Jɔɔŋ 1

Hlɨŋ Nuaa ki Jisho nni

Jɔɔŋ

mà bieŋ

Die chu Mbɛɛ ŋkee

Ə mà duŋ həmɛɛ Die ye mà duŋna. Die ye mà duŋ bə Chu, Die ye mà duŋ Chu. 2 I mà duŋ həmə jə həmɛɛ bə Chu. 3 Chu mà fəə bieŋ binhliŋ bi kah ə kwáŋ ŋiih mə. Fieŋ fimwi həmə hləŋ ffɨŋ Chu mà fə i duŋ hləŋ kə. 4 Die ye kənə kinduŋh ə yi mə, kinduŋh kiih kie duŋ kinchaa ki bəne. 5 Kinchaa kie chaa ə jɨbə mə, jɨbə kie nakə nyɨhɨŋ ki kə.^ª

6 Mbɛɛ ju mà duŋ həmə nnu Chu mà faŋ yii liih duŋ lə Jɔɔŋ. 7 I mà bwo lə i yɔɔ ki kinchaa kie, bənlemi ə nhlaa kinchaa kie dɨŋ, fo mə lə fə ə bəne bənhliŋ yii tɔ́ŋ ə kinchaa kie mə. 8 Ə Jɔɔŋ nnu i mà duŋ kinchaa kie kə. I mà bwo kwaa bənlemi ə nhlaa kinchaa kie dɨŋ. 9 Kinchaa ki kichɛɛŋ kkɨŋ ki nyìi kinchaa bə bəne bənhliŋ bbəŋ bə́ bwò ə mbiŋ nu mə.

10 I mà duŋ ə mbiŋ nu mə, mbiŋ nu duŋ nnu Chu mà fə i kah ə kwáŋ ŋiih mə, kwaalə bəne bə́ yaŋ mbiŋ nu mə nakə kələ wu kə. 11 I mà bwoo ə mbiŋ wi mə, bəne biih nakə tɨŋ nə jə wu kə. 12 Kwaalə, bəne bənhliŋ bbəŋ bə́ mà tɨŋ jə bie wu, yii tɔ́ŋ ə yii liih mə, duŋ i mà nəə muŋga bə bə́ lə yee bə́ dūŋ bwɔni bə Chu. 13 Bəne bə Chu bəhŋ duŋ bbəŋ bə́ mà kə bwee lə bə́ bələ ŋgɔŋ mə kichəŋ kə, ləkə ye mbɛɛ kiɛɛ lə kə, ləkə mbwee Mbɛɛ ŋkee kə. I duŋ mbwee Chu kibɛɛ.

14 Die ye mà choo Mbɛɛ ŋkee i dùŋ ə be mə, i fiila bə tɔŋ linwaa li Chu maa kichɛɛŋ. Kkə ŋəŋna kiŋkuntaŋ kiih go. Kiŋkuntaŋ kkɨŋ ki dùŋ ki Ŋiaani nnu ə duŋ kwaa wu nnu i no ə Tili go.

15 Jɔɔŋ mà lemi ə nhlaa wi dɨŋ i dīimə i yɔ̄ɔ lə, “Nu lə mbɛɛ nnu mmàa n'yɔ̄ɔ yo kiih, n'yɔ̄ɔ lə, ‘Mbɛɛ nnu i yu bwō yo ə mi dɨŋ ko kah mi, yulahalə i mà hlaala duŋ nhlə n'yee ndūŋ.’” 16 Ye i mà fiili lə bə kindunshiiŋ, i hlə yee i nə̄ be bənhliŋ tɔŋ linwaa ə tɔŋ linwaa bəŋ. 17 Kkə kələ lə Chu mà nəə bəŋkɨnə ə Mushe kwáŋ. Kwaalə, tɔŋ linwaa bə kichɛɛŋ mà bwoo kah ə kwáŋ ŋə Jisho Kleto mə. 18 Mbɛɛ hləŋ həmə nnu i mà hlaa ŋəŋ ə Chu go. Ə kwaa Ŋiaani nu nnu ə duŋ kwaa wu nnu i baha ə Tili go nnu i fəə kkə kələ wu.

