Lukaa 7

Che kwoo ki bəne bə bicha yii tɔŋ ə Jisho mə

Ye Jisho mà kaanə lə keeh bəne bie bieŋ bɨhŋ binhliŋ, i hlə no gəŋ lɛɛ ə kibalaki ki Kapanahuŋ mə. 2 Che kwoo ki kintu ki bəne bə bicha ju nnu Luŋ nnu i kənə nfwa wi ju həmə, nnu i màa i lēki wu gbaaŋ. Nfwa yo mà gɔŋna i chu duŋ ə kpe jə. 3 Lə che kwoo nu wo ki Jisho, i hlə kɔnɔ bəne bbəŋ bə́ hlàah kitɨŋ ki Bəjuu faŋ bə́ lə bə́ gəŋ kɔnɔ Jisho lə i bwo ŋwuhuŋ nfwa wi yo. 4 Bə́ hlə gəŋ ŋəŋ Jisho kwi wu kwáŋ yɔɔ lə, “Butee gəŋ chɨnə mbɛɛ ya nu, ə mbɛɛ nnu duŋ ə wə chɨnə wu. 5 I lèki kitɨŋ kiaa gbaaŋ, ə màa wu nnu i mà wɛɛ chəŋ ya cheenə Chu.”

6 Jisho hlə ja yee i gə̄ŋ bə bə́. Bwɔɔ nnu bə́ mà gəŋ baha ə chəŋ che kwoo ki bəne bə bicha kie go i faŋ bədɔɔ biih bədi lə bə́ gəŋ looŋkə Jisho. Bə́ gəŋ bənə bə wu, bə́ nachɛ wu lə, “Baba, che kwoo ki bəne bə bicha yɔɔla lə wə kə fɨhɨŋ gbo wo bəmbwo kə. I kə wunə mbɛɛ nnu duŋ ə wə bwo ə wu chəŋ kə. 7 Fiee fieŋ ffɨŋ fi fə fie dəŋ lə i kə bwoo ə wu kwaŋ lə i bwo ŋəŋ wə. Kwaalə, wə yɔɔ kwaa ə duŋ die wa kəə nfwa wi yo lə ŋwunə. 8 Lə wu dəŋ dùŋ ə muŋgeni mu mbɛɛ ju dɨŋ, nnu bəne bə bicha duŋ dəŋ ə wu dɨŋ. I yɔɔ bə ju lə, ‘Gəŋ,’ i yee i gə̄ŋ bu gəŋnə, ə nlə yɔɔ bə ju lə, ‘Bwo,’ i yee i bwō bu bwonə. I yɔɔ dəŋ bə nfwa wi lə, ‘Fə nəni,’ i yee i fə̄ bu fənə.”

9 Ə chulə Jisho woo fieŋ ffɨŋ i yɔɔla fie, gəə ŋɨŋ wu. I yɔɔ bə bəne bbəŋ bə́ màa bə́ bə̄lə bie wu lə, “N'yɔ̄ɔ bəŋ kichɛɛŋ lə, ŋkə hlaa lə ŋəŋ mbɛɛ ju yaŋ ə Ishlael nnu i yiila dɨŋ lɨhŋ tɔŋ ə mi mə nəni kə.” 10 Lə bəne bə che kwoo ki bəne bə bicha bie wo nəni bə́ fiimə chu chəŋ, bə́ ŋəŋ nfwa yo hə ŋwuna.

