Kpe Jɔɔŋ N'yiinjɔ
14
Ə mà duŋ ə bwɔɔ yo bəŋ, Ŋkɨŋ Hɛlɔ nnu i màa i hlāah wɛɛ wi kitɨŋ ki Galilii mə wo ki nimi li Jisho. 2 I yɔɔ bə bəne biih bə nimi lə, “Mbɛɛ nu lə Jɔɔŋ N'yiinjɔ nnu i fwoo ə kpe mə. Fiee fieŋ ffɨŋ fi fə fie lə yee i kə̄nə múŋga bənfə bieŋ bintaabə bɨhŋ nini nəni.”3 Ə mà duŋ Hɛlɔ hə yɔɔla, bə́ kwo Jɔɔŋ, kwaa fwaŋ wu ə chəŋ munfwa mə yu Hɛlɔdia kpɛɛ Filip dɨŋ Hɛlɔ, Hɛlɔ mà jəə wu ye kpɛɛ lə. 4 Jɔɔŋ yee i nɨ̀hŋ i yɔ̄ɔ bə wu lə, “Ŋkɨnə kə bemi lə wə jə wu ye pwaa lə kə.” 5 Hɛlɔ hlə yee i kīɛɛ jé yyɨŋ mə lə jii Jɔɔŋ, kwaalə yee i lɔ̄ bəne, yulahalə bəne màa bə́ jə̄ Jɔɔŋ lə i dūŋ mbɛɛ hlɨŋ Chu.
6 Ə bwo duŋ butuu bbuŋ Ŋkɨŋ Hɛlɔ màa i fə̄ chɔnɔ ki butuu bbuŋ bə́ mà bwee wu, ŋwa Hɛlɔdia kpɛ lɛɛ bɨŋ ŋkɔŋ ə bəne fwi bbəŋ bə́ mà duŋ bie ə chɔnɔ kie mə, Hɛlɔ ŋəŋ fi nwaa wu. 7 I hlə kaŋ muŋkaŋ lə, mə lə joŋ ŋiaŋ kpɛ yo maa ə duŋ laha ffɨŋ mə lə bii bə wu mu. 8 Mah ŋiaŋ yo hlə hluku ŋiaani yo bwii lə i yɔɔ lə i nə wu kwoo ki Jɔɔŋ N'yiinjɔ ə kinfini mə. 9 I gəŋ yɔɔ, Ŋkɨŋ Hɛlɔ wo nəni gbo kpe wu. Kwaalə yu muŋkaŋ mmuŋ i mà kaŋ mwe ə bəne fwi bbəŋ bə́ mà duŋ bie ə chɔnɔ kie mə, i bu yɔɔ lə bə́ fə ye ŋiaŋ kpɛ yo yɔɔ lə. 10 I faŋ bəne bə́ gəŋ ə chəŋ munfwa ye mə kɨŋ jə kwoo ki Jɔɔŋ, 11 bwo bə ki ə kinfini mə nə bə ŋiaŋ kpɛ yo, i hlə gəŋ bə ki gəŋ nə bə mahni. 12 Bəne bə Jɔɔŋ bə kintu hlə gəŋ jə kiŋwuuni ki Jɔɔŋ gəŋ diih, gəŋ yɔɔ hlɨŋ ye bə Jisho.
