Jɔɔŋ N'yiinjɔ faŋ bəne biih bə kintu ə Jisho go
11
Jisho kaanə keeh kaa bəne biih bə kintu bə yuufi ə nchɔ bəfwe bie, i hlə ja həmə yee i jāa ə bibalaki bibə mə i làanə bəne, i baa i dòntə hlɨŋ nwaa. 2 Ə bwɔɔ yo bəŋ, Jɔɔŋ N'yiinjɔ duŋ ə chəŋ munfwa mə. Ə chulə i woo ki bieŋ bbɨŋ Kleto màa i fə̄ bie, i hlə faŋ bəne biih bə kintu lə bə́ gəŋ 3 bii bə wu ləə, “Ə wə nnu wə mà duŋ yo bəmbwo, lii kkə ke mbɛɛ ju lə?” 4 Bə́ gəŋ bii, Jisho chuu bə bə́ lə, “Bə fiimə gəŋ yɔɔ bə Jɔɔŋ bieŋ bbɨŋ bə woo bə bbɨŋ bə ŋəŋna. 5 Bəmbandii bie bə́ ŋə̄ŋ, bəŋkɔkɔ kpaa jaala ntiiŋ, bəne bbəŋ bə́ gɔ̀ŋ jəŋ kinhlanhla bie bə́ ŋwūnə, bəmbambituŋ bie bə́ wō, bəŋkpi bie bə́ jāka, bie bə́ kēeh dəŋ hlɨŋ nwaa Chu ni bə bəne bənjɨnənə. 6 Nəni kintɨŋ kiŋkuntaŋ duŋ bə mbɛɛ nnu i kə naamə mi kə.”7 Bəne bə Jɔɔŋ bə kintu bie too, Jisho hlə chɔɔ yee i bīi bə bimɔ bi bəne ki Jɔɔŋ, i bīi ləə, “Bə maa bə fū bə gə̄ŋ ə nji bəŋgəŋ ŋəŋ ə duŋ laha lə? Biyaa bbɨŋ fwee kàh ki nɛ̀hiŋ lə? 8 Ye ə nalə kə duŋ nə nəni, bə maa bə fū bəŋgəŋ mə yulaha lə? Bə maa bə gə̄ŋ bəŋgəŋ ŋəŋ ə duŋ mbɛɛ nnu i dɔhaŋ bindu binyuunə lə? Bə wələ wo, bəne bbəŋ bə́ dɔ̀hiŋ bindu biyuunə dùŋ ə duŋ ə bintɔŋ mə. 9 Ə fi kə duŋ nə lə nəni, ə chu bə ma fu gəŋ mə yulaha lə? Bəŋgəŋ ŋəŋ mbɛɛ hlɨŋ Chu lə? Eee, n'yɔ̄ɔ bəŋ lə mbɛɛ nu kàh mbɛɛ hlɨŋ Chu. 10 Ə wu nnu bə́ bieŋna yo kiih Chu yɔ̀ɔ lə,
‘Wələ wo, nfaŋna mbɛɛ ŋgwəŋ hlɨŋ lə i hlaa kah wə fwi,
i gəŋ bwɛɛ je wa ə wə hlə yee wə bwō.’
11 N'yɔ̄ɔ bəŋ kichɛɛŋ lə, ə bəne bbəŋ bəkwɛɛ bwee mə, bə́ kə hlaa lə bwee mbɛɛ nnu i kò kah Jɔɔŋ N'yiinjɔ kə. Kwaalə, mbɛɛ nnu i dùŋ mbɛɛ tənə ə muŋkɨŋ mu buh mə ko kah wu. 12 Gbe jə bwɔɔ nnu Jɔɔŋ N'yiinjɔ mà chɔɔ nimi liih bwo bwii fidiɛɛ, duŋ bəne jù ki muŋkɨŋ mu buh,ª bəne bə muŋga fàa bə muŋga. 13 Bəne bə hlɨŋ bə Chu bənhliŋ maa bəŋkɨnə bə Mushe mà yɔɔla ki muŋkɨŋ mu buh bwo bwii ə bwɔɔ Jɔɔŋ N'yiinjɔ bəŋ. 14 Ə bə ŋəŋ lə duŋ ə bə bemi lə Jɔɔŋ duŋ Elaja nnu i mà duŋ yo bəmbwo, bə bemi. 15 Mbɛɛ nnu i kə̀nə bituŋ i wo.”
