Jɔɔŋ 10

Jisho dùŋ nfwoŋ shɔ́ŋ nwaa

“N'yɔ̄ɔ bəŋ kichɛɛŋ lə, ə mbɛɛ lə lɛɛ ə mbaŋ shɔ́ŋ mə, nakə lɛɛ lə ə duŋ ə fwiih wi mbaŋ we mə, biŋ ə duŋ ə mbaŋ yo go hlə lɛɛ, kəə mbini yo mbɛɛ duŋ ŋwuŋ buyi, i dùŋ mbɛɛ nnu i fàa bieŋ ə muŋga mə. 2 Kwaalə, mbɛɛ nnu i fwòŋ yo shɔ́ŋ bwò i lɛ̀ɛ wu fiih ə duŋ ə fwiih we mə. 3 Mbini yo mbɛɛ dùŋ nnu i fwòŋ yo fwiih wi mbaŋ we bwò i wɛ̀ wulə kiih, i lɛɛ hlə chee shɔ́ŋ yiih ə yii go, yí wo die yi, i hlə jə fu bə yí. 4 Bwɔɔ nnu i fwoo kaa shɔ́ŋ yé yinhliŋ ə bweenə, i hlə kah fwi yee i chēe shɔ́ŋ yé yí bə̄lə wu, yulahalə yí kə̀lə die yi. 5 Ə duŋ ŋwuŋ ju chili, ə yí nakə bələ wu kə. Ə yee yí lɔ̄ wu bu lɔnə, yulahalə yí kə̀lə lə die mbɛɛ ju chili kə.” 6 Jisho mà gba ŋgaŋga ni bə bə́ nəni, bə́ nakə kələ fieŋ ffɨŋ i yɔ̄ɔ fie bə bə́ ə ŋgaŋga ni mə kə.

7 Nəni, Jisho baa yɔɔ bə bə́ lə, “N'yɔ̄ɔ bəŋ kichɛɛŋ lə ə mi fwiih wi mbaŋ wwuŋ shɔ́ŋ kàh we mə. 8 Bəne bənhliŋ bbəŋ bə́ mà hlaa bwo bə mi mà duŋ bəbuyi, bə́ dùŋ bəne bbəŋ bə́ fàa bieŋ ə muŋga mə. Nəni shɔ́ŋ yé nakə woo bə́ kə. 9 Ə mi fwiih wi mbaŋ we. Ə mbɛɛ lə kah ə mi mə hlə lɛɛ, ə i fukwoo. Ə i duŋ ye shɔŋ nni i fù i gə̀ŋ i dì i bwò i chù dɨŋ ə mbaŋ mə. 10 Ŋwuŋ buyi bwo kwaa bənyi, bənjii, maa bəmbihi bieŋ. Mbwo ŋkwo ŋgwəŋ lə bəne kənə ə duŋ kinduŋh, kkɨŋ ki dùŋ kiŋaamə. 11 Ə mi nfwoŋ shɔ́ŋ nwaa yo. Nfwoŋ shɔ́ŋ nwaa yii nə̀ kinduŋh kiih bəŋkpe yu shɔ́ŋ yiih. 12 Mbɛɛ nnu bə́ jəə kwaa wu ə nimi mə, ə kə duŋ nə nfwoŋ shɔ́ŋ yo kə, shɔ́ŋ yé kə duŋ nə yiih kə, ə mə ŋəŋ ye kuula bwo, ə i she shɔ́ŋ yé lɔ no, kuula hlə she kwo shɔ́ŋ yé, hlahi yidi yé. 13 Mə lə lɔ yulahalə bə́ jə kwaa wu bu jənə ə nimi le mə, i kənə lə bwɔɔ bə shɔ́ŋ yé kə. 14 Ə mi nfwoŋ shɔ́ŋ nwaa yo. Ŋkələ shɔ́ŋ yyɨŋ yí duŋ yɨŋŋ, shɔ́ŋ yɨŋŋ kələ dəŋ mi, 15 yəəŋ ye Tah kələ lə mi, ŋkə̀lə dəŋ Tah, nduŋ nnə kinduŋh kɨŋŋ bəŋkpe yu shɔ́ŋ yɨŋŋ. 16 Ŋkənə dəŋ shɔ́ŋ yidi yyɨŋ yí duŋ kə duŋ nə ə kikɨŋ kɨŋŋ mə kə. Ŋkənə bəmbwo bə yí dəŋ yee yí wò die njəŋ, kikɨŋ ki shɔ́ŋ yee ki duŋ mwe, nfwoŋ shɔ́ŋ yo duŋ mwi.

17 Fieŋ ffɨŋ Tah lèki mi yu fi duŋ lə, ntaala kpe njəŋ bəŋkpe fo nlə njə chuu yí dɨŋ. 18 Mbɛɛ hləŋ həmə nnu duŋ ə i jə kinduŋh kɨŋŋ. Ə nə mi wu kinduŋh kɨŋŋ ə kinleki kɨŋŋ mə. Ŋkənə muŋga bənnə kinduŋh kɨŋŋ bəŋkpe, ŋkənə muŋga bənjə chuu kinduŋh kɨŋŋ dɨŋ. Fɨhŋ lə fieŋ ffɨŋ Tah mà yɔɔlə yee nfə̄.”