Jisho jaka hlɔŋ ŋiaŋ nyo ə kpe mə

11 Ə chu bwɔɔ nnu dɨŋ, Jisho bə bəne biih bə kintu no yee bə́ gə̄ŋ ə kibalaki kidi mə kkɨŋ bə́ chèe lə Nayiŋ, kimɔ kiŋkuntaŋ ki bəne bə̄lə wu dɨŋ gbɛɛɛ. 12 Ye bə́ màa bə́ gə̄ŋ lə, bwɔɔ nnu bə́ mà bwii ə fwiih wi mbaŋ wwuŋ bə́ lɛ̀ɛ we ə kibalaki kie mə, ə chu lə bə́ chiini bə́ ŋəŋ ye bə́ tu fu bə kiŋwuuni ki mbɛɛ. Ə màa wu kwaa ə mahni bulə. Mahni mà duŋ kpɛɛ ŋkwu. Ye bə́ mà fulə həmə nəni, kimɔ kiŋkuntaŋ ki bəne bə həmə kibalaki kie mə bələ bə́ bəə mahni. 13 Bwɔɔ nnu Baba mà ŋəŋ ə kpɛ yo go, hlɨŋ kwo wu, i yɔɔ bə wu lə, “Wə kə chu baa de kə.” 14 Ye i yɔɔlə nəni, i hlə kah gəŋ tuu ə kintaŋ kkɨŋ bə́ hə tu kie kiŋwuuni kie bəŋ. Bəne bbəŋ bə́ mà tu bie wu hlə lemi. I yɔ̄ɔ lə, “Hlɔŋ ŋiaŋ nyo, n'yɔ̄ɔ bə wə, ja fa!” 15 I hlə ja shii, chɔɔ bən'yɔɔ jə. Jisho kənə ə wu go hlə nə bə mahni.

16 Bəne bənhliŋ ŋəŋ nəni, gəə ŋɨŋ bə́. Yee bə́ nə̄ kindohi bə Chu bə́ yɔ̄ɔ lə, “Mbɛɛ hlɨŋ Chu ŋkuntaŋ fwoo bwo ə be mə kintekinte. Chu bwoo bənchɨnə bəne biih.” 17 Hlɨŋ Jisho ni hlaamə gəŋ ə bitɨŋ bi Judia mə binhliŋ maa bitɨŋ bbɨŋ bi duŋ baha həmə.

Jɔɔŋ N'yiinjɔ faŋ bəne biih bə kintu bə Jisho

(Matio 11:2-19)

18 Lə bəne bə kintu bə Jɔɔŋ wo dəŋ bieŋ bɨhŋ binhliŋ, bə́ gəŋ yɔɔ bə wu. I bwa bədi bəfwe, 19 faŋ bə́ bə Baba lə bə́ gəŋ bii ləə ə wu nnu i mà duŋ yo bəmbwo, lii yee kkə kē mbɛɛ ju lə.

20 Bə́ gəŋ ŋəŋ Jisho, bə́ yɔɔ bə wu lə, “Jɔɔŋ N'yiinjɔ faŋna be lə kkə bwo bii bə wə ləə ə wə nnu wə mà duŋ yo bəmbwo, lii yee kkə kē mbɛɛ ju lə?”

21 Bə́ màa bə́ bīi nəni, bwɔɔ mbini yo bəŋ Jisho ŋwūhuŋ jə́ŋ bə go ŋənhliŋ, i fwòo dəŋ maa bəfiana bəyili ə bəne go, i wɛ̀ díi ŋə bəmbandii kiŋaaŋkə. 22 Jisho chuu bə bə́ lə, “Bə́ fiimə gəŋ yɔɔ bə Jɔɔŋ bieŋ bbɨŋ bə́ ŋəŋna maa bbɨŋ bə́ woo. Bəmbandii bie bə ŋə̄ŋ bieŋ, bəŋkɔkɔ kpaa jaala ntiiŋ, bəne bə jəŋ kinhlanhla ŋwuna. Bəmbambituŋ bie bə́ wō bieŋ, bəne bəŋkpi jaka chu dɨŋ, baa dontə dəŋ hlɨŋ nwaa Chu ni bə bəne bənjɨnənə. 23 Kintɨŋ kiŋkuntaŋ dùŋ bə mbɛɛ nnu i kə naamə mi kə.”

