Jɔɔŋ 9

Jisho wɛ díi ŋə mbɛɛ nnu bə́ mà bwee i dùŋ mbandii

Lə Jisho yee i jāa, i ŋəŋ ə nyo ju go nnu bə́ mà bwee wu i dùŋ mbandii. 2 Bəne biih bə kintu bii bə wu ləə, “Labi, ə mà fə nyəhə yiwaha bə́ hlə bwee mbɛɛ nu i dùŋ mbandii lə? Ə mà fə mbɛɛ yo lii mahni bə tili lə?” 3 Jisho chuu bə bə́ lə, “Ə mbɛɛ nu kə, ləkə mahni bə tili bbəŋ bə́ mà fə yiwaha kə. Bə́ mà bwee wu nəni fo Chu lə nyii nimi liih ə wu go. 4 Kkə kənə bənɨŋ nimi li mbɛɛ nnu i faŋ yo mi ə kaani ə bushi. Jɨbə kie ki bwō kkɨŋ duŋ ə mbɛɛ nakə baa lə nɨŋ fieŋ kə. 5 Gəŋ bwii bwɔɔ nwɛhɛŋ nnu nduŋ ə mbiŋ nu mə, ndùŋ kinchaa ki mbiŋ nu.” 6 Ye Jisho yɔɔ lə fieŋ fɨhŋ nəni, i hlə tu ntɨŋ həkwe, tiɛŋ shishɔ həmə chaa ə díi ŋə mbɛɛ yo ŋie go, 7 yɔɔ bə wu lə, “Gəŋ wii ə fwoŋ wi ŋgwiŋ wi Shilɔŋ mə.” (Yii lɨhŋ lə Shilɔŋ duŋ lə, “Faŋ.”) I hlə gəŋ wii, fiimə bwo i ŋə̄ŋ ə bieŋ go. 8 Bəne bbəŋ bə́ màa bə́ dūŋ bie baha baha maa bəne bbəŋ bə́ màa bə́ ŋə̄ŋ bie wu ye ŋwuŋ binoŋnə yɔɔ lə, “Nhle lə nu lə mbɛɛ nnu i maa i shī yo i nòŋ binoŋnə lə?” 9 Bədi bie yee bə́ yɔ̄ɔ lə, “Ə wu.” Bədi bie lə, “Ye i bu wu.” Mbɛɛ yo yɔɔ lə, “Ə mi kibɛɛ.” 10 Nəni bə́ hlə bii bə wu ləə, “Fi kah ləhəŋ díi ŋo hlə wɛɛmə lə?” 11 I chuu lə, “Mbɛɛ nnu bə́ chèe yo lə Jisho hə tiɛŋ shishɔ chaa ə díi ŋəŋŋ go, yɔɔ bə mi lə ŋgəŋ ŋ'wii ə Shilɔŋ. Nhlə ŋgəŋ wii, díi ŋəŋŋ bu wɛɛmə.” 12 Bə́ bii bə wu ləə, “Fəhəŋ wu lə?” I chuu lə, “Ŋkə ŋkələ kə.”

Kiŋga bwo ə Bəfalashii mə ki muŋgeni mu Jisho

13 Bə́ hlə ja jə mbɛɛ nnu i màa i hlaa dūŋ yo mbandii gəŋ bə wu ə Bəfalashii fwi. 14 Butuu bbuŋ Jisho mà tiɛŋ bwe shishɔ ye wɛ díi ŋə mbɛɛ yo mà duŋ ə bunte mə. 15 Bəfalashii bie baa bii dəŋ bə wu ye mə hə fə lə díi ŋiih hlə wɛɛmə. I chuu bə bə́ lə, “Mə hə chaa díi ŋəŋŋ bə shishɔ, ŋgəŋ ŋ'wii nhlə n'yee ŋŋə̄ŋ ə bieŋ go.” 16 Bəfalashii hlə yɔɔ lə, “Mbɛɛ nu kə fwoo ə Chu kwuŋ kə, yulahalə i nɨ̀ŋ maa ə bunte mə.” Bədi yɔ̄ɔ ŋkwo bə́ lə, “Hə duŋ lə mbɛɛ nu duŋ mbɛɛ nnu i fə̀ yíwaha ə i hə fə dɨŋ bɨhŋ bieŋ bbɨŋ bi nyìi kiŋkuntaŋ ki Chu kə” Kiŋga hlə bwo ə bə́ mə. 17 Bə́ chu dɨŋ bwo bii bə mbɛɛ yo ləə, “Wə yɔɔ ŋkwo wa lə laha ki mbɛɛ nu ye mə hə wɛ lə díi ŋo lə?” I chuu lə, “Mbɛɛ yo duŋ mbɛɛ hlɨŋ Chu.”

18 Bəjuu mà kə hlaa lə bemi lə mbɛɛ yo mà duŋ mbandii bə́ hlə wɛ díi ŋiih kə. Bə́ gəŋ chee mahni bə tili bə́ bwo. 19 Bəjuu bie bii bə bə́ ləə, “Nu kə duŋ nə ŋiaŋ weŋ nnu bə maa bə yɔ̄ɔ yo lə bə́ mà bwee wu i dùŋ mbandii lə? Fi kah ləhəŋ mə hlə yee i ŋə̄ŋ ə bieŋ go fidiɛɛ lə?” 20 Mahni bə tili chuu lə, “Kkə kəla lə nu lə ŋiaŋ ya nnu kkə mà bwee i duŋ mbandii. 21 Kwaalə, ye fi jaa lə lə i yu ŋə̄ŋ ə bieŋ go fidiɛɛ duŋ dəŋ ə kkə kələ kə. Kkə kə kələ dəŋ mbɛɛ nnu i wɛ yo díi ŋiih kə. Bə bii ə duŋ bə wu. I yo ŋwucha. Duŋ ə i yɔɔ bə kijə kiih.” 22 Mahni bə tili mà yɔɔ nəni yulahalə bə́ màa bə́ lɔ̄ Bəjuu, ə mà duŋ Bəjuu hə kwaala lə ə mbɛɛ lə mɔŋ bən'yɔɔ bu yɔɔnə lə Jisho duŋ mbɛɛ nnu Chu mà kaachi yo, ə bə́ kohiŋ fwoo wu ə chəŋ cheenə Chu mə. 23 Fiee fieŋ ffɨŋ mahni bə tili mà yɔɔ fie lə i chu duŋ ŋwucha, lə bə́ bii ə duŋ bə wu.