Mbɛɛ nnu Jɔɔŋ N'yiinjɔ mà duŋ yo

(Matio 3:1-12; Maak 1:1-8; Lukaa 3:1-18)

19 Fɨhŋ lə fieŋ ffɨŋ Jɔɔŋ mà yɔɔ bwɔɔ nnu tú ŋə Bəjuu ŋə Jelushalɛŋ mà faŋ bəche ntofi bə bəne bə Lebi lə bə́ bii bə Jɔɔŋ lə ə wu nyəhə lə. 20 Jɔɔŋ mà kə nɨhŋ nə bənchuu bi biinə bibə bie kə. I mà yɔɔla bə kijə kiih lə, “Nduŋ nə Nchuu Fwoo nnu Chu mà kaachi yo kə.” 21 Bə́ bii bə wu ləə, “Yɔɔ be, ə wə nyəhə lə? Ə wə Elaja lə?” I chuu bə bə́ lə, “Ə mi Elaja kə.” Bə́ baa bii bə wu ləə, “Ə wə mbɛɛ hlɨŋ Chu yo lə?”^ª I nɨhŋ. 22 Bə́ baa bii bə wu ləə, “Yɔɔ be, ə wə nyəhə lə? Wə yɔɔ lə laha ki kwoo ko lə? Bu yɔɔ kwaa be fieŋ ffɨŋ kkə kənə bəŋgəŋ chuu bə bəne bbəŋ bə́ faŋ bie be.” 23 Jɔɔŋ chuu bə bə́ ye Ejaya mbɛɛ hlɨŋ Chu mà yɔɔlə lə,

“Nduŋ die nni i yi dìimə ye ə nji lə,

‘Bə́ lɛhiŋ je Baba yee i dûŋ ntiiŋ.’”

24 Bəne bəhŋ nini ə mà faŋ Bəfalashii bə́. 25 Bə́ bii bə Jɔɔŋ ləə, “Ə kə duŋ nə wə Nchuu Fwoo nnu Chu mà kaachi yo ləkə Elaja, ləkə mbɛɛ hlɨŋ Chu, wə hlə yee wə yīi bəne ə njɔ yulaha lə?” 26 Jɔɔŋ chuu bə bə́ lə, “N'yīi kwaa mi fɨŋŋ bəne ə duŋ ə njɔ, kwaalə mbɛɛ ju yo ə bəŋ mə nnu bə kə kələ wu kə. 27 Ə wu nnu i yu bwō ə mi dɨŋ, ŋkə wunə dəŋ bəmbwɔkwe hlooli bikpa biih kə.” 28 Bieŋ bɨhŋ binhliŋ màa bi kāh ə duŋ ə Betani ə Kibee ki Joodaŋ wikwi wɛɛ wwuŋ Jɔɔŋ màa i yīi we bəne ə njɔ.

Jɔɔŋ nyii Ŋwa Nshɔŋ Chu bə bəne

29 Lə butuu fu wu, Jɔɔŋ ŋəŋ ye Jisho bwō, i yɔɔ lə, “Bə kee ŋəŋ, nu lə Ŋwa Nshɔŋ Chu nnu i fwòo yíwaha yí bəne bə yaŋ mbiŋ nte! 30 Ə wu nnu mmà n'yɔɔ yo kiih n'yɔ̄ɔ lə, ‘Mbɛɛ ju yu bwō ə mi dɨŋ nnu i kò kah mi, yulahalə i mà hlaala duŋ, nhlə n'yee ndūŋ.’ 31 Mi kibɛɛ mmà ŋkə kələ wu kə. Kwaalə, mmà bwo lə n'yee n'yīi bəne ə njɔ fo bəne Bəishlael lə kələ wu.” 32 Jɔɔŋ mà baala yɔɔ bemi kah bə wu, i yɔɔ lə, “Mmà ŋəŋna ye Fiana Wɛɛŋ hlili bwo ə buh ye kikuuku lə, bwo shii ə wu go. 33 Mi kibɛɛ mmà ŋkə kələ wu kə. Kwaalə, mbɛɛ nnu i mà faŋ yo mi lə mbwo n'yii bəne ə njɔ mà yɔɔla bə mi lə, ‘Mbɛɛ nnu wə yá ŋəŋ yo ye Fiana Wɛɛŋ hlili bwo buh bwo duŋ ə wu go, ə wu nnu i yáa i yīi bəne ə duŋ ə Fiana Wɛɛŋ mə.’ 34 Fɨhŋ lə fieŋ ffɨŋ mmà ŋŋəŋna, n'yee mbēmi kah bə fi n'yɔ̄ɔ lə mbɛɛ nnu duŋ Ŋwa Nchu.”

Bəne bbəŋ bə́ mà hlaa duŋ bəne bə Jisho bə kintu

35 Butuu fu wu, Jɔɔŋ baa lemi ə dɔhɔ kkɨŋ i màa i lēmi kie bə bəne biih bə kintu bəfwe. 36 I ŋəŋ ye Jisho jāa i kāh, i hlə yɔɔ lə, “Bə kee ŋəŋ, nu lə Ŋwa Nshɔŋ Chu.”

