Jɔɔŋ 8

Bə́ bwo bə kpɛ ju ə Jisho go, nnu bə́ hə kwo i nɔ̄ŋ bə nyo ju

Jisho no wu fiih biŋ ə duŋ ə Kɔnɔ ki Bite bi Olif go. 2 Butuu fu wu, i baa fiimə gəŋ chu ə chəŋ ntofi ye mə. Bəne bənhliŋ bumə wu kunə, i shii həkwe yee i kēeh bə́. 3 Bəne bbəŋ bə́ kèeh bəŋkɨnə bə Bəfalashii bwo bə mah kwili ju nnu bə́ hə kwo i nɔ̄ŋ kinɔŋ bə nyo ju. Ye bə́ bwolə bə wu, bə́ chi wu ə bə́ fwi, 4 yɔɔ bə Jisho lə, “Mbɛɛ Keehnə, bə́ kwoo kpɛ nu i nɔ̄ŋ bə nyo ju. 5 Ə bəŋkɨnə mə Mushe mà yɔɔla lə dɨŋ nu kpɛ duŋ bə́ tɨŋ wu ə ntɨŋ mə bə tə́ i kpe. Wə yɔɔ ŋkwo wa lə ləhəŋ lə?” 6 Bə́ màa bə́ fə̄ nəni bə́ tūulə Jisho ə ntuulə mə fo mə lə nyɔkɔ bə díe ə bə́ hlə kənə fieŋ ffɨŋ bə́ lə bwɛɛ ə wu go. Kwaalə, Jisho bwɔ kwe yee i bīeŋ bieŋ həkwe bə fiŋkwaani fiih. 7 Bə́ lemi ba həmə yee bə́ bīi wu bi biinə. I ja lemi fa yɔɔ bə bə́ lə, “Ə mbɛɛ lə duŋ ə bəŋ mə nnu i kə hlaa lə fə yiwaha kə, i hlaa duŋ mbɛɛ nnu fwii nnu mə lə tɨŋ wu bə tə.” 8 Ye Jisho yɔɔlə nəni, i baa bwɔ kwe yee i bīeŋ bieŋ həkwe bə fiŋkwaani fiih. 9 Bə́ wo fieŋ ffɨŋ Jisho yɔɔ fie, hlə gbe bənhlaamə mwi mwi gbe jə ə bəne bəcha go. Bə́ hlaamə nəni, ə she ba kwaa kpɛ yo nnu i lema ba həmə bəə Jisho. 10 Jisho baa ja fa, bii bə kpɛ yo ləə, “Kpɛ, bə́ lə fəhəŋ lə? Mbɛɛ hləŋ nnu i yɔɔ lə wə kənə dəŋ bəŋkpe lə?” 11 I chuu lə, “Mbɛɛ hləŋ kə, Baba.” Jisho hlə yɔɔ lə, “Mi dəŋ nlə n'yɔɔ lə lə wə kənə dəŋ bəŋkpe kə. Gəŋ, kwaalə wə kə baa lə fə yiwaha kə.”]

