Jɔɔŋ 7

Jisho biŋ gəŋ ə Jelushalɛŋ ə Chɔnɔ ki muŋkɔ mə

Ə chu bwɔɔ nnu dɨŋ Jisho ba kwaa yee i jāa ə duŋ ə wɛ́ɛ ŋə Galilii mə. I mà kə baa lə gəŋ ə Judia kə, yulahalə bəne bəŋkuntaŋ bə Bəjuu mà kiɛɛ lə bə́ jii wu. 2 Bwɔɔ Chɔnɔ ki Bəjuu kkɨŋ bə́ chèe lə Chɔnɔ ki muŋkɔ yee ki bwō baha ba. 3 Bə́ dɨŋ Jisho hlə yɔɔ bə wu lə, “No fəŋ wə gəŋ ə Judia fo bəne bwo bə kintu lə ŋəŋ dɨŋ nimi llɨŋ wə nɨ̀ŋ le. 4 Ə mbɛɛ nɨ̀ŋ nimi i kìɛɛ lə bəne hə kələ wu, ə yee i nɨ̄ŋ ə nələ mə kə. Ye wə fə lə bieŋ bɨhŋ, jaa nyii gbo wo bə mbiŋ.” 5 Bəmaani bie màa bə́ yɔ̄ɔ nəni yulahalə bə́ mà kə yii lə dəŋ fibə tɔ́ŋ ə wu mə kə. 6 Jisho chuu bə bə́ lə, “Bwɔɔ ŋgwəŋ kə wunə ba kə. Bə bəŋ weŋ yo bwɔɔ wuna ba. 7 Bəne bə yaŋ mbiŋ nu mə duŋ ə bə́ loh bə bəŋ kə. Kwaalə, bə́ lòh bə mi yulahalə n'yɔɔla bə bə́ lə fwɔ́ ŋəbə dūŋ ŋəŋ'waha. 8 Bə bu gəŋ fieeŋ ə Chɔnɔ mə. Bwɔɔ ŋgwəŋ yu kaani kə wunə ba kə.” 9 Ye i yɔɔlə nəni, i hlə ba ə Galilii.

10 Kwaalə bwɔɔ nnu bəmaani mà no bəmbiŋ gəŋ kaa ə Chɔnɔ kie mə, i hlə she bələ biŋ gəŋ dəŋ mə. Bwɔɔ nnu i màa i bīŋ i nakə biŋ nə lə bəne ŋəŋ ə wu go kə, i biŋ wu fiih ə duŋ ə nələ mə. 11 Ə mà duŋ Bəjuu hə chu kiɛɛ wu ə Chɔnɔ kie mə bə́ bii ləə “Mə lə fəhəŋ lə?” 12 Bəne gbe bəŋwuunə kiih gbaaŋ. Bədi dōhi lə, “I duŋ mbɛɛ nwaa.” Bədi yɔ̄ɔ lə, “I fìhi bəne bu fihinə.” 13 Kwaalə mbɛɛ mà kə duŋ nə həmə nnu duŋ ə i yɔɔ wɛɛŋ kiih kə, yulahalə bə́ màa bə́ lɔ̄ bəne bəŋkuntaŋ bə Bəjuu.

Jisho keeh bəne ə chɔnɔ mə

14 Ə chulə joo ŋə chɔnɔ kie ga kinte kinte, Jisho gəŋ ə chəŋ ntofi yee i kēeh bəne. 15 Bəne bəŋkuntaŋ bə Bəjuu wə̄lə gəə ŋɨ̄ŋ bə́, bə́ yɔɔ lə, “Mbɛɛ nu kah ləhəŋ maa yee i kə̄lə bieŋ nəni maa nlaanə Kiŋwaati ki Chu hləŋ lə!” 16 Jisho duŋ duŋ hlə ja yɔɔ lə, “Keehnə kkɨŋ ŋkeeh kɨhŋ lə kɨŋŋ kə. Ə ki mbɛɛ nnu i faŋ yo mi. 17 Ə mbɛɛ lə kiɛɛ lə yee i fə̄ ə duŋ fieŋ ffɨŋ Chu kiɛɛ, ə i hlə kələ lə keehnə kɨhŋ bwo ə duŋ ə Chu kwáŋ, ləkə lə ŋkeeh ə duŋ ə muŋgeni muŋŋ mə lə. 18 Mbɛɛ nnu i yɔ̀ɔ bə muŋgeni mwii kìɛɛ ə duŋ yii liih liŋkuntaŋ ə gbo wiih go. Kwaalə mbɛɛ nnu i kìɛɛ yii liŋkuntaŋ ə mbɛɛ nnu i faŋ yo wu lə i bwo yee i dūŋ mbɛɛ kichɛɛŋ, fihinə duŋ nə ə wu mə kə 19 Mushe mà kə nəə bəŋ bəŋkɨnə kə lə? Kwaalə mbɛɛ ju ə bəŋ mə chi lə bəŋkɨnə bie kə! Bə kiɛɛ lə bə jii mi yulaha lə?”