24 Ə chulə bəne bbəŋ Jɔɔŋ mà faŋ bie noo, Jisho hlə chɔɔ bəndontə bə kintu ki bəne kie ki Jɔɔŋ i bii ləə, “Bə maa bə fū bə gə̄ŋ ə nji bəŋgəŋ fə ə duŋ laha lə? Biyaa bbɨŋ fwee kàh ki nɛ̀hiŋ lə? 25 Ə nakə duŋ nə nəni, ə chu duŋ lə bə hə fu gəŋ ŋəŋ ə duŋ laha lə? Mbɛɛ nnu i dɔhaŋ bindu binwaa go lə? Bə wələ wo, bəne bbəŋ bə́ dɔ̀hiŋ bindu bintachuŋ maa bəndi go ŋəbə dùŋ ə duŋ ə bəŋkɨŋ kwúŋ. 26 Ə fi kə duŋ nə lə nəni, ə chu bə ma fu gəŋ mə yulaha lə? Bəŋgəŋ ŋəŋ mbɛɛ hlɨŋ Chu lə? Eee, n'yɔ̄ɔ bəŋ lə mbɛɛ nu kah mbɛɛ hlɨŋ Chu. 27 Ə wu nnu bə́ bieŋna yo kiih Chu yɔ̀ɔ lə,

‘Wələ wo, nfaŋna mbɛɛ ŋgwəŋ hlɨŋ lə i hlaa kah wə fwi,

i gəŋ bwɛɛ je wa ə wə hlə yee wə bwō.’

28 N'yɔ̄ɔ bə bəŋ lə, ə bəne bbəŋ bəkwɛɛ bwee mə, bə́ kə hlaa lə bwee mbɛɛ nnu i kò kah Jɔɔŋ kə. Kwaalə, mbɛɛ nnu i dùŋ mbɛɛ tənə ə muŋkɨŋ mu Chu mə ko kah wu.”

29 Bəne bənhliŋ maa bəne bbəŋ bə́ màa bə́ kwō kiŋwaati wo ye Jisho yɔɔ lə Jɔɔŋ duŋ mbɛɛ hlɨŋ Chu ŋkuntaŋ bə́ dohi lə muŋkɨŋ mu Chu duŋ ntiiŋ, yulahalə bə́ dəŋ mà bema lə Jɔɔŋ yii bə́ ə njɔ. 30 Kwaalə, Bəfalashii maa bəne bbəŋ bə́ kə̀lə bəŋkɨnə bə Chu mà nɨhŋna fibə ŋkaachi nnu Chu mà kaachi yo yulahalə bə́ mà nɨhŋna dəŋ bə Jɔɔŋ lə i kə yii lə bə́ ə njɔ kə.

31 Jisho hlə naamə ləə, “Fieŋ ffɨŋ nduŋ ə nfɛhiŋ ŋkaani bəne bə fidiɛɛ bəhŋ mu duŋ laha lə? Bə́ dùŋ ye laha lə? 32 Nduŋ ə n'yɔɔ bəŋ fieŋ ffɨŋ bə́ dùŋ ye fi. Bə́ dùŋ ye bwɔni bbəŋ bə́ shìi ə bidɔhɔ bi shí mə, bədi chèe bədi bə́ bìi ləə, ‘Kkə tɔ̀ŋ munlɛlɛ bə kə bɨŋ nə kə lə? Kkə shèeni yíi ŋə kpe bə kə bèmi kə lə?’ 33 N'yɔ̄ɔ nəni yulahalə Jɔɔŋ N'yiinjɔ mà bwo, i shì kə diee biləə, i kə ŋwee maa mbihŋ kə, bə lə i kə̀nə fiŋkwini ə wu go. 34 Ŋwa Mbɛɛ bwoo, i yu dī i ŋwī, bə lə bə́ ya ŋəŋ, i yu jāa i dì tiɛɛ i ŋwì mbihŋ gbaaŋ, i dùŋ dəŋ kinshiŋ ki bəne bbəŋ bə́ kwò kiŋwaati maa bəne bə bieŋ biwaha bədi. 35 Kwaalə, bəne bənhliŋ bbəŋ bə́ dòhi bufe bbuŋ bu duŋ bu Chu nyìi lə ə buntiiŋ.”