Jisho lee bəne bənchuku bətiŋ
13 Lə Jisho wo fieŋ ffɨŋ fi mà chila fie Jɔɔŋ, i hlə lɛɛ ə kikpɔŋkɔ mə wa gbo gəŋ ə dɔhɔ kkɨŋ bəne mà kə duŋ nə kə. Kwaalə bimɔ bi bəne wo, hlə fu ə bibalaki bie mə jaa bwo ŋəŋ wu. 14 Ye i mà fulə ə kikpɔŋkɔ kie mə biŋ fu həkpa, i ŋəŋ kimɔ ki bəne nəni gbɛɛɛ. Hlɨŋ kwo wu bə bə́, i hlə yee i ŋwūhuŋ bəne bbəŋ bə́ màa bə́ gɔ̄ŋ bie. 15 Ə mà chu bwo duŋ hə kitaŋ, bəne biih bə kintu baŋ gəŋ yɔɔ bə wu lə, “Fəŋ duŋ nji, kitaŋ kaa, yɔɔ bimɔ bi bəne bəŋ gəŋ ə shibəŋ, bə́ gəŋ taŋ biləə bibə bidinə.” 16 Jisho chuu bə bə́ lə, “Fi kə duŋ nə lə bə́ no kə. Ə nə bəŋ bə́ fieŋ fidinə.” 17 Bə́ chuu bə wu lə, “Kkə kənə kwaa ə duŋ chée yí bibele shiŋ bə fiɔŋ fie.” 18 I yɔɔ bə bə́ lə, “Bə bwo nə mi bi.” 19 Bə́ bwo nə wu bi, i jə, hlə yɔɔ lə bimɔ bi bəne bie shii həkwe ə biyaa bəŋ. I jə chée yí bibele yé shiŋ bə fiɔŋ yé fie, kee buh, nə kimbaafɛɛ bə Chu, hlə gaa yí nə bə bəne biih bə kintu, bə́ ga bə kimɔ kie. 20 Bəne bənhliŋ di fiili. Bəne bə Jisho bə kintu bie buhuŋ biŋkə bbɨŋ bi mà she bie bi yii bijee yuufi ə nchɔ bifwe. 21 Bəne bbəŋ bə́ mà di biləə bie mà duŋ bənəə bənəə ye bənchuku bətiŋ lə, ə duŋ bə́ kə faa bəkwɛɛ bə bwɔni buhuŋ mu kə.
Jisho jaa ə ŋgwiŋ bəŋ
22 Jisho hlə yɔɔ lə bəne biih bə kintu lɛɛ ə kikpɔŋkɔ mə cha mi hlaa kah fwi bəŋgəŋ ə wi ju yo mə. I she chii bimɔ bie yee ki kwə̄lə ə bweenə. 23 Ə chulə i shiee chii bə́ nəni, i hlə ja biŋ gəŋ ə kɔnɔ go wuu mboŋ bəŋgəŋ chee Chu. Kitaŋ yee ki gə̄ŋ chɨŋ i dūŋ kwaa həmə wuu mboŋ. 24 Kwaalə ə mà duŋ ə bwɔɔ yo bəŋ, kikpɔŋkɔ duŋ ə nɔ mə je nyɛɛkə, ŋgwiŋ mie fīi ki, yulahalə fwee màa ki bwō ki fwi, ki fɛ̄ɛ ki. 25 Lə yee butuu kpē kwe, Jisho ja yee i bwō ə bə́ go, i jāa ə ŋgwiŋ bəŋ. 26 Bəne biih bə kintu ŋəŋ ye i jāa lə ə ŋgwiŋ bəŋ, tɔ́ŋ kaŋnə bə́. Bə́ yɔɔ lə “Ə lə duŋ ti kiyii.” Bə́ hlə yee bə́ gɛ̄ɛmə gbaaŋ bənɨŋ. 27 Cha mi Jisho hlə yɔɔ bə bə́ lə, “Bə́ kwaa tɔ́ŋ ŋieeŋ, ə mi. Bə kə lɔɔ kə.”
28 Pita yɔɔ bə wu lə, “Baba ə lə duŋ wə, wə yɔɔ njaa dəŋ ə ŋgwiŋ məhŋ bəŋ mbwo ə wə go.” 29 Jisho yɔɔ bə wu lə, “Yee wə bwô.” Nəni Pita fu ə kikpɔŋkɔ kie mə yee i jāa ə ŋgwiŋ mie bəŋ i gə̄ŋ ə Jisho go. 30 Ye i màa i jāalə i gə̄ŋ, i ŋəŋ ye fwee kie fɨ̄ɨŋkə lə, nɨhŋ kwo wu, i hlə gbe bəmiili mə njɔ. Ye i màa i mīili lə i wawa dəŋ de lə, “Baba chɨnə mi lə!” 31 Cha mi Jisho laa kwaŋ kənə wu yɔɔ bə wu lə, “Hooo, kimbemi ko kie kinhlə gbaaŋ! Wə həə wə nāamə yulaha lə?” 32 Bə́ bəə wu hlə lɛɛ ə kikpɔŋkɔ kie mə, fwee kie hlə də. 33 Bəne biih bə kintu bbəŋ bə́ mà duŋ bie ə kikpɔŋkɔ kie mə hlə nə kiŋkohi bə wu yɔɔ lə, “Chɛɛŋ chɛɛŋ, wə duŋ Ŋwa Nchu.”
Jisho ŋwuhuŋ bəne bə jə́ŋ ə Genishalet