Jisho duŋ kinchaa ki mbiŋ nu

12 Jisho baa yɔɔ bə bəne bie lə, “Nduŋ kinchaa ki mbiŋ nu. Maa nyəhə nnu i bə̀lə mi duŋ dəŋ ə i jaa ə jɨbə mə kə. Mə lə kənə kinchaa kkɨŋ ki nə̀ kinduŋh bə bəne.” 13 Bəfalashii hlə yɔɔ bə wu lə, “Wə lema ə ki dɨŋ ki nhlaa kwoo ko bəŋ. Fieŋ ffɨŋ wə yɔɔ fie kə duŋ nə yəəŋ kə.” 14 Jisho chuu bə bə́ lə, “Ə duŋ lə nlema ə ki dɨŋ ki nhlaa kwoo kɨŋŋ bəŋ, kəə fieŋ ffɨŋ n'yɔ̄ɔ duŋ yəəŋ, yu ŋkə̀lə dɔhɔ kkɨŋ mbwō kie, ŋkə̀lə dəŋ dɔhɔ kkɨŋ n'yu ŋgə̄ŋ kie. Kwaalə, bə kə kələ dɔhɔ kkɨŋ mbwō maa dɔhɔ kkɨŋ n'yu ŋgə̄ŋ kie kə. 15 Bə hlàah bəne ə duŋ bə bufe bu mbiŋ. Nhlàah lə fɨŋŋ mbɛɛ kə. 16 Kwaalə, ə duŋ lə nhlàah mbɛɛ, kəə nhlàah ə duŋ yəəŋ, yulahalə nhlàah lə mii mboŋ kə. Nhlàah bəə Tah nnu i mà faŋ yo mi. 17 Ə kiŋwaati kieeŋ ki bəŋkɨnə mə fi duŋ bə bieŋna lə, ə bəne bəfwe lə lemi ə kidɨŋ ki nhlaa fieŋ bəŋ, kəə ə chɛɛŋ. 18 Nlèmi ə kidɨŋ ki nhlaa kwoo kɨŋŋ bəŋ, Tah nnu i faŋ yo mi lèmi dəŋ ə kidɨŋ ki nhlaa ŋgwəŋ bəŋ.” 19 Bə́ hlə bii bə wu ləə, “Chwa lə fəhəŋ lə?” Jisho chuu lə, “Bə kələ lə mi maa Tah kə. Ə bə kələ mi, kəə bə kəla dəŋ Tah.”

20 Jisho màa i yɔ̄ɔ bieŋ bɨhŋ ye i màa i kēeh bəne ə chəŋ ntofi mə baha ə dɔhɔ kkɨŋ bə́ màa bə́ bā bənnə kpo. Kwaalə, mbɛɛ nakə kwoo wu kə, yulahalə bwɔɔ wi mà kə wunə ba kə.

Jisho nyii lə i bwo buh

21 Jisho baa yɔɔ bə bə́ lə, “N'yu ŋgə̄ŋ, bə lə she kiɛɛ mi hləŋ hləŋ kpe ə yíwaha yeeŋ mə. Dɔhɔ kkɨŋ n'yu ŋgə̄ŋ duŋ ə bə bwo həmə kə.” 22 Bəjuu hlə bii bə go ŋəbə ləə, “Mə lə jii gbo wiih chəə lii, ye i yɔ̄ɔ lə lə dɔhɔ kkɨŋ i yu gə̄ŋ duŋ ə kkə bwo həmə kə lə?”

23 Jisho yɔɔ bə bə́ lə, “Bə fu yaŋ kwe, nfu ŋkwo ŋgwəŋ ə buh. Bə duŋ bəne bə yaŋ mbiŋ nte. Kwaalə nduŋ nə mbɛɛ nnu yaŋ mbiŋ nu nte kə. 24 Fiee fieŋ ffɨŋ mà yɔɔ fie bə bəŋ lə bə yá yi kpe yu yíwaha yeeŋ. Yee bə kə̂lə lə bə yá yi kpe ə yíwaha yeeŋ mə ə bə nakə bemi lə ə mi wu.” 25 Bə́ bii bə wu ləə, “Ə wə nyəhə lə?” Jisho chuu lə, “Nduŋ mbɛɛ nnu mmaa n'yɔ̄ɔ yo kiih bə bəŋ chɔɔ jə həmɛɛ. 26 Ŋkənə bieŋ kiŋaaŋkə bbɨŋ nduŋ ə n'yɔ̄ɔ ki bi bə bəŋ maa bieŋ kiŋaaŋkə bbɨŋ nduŋ ə nhlaah bəŋ ki bi. Kwaalə mbɛɛ nnu i faŋ yo mi duŋ ŋwuŋ kichɛɛŋ. Fieŋ ffɨŋ n'yɔ̄ɔ bəŋ yaŋ mbiŋ nte ə fi ffɨŋ ŋ'wo bə mbɛɛ nnu i faŋ yo mi.” 27 Ye i yɔɔlə nəni, bə́ nakə kələ lə i yɔ̄ɔ bə bə́ ə duŋ ki Tili kə. 28 Nəni Jisho hlə yɔɔ bə bə́ lə, “Bwɔɔ nnu bə lə tiɛɛ Ŋwa Mbɛɛ fa, ə bə hlə kələ lə ə mi wu kələ dəŋ lə nduŋ ə nfə dəŋ fieŋ fidi ə muŋgeni muŋŋ mə kə, n'yɔ̄ɔ kwaa ə duŋ ffɨŋ Tah kèeh mi. 29 Mbɛɛ nnu i faŋ yo mi yo bə mi. Mə kə shee mi lə nduŋ mii mboŋ kə, yulahalə mbà bənfə bieŋ bbɨŋ bi nwaa wu.” 30 Ye Jisho mà yɔɔlə bieŋ bɨhŋ nəni, bəne kiŋaaŋkə yii tɔŋ ə wu mə.