Jisho laamə nə yíwaha yí kpɛ kiwaali ə ŋwuŋ Bəfalashii chəŋ

36 Ŋwuŋ Bəfalashii ju mà cheela Jisho lə i bwo di bieŋ ə wu chəŋ. Jisho gəŋ yee bə́ dī.^ª 37 Fi bwo duŋ lə kpɛ kiwaali ju mà duŋ ə kwili le mə. Lə i wo lə Jisho yu dī ə ŋwuŋ Bəfalashii yo chəŋ, i hlə jə fika^ª fi mɛŋ məndi mənlɔɔnə mməŋ mə fù chee nwaa, gəŋ bə mə mu. 38 I gəŋ lemi ə Jisho dɨŋ, hlə ja chɔɔ bənde, ndəŋ tēe ə wuh ŋə Jisho go. I hlə bwɔ kwe, kɔ kwoo kiih yee i gīaali wuh ŋə Jisho ŋie bə fwee kiih, yohi hlə giaali lɔɔ bə mɛŋ mie. 39 Ŋwuŋ Bəfalashii nnu i mà chee yo Jisho lə i bwo bə́ di bieŋ ŋəŋ nəni, i hle ə tɔŋ liih mə lə, “Ə mbɛɛ nu fəŋ hə duŋ mbɛɛ hlɨŋ Chu, ə mə hə kələ fieŋ ffɨŋ kpɛ nu tuu fie ə wu go, lə i duŋ kpɛ kiwaali.”

40 Jisho ja yɔɔ bə ŋwuŋ Bəfalashii yo lə, “Shaamuŋ, n'yo bə fieŋ fi yɔɔnə bə wə.”

I chuu lə, “Mbɛɛ Keehnə, yɔɔ lə.”

41 Jisho hlə chɔɔ lə, “Mbɛɛ ju mà fwɔɔla bəne bəfwe kpo, i fwɔɔ mbɛɛ ju yo bibwa gi tiŋ, i fwɔɔ ju yo bibwa mbwɛɛnshiŋ. 42 Wi kah bə́ bənhliŋ bənhluŋ chuu, i tukwaŋ ə bə́ go bə kpo we. Fidiɛɛ, wə ŋəŋ mənte lə ə bəne bə bəfwe bəhŋ mə, mbɛɛ nnu mə lə leki wu gbaaŋ lə duŋ nwɛhɛŋ lə?”

43 Shaamuŋ chuu lə, “Fi duŋ ə waalə ə mbɛɛ nnu bə́ mà too yo wu fie ŋaamə.”

Jisho bemi lə, “Wə yɔɔla yəəŋ.” 44 Ye i bemi lə nəni, i fii gbo kee kpɛ yo, hlə yɔɔ bə Shaamuŋ lə, “Wə ŋəŋna kpɛ nu lə? Ye nhə mbwo ə wə chəŋ, wə hə kə nəə dəŋ mi ŋgwiŋ lə ŋ'wii wuh mu kə. Kwaalə, kpɛ nu wiila wuh ŋəŋŋ ə duŋ bə ndəŋ, giaali bə fwee kiih ki fi. 45 Wə hə kə chee lə yohi mi kə. Kwaalə, chɔɔ jə ye nhə mbwo fəŋ, kpɛ nu kə wii lə bənyohi wuh ŋəŋŋ kə. 46 Wə hə kə lɔɔ lə dəŋ kwoo kɨŋŋ maa bəmɛŋ kə. Kwaalə, kpɛ nu lɔɔla wuh ŋəŋŋ ə duŋ bəmɛŋ mənlɔɔnə mənfuchee nwaa. 47 Nəni, n'yu n'yɔ̄ɔ bə wə lə, kpɛ nu nyiila kinleki kiŋkuntaŋ yulahalə bə́ yá laamə nə li ba yíwaha yiih yí kiŋaŋ. Kwaalə, mbɛɛ nnu bə́ laamə nə yíwaha yiih yí chɛɛ nyìi kinleki ki chɛɛ.”

48 Jisho hlə yɔɔ bə kpɛ yo lə, “Bə́ laama nə yíwaha yo.”

49 Bəne bbəŋ bə́ màa bə́ dī bie bəə bə́ hlə chɔɔ bəŋwuunə ə bə́ mə bə́ yɔ̄ɔ lə, “Nu lə nyəhə chəə kibɛɛ nnu i laamə nə maa yíwaha yí bəne lə?”

50 Jisho hlə kaanə yɔɔ bə kpɛ yo lə, “Gəŋ wə fo ə kidunshiiŋ mə, tɔŋ llɨŋ wə yii le ə mi mə fwoola wə.”