16 Jisho ja bii bə gbo wiih ləə, “Ə duŋ ə nfɛhiŋ ŋkaani fidiɛɛ nu ə duŋ bə laha lə? I duŋ dəŋ ye bwɔni bə wɛ bbəŋ bə́ shiila ə shibəŋ, bədi chēe bədi bə́ bīi ləə, 17 ‘Kkə tɔ̀ŋ munlɛlɛ bə kə bɨŋ nə kə lə? Kkə nə̀ yii li kpe bə kə bemi kə lə?’ 18 N'yɔ̄ɔ nəni yulahalə Jɔɔŋ mà bwo i kə diee maa kə ŋwee dəŋ kə, bə yɔɔ lə, ‘I kə̀nə fiŋkwini ə wu go.’ 19 Ə chulə Ŋwa Mbɛɛ bwo, i dì i ŋwì, bə lə bə́ ya ŋəŋ, i jàa i dì tiɛɛ, i kpà kiŋwi, i dùŋ kinshiŋ bə bəne bbəŋ bə́ kwò kiŋwaati maa bə bəne bəwaha bədi. Yee bə kə̂lə lə bufe nyii gbo wu bwi ə duŋ yu fieŋ ffɨŋ bu nɨ̀ŋ.”
Jisho yee i hlāŋ ki fwɔ wi bibalaki bidi
20 Jisho hlə ja gbe bənhlaŋ ki fwɔ wi bibalaki bidi bbɨŋ i mà fəə bieŋ bi ŋɨŋ gəə kiŋaaŋkə mə, yulahalə i mà fə nəni, bəne bə həmə nakə gaanə fwɔ́ ŋəbə kə. 21 Jisho ja yɔɔ lə, “Ŋgə ŋkuntaŋ dùŋ weŋ, bəŋ bəne bə Kolashiŋ, ŋgə ŋkuntaŋ duŋ dəŋ weŋ, bəŋ bəne bə Beshayida. Bə kələ lə, ə màa duŋ lə bieŋ bi ŋɨŋ gəə bbɨŋ mmà nfə bie bə bəŋ lə mmàa nfə bi ə duŋ ə Taya bə Shidɔŋ, fo bə́ mà leela bindu biyi bi kpe, kəŋ bu go bənyii lə bə́ fiila tɔ́ŋ ŋəbə. 22 N'yɔ̄ɔ bə bəŋ lə, ə yá bwo duŋ butuu bu nhlaah bu həŋgbɔŋ, bieŋ yá yi bɛŋki bə bəne bə Taya maa bə Shidɔŋ kah bəŋ. 23 Maa bəŋ bəne bə Kapanahuŋ, bə hlè lə duŋ ə bə́ bihiŋ bəŋ ə bə biŋ buh lə? Ye. Bə́ yá kaka bwɔ bə bəŋ ə kitɨŋ ki bəŋkpi kwuŋ.” Yee bə kə̂lə lə, ə mmàa nfə bieŋ bi ŋɨŋ gəə bbɨŋ mà nfə bɨhŋ ə bəŋ kwuŋ, lə màa nfə bi ə duŋ ə Shidɔŋ, ə kibalaki kie hə yee ki kāani həmə bwo bwii daŋ. 24 N'yɔ̄ɔ bə bəŋ lə, “Ə yá duŋ butuu bu nhlaah bu həŋgbɔŋ, bieŋ yá yi bɛŋki ə wɛɛ wi bəne bə Shɔdɔŋ mə kah bəŋ.”
Ntiɛɛ Jisho duŋ nyaalə
25 Ə bwɔɔ yo bəŋ, Jisho ja yɔɔ lə, “N'yu nnə̄ kimbaafɛɛ bə wə Tah Ŋkɨŋ buuli bə shishɔ ye wə mà nəla lə bieŋ bɨhŋ bə bəbufe maa bəne bəŋkələ bieŋ, nyii ə duŋ bə bwɔni bə wɛ. 26 Ə li nnu fi dùŋ Tah, yulahalə fi duŋna ye wə mà hlelə lə fi duŋ.
27 Tah mà nəə bieŋ binhliŋ bə mi. Mbɛɛ hləŋ həmə nnu i kə̀lə Ŋwa Nchu kahiŋ Tili. Mbɛɛ hləŋ həmə nnu i kə̀lə Tili kahiŋ Ŋiaani maa bəne bbəŋ Ŋiaani mà shaa bənyii bə́ bə Tili.
28 Bəŋ bənhliŋ bbəŋ bə too bəntiɛ bbəŋ bə́ dìli kah bəŋ, bə bwo ə mi go, nlə nfə ə bə ŋɔɔni. 29 Bə jə ə duŋ ntiɛɛ ŋgwəŋ wala, yee bə bə̂lə keehnə kɨŋŋ, yulahalə nduŋ fɨŋŋ mbɛɛ kindunshiiŋ, ŋkə̀nə tɔŋ lində, ə yee bə kə̄nə kindunshiiŋ ə tɔ́ŋ ŋieeŋ mə. 30 Ntiɛɛ ŋgwəŋ talə bəntu kə, ntiɛ ŋgwəŋ dili lə kə.”