37 Bəne biih bə kintu bə bəfwe bəhŋ ə bwɔɔ nnu bəŋ wo ye i yɔ̄ɔ lə nəni, hlə ja yee bə́ bə̄lə Jisho. 38 Jisho fiimə ŋəŋ ye bə́ bə̄lə wu, bii bə bə́ ləə, “Bə́ kiɛɛ ə duŋ laha lə?” Bə́ bii bə wu ləə, Labi, wə nɔ̄ŋ fəhəŋ lə? (Yii lɨhŋ lə Labi duŋ lə, “Mbɛɛ Keehnə Ŋkuntaŋ.”) 39 Jisho chuu bə bə́ lə, “Bə bwo ŋəŋ.” Bə́ hlə gəŋ ŋəŋ dɔhɔ kkɨŋ i màa i nɔ̄ŋ kie. Bə́ hlə shi kaa kitaŋ. Bwɔɔ nnu bə́ màa bə́ bə̄lə wu mà duŋ ba ye bitaŋ binua lə hə kitaŋ. 40 Mbɛɛ mwi ə kintu ki bəne bə bəfwe bie mə nnu i mà wo ye Jɔɔŋ yɔɔ ki Jisho mà duŋ Andulu dɨŋ Shaamuŋ Pita. 41 Andulu wo hlaa gəŋ kiɛɛ maani Shaamuŋ, yɔɔ bə wu lə, “Kkə ŋəŋna ə Nchuu Fwoo nnu Chu mà kaachi yo go” (nnu i duŋ lə Kleto). 42 Nəni, i hlə jə Shaamuŋ gəŋ bə wu ə Jisho tɨŋ. Jisho kee wu nəni jwaaŋ, yɔɔ lə, “Ə wə Shaamuŋ ŋwa Jɔɔŋ. Bə́ yáa bə́ chēe dəŋ wə lə Shefa.” (Yii lɨhŋ nini lə Shefa duŋ lə Pita).^ª

Jisho chee Filip bə Nataniya

43 Butuu fu wu, Jisho ŋəŋ lə mə lə gəŋ ə wɛɛ wi Galilii mə. I gəŋ ŋəŋ Filip, yɔɔ bə wu lə, “Yee wə bə̂lə mi.” 44 Filip nu mà duŋ mbɛɛ nnu kibalaki ki Beshayida mə. Kibalaki kɨhŋ mà duŋ ki bə Andulu bəə Pita. 45 Filip gəŋ kiɛɛ Natania yɔɔ bə wu lə, “Kkə ŋəŋna ə mbɛɛ nnu Mushe mà bieŋ yo ə Kiŋwaati ki bəŋkɨnə mə yu wu ə duŋ bəne bə hlɨŋ Chu mà bieŋna dəŋ kiih. Mbɛɛ nu duŋ Jisho nnu Nashalit ŋwa Joshɛ.” 46 Natania chuu bə wu lə, “Fieŋ finwaa duŋ ə fi fu ə Nashalit lə?” Filip yɔɔ bə wu lə, “Bwo ŋəŋ.” 47 Lə Jisho ŋəŋ ye Natania bwō, i yɔɔ kiih lə, “Bə́ kee ŋəŋ, mbɛɛ nu duŋ ba mbɛɛ nnu Ishlael bə kichɛɛŋ. Fwɔ wi fihinə lə wu mə kə.” 48 Natania bii bə Jisho ləə, “Wə fə ləhəŋ hlə kələ mi lə?” Jisho chuu bə wu lə, “Filip hə bwo bənchee wə, duŋ nhə ŋŋəŋna ə wə go ə tiɛɛ ki fik kie kwe.”^ª 49 Natania chuu bə wu lə, “Labi, wə duŋ Ŋwa Nchu! Wə duŋ Ŋkɨŋ nnu Ishlael!” 50 Jisho yɔɔ bə wu lə, “Wə fəŋ bēmi mi fidiɛɛ kwaa yulahalə n'yɔɔla bə wə lə nhə ŋŋəŋna ə wə go ə tiɛɛ kie kwe lə? Wə yá yi ŋəŋ bieŋ biŋkuntaŋ kah bɨhŋ.” 51 Jisho baa yɔɔ bə wu lə, “N'yɔ̄ɔ bəŋ chɛɛŋ chɛɛŋ lə bə yá yi ŋəŋ buuli wɛɛma, bənchinda bə Chu bīŋ, bə́ bwɔ̄ ə Ŋwa Mbɛɛ go.”