Kichɛɛŋ fwoo bəne ə munfwa mə

31 Jisho yɔɔ bə Bəjuu bbəŋ bə́ mà yii bie tɔŋ ə wu mə lə, “Ə bə ba yee bə lēmi ə die njəŋ bəŋ, ə bə ba bəne bə kintu kɨŋŋ bə kichɛɛŋ, 32 ə bə hlə kələ kichɛɛŋ, ə kichɛɛŋ kie fə ə bə fu ə munfwa mə.” 33 Bə́ chuu bə wu lə, “Kkə duŋ kichəŋ ki Ablahaŋ, kkə kə hlaa lə duŋ ə munfwa mə ə mbɛɛ ju kwáŋ kə. Ə fə laha lə yee wə yɔ̄ɔ lə kkə lə fu ə munfwa mə lə?”

34 Jisho chuu bə bə́ lə, “N'yɔ̄ɔ bəŋ kichɛɛŋ lə mbɛɛ mənhliŋ nnu i fə̀ yiwaha lə nfwa yiwaha. 35 Nfwa duŋ nə mbɛɛ ə kichəŋ mə bwɔɔ mənhliŋ kə. Ə kwaa ŋiaŋ nnu i dùŋ mbɛɛ ə kichəŋ mə bwɔɔ mənhliŋ. 36 Nəni, ə Ŋiaŋ lə fwoo bəŋ ə chəŋ munfwa mə, kəə bə fwoo ba bə kichɛɛŋ. 37 Ŋkəla wɛɛŋ lə bə duŋ ə ŋgɔlɔ ki Ablahaŋ mə, kwaalə bə kiɛɛ lə bə chɔɔ jii mi yulahalə biyɔɔnə bɨŋŋ lɛɛ lə bəŋ to kə. 38 N'yɔ̄ɔ ə duŋ fieŋ ffɨŋ ŋŋəŋna bə Tah, bə fə̀ ŋkwo weŋ ə duŋ fieŋ ffɨŋ bə woo bə Chwa weŋ.”

39 Bə́ chuu bə wu lə, “Tah ya lə Ablahaŋ.” Jisho yɔɔ bə bə́ lə, “Bə hə duŋ bwɔni bə Ablahaŋ, bə hə yee bə́ fə̄ ə duŋ fieŋ ffɨŋ Ablahaŋ màa i fə̄. 40 Nduŋ mbɛɛ nnu n'yɔ̄ɔ bəŋ kichɛɛŋ kkɨŋ ŋ'wò bə Chu. Kwaalə, fidiɛɛ bə bie bə kīɛɛ lə bə jii mi, fɨhŋ lə fieŋ ffɨŋ Ablahaŋ màa i fə̄ kə. 41 Bə bie bə fə̄ ə duŋ bieŋ bbɨŋ chwa weŋ màa i fə̄.” Bə́ yɔɔ bə wu lə, “Kkə duŋ nə bwɔni bbəŋ bə́ bwee kwe kə. Kkə kənə Tah ya, ə duŋ Chu.” 42 Jisho yɔɔ bə bə́ lə, “Ə Chu hə duŋ Chwa weŋ, ə bə hə yee bə lēki mi, yulahalə nno ə duŋ ə Chu kwuŋ bwo yaŋ. Ŋkə mbwoo ə duŋ ə muŋgeni muŋŋ mə kə. Ə faŋ wu mi. 43 Ə laha ffɨŋ die njəŋ duŋ kə lɛɛ lə bəŋ to kə lə? Ə yulahalə fi fie ntakə bə bəŋ bəŋ'wo die njəŋ lə? 44 Bə duŋ bwɔni bə chwa weŋ hlaata, fieŋ ffɨŋ bə lèki bənfə ə fi ffɨŋ chwa weŋ lèki. I mà duŋ mbɛɛ nnu i màa i jīi bəne chɔɔ jə həmɛɛ. I kənə lə fieŋ fi fənə bə kichɛɛŋ kə, yulahalə kichɛɛŋ dūŋ nə ə wu mə kə. Bwɔɔ nnu i kaalə yo i yɔɔ ə duŋ ye fwɔ wiih duŋ, yulahalə i duŋ mbɛɛ kaalənə yo i duŋ che yó. 45 Kwaalə, N'yɔ̄ɔ fɨŋŋ ə duŋ chɛɛŋ, ə fi ffɨŋ bə duŋ fie kə bemi mi kə. 46 Ə nyəhə ə bəŋ mə nnu duŋ ə i nyii fieŋ fiwaha ffɨŋ nfəə lə? Ye fieŋ ffɨŋ n'yɔ̄ɔ bə bəŋ duŋ chɛɛŋ, ə fə laha lə bə kə bemi bə mi kə lə? 47 Mbɛɛ nnu i dùŋ ŋwuŋ Chu wò die Chu. Fieŋ ffɨŋ bə duŋ fie kə woo die Chu duŋ yulahalə bə dūŋ nə bəne bə Chu kə.”

