə bii bə bə́ ləə, “Bə hlōoli ŋwa hlɔmbwaa yo yulaha lə?” 6 Bə́ hlə yɔɔ bəne bie fieŋ ffɨŋ Jisho hə yɔɔ fie. Bəne bie hlə tukwaŋ lə yee bə́ gə̄ŋ bə wu. 7 Bə́ bwo bə wu ə Jisho go, tu bindu bibə ə nyaŋ ye bəŋ, Jisho biŋ. 8 Bəne kiŋaaŋkə yee bə́ tū bindu ə je, bədi shɔ̄ki bibaanə, bə tū dəŋ ə je. 9 Bəne bbəŋ bə́ màa bə́ gə̄ŋ bie ə Jisho fwi maa bbəŋ bə́ màa bə́ bə̄lə dɨŋ yee bə wīli lə, “Ayililili,ª kiŋkohi duŋ bə Chu looo! Chu lɛɛla kindunshiiŋ ə mbɛɛ nnu i yu bwō yo ə yii li Baba bəŋ looo! 10 Chu lɛɛla kindunshiiŋ ə muŋkɨŋ mu Tah ya Daafi bəŋ nnu i yu bwō yo! Ayililili, kiŋkohi duŋ bə Chu nnu buh yo looo!” 11 Jisho gəŋ bwii ə Jelushalɛŋ, lɛɛ ə kwili li chəŋ ntofi mə, ŋəŋ ye bieŋ binhliŋ duŋ. Ə chu duŋ bwɔɔ hə gəŋna bəə bəne biih bə kintu bə yuufi ə nchɔ bəfwe no gəŋ ə Betani.Jisho chɨŋ tiɛɛ kidi
12 Lə butuu wu, Jisho bəə bəne biih bə kintu ja ə Betani yee bə́ chū ə Jelushalɛŋ, jəbulə wū wu. 13 I lɛɛ díi ŋəŋ ə tiɛɛ kidi go je nyɛɛkə ki jɛka.ª I màa i gə̄ŋ həmə bəŋgəŋ ŋəŋ ləə ə duŋ ə i kwi fieŋ ə ki go di lə. Bwɔɔ nnu i mà bwii həmə i nakə ŋəŋ nə fieŋ ə ki go kə, i ŋəŋ kwaa ə duŋ bibiaa mu, yulahalə ə mà kə duŋ nə bwɔɔ ki chɔŋ nə kə. 14 I hlə yɔɔ bə tiɛɛ kie lə, “Mbɛɛ yá kə baa lə di fieŋ ə wə go kə dududu.” Ye i yɔɔlə nəni, bəne biih bə kintu wo.
Jisho kohiŋ bəne bə shi ə chəŋ ntofi mə
15 Bə́ jaa gəŋ bwii ə Jelushalɛŋ, Jisho gəŋ ə chəŋ ntofi mə chɔɔ bəŋkohiŋ bəne bbəŋ bə́ màa bə́ dī shi mu. I màa i kōhiŋ nəni, i yə̄ə i tə̄lə bidaŋ bi bəne bbəŋ bə́ màa bə́ gāanə kpo, bə biŋkaa bi bəne bbəŋ bə́ màa bə́ tāa bie bikuuku. 16 I nakə baa lə bemi dəŋ lə mbɛɛ ju tu jaa kah bə fieŋ fidi ə chəŋ ntofi tɨŋ kə. 17 I kēeh bə́ i yɔ̄ɔ lə, “Bə́ mà kə bieŋ nə Chu yɔ̀ɔ lə,
‘Chəŋ njəŋ, bə́ yáa bə́ chēe yi lə chəŋ cheenə Chu bitɨŋ binhliŋ lə?’
Kwaalə bə fiila chuu yi butiɛ bu bəne bəbuyi.” 18 Bəche ntofi bəŋkuntaŋ bəŋkuntaŋ bə bəne bə keehnə bəŋkɨnə wo hlə yee bə́ kīɛɛ je nni bə́ lə jii wu mə. Bə́ màa bə́ lɔ̄ wu, yulahalə kimɔ ki bəne màa ki wō keehnə kiih gbo nūaa bə́. 19 Ə chulə yee ə dūŋ hə kitaŋ, Jisho bə bəne biih bə kintu fu ə kibalaki kie mə.
