Matio 10

Jisho faŋ bəne biih bə kintu bə yuufi ə nchɔ bəfwe

Jisho ja chee jə bəne biih bə kintu bə yuufi ə nchɔ bəfwe, bə́ bwo. I nə bə́ muŋgeni mmuŋ bə́ lə yee bə́ fwōo bəfiana bəyili ə bəne go, bə́ ŋwùhuŋ go ŋənhliŋ bə jə́ŋ chili chili. 2 Ŋəhŋ lə yíi ŋə bəne bə faŋnə bə Jisho bə yuufi ə nchɔ bəfwe bie: Nu fwii lə Shaamuŋ nnu bə́ mà chee dəŋ lə Pita, bəə maani Andulu. Bədi duŋ Jɛŋ ŋwa Jebedee bə maani Jɔɔŋ maa 3 Filip bə Batolomu, Tɔma bə Matio nnu i màa i kwō kiŋwaati, Jɛŋ ŋwa Alfiyu, Tadiyo bə 4 Shaamuŋ nnu i mà duŋ ə kintu ki Bəjilɔt mə^ª bə Judash Ishkalɔt nnu i mà taa yo Jisho.

(Maak 6:7-13; Lukaa 9:1-6)

5 Jisho faŋ bəne bə yuufi ə nchɔ bəfwe bəhŋ, i yɔɔ bə bə́ lə, “Bwɔɔ nnu bə gə̄ŋ, bə kə gəŋ nə ə dɔhɔ kkɨŋ bəne bə Bəjuu dùŋ kə duŋ nə kə. Bə kə gəŋ nə ə bibalaki bi bəne bə Shamalia mə kə. 6 Bə gəŋ ə duŋ ə bwɔni bə Ishlael mə bbəŋ bə́ laa ye shɔ́ŋ lə. 7 Ye bə gə̄ŋ lə, yee bə yɔ̄ɔ bə bə́ lə, ‘Muŋkɨŋ mu buh mwe baha baha.’ 8 Yee bə ŋwûhuŋ dəŋ bəne bə jə́ŋ, bə fə̀ bəne bəŋkpi fu, bə ŋwùhuŋ bəne bbəŋ bə́ kə̀nə jəŋ kinhlanhla, bə fwòo muŋkwini ə bəne go. Nnəə muŋgeni muhŋ bə bəŋ nya. Bə gəŋ yee bə chɨ̄nə dəŋ bəne nya. 9 Bwɔɔ nnu bə gə̄ŋ, mbɛɛ kə jəə kpo yii ə kicha mə kə, ləkə wuŋkuntaŋ, ləkə wutənə, ləkə wwuŋ wi hlə ye laha lə. 10 Mbɛɛ kə jəə kibwa. Mbɛɛ kə jəə bindu bifwe ləkə bikpa bidi, ləkə tələ. Yee bə kə̂lə lə dɔhɔ kkɨŋ mbɛɛ nɨ̀ŋ nimi, ə həmə nnu i kə̀nə bəŋkənə bikoonə biih. 11 Bwɔɔ nnu bə gəŋ lɛɛ ə kibalaki mə, ləkə ə kwili mə, kiɛɛ ŋəŋ mbɛɛ nnu i wuna, yee bə dûŋ bə wu gəŋ bwii bwɔɔ nnu bə yá no həmə. 12 Bwɔɔ nnu bə chu gəŋ lɛɛ ə mbɛɛ yo chəŋ, bə chee chəŋ ye. 13 Ə duŋ lə chəŋ ye wuna bəŋ, ə kindunshiiŋ kieeŋ bwo ə chəŋ ye mə. Ə duŋ lə chəŋ ye kə wunə bəŋ kə, ə kindunshiiŋ kieeŋ fiimə chu bə bəŋ. 14 Ə mbɛɛ nɨhŋ kə tɨŋ nə jə bəŋ ləkə bəŋ'wo fieŋ ffɨŋ bə yɔ̀ɔ, bwɔɔ nnu bə fu ə chəŋ ye mə ləkə ə kibalaki kie mə bə kwili luu libə ə wuh ŋieeŋ go. 15 N'yɔ̄ɔ bəŋ kichɛɛŋ lə ə yá bwo duŋ butuu bu nhlaah nnu həŋgbɔŋ, ə bieŋ yá bɛŋki bə kibalaki ki Shɔdɔŋ bə ki Gɔmɔla kah kimbini kie.