Ablahaŋ mà chu bwo duŋ, mà duŋ Jisho duŋ

48 Bəjuu hlə yɔɔ bə Jisho lə, “Kkə hə kkə yɔɔ lə kichɛɛŋ lə wə duŋ mbɛɛ nnu Shamalia nnu fiŋkwini fie ə wə mə lə?” 49 Jisho chuu bə bə́ lə, “Fiŋkwini hləŋ kə ə mi mə. Mbwɔ̀kwe fɨŋŋ bə Tah, kwaalə bə bwɔ̀ lə kwe bə mi kə. 50 Fi kə duŋ nə lə ŋkiɛɛ yii liŋkuntaŋ ə mbili ŋgwəŋ go kə. Mbɛɛ mwi yo həmə nnu i kìɛɛ fimbini fie yu mi, ə wu dəŋ nnu i hlàah bəne.

51 N'yɔ̄ɔ bəŋ kichɛɛŋ lə ə mbɛɛ lə wo die njəŋ chi yi, ə i yá wo chee kpe kə.” 52 Bəjuu yɔɔ bə wu lə, “Kkə kəla ba fidiɛɛ lə fiŋkwini fie ə wə mə. Ablahaŋ mà kpe, bəne bə hlɨŋ Chu kpe dəŋ, yee wə yɔ̄ɔ lə, ‘Ə mbɛɛ yee i wô die njəŋ i chì yi, ə i baa wo chee kpe kə.’ 53 Wə kah tah ya Ablahaŋ nnu i mà kpe yo, kah dəŋ bəne bə hlɨŋ bə Chu bbəŋ bə́ mà kpe bie lə? Wə hle lə wə duŋ laha lə?” 54 Jisho chuu lə, “Ə mi ŋkohi gbo wuŋŋ, kəə fimbini fie duŋ finya. Ə Tah nnu i kòhi mi, ə duŋ wu nnu bə yɔ̀ɔ yo lə ə Chu weŋ. 55 Kwaalə bə kə kələ wu kə. Ə kələ kwaa mi wu. Ə nlə n'yɔɔ lə ŋkələ lə wu kə, kəə nduŋ ŋwuŋ yo kaalənə ye bəŋ. Kwaalə, ye fi duŋ, ŋkələ wu, nchì die yi. 56 Che chwa weŋ Ablahaŋ màa i tɨ̄ŋ lə mə lə bwo ŋəŋ ə joo ŋəŋŋ go. Lə i ŋəŋ, i wo njənjə.” 57 Bəjuu hlə ja yɔɔ bə wu lə, “Wə kə bwii lə bigoŋ mbwɛɛnshiŋ kə, wə yɔ̄ɔ lə wə mà ŋəŋna ə Ablahaŋ go lə?” 58 Jisho chuu bə bə́ lə, “N'yɔ̄ɔ bəŋ kichɛɛŋ lə, Ablahaŋ mà chu bwo duŋ, ndùŋ.”^ª 59 Bə́ wo nəni, hlə jə tə́ lə bə́ tɨŋ Jisho bə ŋə. Jisho wɛɛnə fu ə chəŋ ntofi ye mə.