Keehnə kkɨŋ ki bwò yu tiɛɛ kkɨŋ Jisho mà chɨŋ
20 Lə Jisho bə bəne biih bə kintu fu həmbumbwaa yee bə́ kāh, bə́ ŋəŋ tiɛɛ kie hə kpee kiɛkiɛ bwɔ gəŋ bwii ə gɛŋ go. 21 Pita ŋoo fieŋ ffɨŋ fi ma kah fie, yɔɔ bə Jisho lə, “Mbɛɛ Keehnə, ŋəŋ tiɛɛ kkɨŋ wə ma chɨŋ kie hə kpee ba.” 22 Jisho chuu bə bə́ lə, “Bə yii tɔ́ŋ ə Chu mə. 23 N'yɔ̄ɔ bəŋ kichɛɛŋ lə, ə mbɛɛ lə yɔɔ bə kɔnɔ kɨhŋ lə, ‘Ŋəəmə fu fəŋ gəŋ gbe ə nɔ mə’, ə duŋ i yɔ̀ɔ nəni kə kənə naamənə ə tɔŋ liih mə, ə mə bemi lə fieŋ ffɨŋ i yɔ̀ɔ fie duŋ, ə yee fi dūŋ lə bə wu. 24 Nəni n'yɔ̄ɔ bə bəŋ lə, fieŋ finhliŋ ffɨŋ bə nòŋ ə Chu cheenə mə, bə bèmi lə bə bənə, ə bə bənə ba. 25 Bwɔɔ nnu bə lèmi lə bə bie bə chēe Chu, ə fi lə duŋ lə mbɛɛ yu kə̄nə mbɛɛ ju ə tɔŋ go, i laamə nə wu. Yee bə fə̂ nəni fo Chwa weŋ nnu i dùŋ yo ə buh lə yee i lāamə nə dəŋ yíwaha yeeŋ. [ 26 Ə bə nakə yee bə lâamə nə yíwaha yí bəne bədi, ə Chwa weŋ nnu i dùŋ yo ə buh nakə yee i lâamə nə dəŋ yeeŋ kə.]”ª
Bə́ bii dɔhɔ kkɨŋ muŋgeni mu Jisho fu
27 Jisho bə bəne biih bə kintu baa gəŋ ə Jelushalɛŋ. Ə chulə yee i jāa ə kwili li chəŋ ntofi mə, bəche ntofi bəŋkuntaŋ bəŋkuntaŋ bə bəne bbəŋ bə́ kèeh bəŋkɨnə bə Chu maa bəne bbəŋ bə́ hlàah kitɨŋ, ŋəŋ ə wu go, 28 bii bə wu ləə, “Wə jə muŋgeni munfənə bieŋ bɨhŋ fəhəŋ lə? Ə nə nyəhə wə muŋgeni mwe lə yee wə fə̄ bieŋ bɨhŋ lə?” 29 Jisho chuu bə bə́ lə, “Nduŋ ə mbii dəŋ bəŋ fieŋ fimwi, ə bə lə chuu fi, ə nhlə yɔɔ bəŋ mbɛɛ nnu i nə̀ yo mi muŋgeni mwe lə n'yee nfə̄ bieŋ bɨhŋ. 30 Ə mà nə nyəhə Jɔɔŋ muŋgeni lə yee i yīi bəne ə njɔ lə? Ə mà nə Chu lii mbɛɛ lə? Bə chuu dəŋ mi ŋ'wo!” 31 Bə́ ja yee bə ŋwūunə bə́ bə́ lə, “Ə kkə lə chuu lə ə mà nə Chu, ə i bii bə be ləə ə mà fə laha lə kkə nakə bemi bə Jɔɔŋ lə? 32 Ə kkə chuu lə ə mà nə mbɛɛ, ə fi gbe mə lə?” Bə́ màa bə́ lɔ̄ bəne yulahalə bəne bənhliŋ mà bema lə Jɔɔŋ mà duŋ ba mbɛɛ hlɨŋ Chu bə kichɛɛŋ. 33 Nəni, bə́ hlə chuu bə Jisho lə, “Kkə kə kələ kə.” Jisho hlə yɔɔ bə bə́ lə, “Kəə n'yɔɔ lə dəŋ bəŋ mbɛɛ nnu i nə̀ yo mi muŋgeni mwe lə n'yee nfə̄ bieŋ bɨhŋ kə.”