20 Bəne bie chuu bə wu lə, “Wə yo bə fiŋkwini. Mbɛɛ nnu i kìɛɛ lə i jii wə lə nyəhə lə?” 21 Jisho yɔɔ bə bə́ lə, “Mmà nfəə nyiŋ, kindɔchiŋ bəŋ bə yi. 22 Mushe mà nəə ŋkɨnə lə yee bə́ nyîeŋ bwɔni jó. Kwaalə ŋkɨnə nu mà kə fwoo ə Mushe kwáŋ kə. I mà fu ə bəchwa bieeŋ kwáŋ Mushe hlə duŋ. Bə hlə yee bə nyīeŋ bwɔni jó maa dəŋ ə bunte mə. 23 Ə bə́ lə nyieŋ mbɛɛ jo ə bunte mə fo bə́ lə nakə bihi bəŋkɨnə bə Mushe, bə hlə yee bə wō nlogo bə mi lə nfəə mbɛɛ mə ŋwunə gbo wiih winhliŋ ə bunte mə yulaha lə? 24 Bə kə yee bə hlâah nhlaa bə kee wɛɛ mwe kə. Yee bə hlâa ə jé yintiiŋ mə.”

Bəne yee bə́ nāamə lə Jisho duŋ Nchuu Fwoo nnu Chu mà kaachi yo lə

25 Bəne bə Jelushalɛŋ bədi hlə ja bii ləə, “Nu kə duŋ nə mbɛɛ nnu bə́ kīɛɛ yo lə bə́ jii lə? 26 Bə kee ŋəŋ nu wu fəŋ nnu i yu yɔ̄ɔ wɛɛŋ, mbɛɛ hləŋ nnu i yɔɔ fieŋ bə wu. Ə chu duŋ lə bikuu bi kitɨŋ kəla ba lə mbɛɛ nu duŋ Nchuu Fwoo nnu Chu mà kaachi yo lə? 27 Kwaalə, kkə kəla dɔhɔ kkɨŋ mbɛɛ nu bwō kie. Bwɔɔ nnu Nchuu Fwoo nnu Chu mà kaachi yo yá bwo yá duŋ ə mbɛɛ yá kələ dɔhɔ kkɨŋ i bwo kie kə.” 28 Nəni Jisho ə bwɔɔ nu bəŋ kēeh bəne ə chəŋ ntofi mə ja gɛɛmə bu gbaaŋ lə, “Bə kə̀lə mi, ŋkə̀lə dəŋ dɔhɔ kkɨŋ mbwò. Kwaalə ŋkə mbwoo fəŋ ə muŋgeni muŋŋ mə kə. Mbɛɛ nnu i faŋ yo mi duŋ mbɛɛ kichɛɛŋ, bə kə kələ wu kə. 29 Ŋkə̀lə wu yulahalə mbwò dɔhɔ kkɨŋ i dùŋ, ə duŋ wu nnu i faŋ mi.” 30 Ye i yɔɔlə nəni, bəne bədi hlə yee bə́ kīɛɛ lə bə́ kwo wu. Kwaalə mbɛɛ nakə tuu lə ə wu go kə, yulahalə bwɔɔ wi mà kaani kə wunə ba kə. 31 Kwaalə bəne kiŋaaŋkə yii tɔŋ ə wu mə yee bə́ yɔ̄ɔ lə, “Bwɔɔ nnu Nchuu Fwoo nnu Chu mà kaachi yo yá bwo, i yá yi baa fə bieŋ kiŋaaŋkə bbɨŋ bi nyìi kiŋkuntaŋ ki Chu kah bbɨŋ mbɛɛ nu fəə bie lə?”

32 Bwɔɔ nnu Bəfalashii mà wo ye kintu ki bəne ŋwūunə ki Jisho, bəche ntofi bəŋkuntaŋ bəŋkuntaŋ hlə faŋ bəne bə bicha lə bə́ gəŋ kwo wu. 33 Ye bə́ gəŋ lə, Jisho yɔɔ lə, “Nlə nduŋ bə bəŋ kwaa bwɔɔ chɛɛ, nhlə nfiimə chu dɨŋ ə mbɛɛ nnu i faŋ yo mi go. 34 Bə lə she kiɛɛ mi nəni, nakə ŋəŋ nə ə mi go kə. Dɔhɔ kkɨŋ nlə gəŋ duŋ ə bə bwo həmə kə.” 35 Bəjuu yɔɔ bə bəŋkafwi bə bə́ lə, “Mbɛɛ nu kiɛɛ lə i gəŋ ə duŋ fəhəŋ nnu kkə yá kiɛɛ wu ə kkə nakə ŋəŋ nə ə wu go kə lə? I kiɛɛ lə i gəŋ ə bitɨŋ bbɨŋ bəne biaa mà hlaamə gəŋ mə yee i lāanə bəne bə bitɨŋ bie mə lə? 36 Fiee fieŋ ffɨŋ i yɔ̄ɔ fie lə, ‘Bə yá yi kiɛɛ mi kə ŋəŋ nə ə mi go kə, yu dɔhɔ kkɨŋ ŋgə̄ŋ duŋ ə bə bwo həmə kə,’ ye i yɔɔlə lə fi duŋ lə laha lə?”