Bəŋgə bə bəne bə faŋnə bə Jisho

(Maak 13:9-13; Lukaa 21:12-17)

16 Bə wələ wo, n'yu nfāŋ bəŋ, bə gəŋ yee bə dûŋ ye shɔ́ŋ lə ə bəŋgumi mə. Nəni bwɔɔ nnu bə jàa, yee bə dûŋ bə bufe ye yɔ́ lə, yee bə dûŋ dəŋ shiiiŋ ye bikuuku lə. 17 Bwɔɔ nnu bə jàa, yee bə jə̂ bwɔɔ ə bəne mə. Yee bə kə̂lə lə bə́ nə bəŋ ə bəne bbəŋ bə́ hlàah bənhlaa kwáŋ. Bə́ kwuŋ bəŋ ə chə́ŋ yí cheenə Chu yibə mə. 18 Bə́ kpa gəŋ bə bəŋ ə bəne bbəŋ bə́ hlàah kitɨŋ fwi, maa ə bəŋkɨŋ fwi yu mi, fo bə lə yɔɔ bə bə́ maa bəne bbəŋ bə́ dùŋ kə duŋ nə Bəjuu yu mi. 19 Bwɔɔ nnu bə́ nə bəŋ bə bə́ nəni, bə kə yee bə gâa bikuu bieeŋ ləə ə laha ffɨŋ bə lə gəŋ yɔɔ ləkə lə ə je nyɛhɛŋ mə nni bə lə gəŋ nachɛ, yulahalə Chu yá yi nə bəŋ fieŋ ffɨŋ bə yá yɔɔ ə bwɔɔ mbini yo bəŋ. 20 Yee bə kə̂lə lə ə baa duŋ n'yɔɔ weŋ kə. Ə yɔ̄ɔ ə duŋ Fiana Chwa weŋ ə kijə kieeŋ mə. 21 Mbɛɛ yá ja jə maani nə ə bə́ jii, ə che ŋiaŋ jə ŋiaani nə ə bə́ jii. Bəne yá ja yee bə́ bɛ̄ŋ dəŋ kinjɔŋ ə bətili bə bəmahni bəbə dɨŋ, bə́ fə̀ bə́ jìi bə́. 22 Bəne bənhliŋ yáa bə́ lōh bə bəŋ yu yii lɨŋŋ. Kwaalə mbɛɛ nnu i yá kwaa tɔŋ gəŋ bwii həŋgbɔŋ ə wu nnu i yá fukwoo. 23 Bwɔɔ nnu bəne hlɔ̀ɔ wuh ə bəŋ dɨŋ ə kibalaki kidi mə, bə lɔ no həmə gəŋ ə kidi mə chili. N'yɔ̄ɔ bəŋ kichɛɛŋ lə, bə yá jaalə ə bibalaki bi Ishlael mə binhliŋ Ŋwa Mbɛɛ kaani kə bwoo kə.

24 Ŋwa kiŋwaati kàh lə mbɛɛ nnu i kèeh wu kə, mbɛɛ nimi kòlə kah dəŋ che kwoo wi kə. 25 Fi wuna lə ŋwa kiŋwaati duŋ ə i duŋ dəŋ ye mbɛɛ nnu i kèeh yo wu lə, mbɛɛ nimi duŋ dəŋ ye che kwoo wi lə. Ə bə́ chee che chəŋ yo lə i duŋ Beeshebu, ə bə́ duŋ kə yee bə́ chēe bwɔni bə mu chəŋ bie yii llɨŋ li bèe kah lɨhŋ lə?

(Lukaa 12:2-7)