24 Ə cha bəŋ fie, bə́ baa chee mbɛɛ nnu i mà duŋ yo mbandii, yɔɔ bə wu lə, “Yɔɔ fieŋ fi kichɛɛŋ fo kiŋkohi lə duŋ bə Chu. Kkə kə̀lə ŋkwo ya lə mbɛɛ nu duŋ mbɛɛ nnu i fə̀ yíwaha.” 25 I chuu lə, “Ləkə i fə̀ yíwaha, kəə ŋkə kələ kə. Fieŋ fimwi ffɨŋ ŋkə̀lə duŋ dəŋ lə mmàa nhlaa ndūŋ mbandii, fidiɛɛ n'yu ŋŋə̄ŋ ə bieŋ go.” 26 Bə́ baa bii bə wu ləə, “Mə hə fə ləhəŋ bə wə lə? Mə hə fə ləhəŋ mə hlə wɛ díi ŋo lə?” 27 I chuu bə bə́ lə, “Nhə nhlaala yɔɔ bəŋ, bə nakə leki bəŋ'wo kə. Bə kiɛɛ lə bə baa wo fə laha mu lə? Bə kiɛɛ dəŋ lə yee bə dūŋ ə bəne biih bə kintu mə lə?” 28 Bə́ to wu yɔɔ lə, “Ə wə mbɛɛ wi kintu. Kkə duŋ ŋkwo ya bənchinda bə Mushe. 29 Kkə kə̀lə lə ə Mushe nnu Chu màa i yɔ̄ɔ bə wu. Kwaalə mbɛɛ nu kkə kə kələ dɔhɔ kkɨŋ i fu kə.” 30 Mbɛɛ yo chuu lə, “Hebee, fɨhŋ lə fieŋ fi ŋɨŋ gəə! Bə yɔɔ lə bə kə kələ dɔhɔ kkɨŋ i fù kə lə? Kwaalə i wɛɛ díi ŋəŋŋ. 31 Kkə kə̀lə lə Chu wò lə cheenə ki mbɛɛ nnu i fə̀ yíwaha kə. Kwaalə, ə mbɛɛ lə bwɔkwe bə Chu, i fə̀ fieŋ ffɨŋ i kìɛɛ, ə Chu yee i wō cheenə kiih. 32 Chɔɔ jə ye mbiŋ nu mà chɔɔ bə́ mà kə hlaa lə wo lə mbɛɛ wɛɛ díi ŋə ŋwuŋ nnu bə́ mà bwee wu i dùŋ mbandii kə. 33 Ə mbɛɛ nu hə nakə duŋ nə lə i fù ə Chu kwuŋ, ə mə hə kaamu bənfə fieŋ kə.” 34 Bə́ yɔɔ bə wu lə, “Bə́ mà bwee wə, wə ba ə yiwaha mə kibɛɛ, wə kiɛɛ lə yee wə lāanə be lə?” Ye bə́ yɔɔlə nəni, bə́ kohiŋ wu ə bə́ mə.

Mbandii ə je Chu mə

35 Jisho wo lə bə́ kohaŋ mbɛɛ yo ə bə́ mə, i kiɛɛ ŋəŋ ə wu go, bii bə wu ləə, “Wə yii tɔŋ ə Ŋwa Mbɛɛ mə lə?” 36 I bii ləə, “Tah, mbɛɛ yo lə nyəhə lə? Yɔɔ mi lə, fo nlə n'yii tɔŋ ə wu mə.” 37 Jisho yɔɔ bə wu lə, “Wə ŋəŋna ə wu go. Ə wu mbɛɛ nnu i yu yɔ̄ɔ yo bə wə fidiɛɛ.” 38 Mbɛɛ yo hlə yɔɔ lə, “Baba n'yiila tɔŋ.” Ye i yɔɔlə nəni, i hlə bɛŋ núh ə wu fwi nə kiŋkohi bə wu. 39 Jisho yɔɔ lə, “Mbwo ə mbiŋ nu mə lə bə́ nhlaah bəne bbəŋ bə́ dùŋ kə ŋəŋ nə lə yee bə́ ŋə̄ŋ, bbəŋ bə́ ŋəŋ chu bəmbandii.” 40 Ye Jisho yɔɔlə nəni, Bəfalashii bbəŋ bə́ mà duŋ bie baha ə wu tɨŋ wo hlə bii bə wu ləə, “Kkə duŋ dəŋ bəmbandii lə?” 41 Jisho yɔɔ bə bə́ lə, “Ə bə hə duŋ bəmbandii, kəə kwáŋ ŋieeŋ ŋie yə ə wɛɛ wi yíwaha mə. Kwaalə fidiɛɛ ye bə yɔɔlə lə bə bie bə ŋə̄ŋ, yíwaha yeeŋ baa ə bikuu bieeŋ bəŋ.”