Jisho yɔɔ ki ŋgwiŋ mməŋ mə nə̀ kinduŋh

37 Lə yee ə dūŋ butuu bbuŋ Chɔnɔ gəŋ ŋka bbuŋ bu duŋ butuu bu Chɔnɔ kiŋkuntaŋ bwe, Jisho ja lemi fa gɛɛmə lə, “Ə ntɔntɔ lə ŋɨŋ mbɛɛ, i bwo nnə wu fieŋ fi ŋwinə. 38 Mbɛɛ nnu i yìi tɔŋ ə mi mə duŋ dəŋ ye Kiŋwaati ki Chu yɔɔlə lə, ‘Ŋgwiŋ mməŋ mə nə̀ kinduŋh yáa mə fū ə tɔŋ liih go mə bwɔ̀ nəni wɔɔɔ.’” 39 I mà yɔɔlə nəni, i yɔ̄ɔ ə duŋ ki Fiana bəne bbəŋ bə́ mà yiila tɔ́ŋ ə wu mə yá kənə. Ə duŋ bwɔɔ nnu bə́ mà kaani kə nəə Fiana wi bə bə́ kə, yulahalə bə́ mà kə bihiŋ ba Jisho lə i lɛɛ ə kiŋkuntaŋ kiih mə kə.

Bəne shwaamə ə Jisho go

40 Bəne wo fieŋ ffɨŋ Jisho mà yɔɔ fie, bədi yɔɔ lə, “Mbɛɛ nu duŋ ba Mbɛɛ Hlɨŋ Chu yo.” 41 Bədi yɔɔ lə, “Nu lə Nchuu Fwoo nnu Chu mà kaachi yo.” Kwaalə, bədi bii ŋkwo bə́ ləə, “Nchuu Fwoo nnu Chu mà kaachi mà kənə bənfu ə duŋ ə Galilii lə? 42 Yu Kiŋwaati ki Chu yɔ̀ɔ lə Nchuu Fwoo yo yá fu ə duŋ ə kichəŋ ki Ŋkɨŋ Daafi mə, ə kwili li Bɛtuluhɛŋ mə, llɨŋ li duŋ kwili li Daafi hləəŋ lə?” 43 Ye bəne bie yɔɔlə nəni, kiŋga hlə bwo ə bə́ mə yu Jisho. 44 Bəne bədi ə bə́ mə yee bə́ kīɛɛ lə bə́ kwo wu, kwaalə mbɛɛ nakə tuu lə ə wu go kə.

Bikuu bi Bəjuu nɨhŋ Jisho

45 Bəne bə bicha bie hlə no fiimə chu dɨŋ ə bəche ntofi bəŋkuntaŋ bəŋkuntaŋ bə Bəfalashii go, bə́ bii bə bəne bə bicha bie ləə, “Bə́ kə bwoo bə wu yulaha lə?” 46 Bəne bə bicha bəhŋ chuu lə, “Mbɛɛ ju kə hlaa lə yɔɔ ye mbɛɛ nu yɔ̄ɔ lə kə.” 47 Bəfalashii bii bə bə́ ləə, “I gəŋna fihi dəŋ maa bəŋ həmə lə? 48 Bə ŋəŋna lə bikuu bi bitɨŋ ləkə Bəfalashii yiila tɔŋ ə wu mə lə? 49 Kwaalə kintu kkɨŋ ki kə kələ ŋkɨnə Chu kə. Kida kie ə bə́ fí.” 50 Nikodemu nnu i mà duŋ mbɛɛ ə kintu ki Bəfalashii mə, nnu i mà gəŋ yo butuu budi gəŋ ŋəŋ Jisho mà duŋ həmə. I bii bə bə́ ləə, 51 “Ŋkɨnə ya yii bèmi lə bə́ kaalə nhlaa bə́ kaani kə wələ wo ba fieŋ ffɨŋ i yɔ̄ɔ lə?” 52 Bə́ hlə bii bə wu ləə, “Wə bwo dəŋ ə Galilii lə? Fwiilə Kiŋwaati ki Chu kinwaa wə ŋəŋ lə duŋ ə mbɛɛ hlɨŋ Chu ju fu ə Galilii kə.”

53 ^ª[Bə́ hlə ja mwi mwi yee bə́ gə̄ŋ ə chə́ŋ yibə mə.