19 Lə Jisho yɔɔ bieŋ bɨhŋ nəni, kiŋga baa bwo ə Bəjuu mə. 20 Bəne kiŋaaŋkə ə bə́ mə yee bə́ yɔ̄ɔ lə, “I yo bə fiŋkwini, i yu gbēja. Bə wələ laha bə wu lə?” 21 Kwaalə bədi yee bə́ yɔ̄ɔ lə, “Dɨŋ bɨhŋ biyɔɔnə duŋ nə bi mbɛɛ nnu i yò bə fiŋkwini kə. Ə duŋ ə fiŋkwini wɛ díi ŋə mbandii lə?”

Jisho nyii lə i dùŋ Ŋwa Nchu

22 Ə yee ə dūŋ bwɔɔ Chɔnɔ kidi kkɨŋ bə́ chèe lə Hanuka ə duŋ bwɔɔ fukpɔŋ.^ª 23 Jisho gəŋ ə chəŋ ntofi, yee i jāa ə kpənə kkɨŋ bə́ chee lə kpənə ki Sholomuŋ mə. 24 Bəjuu ja bwo kaa wu kunə, bii bə wu ləə, “Wə duŋ ə wə tukwaŋ ə be go ə kkə ba ə jɨbə mə nəni gəŋ bwii ləhəŋ lə? Ə wə duŋ Nchuu Fwoo nnu Chu mà kaachi yo, wə yɔɔ bə be wɛɛŋ.” 25 Jisho chuu bə bə́ lə, “Mmà n'yɔɔla kaa bə bəŋ, bə nakə bemi kə. Nimi llɨŋ nfə̀ ə yii li Tah bəŋ ə li llɨŋ li nyìi mbɛɛ nnu ndùŋ yo. 26 Kwaalə bə kə bemi, yulahalə bə duŋ nə ə kikɨŋ ki shɔ́ŋ yɨŋŋ mə kə. 27 Shɔ́ŋ yɨŋŋ wò die njəŋ. Ŋkə̀lə yí, yí bə̀lə mi, 28 nnə̀ kinduŋh ki kə kaa bə yí. Yí yá laa dududu kə. Mbɛɛ hləŋ nnu i yá faa yí ə kwáŋ ŋəŋŋ mə. 29 Tah nnu i mà nə yo shɔ́ŋ yé bə mi kah mbɛɛ mənhliŋ, mbɛɛ hləŋ həmə nnu duŋ ə i faa yí ə kwáŋ ŋiih mə. 30 Bee Tah dùŋ fieŋ fimwi.”

31 Bəjuu baa jə tə́ bəntɨŋ wu mu. 32 Jisho bii bə bə́ ləə, “Bə́ ŋəŋna nimi linwaa kiŋaaŋkə llɨŋ Tah yɔɔ lə yee nfə̄. Ə lɛhɛŋ llɨŋ bə kiɛɛ lə bə tɨŋ mi yu li lə?” 33 Bə́ chuu bə wu lə, “Kkə tɨŋ nə wə ə duŋ yu nimi linwaa llɨŋ wə fə̀ le kə. Kkə tɨŋ wə yulahalə wə yu bīhi yii li Chu. Wə duŋ mbɛɛ ŋkee, wə yɔɔ lə wə duŋ Chu.” 34 Jisho chuu bə bə́ lə, “Bə́ mà kə bieŋ nə ə Kiŋwaati kieeŋ ki bəŋkɨnə mə Chu yɔɔ mə lə, ‘Mmà ŋkə n'yɔ̄ɔ lə lə bə dùŋ bəcheh lə’? 35 Chu chèe bəne bie lə bəcheh, ə duŋ kwaa bə́ bbəŋ die yi mà bwo yu bə́, kkə kə̀lə lə fieŋ ffɨŋ fi dùŋ ə Kiŋwaati ki Chu mə duŋ ə bə́ gaanə fi kə. 36 Ye fi duŋ lə nəni, ə duŋ yulaha ffɨŋ bə yɔ̄ɔ bə mi lə mbiha yii li Chu ye n'yɔ̄ɔ lə lə nduŋ Ŋwa Nchu lə? Ə duŋ mi nnu Chu mà kaachi faŋ yaŋ ə mbiŋ nte. 37 Ə duŋ lə nnɨ̀ŋ nə ə duŋ nimi li Tah kə, bə kə bemi bə mi kə. 38 Kwaalə ə duŋ lə nnɨŋ ə duŋ li, bə bemi mi, maa ə duŋ lə bə kə bemi bə fieŋ ffɨŋ n'yɔ̀ɔ, ə bə hlə kələ kpee ba lə Tah dùŋ ə mi mə, ndùŋ ə Tah mə.” 39 Bəjuu baa kiɛɛ lə bə́ kwo wu, kwaalə i lɔɔlə fu ə bə́ kwáŋ.

40 I baa gəŋ le chu Kibee ki Joodaŋ kwo wukwi ye Jɔɔŋ màa i hlaalə i yìi bəne ə njɔ, yee i dūŋ mə. 41 Bəne kiŋaaŋkə bwò bə́ ŋə̀ŋ wu. Bə́ duŋ duŋ ja yɔɔ lə, “Jɔɔŋ mà kə fəə dəŋ fieŋ fidi ffɨŋ fi nyìi kiŋkuntaŋ ki Chu kə. Kwaalə bieŋ binhliŋ bbɨŋ i màa i yɔ̄ɔ ki mbɛɛ nu mà duŋ ba kichɛɛŋ.” 42 Nəni bəne kiŋaaŋkə yii tɔ́ŋ ə Jisho mə həmə.