26 Nəni bə kə yee bə lɔ̂ mbɛɛ kə. Yee bə kə̂lə lə fieŋ hləŋ həmə ffɨŋ fi dùŋ ki kəə ffɨŋ fi dùŋ kə fwoo ə bweenə ŋgbuuŋ kə. Fieŋ hləŋ həmə dəŋ ffɨŋ fi dùŋ ə nələ mə ffɨŋ bə́ dùŋ kə kələ kə. 27 Fieŋ ffɨŋ n'yɔ̀ɔ bə bəŋ ə butuu, yee bə yɔ̂ɔ fi bə bəne ə bushi. Fɨhŋ ŋwùunə bə bəŋ, bə diimə fi ə binchu bi chə́ŋ bəŋ. 28 Bə kə yee bə lɔ̂ bəne bbəŋ duŋ ə bə́ jii kwaa ə duŋ nyaŋ ni go, ə bə́ nakə jii lə fiana kə. Yee bə lɔ̂ ə duŋ Chu nnu i dùŋ yo ə i laa fiana mbɛɛ bə gbo wiih ə bwii wuŋkuntaŋ mə. 29 Bə kə kələ lə bə́ yii tàa munshansha munfweŋ finiini fimwi kwaa kə lə? Kwaalə, duŋ ə fimwi gbe kwe Chwa weŋ kaani kə bemi kə. 30 Yee fi dûŋ lə, Chu yii kə̀lə fwee kinhliŋ kkɨŋ ki dùŋ ə bəŋ fí. 31 Nəni bə kə yee bə lɔ̂ kə. Bə kàh munshansha kiŋaaŋkə.

32 Ə mbɛɛ mənhliŋ lə bemi ə bəne fwi lə mə yii kə̀lə mi, ə n'yá bemi dəŋ wu ə Tah fwi lə n'yii ŋkə̀lə wu. 33 Kwaalə maa nyəhə nnu i nɨ̀hŋ mi ə bəne fwi, kəə n'yá yi nɨhŋ dəŋ wu ə Tah fwi nnu i dùŋ yo ə buh.

Jisho bwoo bə kiŋga

(Lukaa 12:51-53; 14:26-27)

34 Bə kə yee bə hlê lə mbwo ə duŋ bə kindunshiiŋ yaŋ kwe kə. Ŋkə mbwoo yu fimbini fie kə. Mbwo ə duŋ bə ntɨmə. 35 Yee bə kə̂lə lə mbwo bənfə lə ŋiaŋ nyo yee i jû bə tili, ŋiaŋ kpɛ jù bə mahni, kpɛɛ ŋiaŋ jù bə mah nyimi. 36 Bəne bbəŋ bə́ dùŋ kə diee njənə bə mbɛɛ lə yee bə dūŋ ə duŋ kwaa bəne bə mu wu chəŋ. 37 Ə mbɛɛ yee i lēki tili ləkə mahni kah mi, kəə mə kə wunə mbɛɛ nnu dùŋ ə yee i dūŋ mbɛɛ ŋgwəŋ kə. Ə mbɛɛ yee i lêki ŋiaani nyo ləkə ŋiaani kpɛ kah mi, kəə i kə wunə mbɛɛ nnu dùŋ ə yee i dūŋ mbɛɛ ŋgwəŋ kə. 38 Ə mbɛɛ nakə too kiŋgwa kiih yee i bə̄lə mi, kəə i kə wunə mbɛɛ nnu dùŋ ə yee i dūŋ mbɛɛ ŋgwəŋ kə. 39 Ə mbɛɛ lə biaalə kinduŋh kiih, ə i laa ki. Kwaalə ə mbɛɛ lə laa kinduŋh kiih yu mi, ə i kənə kinduŋh ki kə kaa.

(Maak 9:41)

40 Ə mbɛɛ tɨŋ jə bəŋ, kəə i tɨŋ jə ə duŋ mi. Ə mbɛɛ tɨŋ jə mi, kəə i tɨŋ jə ə duŋ mbɛɛ nnu i faŋ yo mi. 41 Ə mbɛɛ tɨŋ jə mbɛɛ hlɨŋ Chu yulahalə i kə̀lə lə ə faŋ Chu wu, kəə i yá kənə bikoonə bbɨŋ Chu kòŋ bəne biih bə hlɨŋ mu. Ə mbɛɛ lə tɨŋ jə mbɛɛ nnu i dùŋ ntiiŋ yulahalə i kə̀lə lə mbɛɛ yo dùŋ mbɛɛ ntiiŋ, kəə i yá kənə bikoonə bbɨŋ Chu kòŋ bəne bbəŋ bə́ dùŋ ntiiŋ mu. 42 N'yɔ̄ɔ bəŋ kichɛɛŋ lə, ə mbɛɛ nə bəŋ kwooh ki ŋgwiŋ mənde bə mbɛɛ mwi ə kintu ki bəne bətənə bətənə mə yulahalə i kə̀lə lə ə mbɛɛ kintu ŋgwəŋ, kəə duŋ ə mbɛɛ yo yá jɨnə bikoonə biih kə.”